سەرەکی » راپۆرت » روانینی مام بۆ ماف ‌و ئەركی توێژەكان

روانینی مام بۆ ماف ‌و ئەركی توێژەكان

بە درێژایی مێژووی خەباتی رێكخراوەیی و سیاسی و پێشمەرگایەتی و دیپلۆماسیی، مام جەلال لە ئاست كارو ئامانجی رێكخراو و سەندیكا و كۆمەڵە پیشەیی و دیموكراتییەكان و نوێنەرانی چین و توێژەكاندا هەمیشە پشت و پەنایان بووە و داكۆكیی لە مافە رەواكانیان كردووە، بۆ بەدیهێنانی ئامانجەكانیان و رێنوینی پڕ لە هیوا و ئومێدی پێبەخشیوون، لە برەودان بە كاروانی خەباتەكەیان.
لێرەدا پوختەیەك لە روانینەكانی ئەو زاتەتان بۆ دەخەینەوەڕوو كە لە بۆنە جیاجیاكاندا تەئكیدی لەسەر كردوونەتەوە.

شرۆڤەو ئامادەكردنی: كاروان شێخ عوسمان

تێڕوانینی بۆ كاری رۆژنامەنووسیی
لە كۆبوونەوەیەكی لەگەڵا دەستەی نووسەران‌و ستافی نووسینی رۆژنامەی كوردستانی نوی و ژمارەیەك رۆژنامەنووسدا لە ساڵی 2000 دا، پاش گێڕانەوەی ئەزموونی خۆی لە سەرەتای كاركردنی لە بواری رۆژنامەنووسیدا كە چۆن هەمیشە پشتی بە سەرچاوە بەستووە بۆ نووسینی بابەتەكانی بۆ رۆژنامەنووسانیش لەو كۆبونەوەیەدا دەڵێت: «ئێوەش ئەگەر بتانەوێت باش بنووسن، چەندی پێتان بكرێت سەرچاوەی زیاتر تەماشا بكەن، بەڵام پشت بەستن بە سەرچاوە هەر ئەوەنییە كۆپی بابەتەكە بكەن، بەڵكو بۆ ئەوەی كە باش تێیبگەن و چی بە كەڵكتان بێت، سوودی لێ وەربگرن، بۆ نموونە وتارێك یان بابەتێك دەخوێنیتەوە، بیرۆكەیەكی لێ دروست بكە، یان بە هزرو بیری خۆتان دایبڕێژنەوە یان بابەتەكەی خۆتانی پێ دەوڵەمەند بكەن.
لەم سەردەمەشدا كە ئینتەرنێت هەیە ئاسانكاریی زیاتر كراوە بۆ بەدەستهێنانی سەرچاوە».
مام هەمیشە تەكیدی لەوەش دەكردەوە كە لە بوارێكی وەك رۆژنامەنووسیدا كە داهێنان و پێشكەوتنەكانی لە بەردەوامیدایە، بۆیە تا گرنگی زیاتر بە رێكردن لەگەڵ پێشكەوتن و داهێنانەكاندا بدرێت كەمە، لەسەر ئەم خاڵەش مام دەڵێت: « كە دەڵێم لەگەڵ پێشكەوتنەكاندا رێ بكەن، مەبەستم ئەوەیە هەمیشە خۆتان بە خوێندكار بزانن و چەندە نووسین و بابەتتان هەبێت، خۆتان لێ نەبێت بە مامۆستا، هەمیشە لە هەوڵ و كۆششدا بن بۆ بەدەستهێنانی زانیاریی تازە، چونكە هەر رۆژنامەنووس و نووسەرێك رابووەستێت لە فێربوون، بەواتای ئەوەیە كە رادەوستێت لە ژیان، چونكە ژیان جووڵانە، یاسای ژیان مانای گەشەكردنە، بۆیە ئەگەر ئێوەش بتانەوێت ببنە رۆژنامەنووسێكی سەركەوتوو، دەبێت هەمیشە گەشە بە خۆتان بدەن و بە كەموكوڕییەكانی خۆتاندا بچنەوە».
هەر لەسەر ئەم خاڵەش مام زۆر تەئكیدی دەكردەوە كە گەشەكردن گشت بوار و كایەكان بگرێتەوە و لەو دانیشتنەی لەگەڵ رۆژنامەنوساندا دەڵێت: «چەندین هۆی تریش هەیە بۆ گەشەكردنی مرۆڤ، بۆنموونە یەكێك خوێندەواریی نەبێت چۆن گەشە دەكات؟ بێگومان سەرەتا خۆی فێری خوێندەواریی دەكات، بەڵام هەر ئەوەش بەس نییە، بەڵكو گەشەدان بە ئاستی خوێندەواریی و مەعریفە و هۆشیاریی سیاسی و پرسوڕا گۆڕینەوە لەگەڵ دەوروبەر و ئەزموون و چوونە ناو خەڵك و تێگەیشتن لە پرسەكان و بەكارهێنانی زمانێك كە لێت تێبگەن گرنگن، هەموو ئەم سیفاتانەش پێكەوە دەكرێت یارمەتیی مرۆڤ بدات كە ببێتە رۆژنامەنووسێكی سەركەوتوو، ئەگەر خۆشی ئەو بەهرەیەی تێدابێت».
لە بارەی ئامانج و دابینكردنی بژێویی و هەڵوێستی رۆژنامەنووسەوە مام هەمیشە روانینی وابوو كە لەو بۆنەیەشدا بەو جۆرە تەئكیدی لێ كردەوە و دەڵێت: «رۆژنامەنووس وێرای دابینكردنی بژێویی ژیانی دەبێت ئامانجێكی روونیشی هەبێت كە دەیەوێت چی بڵێت یان چی بگەیەنێت؟ جگە لەوەش دەبێت هەڵوێستی هەبێت و هەمەلایەنە سەیری شتەكان بكات و دیدی پانۆرامایی بێت، بەو شێوەیە دەتوانن شتی نوێ فێرببن و ببنە داهێنەریش».

