سەرەکی » راپۆرت » له‌ عیراق، هه‌موو ده‌پرسین، كه‌س وه‌ڵام ناداته‌وه‌

له‌ عیراق، هه‌موو ده‌پرسین، كه‌س وه‌ڵام ناداته‌وه‌

ئه‌یاد ئه‌لعه‌نبه‌ر

تۆ بڵێی‌ ئاسۆیه‌ك، تروسكاییه‌ك مابێ؟ كاتێكی‌ دیاریكراو هه‌یه‌ بۆ چاره‌سه‌ری‌ كێشه‌كانمان؟ بۆچی‌ هه‌میشه‌ ماندووین؟ بۆچی‌ هه‌میشه‌ ئازار ده‌چێژین؟ ئه‌ی‌ كاتی‌ ئه‌وه‌ نه‌هاتووه‌ ئێمه‌ وه‌كو گه‌ل بحه‌سێینه‌وه‌‌و ساده‌ترین مافه‌ سروشتییه‌كانمان كه‌ په‌یوه‌سته‌ به‌ ژیانی‌ رۆژانه‌وه‌ به‌ده‌ست بهێنین؟ بۆچی‌ به‌رده‌وام راده‌كه‌ین؟ تا كه‌ی‌ به‌ هیوای‌ ئه‌مڕۆ‌و سبه‌ینێوه‌ سه‌ر بنێینه‌وه‌؟ ئه‌وه‌تا منداڵی‌ ساوامان پیر بوو هێشتا كێشه‌كانمان چاره‌سه‌ر نه‌كراوه‌، تا كه‌ی‌ وابێت؟ له‌ راستیدا ناتوانین وه‌ڵامی‌ ئه‌م پرسیارانه‌ بده‌ینه‌وه‌، به‌ڵام هه‌ر ده‌بێ قسه‌ی‌ له‌سه‌ر بكه‌ین‌و باسیان بكه‌ین. ئه‌مانه‌ قسه‌ی‌ سه‌ید ئه‌حمه‌د ئه‌لسافی‌ بوو، كه‌ نوێنه‌ری‌ مه‌رجه‌عی‌ باڵای‌ ئایینییه‌ له‌ نه‌جه‌ف‌و قسه‌كانیشی‌ له‌ وتاری‌ هه‌ینی نۆیه‌مین رۆژی‌ مانگی‌ ئابی‌ رابردوودا پێشكه‌شی‌ كرد.
سروشتی‌ ئه‌م پرسیارانه‌‌و ناوه‌رۆكه‌ پڕ له‌ نائۆمێدییه‌كه‌ی‌ بۆ بارودۆخی‌ چه‌ند ساڵه‌ی‌ عیراق تازه‌ نییه‌، ته‌نانه‌ت ره‌خنه‌ی‌ مه‌رجه‌عی‌ ئایینیش له‌ واقیعی‌ سیاسی‌‌و ئابووری‌ ناهه‌مواری‌ وڵات بابه‌تێكی‌ تازه‌ نییه‌، به‌ڵام ئه‌وه‌ی‌ جێگه‌ی‌ سه‌رسوڕمانه‌‌و چاوه‌ڕوان نه‌كراوه‌ ئه‌وه‌یه‌ كه‌ گۆڕانكاریی وتاری‌ مه‌رجه‌عی‌ ئایینییه‌ له‌ رێنمایی‌و ئامۆژگاری‌‌و ئاراسته‌ كردنه‌وه‌ بۆ گله‌یی‌و داد‌و بێداد. ئه‌م گۆڕاكارییه‌ وای‌ كردووه‌ وتاری‌ مه‌رجه‌عی‌ ئایینی‌ له‌گه‌ڵ گله‌یی‌و داد‌و بێدادی‌ گه‌لدا یه‌ك بگرێته‌وه‌، سه‌باره‌ت به‌ خراپیی بارودۆخه‌كه‌‌و بێتوانایی سیستمی‌ سیاسی‌ له‌ دابین كردنی‌ ساده‌ترین داواكارییه‌كانی‌ ژیان بۆ هاووڵاتیان تا سه‌ربه‌رزانه‌ بژین، ئاخر داواكردنی‌ ژیانێكی‌ ساده‌ی‌ سه‌ربه‌زانه‌ مافێكی‌ ساده‌ی‌ هه‌ر مرۆڤێكه‌.
