سەرەکی » ئاراستە » خۆری‌ تۆ له‌ دڵ‌ ئاوا نابێت

خۆری‌ تۆ له‌ دڵ‌ ئاوا نابێت

به‌هار شێخ شه‌ره‌ف

كاك پێشه‌وا، كه‌سێكی توانا ‌و پڕ به‌هره‌ی‌ هه‌مه‌چشن و به‌هروه‌ر بوو له‌ هه‌موو كایه‌كانی ژیاندا، زیاده‌ڕۆیی نییه‌ كه‌ به‌ ده‌گمه‌ن ناوی‌ ببه‌م. وه‌ك كورد ده‌ڵێ ئه‌سپی خۆی‌ زۆر به‌ گورجی ‌و به‌ توانایه‌كی پۆڵایینه‌وه‌ له‌ هه‌موو گۆڕه‌پانه‌كانی ژیاندا تاو دابوو.
من و ئه‌و هه‌ر ته‌نیا خوشك و برا نه‌بووین، هه‌م دوانه‌ و خاوه‌ن په‌یوه‌ندییه‌كی‌ رۆحی‌ بووین، هه‌م هاوڕێ و دواتریش هه‌ڤاڵ‌ بووین له‌ ڕێكخستنه‌ نهێنییه‌كاندا پێكه‌وه‌ بووین تا ده‌ستگیر كردنی‌ و دواتر چوونی‌ بۆ شاخ و به‌شداریی له‌ خه‌باتی‌ چه‌كداری‌ هه‌ر پێكه‌وه‌ بووین. زۆرتر له‌ هه‌ر كه‌س ئه‌ركی‌ منه‌ له‌ ژیانی‌ پڕ نموونه‌یی بوونی‌ ئه‌و بدوێم و بینووسمه‌وه‌. هه‌ر به‌ ته‌نیا بۆ ئه‌وه‌ نا كه‌ نیشان درێت ئه‌و چی بوو و چی‌ كرد و چی‌ له‌ توانادا بوو، به‌ڵكو بۆ ئه‌وه‌ی گه‌نجی‌ كوردستانه‌كه‌م وه‌ك نموونه‌ چاوی‌ لێ بكه‌ن و بزانن له‌ رۆژگارێكی‌ زۆر سه‌خت دا گه‌نجێك توانی‌ چی بكات، چۆن خۆی‌ په‌روه‌رده‌ بكات، چۆن خزمه‌تی‌ بزووتنه‌وه‌ی‌ رزگاری‌ و دۆزی‌ نه‌ته‌وه‌یی و بكات و چ پێگه‌یه‌ك بۆ خۆی‌ له‌ مێژووی‌ میلله‌ته‌كه‌ی‌ بگرێت. من نووسه‌ر نیم و سه‌ر و سه‌واشم له‌گه‌ڵ‌ دنیای‌ نووسین نییه‌، بۆیه‌ هه‌ر به‌ زمانی‌ ساده‌ لێره‌ و له‌م یاده‌ تاڵه‌دا یاداشت ده‌كه‌م.
كه‌ منداڵ بووین تێكۆشه‌ری‌ جوانه‌مه‌رگ و مامۆستا و براگه‌وره‌مان كاك نوری برا (كوردپه‌روه‌رێكی‌ ئازا و تێكۆشه‌رێكی‌ نه‌به‌ردی‌ كوردایه‌تی‌ و جێی سه‌رسامی‌ جه‌نابی‌ مام جه‌لال و تێكۆشه‌رانی‌ دیكه‌ی‌ خه‌باتی‌ كوردایه‌تی‌ بوو و له‌ به‌غدا له‌ شه‌سته‌كاندا تیرۆر كرا)، فێری هۆنراوه‌ نیشتمانییه‌كانی حاجی قادری كۆیی ‌و شاعیره‌كانی تری ده‌كردین بیرمه‌ پێشه‌وا هه‌ر زوو له‌به‌ری ده‌كردن ‌و پرسیاری ماناكانی له‌ كاك نوری‌ ده‌كرد ئه‌ویش به‌ سنگێكی فراوان ‌و زۆر به‌ خۆشحاڵیه‌وه‌ بۆی شی ده‌كردوه‌.