داكۆكی لە مافی ژنان
پشتگیریی و پشتیوانیی مام جەلال بۆ ژنان لە سەرەتای دەستپێكردنی خەباتی سیاسییەوە رەنگی دابۆوە بە جۆرێك داكۆكی لە مافەكانیان دەكرد كە لە كۆنگرەی جیهانی ژناندا كە لە كۆماری میللیی چین بەڕێوەچوو بە نوێنەرایەتی ئەوان بەشداریی ئەو كۆنگرەیەی كرد، ئەم هەڵوێستە مەبدەئییەی مام لە پشتگیریی ژنان تا دواماڵئاویی كردنی لێمان بەردەوام بووە، لە بۆنەیەكی یەكێتی ژناندا مام جارێكی تر پشتگیریی خۆی وەها بۆ دووپاتكردنەوە: « راستە هەم یەكێتیی نیشتمانیی كوردستان و هەم حكومەت و حزب و هێزە پێشكەوتنخوازەكان یاریدەدەر و پشتیوانی خەباتە رەواكەتانن، بەڵام پێویستیشە زیاتر پشت بە توانا و خەباتی خۆتان ببەستن و سووربن لەسەر داخوازییە رەواكانتان و بەرامبەر هەر دیاردەیەكی دزیۆ كە لە دژی ژنان روودەدات، پێویستە لە رێگەكانی خەباتتانەوە دەنگی ناڕەزایەتی بەرز بكەنەوە، بۆ ئەوەی هەموولایەك بزانن كە دژایەتی كردنی ئێوە جێگەی نەفەرەتییە، هەروەها بۆ هەر بڕیار و هەنگاوێكیش كە لایەنی ئیجابی هەیە بۆ ئێوە قسەتان لەسەری هەبێت ، مانای لە هەردوو حاڵەتدا رەئیتان هەبێت».
مام هەمیشە روانینی وابووە كە ژنان بە هەوڵ و تواناكانی خۆیان بوونی خۆیان لە گشت كایەكانی ژیاندا بسەلمێنن، هەر لە بۆنەیەكی یەكێتیی ژناندا ئەم راستییەی بەمجۆرە دووپاتكردەوە و دەڵێت: «وەك چۆن دەبینین لە بوارەكانی پەروەردە و تەندروستیدا چەندین ژن و كچ وەك مامۆستا و فەرمانبەر و پزیشك و كارمەندی تەندروستی و برین پێچ رۆڵێكی باشتان هەیە، لە بواری پێشمەرگایەتیشدا ژمارەیەكی بەرچاو لە پێشمەرگە و ئەفسەری ژن هاتوونەتە كۆڕی خەباتەوە، بۆیە ئەمانە سەرەتایەكی باشن بۆئەوەی لە گشت كایەكانی ژیاندا وەكیەكیی خۆتان لەگەڵ پیاواندا بچەسپێنن بەسەر كۆمەڵگەدا».
لە میانی ئەو پشتگیرییە بەردەوامەی مام بۆ ژنان و جووڵانەوەكانیان، هەمیشە تەئكیدی لە پەروەردەو فێركردنی هۆشیاریی بەخشینی زیاتر دەكردەوە و لە بۆنەكانی ژناندا ئەم خاڵەی بۆ دووپات دەكردنەوە كە دەیوت: «چەندی هۆشیاریی سیاسی و زانیاری نوێ لە ناو ئەندامانی رێكخراوەكەتاندا و پاشان لەناو كۆمەڵی كوردەواریدا بڵاو بكەنەوە، ئەوەندە زیاتر رێكخراوەكەتان كاریگەریی دەبێت بۆ بەدیهێنانی داوا و ئامانجەكانتان».
بۆیە مام بەردەوام تەئكیدی لەوە دەكردەوە كە بەبێ بەشداریی ژنان كۆمەڵگەیەكی بەختیار و پێشكەوتوو پێكنایەت.