له‌ ئه‌زموونی‌ گه‌لانی‌ سه‌ركه‌وتوو هۆشیاردا داڕشتنی‌ نه‌خشه‌ڕێگا بۆ چاكسازی‌ كارێكه‌ هێنده‌ قورس‌و ئه‌سته‌م نییه‌، به‌ڵام ئه‌وه‌ی‌ له‌ عیراق ده‌گوزه‌رێت، دووباره‌‌و چه‌ندباره‌بوونه‌وه‌ی‌ ئه‌و هه‌موو گله‌یی‌و دادوبێداده‌ ماندووكه‌ر‌و بێزاركه‌ره‌، به‌ڵام پرسیاری‌ سه‌ره‌كی‌ ئه‌م جاره‌یان ئه‌وه‌یه‌، بۆچی‌ ئێستا‌و له‌م ساته‌وه‌خته‌دا ئه‌م پرسیارانه‌ ده‌وروژێنرێ؟ چونكه‌ وروژاندنی‌ ئه‌و پرسیاره‌ دووبارانه‌ هاوكات بوو له‌گه‌ڵ راپۆرتی‌ شه‌ش مانگیی حكومه‌ت، كه‌ تیایدا هاتووه‌ 79%ی‌ به‌رنامه‌كانی‌ حكومه‌ته‌كه‌ی‌ عادل عه‌بدولمه‌هدی‌ جێبه‌جێ كراوه‌، له‌ هه‌مان كاتیشدا گومان دروست بوو له‌سه‌ر راستی‌‌و دروستی‌ ئه‌و رێژه‌یه‌ له‌ جێبه‌جێ كردنی‌ ئه‌ركه‌كان، گومانه‌كه‌ش له‌لایه‌ن لیژنه‌ی‌ پلان‌و چاودێری كردنی‌ به‌رنامه‌كانی‌ حكومه‌ت له‌ ئه‌نجومه‌نی‌ نوێنه‌رانی‌ عیراق، هه‌روه‌ها گومانه‌كه‌ قسه‌ی‌ دڵی‌ كوتله‌ی‌ حیكمه‌ی ئۆپۆزسیۆنیشه‌.
كه‌واته‌ بابه‌تی‌ سه‌ره‌كی‌ زۆر گرنگ لێره‌دا گریمانه‌كانی‌ ئان‌و ساتی‌ وروژاندنی‌ پرسیاره‌كانی‌ نوێنه‌ری‌ مه‌رجه‌عه‌ ئایینییه‌كه‌یه‌. زۆر له‌ چاودێران باش ده‌زانن هه‌ڵبژاردنی‌ عادل عه‌بدولمه‌هدی‌ بۆ سه‌رۆكایه‌تی‌ وه‌زیران به‌ ته‌نیا له‌ ئه‌نجامی‌ سازانی‌ هه‌ردوو كوتله‌ گه‌وره‌كه‌ی‌ ناو په‌رله‌مانی‌ عیراق واته‌ سائیرون‌و فه‌تح نه‌بوو، به‌ڵكو له‌لایه‌ن كه‌سانی‌ نزیك له‌ سه‌ید سیستانی‌ مه‌رجه‌عی‌ ئایینییشه‌وه‌ پشتیوانی‌ لێ ده‌كرا‌و هه‌روه‌ها له‌ ده‌ره‌وه‌ش پشتیوانی‌ لێ ده‌كرا، به‌ تایبه‌تیش له‌لایه‌ن ئێرانه‌وه‌.
