سەرەکی » ئاراستە » ملازم حه‌لیمه‌ یه‌كه‌مین ژنه‌ پێشمه‌رگه‌ی شۆڕشی نوێ

ملازم حه‌لیمه‌ یه‌كه‌مین ژنه‌ پێشمه‌رگه‌ی شۆڕشی نوێ

هونه‌ر ره‌سوڵ ئه‌حمه‌د

شۆڕشی نوێ به‌رابه‌رایه‌تی یه‌كێتیی نیشتمانیی كوردستان له‌قۆناغێكدا له‌دایكبوو كه‌ كۆمه‌ڵانی خه‌ڵكی كوردستان له‌ لوتكه‌ی بێ ئومیدیدا بوون و له‌و قۆناغه‌دا یه‌كێتی به‌هه‌ڵگیرساندنه‌وه‌ی شۆڕشی نوێ توانی جارێكی تر له‌ رۆژگاری بێ ئومیدیا مه‌شخه‌ڵی شۆڕش دابیگرسێنێت و به‌مه‌ش كوردستان به‌ره‌و هیوا و ئومیدێكی نوێ هه‌نگاوه‌كانی ده‌ستپێكرد.
له‌ناو لاپه‌ره‌ دره‌وشاوه‌كانی مێژوی حیزبی شه‌هیدانیشدا زۆرن ئه‌و ناوه‌ دیارو كه‌سایه‌تیانه‌ی هه‌مووژیانی خۆیان بۆ رێبازی پیرۆزی گه‌یشتن به‌ئامانجه‌ نه‌ته‌وه‌یه‌كان ته‌رخانكردوو دواجاریش توانیان به‌شێكی ئامانجه‌كانی شۆڕشی نوێ بهێننه‌دی.
یه‌كێ له‌و ناوه‌ دیارانه‌ی ناولاپه‌ڕه‌ دره‌وشاوه‌كانی مێژوی حیزبی شه‌هیدانیش (ملازم حه‌لیمه‌)یه‌.
ملازم حه‌لیم یه‌كێ له‌وقاره‌مان و تێكۆشه‌رانه‌یه‌ له‌ته‌مه‌نی گه‌نجیه‌تیه‌وه‌ چه‌كی به‌رگری كرده‌شانی و بوو به‌ یه‌كه‌مین ژنه‌ پێشمه‌گه‌ی شۆڕشی نوێ.
ملازم حه‌لیمه‌ ئه‌و خاتونه‌ قاره‌مانه‌یه‌ كه‌ به‌بیرو باوه‌ڕی كوردانه‌ گۆشكرا و دواجاریش بوو به‌به‌شێكی گرنگی مێژووی نه‌ته‌وه‌كه‌ی.
باوه‌ڕی نه‌گۆڕی یه‌كێتیی نیشتمانیی كوردستان به‌یه‌كسانی ژن و پیاو یه‌كێ له‌ هۆكاره‌ سه‌ره‌كیه‌كان بوو كه‌ حه‌لیمه‌ی قاره‌مانی كرده‌ شۆڕه‌سواری نه‌به‌رد، ئه‌و شانبه‌شانی هاوڕێ و هاوسه‌نگه‌رانی هه‌موو ئه‌ركێكی پێشمه‌رگانه‌ی ئه‌نجامده‌دا، نمونه‌ی قاره‌مانێكی شۆڕشگێڕبوو كه‌ بۆ یه‌كسانی ژن و پیاو هه‌نگاوی نا و دواجاریش سه‌ركه‌وتوانه‌ ئه‌ركه‌كانی شۆڕشی جێبه‌جێ ده‌كرد.
هه‌ر ئه‌م خه‌سڵه‌ت و وره‌ به‌رزییه‌ی ئه‌و خاتوونه‌ قاره‌مانه‌ش بوو كه‌ ملازم حه‌لیمی كرده‌ ئه‌ستێره‌یه‌كی دره‌وشاوه‌ كه‌ هه‌میشه‌ هاوڕێ و هاوسه‌نگه‌ره‌كانی شانازیی پێوه‌ ده‌كه‌ن.