دیدو تێڕوانینی بۆ ئەركی هێزەكانی ئاسایشی ناوخۆ
لە بارەی دابینكردنی ئۆقرەیی و ئارامی و ئاسایشەوە بۆ وڵات و كۆمەڵانی خەڵك، مام هەمیشە راستەوخۆ و ناڕاستەوخۆ رێنوێنی ئەو هێزانەی دەكرد و روانینی وەها بوو كە گرنگیی بە خولی مەشق لەسەر بنەماكانی رێزگرتن لە مافەكانی مرۆڤ و شێوازی پاراستنی سەرو ماڵی خەڵك بگرنە بەر، بۆیە لە بۆنەیەكی خولی مەشقی هێزەكانی ئاسایشدا بەم جۆرە رێنوێنی ئەو هێزانە دەكات و دەڵێت: «ئەو ئەفسەرانەی كە ئەم خولەیان تەواو كردووە، دەبێت باشتر بزانن كە ئێوە خزمەتگوزاری خەڵكن و بە سوود وەرگرتن لە بنەماكانی مافەكانی مرۆڤ، چونكە ئاسایشی ئێمە جیاوازن لە هێزەكانی سەردەمەكانی رژێمی دیكتاتۆری كە لە پاڵ ئەم ناوەدا خەڵكیان ئازار دەدا، ئەركی ئێوە پاراستنی سەر و ماڵی خەڵكە و بۆ ئەوانەشی لە رێی یاسا لادەدەن ، یان نیازیانە كارێكی خراپ بكەن ، بە وریایی و لێزانانە بیانهێننەوە سەر رێی راست و دەبێت پەیوەندییتان لەگەڵ كۆمەڵانی خەڵكدا باشتر و تۆكمەتر بكەن، چونكە بە پشتیوانیی خەڵك دەتوانن گومان لێكراوان یان هەر هەوڵیكی خراپەكاری دەستنیشان بكەن و رێ لە تێكدانی ئارامی و ئاسایش بگرن».