گریمانه‌ی یه‌كه‌م به‌ره‌و ئه‌و بۆچوونه‌یه‌ كه‌ مه‌رجه‌عی‌ ئایینی‌ له‌گه‌ڵ هه‌ستی‌ گه‌لدا ده‌ڕوات كه‌ گله‌یی‌و گازنده‌ی‌ هه‌یه‌ له‌ ئه‌ركه‌كانی‌ حكومه‌ت سه‌باره‌ت به‌ دابین كردنی‌ خزمه‌تگوزاری‌ بۆ هاووڵاتیان، چونكه‌ راپۆرتی لیژنه‌یه‌كی‌ په‌رله‌مانی‌ ئه‌و ئاسته‌ی‌ به‌ له‌ سه‌دا سفر له‌قه‌ڵه‌م داوه‌، په‌یامی‌ مه‌رجه‌عی‌ ئایینییش هه‌میشه‌ له‌گه‌ڵ داواكاریی خه‌ڵكدایه‌ نه‌ك له‌گه‌ڵ بیانوو هێنانه‌وه‌ی‌ حكومه‌ت بۆ خراپی‌‌و دواكه‌وتوویی ئه‌ركه‌كانی‌.
گریمانه‌ی‌ دووه‌م ئه‌و بۆچوونه‌یه‌ كه‌ پێی‌ وایه‌ وتاره‌كه‌ی‌ مه‌رجه‌عی‌ ئایینی‌ په‌یامێكه‌ ئاراسته‌ی‌ سه‌رجه‌م توێژه‌ سیاسییه‌كه‌ی‌ وڵات كراوه‌ بێ هیچ جیاوازییه‌ك، نه‌ك ئاراسته‌ی‌ حكومه‌تێك كرابێت كه‌ هێشتا ته‌مه‌نی‌ ساڵی‌ تێنه‌په‌ڕاندووه‌. چونكه‌ توێژی‌ سیاسی‌ تا ئێستا بیر له‌ فراوان كردنی‌ بازنه‌ی‌ به‌رژه‌وه‌ندییه‌كانی‌ ده‌كاته‌وه‌ له‌سه‌ر حسابی‌ به‌رژه‌وه‌ندی‌ هاووڵاتیان، هه‌رچه‌نده‌ حكومه‌ته‌كه‌ی‌ عادل عه‌بدولمه‌هدی‌ دوا ده‌رفه‌تی‌ بۆ راستكردنه‌وه‌ی‌ هه‌ڵه‌كان ره‌خساندووه‌، به‌ڵام له‌سه‌ر ئه‌رزی‌ واقیع هیچ شتێك نه‌گۆڕاوه‌، ئه‌وه‌تا هێشتا گه‌نده‌ڵی‌ بڵاوه‌‌و هه‌موو جومگه‌كانی‌ ده‌وڵه‌تی‌ ته‌نیوه‌، بێئه‌وه‌ی‌ هیچ چاره‌سه‌رێكی‌ راست‌و دروست له‌ ئارادا بێت، له‌و نێوانه‌دا كێشه‌ی‌ هه‌ره‌ ئاڵۆزیش نه‌بوونی‌ متمانه‌یه‌ به‌و توێژه‌ سیاسییه‌، واته‌ خه‌ڵكی‌ باوه‌ڕیان پێیان نه‌ماوه‌ كه‌ له‌ توانایاندا هه‌بێت چاره‌سه‌رێكی‌ گونجاو بدۆزنه‌وه‌ بۆ قه‌یرانه‌ كه‌ڵه‌كه‌بووه‌كانی‌ وڵات.