كه‌ چووینه‌ قوتابخانه‌ی سه‌ره‌تایی هه‌موو رۆژی پێنج شه‌مان هۆنراوه‌یه‌كی ده‌خوێنده‌وه‌‌و، به‌ڕێوه‌به‌ر ‌و مامۆستاكان سه‌رسام ده‌بوون له‌ توانای، به‌تایبه‌تی مامۆستا زه‌كی احمد هه‌ناری به‌ڕێوه‌به‌ر كه‌ خۆیشی هۆنراوه‌ی ده‌نووسی هه‌موو ساڵه‌كانی خوێندنی به‌ سه‌ركه‌وتوترین شێوه‌ ده‌بڕی. دوای ماوه‌یه‌كی كورت پیچشه‌وا به‌هره‌ی هۆنراوه‌ نووسینی تێدا ده‌ركه‌وت ‌و ده‌ستی كرد به‌ هۆنراوه‌ نووسین، به‌ڵام نه‌یده‌ویست هیچ كام له‌ خوشك و براكانی‌ هۆنراوه‌كانی ببینن و بخوێنه‌وه‌. ته‌نانه‌ت ئه‌گه‌ر یه‌كیچكمان هۆنراوه‌كانمان بخوێندبایه‌وه‌ ئه‌و په‌ڕانه‌ی‌ ده‌دڕاند كه‌ هۆنراوه‌كه‌ی‌ تێدا نووسیبوو.
كه‌ گه‌یشتینه‌ پۆلی شه‌شه‌می سه‌ره‌تایی به‌هره‌ی زیاتری تێدا ده‌ركه‌وت ‌و له‌ پشووی هاوین تێكستی شانۆیی ده‌نووسی ‌و هه‌ر خۆیشی سیناریۆی بۆ ده‌نووسی ئێمه‌ (من ‌و پێشه‌وا ‌و پشتیوانی برامان و نازه‌نینی‌ خوشكمان) ئه‌كته‌ر ده‌بووین و هه‌ر له‌ ماڵه‌كه‌ی‌ خۆماندا نمایشمان ده‌كرد و زۆر جار خۆی ده‌وری سه‌ره‌كی تێدا ده‌بینی.
له‌ هه‌مان كاتیشدا شكاری ووشه‌ كوردیه‌كانی ده‌كرد ‌و كه‌ له‌ چیه‌وه‌ هاتوون ‌و ماناكانیان چی یه‌ ‌و به‌راوردی ده‌كردن به‌ ووشه‌ی فارسی كه‌ نزیكترین زمانه‌ له‌ زمانی كوردییه‌وه‌ هۆی نه‌مانی هه‌ندێ پیتی له‌ كوردی ‌و هێندی پیتی ده‌كرد له‌ فارسی. كه‌ چووینه‌ قۆناغی ناوه‌ندی به‌ باشترین شێوه‌ داڕشتنی كوردی ‌و عه‌ره‌بی ده‌نووسی، مامۆستای عه‌ره‌بی كه‌ براده‌ر ‌و دۆستی كاك ئه‌شره‌فی برامان و ئه‌ده‌ب دۆست ‌و زیره‌ك بوو، زۆر سه‌رسام ببوو به‌ توانا له‌ ڕاده‌به‌ده‌ره‌كانی پێشه‌وا ‌و له‌ زانیاره‌كانی له‌ هه‌موو بواره‌كاندا، هه‌ر ئه‌وسا وتبووی كه‌ پێشه‌وا ده‌بێته‌ مرۆڤێكی مه‌زن هه‌ر واش ده‌رچوو.
له‌ ساڵی 1974 له‌ قۆناغی دواناوه‌ندی كه‌ چووینه‌ سلێمانی ده‌ستمان كرد به‌ كاری رێكخستن هه‌ر زوو توانا زۆره‌كانی ده‌ركه‌وتن ‌و له‌ ماوه‌یه‌كی زۆر كه‌مدا و له‌و دۆخه‌ دژواره‌دا توانی زۆرترین خه‌ڵك بهێنیته‌ ناو رێكخستنه‌كان ‌و هه‌ر خۆیشی هه‌موو بڵاوكراوه‌ و زانیاریی و بابه‌ته‌ رۆشنبیرییه‌كانی‌ په‌یوه‌ست به‌ كار و ئه‌ركی‌ رێكخستنی‌ ده‌نوسی ‌و تاكو به‌هاری 1975 كه‌ شۆرشی كوردی توایه‌وه‌ ئێمه‌ ‌و (پێشه‌وا و من پشتیوان) ‌و زۆرینه‌ی خه‌ڵكی ناو رێكخستنه‌كان ویستمان بچینه‌وه‌ شاخ ‌و شۆرش ده‌ستپێ بكه‌ینه‌وه‌، به‌ڵام له‌لایه‌ن ماڵه‌وه‌ ‌و رێكخستنه‌كانه‌وه‌ رێگه‌مان پێنه‌درا، وتیان هێشتا زووه‌ بۆ ئه‌وه‌. دوایی له‌ ساڵی 1976 دوای ئه‌وه‌ی پۆلی شه‌شه‌می‌ ئاماده‌ییمان ته‌واو كرد، به‌هۆی گیرانی یه‌كێ له‌ هاورێكانی پێشه‌واس ده‌ستگیر كرا، به‌هۆی خۆڕاگریی، به‌هێزی به‌رامبه‌ر ئه‌شكه‌نجه‌ دڕندانه‌ییه‌كانی به‌عس. هه‌موو نهێنیه‌كانی پاراست ‌و نموونه‌ی پیاوی ئازا ‌و تێكۆشه‌ر بوو له‌ ناو زیندان و كه‌ ئازادیش كرا چووه‌وه‌ بۆ زانكۆی به‌غداو ده‌ستی به‌ كاری رێكخستن كرده‌وه‌ ‌و بوێرانه‌تر له‌ جاران كاری‌ ده‌كرد، دوایی ئه‌وه‌ی‌ پۆلێ له‌ براده‌ره‌كانی ده‌ستگیر كران، ئه‌مجاره‌ پێشه‌وا خوێندنی‌ كۆلیژی‌ پزیشكی‌ ڤێته‌رنه‌ری‌ جێهێشت و چووه‌ ریزی شۆرش، چونكه‌ هیچ شتێك لای ئه‌و له‌ خاك ‌و نیشتمان و مه‌سه‌له‌ی‌ رزگاریی نیشتمانیی پیرۆزتر نه‌بوو. بووه‌ پێشمه‌رگه‌ ‌و له‌وێش به‌ وره‌ پۆڵایینه‌كانییه‌وه‌ له‌ شاخ جارێكی تر تێهه‌ڵچووه‌وه‌‌و توانی له‌ناو كۆنگره‌دا زۆرترین ده‌نگ به‌ ده‌ست بهێنێت به‌هۆی له‌ خۆبردوویی، فیداكاریی‌و تواناكانی خاكیی بوونی‌. كه‌ هه‌رده‌م له‌گه‌ڵ پێشمه‌رگه‌كان برا و مشورخۆری‌ هه‌مووان و به‌سیت تر له‌ هه‌مووان بوو.
پێشه‌وا هه‌ر له‌ ژیانی‌ رێكخستن و له‌ زیندان ئازا و بوێر و دلێر و به‌جه‌رگ و خۆڕاگر نه‌بوو، به‌ڵكو له‌ پێشمه‌رگایه‌تی‌ و هه‌موو هه‌ڵوێست و بیر و باوه‌ڕه‌كانیشیدا هه‌روه‌ها بوو.
زۆر ده‌چووم بۆ شاخ بۆ لای د. پێشه‌وای برام، به‌ڵام جارێك كه‌ چووم بۆلای‌ له‌ به‌رگه‌ڵوو له‌ نه‌خۆشخانه‌كه‌ بوو. بۆ به‌یانیه‌كه‌ی فرۆكه‌یه‌كی به‌عس هات ‌و بۆمبارانی ناوچه‌كه‌ی كرد ‌و منیش وه‌كو هه‌موو خه‌ڵكه‌كه‌ خۆم شارده‌وه‌ دوایی وتیان فرۆكه‌كه‌ له‌ نه‌خۆشخانه‌كه‌ی داو منیش ڕام كرد بۆ ئه‌وه‌ی بینیم پیشه‌وا چی‌ به‌سه‌ر هاتووه‌. به‌بێ ئه‌وه‌ شێوا بێت یان ترس به‌ ده‌م ‌و چاویه‌وه‌ دیار بێ دانیشتبوو خه‌ریكی‌ نووسین بوو.
وتم ئه‌ی تۆ بۆ ڕات نه‌كردوه‌؟ وتی ئه‌ی له‌ منت نه‌كه‌وێ برات له‌ فرۆكه‌ ‌و تۆپی به‌عس ناترسێ تا ڕا بكه‌م، ئه‌مه‌ وره‌ ده‌داته‌ پێشمه‌رگه‌ و خه‌ڵكی‌ دێ و ناوچه‌كه‌ش.
كه‌ ئه‌مه‌ ده‌نووسم قوڵپی‌ گریان ئه‌وكی‌ گرتووم، ده‌ستم ده‌له‌رزێ. فرمێسكم به‌ خوڕ دێ‌، ئه‌و دڵه‌ به‌هێزه‌ی تۆ كه‌ فرۆكه‌ ‌و تۆپی دوژمن نه‌یهه‌ژاند ئه‌ی بۆ به‌رگه‌ی ماوه‌یه‌كی كه‌می شێرپه‌نجه‌ی نه‌گرت!!
تۆ برا و ڕێنوێن و ئه‌و خۆره‌ هه‌ڵاتووه‌ی من ‌و خێزانه‌كه‌ت باوانت ‌و كوردستان بووی بۆچی تیشكه‌ به‌هێزه‌كانت وا زوو پێچایه‌وه‌. ئه‌وه‌ش بزانه‌ كه‌ تیشكه‌كانت هێشتا له‌ناو دڵی من ‌و هه‌زارانی تر هه‌ر دره‌وشاوه‌ن وه‌كو جاران كاریگه‌ریی خۆیان هه‌یه‌.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*