مافی مرۆڤ لە دیدی مام جەلال-ەوە
دەتوانرێت بوترێت كە پەرۆشیی مام بۆ پاراستنی مافەكانی مرۆڤ ، لە پێش زۆر خاڵی ترەوە بوو لە ژیانی سیاسیی خۆیدا و لە ئەولەوییەتدا داینابوو كە هەمیشە و لە زۆر وێستگەدا تەئكیدی لێ دەكردەوە، هەر لەو بارەیەشەوە لە بۆنەیەكی ساڵانەی یادی جاڕنامەی جیهانیی مافی مرۆڤدا بەمجۆرە تێڕوانینی خۆی دەخاتەڕوو و دەڵێت: «جاڕنامەی جیهانیی مافی مرۆڤ گرنگییەكی گەورەی هەبوو، چونكە بۆ یەكەمجار بوو جیهان بە گشتی و بە یەك دەنگ بڕیاریان لەسەر ئەو راستیانە دا كە مرۆڤ و مافەكانی لە سەرتاسەری دونیا بپارێزرێت، ئەمەش بۆ گەلانی زۆر لێكراو و بەشخوراوی وەك گەلی كوردستان گرنگییەكی تایبەتی هەیە، هەر بۆیە ئێمەش پێویستە لە گەلانی تر زیاتر پەرۆشی بەدیهێنانی ناوەڕۆكی ئەو جاڕنامەیە بین و خەبات بۆ جێبەجێكردنی بكەین و خەبات بكەین بۆ رێگە گرتن لە پێشێلكردنی مافەكانی مرۆڤ لە كوردستانی خۆماندا».
لەبەرامبەر هەر پێشێلكردنێكی مافەكانی مرۆڤدا چ لە ناوخۆ و چ لە دەوروبەر و دونیادا مام هەمیشە روانینی وەها بووە كە ئەو پێشێلكردنانە دژایەتی گشت بیروباوەڕێكی پێشكەوتنخوازانەیە، بۆیە هەر لەو بۆنەیەشدا جارێكی تر ئەوەی دووپاتكردۆتەوەو دەڵێت: «پێشێلكردنی مافەكانی مرۆڤ جگە لەوەی كارێكی دڕندانەو دژە شارستانییەتە و دەبێتە هۆی سوكایەتی كردن بەو گەلەش كە لە ناویاندا ئەم جۆرە پێشێلكردنە روو دەدات، بۆیە پێویستە هەوڵبدەین بە هیچ شێوەیەك لە هیچ دەزگایەكدا لە هیچ شوێنێكی كۆمەڵی كوردەواریدا ماوە نەدەین بە پێشێلكردنی مافەكانی مرۆڤ، بە پێچەوانەوە خەبات بكەین بۆئەوەی كوردستانی ئێمە ببێتە نموونەیەكی زیندوو لە رێزگرتن و پاراستن و بەدیهێنانی مافەكانی مرۆڤدا، چونكە ئەم بەدیهێنانە نەك هەر لەگەڵ دەستكەوتە نەتەوایەتییەكانمان دەگونجێت، بەڵكو لەگەڵ نەریت و تەقالیدی نەتەوایەتی و دینیشدا یەك دەگرێتەوە».
هەر لەو روانگەیەوە مام ئەوەی وەبیر هەموولایەك دەهێنایەوە كە پاراستنی مافەكانی مرۆڤ بناغەی وەدیهێنانی مافە نەتەوایەتیەكانیشە، بۆیە بەوجۆرە بە گرنگییەوە لەم پرسەی دەڕوانی كە لە بۆنەكاندا بەمجۆرە تەئكیدی لەسەر دەكردەوە و دەیوت: « لە و ڵاتی ئێمەدا جاڕنامەی گەردوونیی مافەكانی مرۆڤ و پاراستنی پرەنسیپەكانی دەكرێت بكرێنە چەكێكی كاریگەر بۆ پاراستنی مافەكانی گەلەكەمان، بۆیە پاراستنی مافەكانی مرۆڤ ئەركێكی نەتەوایەتی و دینی خەڵكی كوردستانی عیراقە و هیوادارم ئەم ئەركە بە چاكی جێبەجێ بكەین و چاو نەپۆشین لەهیچ كەس و لایەنێك كە پێشێلی بەندو خاڵەكانی بكەن».
مام جەلال روانینی بەو جۆرەبوو كە پێش هەموو كەسێك پێویستە یەكێتی و ئەندامەكانی بە گرنگییەوە پاراستنی مافەكانی مرۆڤ درك پێبكەن و هەر لەو بۆنەیەشدا بەم جۆرە رێنوێنی هەموو لایەكی كردەوە: «جێبەجێكردنی بەندەكانی جاڕنامەی گەردونیی مافەكانی مرۆڤ واجبێكی حزبیی یەكێتیی نیشتمانیی كوردستان و هەموو ئەندامەكانێتی و هەمیشە ئەوەیان لەبیربێت كە بەندی دووەمی پرۆگرامی یەكێتیی نیشتمانیی كوردستان داوای جێبەجێكردنی پاراستنی مافەكانی مرۆڤ دەكات، بۆیە هیوادارم لەو مەیدانەدا رۆڵێكی گرنگتان هەبێت».