گریمانه‌ی‌ سێیه‌م خۆی‌ له‌ وتاری‌ نوێنه‌ری‌ مه‌رجه‌عه‌ ئایینییه‌كه‌دا ده‌بینێته‌وه‌ كه‌ ده‌ڵێ: «ره‌شه‌با به‌ راست‌و چه‌پدا وڵات ده‌هه‌ژێنێ‌و ئێمه‌ش وه‌كو بینه‌ر راوه‌ستاوین سه‌یر ده‌كه‌ین داخۆ كه‌ی‌ رزگاری‌ ده‌بێت‌و ئه‌م دۆخه‌ی‌ عیراقی‌ تێكه‌وتووه‌ كه‌ی‌ كۆتایی دێت؟». مه‌رجه‌عیه‌تی‌ سه‌ید سیستانی‌ ته‌نیا بۆ پاراستنی‌ سیستمی‌ گشتی‌‌و رێگرتن له‌ بڵاوبوونه‌وه‌ی‌ پشێوی‌‌و ئاژاوه‌ دێته‌ پێشه‌وه‌‌و دێته‌ گۆ، ئه‌م حكومه‌تی‌ ئێستاش ئه‌گه‌رچی‌ نیشتمانپه‌روه‌ری‌ كردۆته‌ خاڵی‌ یه‌كه‌می‌ گرنگیپێدان، به‌ڵام له‌ بری‌ ئه‌وه‌ی‌ سه‌رقاڵی‌ كار بۆ به‌رژه‌وه‌ندییه‌كانی‌ هاووڵاتیان بكات، كه‌وتۆته‌ نێوان به‌رداش‌و راكێش راكێشی‌ ئه‌مریكا‌و ئێرانه‌وه‌. له‌ كاتێكدا كه‌ حه‌ز‌و خواستی‌ مه‌رجه‌عی‌ ئایینی‌‌و هه‌ندێك له‌ سه‌ركرده‌ سیاسییه‌كانیش ده‌رهێنانی‌ سه‌رۆكایه‌تی‌ وه‌زیران بوو له‌ بۆته‌ی‌ ناوو حزبی‌ سیاسی‌ جیاجیا، كه‌ ساڵانێكی‌ زۆره‌ ده‌ستیان به‌سه‌ردا گرتووه‌، ئه‌مه‌ش له‌ رێگه‌ی‌ كاندید كردنی‌ كه‌سێكی‌ سه‌ربه‌خۆ‌و بێلایه‌ن به‌و هیوایه‌ی‌ كاریگه‌ریی ده‌ره‌كی‌ له‌سه‌ر بڕیاری‌ سیاسی‌ عیراق دوور بخه‌نه‌وه‌، به‌ڵام رووداوه‌كانی‌ سه‌ر ئه‌رزی‌ واقیع ده‌ری‌ ده‌خه‌ن، نه‌ك هه‌ر كاریگه‌ری‌ ده‌ره‌كی‌ دوور نه‌خراوه‌ته‌وه‌، به‌ڵكو كاریگه‌ریی‌و هه‌ژموونی‌ ئێران له‌سه‌ر عیراق زیادی‌ كردووه‌، پێشتریش مه‌ترسییه‌كه‌ له‌وه‌دابوو ئه‌گه‌ر حه‌یده‌ر عه‌بادی‌ له‌سه‌ر حوكم بمایه‌، هه‌ژموونی‌ ئه‌مریكا به‌سه‌ر عیراقه‌وه‌ زاڵ ده‌بوو، ئه‌وه‌شیان هه‌ر كاریگه‌ریی ده‌ره‌كییه‌.