ملازم حه‌لیمه‌ گۆشكراوی بیری كوردایه‌تی بوو، له‌خێزانێكی ئاشنا به‌ هه‌ستی پیرۆزی كوردایه‌تی و لێوانلێو له‌ قوربانیدان له‌دایك بوو، ملازم حه‌لیمه‌ خوشكی شه‌هیدی فه‌رمانده‌ (خدر سۆفی)یه‌، كه‌ ساڵی 1976 سه‌ركردایه‌تی یه‌كێك له‌ مه‌فره‌زه‌ سه‌ره‌تاییه‌كانی شۆڕشی نوێی گه‌له‌كه‌مانی له‌ بناری قه‌ندیل كردووه‌.
خدر سۆفی له‌ یه‌كێك له‌ داستانه‌ مێژووییه‌كانی شه‌ڕی ده‌سته‌ویه‌خه‌ له‌ بناری قه‌ندیل له‌ ساڵی 1977دا كه‌ به‌ داستانی كه‌ڵه‌كی باڵه‌ییان ناسراوه‌، دوای به‌رگرییه‌كی قاره‌مانانه‌، خۆی و هاوڕێیه‌كی شه‌هید ده‌بن و ته‌رمه‌كه‌ی ده‌كه‌وێته‌ ده‌ستی دوژمن.
له‌ بناری قه‌ندیله‌وه‌ بۆ (ده‌شتی ماوان)ی نزیكی ناحیه‌ی قه‌سرێ ته‌رمه‌كه‌ی به‌ ئۆتۆمبێل راده‌كێشرێت و دواتر به‌داردا هه‌ڵده‌واسرێت، ته‌نانه‌ت دوژمن رێگه‌ی نه‌داوه‌ خزم و دۆسته‌كانی ته‌رمه‌كه‌شی ئه‌سپارده‌ی نیشتیمان بكه‌ن، تا سه‌ره‌نجام دوای سێ مانگ له‌ هه‌وڵ و ته‌قه‌ڵا، مولازم حه‌لیم توانی زه‌فه‌ر به‌ دوژمن ببات و ته‌رمی براكه‌ی به‌هاوكاری چه‌ند هاوسه‌نگه‌ر و خزم و دۆست له‌ ناو جه‌رگه‌ی دوژمن بۆ زێدی خۆی بگوازرێته‌وه‌. شیاوی ئاماژه‌پێكردنه‌ سه‌رجه‌م ئه‌و سوكایه‌تییانه‌ی به‌ ته‌رمی شه‌هیدی فه‌رمانده‌ (خدر سۆفی) كرا له‌ پێناو شكاندنی ئیراده‌ و ویستی خزم و هاوسه‌نگه‌ره‌كانی بوو، كه‌چی ئه‌م رووداوه‌ دڵته‌زێنه‌ جه‌رگبڕه‌ نه‌ك نه‌یتوانی ئیراده‌ی پۆڵاینی هاوسه‌نگه‌ر و خوشك و خوارزاكه‌ی (مولازم حه‌لیم و حاجی ره‌سوڵ وه‌سمان) بشكێنێت، بگره‌ سورتری كردن له‌ سه‌ر به‌گژداچوونه‌وه‌ی دوژمن و درێژه‌دان به‌ خه‌باتی چه‌كداری له‌ پێناو كوردستانێكی ئازاد و نه‌ته‌وه‌یه‌كی سه‌ربه‌ست و وڵاتێكی ئاوه‌دان.