وێستگەی خەباتی پێشمەرگانەی مام
بواری خەباتی پێشمەرگانە، سەبارەت بە مام جەلال، زۆرترین ماوەی وێستگەكانی تری ژیانی بووە كە لە سەرەتای شۆڕشی ئەیلول و شۆڕشی نوێ-وە جگە لە ئەركی سیاسی، ئەركی فەرماندەییشی بینیووە، بۆیە هەمیشە پێداگریی لەسەر ئەوە كردووە كە جگە لە چەندایەتی ئەو هێزە، گرنگیی بە چۆنایەتیشیان بدرێت و هەر بۆ ئەوەش بەردەوام رێنوێنی هێزی پێشمەرگەی كردووە كە جگە لە ئەركی چەكداریی، گرنگی بە هۆشیاریی سیاسی و پەیوەندییە كۆمەڵایەتیەكانیشیان بدەن.
وەك لە كۆبوونەوەیەكیدا لەگەڵ مەڵبەندی رێكخستنی پێشمەرگەدا بەم جۆرە ئەو تێڕوانینەی خۆی بۆیان دەخاتەڕوو: «هێزی پێشمەرگە هێزێكی شۆڕشگێڕی سیاسیی چەكدارە ، هێزێكی نیزامیی پیشەیی نییە، بەڵكو لە پێشەوە تێكۆشەری سیاسین، ئینجا تێكۆشەری سیاسی چەكدارن، كە ئەركیان پاراستنی نیشتمان و كۆمەڵانی خەڵكی كوردستانە، كەواتە دوو ئەركیان لەبەردەمە، ئەم دوو ئەركە وای لێ دەكات كە دەبێت باشتر و چاكتر لە مانای ئەركەكانی خۆی تێبگات كە ئەوان هێزی پێشمەرگەی كوردستانن و هێزێكی رێكخراوی هەموو خەڵكی كوردستانن نەك هێزی هۆز و تیرەو ناوچەیەك».
مام هەمیشە تێڕوانینی بەجۆرێك بووە كە ئەم تێگەیشتنە لە ناو هێزی پێشمەرگە هەوڵی بەردەوامی دەوێت كە لەم كۆبوونەوەیەیدا لەگەڵ مەڵبەندی رێكخستنی پێشمەرگەدا دەڵێت: «ئەم تێگەیشتنە دەبێت لە ناو هێزی پێشمەرگەدا رەنگ بداتەوە، دیارە بە هۆشیاركردنەوە و راهێنانی بەردەوام ئەمانە جێبەجێدەكرێن».