ئه‌م هه‌ڵوێسته‌ی‌ مه‌رجه‌عی‌ ئایینی‌‌و وروژاندنی‌ پرسیار له‌سه‌ر خراپ به‌ڕێوه‌چوونی‌ وڵات‌و بڵاوبوونه‌وه‌ی‌ گه‌نده‌ڵی‌، ده‌رفه‌تێك بوو بۆ سه‌رهه‌ڵدانه‌وه‌ی‌ داواكاریی له‌و مه‌رجه‌عه‌ بۆ ئه‌وه‌ی‌ گۆڕانكارییه‌ك له‌ دیمه‌نی‌ سیاسی‌ عیراقدا بكه‌ن. هه‌رچه‌نده‌ تاكه‌ هێزه‌ كه‌ توانای‌ گۆڕانكارییه‌كی‌ جه‌وهه‌ریی هه‌بێت له‌ پرۆسه‌ی‌ سیاسی‌ عیراقدا، به‌ تایبه‌ت دوای‌ كاڵبوونه‌وه‌ی‌ بزوتنه‌وه‌ ناڕه‌زاییه‌كان‌و كه‌مبوونه‌وه‌ی‌ خۆپیشاندانه‌كان‌و دوای‌ ئه‌وه‌ی‌ ده‌ركه‌وت ئه‌و جموجۆڵانه‌ توانای‌ گۆڕانكارییان نییه‌، له‌گه‌ڵ ئه‌وه‌شدا زۆر هۆكار هه‌ن وا ده‌كه‌ن ده‌ستێوه‌ردانی‌ مه‌رجه‌عی‌ ئایینی‌ باڵا له‌ نه‌جه‌ف وه‌ك ئه‌وه‌ی‌ پێشتر هه‌یبووه‌ له‌ فه‌تواكانی‌ تایبه‌ت به‌ هه‌ڵبژاردن‌و نووسینه‌وه‌ی‌ ده‌ستوور‌و جیهادی‌ كه‌فائی‌ به‌دوور بزانرێت.
چونكه‌ مه‌رجه‌عی‌ سه‌ید سیستانی‌ باوه‌ڕی‌ به‌وه‌یه‌ سه‌رپه‌رشتی‌ كاروباری‌ گشتی‌ بكات. خودی‌ سه‌ید سیستمانی‌ پێی‌ وایه‌ ته‌نیا له‌و كاروبارانه‌دا هه‌ڵده‌دات‌و كار ده‌كات كه‌ په‌یوه‌ندییان به‌ سیستمی‌ گشتی‌‌و پشێوی‌‌و ئاژاوه‌وه‌ هه‌یه‌. كه‌واته‌ ئه‌م جۆره‌ له‌ سه‌رپه‌رشتی‌ كردن‌و ویلایه‌ته‌ جیاوازه‌ له‌ ویلایه‌تی‌ گشتی‌ ره‌ها، وه‌ك ئه‌و نموونه‌یه‌ی‌ له‌ ئێران هه‌یه‌ كه‌ مه‌رجه‌عی‌ ئایینی‌ خۆی‌ له‌ هه‌موو ورده‌كارییه‌كی‌ كاروباری‌ گشتی‌ هه‌ڵده‌قورتێنێ. جگه‌ له‌وه‌ش مه‌رجه‌عی‌ ئایینی‌ ناتوانێ گره‌و له‌سه‌ر گۆڕانكاریی گشتگیری‌ سیاسی‌ بكات، ئه‌گه‌ر ئه‌و گۆڕانكارییه‌ له‌ رێگه‌ی‌ هه‌ڵبژاردنه‌وه‌ نه‌بێت، كێشه‌كه‌ش هێنده‌ی‌ تر ئاڵۆز ده‌بێت كه‌ ده‌بینین توێژی‌ سیاسی‌ ئه‌م وڵاته‌ به‌ جۆرێك شاره‌زاییان له‌گه‌ڵ بارودۆخه‌كه‌ په‌یدا كردووه‌ كه‌ به‌ ئاسانی‌ فێڵ له‌ یاساكانی‌ هه‌ڵبژاردن ده‌كه‌ن، ئه‌ویش له‌ رێگه‌ی‌ داڕشتن‌و هه‌موار كردنی‌ یاسای‌ هه‌ڵبژاردنی‌ ئه‌وتۆ كه‌ مانه‌وه‌ی‌ خۆیان له‌ ده‌سه‌ڵاتدا مسۆگه‌ر بكات، نه‌ك یاسایه‌ك كه‌ ئامانجه‌كه‌ی‌ ته‌نیا رێكخستنی‌ هه‌ڵبژاردن‌و به‌شداری‌ جه‌ماوه‌ر بێت له‌ سیاسه‌ت‌و به‌ڕێوه‌بردنی‌ وڵاتدا، هه‌ژموونیشیان به‌سه‌ر دامه‌زراوه‌كانی‌ تایبه‌ت به‌ رێكخرستنی‌ پرۆسه‌ی‌ هه‌ڵبژاردنه‌وه‌ دیاره‌ كه‌ به‌ره‌و كوێ ده‌چێت.