ژیاننامه‌كه‌ی
مولازم حه‌لیم ناوی ته‌واوی حه‌لیمه‌ سۆفی مسته‌فایه‌، له‌ خانه‌واده‌یه‌كی هه‌ژاری كوردپه‌روه‌ر و نیشتمانپه‌روه‌ر و قوربانیده‌ری رێگای ئازادی كورد و كوردستان له‌ ساڵی 1933 له‌ گوندی (ماونان)ی دۆڵی باڵه‌ییانی باڵه‌كایه‌تی له‌ دایكبووه‌.
هاوسه‌رگیریی كردووه‌ و خاوه‌نی كوڕێك و سێ كچه‌، كوڕێكی به‌ناوی (حاجی ره‌سوڵ وه‌سمان) ناسراو به‌ حاجی-ی ملازم حه‌لیم، هه‌ر له‌ ته‌مه‌نی لاوێتییه‌وه‌ پشت له‌ خولیاو ئاواته‌كانی ده‌كات و هاوشێوه‌ی دایك و خاڵ و خزمانی تری ده‌چێته‌ ریزی شۆڕش.
مولازم له‌ پاڵ ئه‌ركه‌ خێزانی و كۆمه‌ڵایه‌تییه‌كه‌ی، له‌پێناو كوردستانێكی ئازاد و نه‌ته‌وه‌یه‌كی سه‌ربه‌ست‌ سه‌رجه‌م ژیانی بۆ خه‌باتی چه‌كداری و سیاسیی ته‌رخانكردبوو.
له‌ یه‌كه‌م هه‌ڵمه‌تی راگواستنی گونده‌كانی سه‌ر سنووری عیراق-ئێران، دۆڵی باڵه‌ییان راده‌گوێزرێت و مولام حه‌لیمیش به‌ر هه‌ڵمه‌ته‌كه‌ ده‌كه‌وێت و خۆی و گوندنشینانی بۆ ئۆردوگا زۆره‌ملێكانی (به‌ستۆره‌، پیرزین و شاوێس) راده‌گوێزرێن، ئه‌و راگوازستنه‌ نه‌وه‌ك ناتوانێت چالاكییه‌كانی مولازم رابگرێت، به‌ڵكو وه‌ك شانه‌یه‌كی رێكخستنی هێزه‌كانی یه‌كێتیی نیشتیمانیی كوردستان چاونه‌ترسانه‌ هانی جه‌ماوه‌ر و گه‌نجان و نیشتیماندۆستانی داوه‌ په‌نا ببنه‌ به‌ر خه‌باتی چه‌كداری بۆ شكاندنی ته‌وقی دیلی، له‌و پێناوه‌شدا چه‌ندین كادیر و پێشمه‌رگه‌ی ئازای بۆ بناری قه‌ندیل ناردوون، تا له‌ كۆتایی 1977 خۆی و كوڕه‌كه‌ی (حاجی ره‌سوڵ وه‌سمان) په‌یوه‌ندییان به‌ هێزی پێشمه‌رگه‌ و هه‌رێمی حه‌وتی باڵه‌كه‌وه‌ كرد.
له‌ ساڵی 1978 له‌ دۆڵه‌كۆگه‌ به‌ خزمه‌تی مامی گه‌وره‌ (مام جه‌لال) ده‌گات و مام وه‌ك رێزلێنان له‌ هه‌وڵ و ته‌قه‌لاكانی و پاڵپشتیی بۆ یه‌كه‌م ژنی چه‌كداری شاخ له‌ ریزه‌كانی هێزی پێشمه‌رگه‌ی كوردستان و وه‌ك شۆڕه‌ژنێكی ئازای پێشمه‌رگه‌ خه‌ڵاتی ده‌كات.
بۆ دووه‌مجار له‌ ساڵی 1980 وه‌ك یه‌كێك له‌ چالاكترین پێشمه‌رگه‌كانی هه‌رێمی حه‌وت له‌لایه‌ن مامی گه‌وره‌ هه‌ڤاڵ (مام جه‌لال)ه‌وه‌ خه‌ڵات ده‌كرێت.