ئەرك ‌و پۆست ‌و پلە
بۆ تێگەیشتن لەسەر ئەرك و پلە و پۆست مام جەلال پێیوابوو كە خزمەتكردن لە ئەركدایە، نەك مەنسەب، بۆیە هەمیشە پێداگریی لەوە دەكردەوە كە لەناو گشت دەزگا و تەشكیلاتەكانی یەكێتیدا ئەمە رەنگ بداتەوە، وەك لەم كۆبوونەوەیەشدا بەمجۆرە دەڵێت: «لای ئێمە هەمیشە سەروەریی لە خەباتدایە، لە پلە و پۆستدا نییە، چەندە مرۆڤ بتوانێت خەباتی خۆی باشتر و رێكوپێكتر بكات بۆ خزمەتی كۆمەڵانی خەڵك، ئەوەندە زیاتر سەروەریی پێدەبڕێت، پێشمەرگەش كە ناوی خۆی بەخۆیەوەیەتی، پێویستە هەمیشە ئەم راستییە نەك هەر لە دڵ و دەرونیدا جۆش بدات، بەڵكو پێویستە رەنگیش بداتەوە لە كردار و رەفتارەكانیدا بە تایبەتی لەگەڵ كۆمەڵانی خەڵكی كوردستاندا و ئەم راستییەیان هەمیشە لەبیربێت كە پەیوەندیی ئەوان لەگەڵ كۆمەڵانی خەڵكدا وەك پەیوەندیی ماسی و ئاو وایە، ئەگەر ئاوەكە وشكی كرد ماسییەكە دەمرێت «.
گەشەپێدانی ئابووریی ‌و ئاوەدانكردنەوە
بوژاندنەوە و گەشەپێدانی ئابووریی وڵات جێگەی بایەخ پێدانێكی تری گرنگ بوو بەلای مام جەلال-ەوەو تێڕوانینی تایبەتی هەبووە بۆ ئەم بوارانە وەك كۆڵەكەیەكی ژیان لە كوردستاندا، بۆ ئەو بوارەش لە كۆنگرەی ئابووریناسان و ژمێریارانی كوردستاندا بەم شێوەیە تێڕوانینی خۆی دەخاتەڕوو و دەڵێت:»ئابووری هەر وڵاتێك بە ئارەزووی حكومەت و كاربەدەستانی ئەو حكومەتە بەتەنیا نایەتەدی، بەڵكو وەكو خۆتان ویستوتانە، ئەوان دەتوانن رۆڵێكی كاریگەر ببینن لە مۆدێرنكردن و گەشەپێدان و دانانی نەخشە و پلانی راستدا، بەڵام ئەوەش لەوڵاتی ئێمەدا گرێداروی چەندین هۆی ناوخۆیی و دەرەكییە، بۆیە پێویستە ئێمە بە تایبەتی ئابوریناسان و ژمێریاران كە زانستییانە كاری ئامارو فاكتەرە زانستییەكان لەبەر دەستیاندا دەبێت بە چاوێكی دووربینانە و وردبینانە بنواڕنە ئابووری وڵات و چۆنێتی گەشەپێدانی».
بۆ سەرخستن و گەشەپێدانی ئابووریی وڵات و جێبەجێكردنی داخوازییەكانی خەڵك، سەرۆك مام جەلال روانینی بەو جۆرە بووە كە دانانی پلان بنەمایەكی سەرەكییە وەك لەو كۆبوونەوەیەدا تەئكیدی لەسەر كردۆتەوە و دەڵێت: «هەر لەبەر ئەوە بوو كە یەكێتیی نیشتمانیی كوردستان بڕیاریدا ئەنجومەنی پلاندانان دابنرێت تا بتوانرێت لەهەموو لایەنەكانی ژیان بە لایەنی ئابووریشەوە بە پێی پلان و بەپێی نەخشەی رێكوپێكی زانستییانەی گونجاو لەگەڵ بارودۆخی وڵاتەكەماندا نەخشەو پلانی پێویست دابنێیین بۆ گەشەپێدانی ئابووریمان، ئەوەی كە بەئێوەش دەكرێت، نەك هەر بەشداریكردنتانە لەو ئەنجومەنەدا، بەڵكو دەتوانن پێشنیازی پێویستی بۆ بكەن بۆ گۆڕینی ئەو یاسا كۆنانەی كە بە میرات لە رژێمە داگیركەرەكانەوە بە جێماون و لەمپەرن لەبەردەم هەنگاوەكانی گەشەپێدانی ئابووریدا».
مام جەلال هەمیشە تێڕوانینی بەجۆرێك بووە كە لە زۆربەی لایەنەكانی ژیاندا بۆ چارەسەری كەموكوڕیی و كێشەكان، چارەسەری نموونەیی گرنگە، بەڵام بەپێی بارودۆخی وڵات ئەوە دێتەدی، بۆیە دەكرێت لە قۆناغی سەرەتادا چارەسەری واقعیانە پێشنیازبكرێت كە توانای جێبەجێكردنیان هەبێت، ئەو راستییەشی بۆ ئابووریناسان و ژمێریاران لەو كاتانەدا بەمجۆرە خستەڕوو و وتی: «داوا دەكەم هەوڵەكانتان زیاتر بخەنەگەڕ بۆ چارەسەری واقعییانەی كەموكوڕیی و كێشەكان و بیری ورد و زیرەكانە بكەنەوە بۆ پڕۆژە و پێشنیازەكانتان لەپێناوی بوژانەوە و پێشخستنی ئابووریی وڵاتەكەمان، بۆ نموونە بوژانەوەی كارگە مامناوەندی و بچووكەكان كە لەكاركەوتوون و لەتوانادا هەیە لەسەر دەستی ناوخۆیی بخرێنەوە كار، هەروەها بوژانەوەی كەرتی كشتوكاڵا بە گشت بوارەكانی بەروبومی دانەوێڵە و باخداریی و ئاژەڵداریی و پەلەوەر و هەنگەڵان بەبوژانەوەی ئەم بوارە، دەتوانرێت لایەنێكی ئابووریی سەرپێ بخرێتەوە».
لەگەڵ ئەو رێنوێنیانەشیدا وێڕای خستنەڕووی روانینەكانی مام جەلال بۆ نوێنەرانی گشت چین و توێژەكان لە سەندیكا و رێكخراوەكاندا، هەمیشە چۆنێتی كاركردن و جێبەجێكردنی بڕیارو ئەركەكانیانی بۆ خۆیان دەهێشتەوە و ئەوەی دووپات دەكردەوە كە ئەوە بواری خۆتانە و ئێوە زانستیانە و وردبینانە دەتوانن ئامانجەكانی خۆتان كە لە خزمەت كۆمەڵانی خەڵكی كوردستاندایە، باشتر جێبەجێ بكەن.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

دوا پەرەسەندنەكانی رێكەوتنی هەسەدە ‌و سوپای سوریا

پاش ئەوەی بە چاودێریی روسیا، هێزەكانی سوریای دیموكرات (هەسەدە) ‌و ...