گریمانه‌ی‌ یه‌كه‌م كه‌ مه‌رجه‌عی‌ ئایینی‌ له‌گه‌ڵ هه‌ستی‌ گه‌لدا ده‌ڕوات‌و گوێ راده‌گرێ بۆ گله‌یی‌و گازنده‌كانیان له‌ حكومه‌ت سه‌باره‌ت به‌ دابین كردنی‌ خزمه‌تگوزاری‌ بۆ هاووڵاتیان، ده‌گه‌ینه‌ ئه‌و ئه‌نجامه‌ی‌ هه‌موو ئه‌و كه‌سانه‌ی‌ گره‌ویان له‌سه‌ر ئه‌وه‌ كردووه‌، به‌ گۆڕینی‌ كه‌سێتی‌ سه‌رۆك وه‌زیر ده‌توانرێ دۆخه‌كه‌ گۆڕانكاریی به‌سه‌ردا بهێنرێت، گره‌وه‌كه‌یان دۆڕاندووه‌، چونكه‌ كۆی‌ گشتی‌ سیستم‌و پرۆسه‌ی‌ سیاسی‌ كه‌ حزب‌و كه‌سێتی‌‌و هێزه‌ سیاسییه‌كانیان چه‌سپاندوویانه‌ كاری‌ دامه‌زراوه‌یی ده‌وڵه‌تی‌ له‌ناو بردووه‌‌و له‌ بری‌ كاری‌ دامه‌زراوه‌یی بیرۆكراتی‌ حزبی‌‌و تاكه‌كه‌سی‌ زاڵه‌ به‌سه‌ر سیستمی‌ سیاسییه‌وه‌‌و 15 ساڵیشه‌ به‌و شێوه‌یه‌ به‌رده‌وامه‌‌و چه‌سپاوه‌. وتاری‌ ره‌شبینی‌‌و نائومێدی‌‌و ده‌ربڕینی‌ گله‌یی‌و داد‌وبێداد هیچ هه‌ڵه‌یه‌ك راست ناكاته‌وه‌‌و وه‌ڵامی‌ ئه‌و پرسیارانه‌شی‌ پێ نادرێته‌وه‌ كه‌ داخۆ كه‌ی‌ بێت گه‌لی‌ عیراق له‌و هه‌موو كوێره‌وه‌رییه‌ رزگاری‌ بێت، چونكه‌ وه‌ڵامی‌ پرسیارێكی‌ وا پێویستی‌ به‌ ئازایه‌تی‌‌و بوێرییه‌كی‌ ئه‌وتۆ هه‌یه‌ كه‌ دان به‌ هه‌موو ئه‌و هه‌ڵانه‌دا بنێن كه‌ تێكڕای‌ توێژه‌ سیاسییه‌كه‌ تیایدا به‌شدارن‌و خۆیان‌و ئه‌وانه‌ش كه‌ شه‌رعیه‌تی‌ پێداون به‌رپرسیاریی دۆخه‌كه‌یان ده‌كه‌وێته‌ ئه‌ستۆ.