دوای درووستكردنی هه‌رێمی 14 و پێكهێنانی هێزی كارۆخ، له‌سه‌ر ده‌ستی شه‌هیدی فه‌رمانده‌ (ئه‌حمه‌د مه‌ولود) له‌ ساڵی 1981 له‌سه‌ر راسپارده‌ی مامی گه‌وره‌ و سه‌ركردایه‌تی، فه‌رمانده‌یی یه‌كێك له‌ سێ كه‌رتی هه‌رێمه‌كه‌ بۆ مولازم حه‌لیم و كوڕه‌كه‌ی (حاجی ره‌سوڵ وه‌سمان) دیاریده‌كرێت.
له‌ ساڵی 1985 مولازم حه‌لیم و كوڕه‌كه‌ی ده‌گوازرێنه‌وه‌ بۆ تیپی 74ی باڵه‌ك له‌ بناری قه‌ندیل و دۆڵی باڵه‌ییان، له‌وێش به‌شداریی چه‌ندین شه‌ڕی ده‌سته‌ویه‌خه‌ی كردووه‌ كه‌ دیارترینییان شه‌ڕی (بایناون، كه‌ڵه‌كی باڵه‌ییان، مامه‌نده‌- كه‌ ناسراوه‌ به‌ شه‌ڕی حه‌وت رۆژه‌-، شه‌ڕی مه‌ڵبه‌ندی سێ، بێتواته‌، سه‌ركردایه‌تی، ئاكۆیه‌تی، خۆشناوه‌تی و باڵه‌كایه‌تی) له‌ شه‌ڕی بێتواته‌دا حاجی ره‌سوڵی كوڕی بریندار ده‌بێت.
ملازم حه‌لیمه‌ له‌ ساڵی 1988 دووچاری نه‌خۆشییه‌كی سه‌خت ده‌بێت و به‌ مه‌به‌ستی چاره‌سه‌ر ره‌وانه‌ی هه‌ولێری ده‌كه‌ن، به‌ڵام به‌هۆی ته‌شه‌نه‌كردنی نه‌خۆشییه‌كه‌ی ناتوانرێت چاره‌سه‌ر بكرێت،سه‌ره‌نجام له‌ ساڵی 1992 له‌ ده‌ره‌نجامی هه‌مان نه‌خۆشی كۆچی دوایی ده‌كات.
مولازم حه‌لیم له‌ پاڵ هه‌ڵمه‌تبردنه‌ سه‌ر دوژمن و وه‌شاندنی گورزی كه‌مه‌رشكێن لێیان، له‌ تیماركردنی برینداره‌ هاوسه‌نگه‌ره‌كانیشی رۆڵێكی به‌رچاوی هه‌بووه‌، له‌ یه‌كێك له‌ شه‌ڕه‌ ده‌سته‌ویه‌خه‌كاندا پێشمه‌رگه‌یه‌ك به‌ناوی (حه‌سه‌ن به‌گ) كه‌ دانیشتووی گوندی (بوران)ی دۆڵی باڵه‌یانی باڵه‌كایه‌تی بوو به‌سه‌ختی بریندار ده‌بێت، به‌هۆی گه‌مارۆی دوژمن و ناله‌باریی كه‌شوهه‌وا و نه‌بوونی دكتۆر و شوێنی جوگرافی دوره‌ده‌ست ناتوانرێت بگه‌یه‌نرێته‌ هیچ نه‌خۆشخانه‌یه‌ك، به‌ڵام مولازم حه‌لیم توانی فریاگوزاری سه‌ره‌تایی بۆ ئه‌نجامبدات و له‌ مه‌رگ رزگاری بكات.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

پێشمه‌رگه‌ی هه‌ڵمه‌تبه‌ری‌ شاخ و پارێزه‌ری‌ ئارامیی شار

ئالان حه‌مه‌جه‌زا سه‌وڵجانی‌ یه‌كێتیی نیشتمانیی كوردستان شۆڕشگێڕترین حزبه‌ كه‌ زۆرترین ...