به‌ڵام وه‌ك پێشتر وتمان لای‌ گه‌لانی‌ هۆشیار‌و خاوه‌ن ئه‌زموون داڕشتنی‌ نه‌خشه‌ڕێگای‌ چاكسازی‌ شتێكی‌ وا ئه‌سته‌م نییه‌ كه‌ نه‌كرێت، ئه‌وه‌نده‌ قورس نییه‌ كه‌ نه‌وتوانرێ به‌سه‌ر قه‌یرانه‌كاندا زاڵ بێت‌و ده‌وڵه‌ت بنیات بنرێته‌وه‌، ئه‌سته‌م نییه‌ له‌به‌ر چه‌ند هۆكارێك، ئه‌ویش به‌ر له‌ هه‌موو شتێك ویستی‌ سیاسی‌ مكوڕ‌و شێلگیرانه‌ هه‌بێت بۆ چاكسازی‌ نه‌ك ته‌نیا وه‌ك دروشمێك به‌كار بهێنرێت، دووه‌میش، پێویسته‌ سه‌ركرده‌ی‌ سیاسی‌ پڕۆژه‌یه‌كی‌ راسته‌قینه‌ی‌ هه‌بێت بۆ به‌ڕێوه‌بردنی‌ وڵات، نه‌ك سه‌ركرده‌یه‌ك كه‌ ئامانجی‌ سه‌ره‌كی‌‌و بگره‌ تاكه‌ ئامانجیشی‌ حه‌ز‌و خولیای‌ تاكه‌كه‌سی‌ بێت بۆ گه‌یشتن به‌ پۆستی‌ سیاسی‌ گه‌وره‌‌و هه‌ر كه‌ پۆسته‌كه‌یشی‌ وه‌رگرت ببێته‌ ئامرازێك بۆ جێبه‌جێ كردنی‌ كۆمه‌ڵێك ویستی‌ ده‌ره‌كی‌‌و ناوخۆیی، سێیه‌م‌و كۆتاییش گرنگیی بوونی‌ توانای‌ گۆڕانكارییه‌ له‌ سیستمی‌ یاساداناندا به‌ لۆژیكی‌ هه‌ڵسه‌نگاندنی‌ ده‌رهاویشته‌كانی‌ پێشووی‌، واته‌ به‌ له‌به‌رچاو گرتنی‌ به‌ره‌نجام‌و ده‌رهاویشته‌كانی‌ سیستمه‌كه‌ی‌ پێشوو كه‌ جگه‌ له‌ سیستمێكی‌ بێتوانا به‌رامبه‌ر به‌ جێبه‌جێ كردنی‌ ئه‌ركه‌كانی‌ هیچی‌ له‌ده‌ست نه‌هاتووه‌‌و جگه‌ له‌ فراوان كردنی‌ درزی‌ نێوان كۆمه‌ڵگه‌‌و سیستمی‌ ده‌سه‌ڵات هیچی‌ تری‌ نه‌كردووه‌. له‌گه‌ڵ هه‌موو ئه‌مانه‌شدا گه‌لی‌ عیراق به‌م پیشنیاز‌و تیۆرانه‌ رزگاری‌ نابێت له‌ كوێره‌وه‌ری‌، هه‌تا ده‌سته‌بژێری‌ سیاسی‌ بوێری‌ ئه‌وه‌یان نه‌بێت دان به‌ هه‌ڵه‌كانیاندا بنێن‌و نه‌یانه‌وێ متمانه‌ی‌ هاووڵاتیان به‌ده‌ست بهێنن ئه‌م گه‌له‌ رزگاری‌ نابێت.

سایتی‌ كه‌ناڵی‌ ئاسمانی‌ ئه‌لحوره‌ی‌ ئه‌مریكی‌

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

له‌ شامه‌وه‌ بۆ ئیمرالی ئـۆج ئالان

وه‌رگێرانی له‌ توركیه‌وه‌: شنۆ هیرانی ن: موراد یه‌تكین بەشی شەشەم ...