سەرەکی » کەلتوور » له‌ شامه‌وه‌ بۆ ئیمرالیی ئۆج ئالان

ته‌رازووی كوردته‌رازووی كورد

له‌ شامه‌وه‌ بۆ ئیمرالیی ئۆج ئالان

وه‌رگێرانی له‌ توركیه‌وه‌: شنۆ هیرانی

ن: موراد یه‌تكین

چواردەهەم

بڕیار بوو مینی پاسه‌كه‌ له‌پاڵ یه‌كێ له‌ دیواره‌كانی باخه‌كه‌ و ڕاست به‌ڕاستی ده‌رگای سه‌ره‌كی خانوه‌كه‌ی ئۆج ئالان، پارك بكرێت و بورغوه‌كانی ده‌رگاكه‌ش شل بكرێنه‌وه‌ بۆ ئه‌وه‌ی له‌كاتی ته‌قینه‌وه‌كه‌دا ده‌رگاگه‌ له‌شوێنی خۆیدا ده‌ربچێ هێزی وێرانكاری ته‌قینه‌وه‌كه‌ كاریگه‌ریه‌كه‌ی زۆر زیاتر بێت. ئه‌و كه‌سه‌ی بڕیاربوو بۆمبه‌كه‌ بته‌قینێته‌وه‌، تاكه‌ شت كه‌ پێویست بوو بیكات ئه‌وه‌بوو له‌كاتی بینینی ئۆج ئالان و چوونه‌ ژووۆه‌وه‌ی بۆ ماڵه‌كه‌ له‌و ساته‌وه‌خته‌دا ده‌ست بنی به‌ دوگمه‌ی تایبه‌ت به‌ ته‌قاندنی بۆمبه‌كه‌. كه‌ ته‌وقیت كرابوو دوای ده‌ستنان به‌ دوگمه‌كه‌وه‌ به‌ بیست خوله‌ك بته‌قیه‌ته‌وه‌، به‌رده‌وام ئۆج ئالان ماوه‌ی دوو بۆ سێ كاتژمیر له‌سه‌ر ته‌له‌فۆن له‌و ماڵه‌دا ده‌مایه‌وه‌. بۆمبه‌كه‌ كاتێك بته‌قیایه‌ته‌وه‌ له‌دووری 150مه‌تر كاریگه‌ری بكوژی هه‌بوو. وا گریمانه‌ ده‌كرا له‌ئه‌گه‌ری ته‌قینه‌وه‌ی بۆمبه‌كه‌دا ئۆج ئالان و هه‌موو ئه‌و ئه‌ندامانه‌ی په‌كه‌كه‌ له‌بیناكه‌دا هه‌بوون، هه‌موویان له‌گه‌ڵ زه‌ویدا یه‌كسان بكرێن و كه‌س به‌سه‌لامه‌تی ده‌رنه‌چێ.
بهڵام ئه‌م كاره‌ له‌ ولاتێكی وه‌ك سوریا كه‌ ده‌وڵه‌تێكی پۆلیسی بوو، وه‌ك باس ده‌كرێ ئه‌وه‌نده‌ به‌سانایی كاری له‌م شێوه‌یه‌ جێبه‌جێ ناكرێ.
ئاسته‌نگی یه‌كه‌م، ئه‌وه‌بوو ئه‌و سیخوڕه‌ی میت كه‌ به‌ڕه‌گه‌ز سوری بوو، له‌دوا ساته‌كاندا په‌شیمان بۆیه‌وه‌ له‌وه‌ی ته‌قه‌مه‌نی به‌كاربهێنرێ و به‌و هۆیه‌شه‌وه‌ ئه‌ركه‌كه‌ی ڕه‌تكرده‌وه‌. له‌شوێنی ئه‌و هاوڵاتیه‌كی تری سوری ده‌ستنیشانكرا، ئه‌و كه‌سه‌ش په‌یوه‌ندی له‌گه‌ڵ میتدا هه‌بوو و سه‌ر به‌ یه‌كێ له‌و خێڵانه‌ بوو كه‌ ناكۆكیان له‌گه‌ڵ په‌كه‌كه‌دا هه‌بووو ئه‌ندامی (مه‌لاسیۆن) بوو. بهڵام به‌و كه‌سه‌ نه‌گوترا كه‌ ئه‌م مینی پاسه‌ بۆ ته‌قینه‌وه‌ له‌وێ پارك كراوه‌، بهڵام به‌پێچه‌وانه‌وه‌ وایان تێگه‌یاند كه‌ مینی پاسه‌كه‌ به‌گومانی بوونی ماده‌ی هۆشبه‌ر ده‌ستبه‌سه‌ر كراوه‌و له‌وێ دانراوه‌.
له‌به‌یانیه‌كه‌ی 6ی مایسی 1996 كاتێك له‌سه‌رۆكایه‌تی هۆبه‌ی (ئایتی) (هۆبه‌ی ئه‌له‌كترۆنیك و ته‌كنیكی هه‌واڵگری) سه‌ربه‌ ده‌زگاری هه‌واڵگری توركیا (میت) له‌ ئه‌نقه‌ره‌وه‌ هه‌واڵی ئه‌وه‌یاندا كه‌ ئۆج ئالان ده‌ستیكردووه‌ به‌ قسه‌كردن به‌ ته‌له‌فۆن و بێته‌ل. ئیتر فه‌رمان به‌ده‌ستبه‌كاربوونی ئه‌و تیمه‌ درا كه‌ ئه‌ركی ئه‌نجامدانی ته‌قینه‌وه‌كه‌یان پێ سپێردرابوو.
له‌م خاڵادا تیمه‌كه‌ی میت هه‌ڵه‌یه‌كی تری زۆر گه‌وره‌ ده‌كه‌ن، شوفێره‌ تازه‌كه‌ی ئۆتۆمۆبیله‌كه‌ ده‌یه‌وێت خۆی له‌پۆلیسه‌كانی هاتووچۆ بدزێته‌وه‌ كه‌ له‌و ساته‌وه‌خته‌دا له‌شێوه‌ی ده‌وریه‌ به‌ناوچه‌كه‌دا ده‌سوڕانه‌وه‌، ناچار ده‌بێ ئۆتۆمۆبیله‌كه‌ی نزیكه‌ی سه‌د مه‌ترێ له‌سه‌ره‌وه‌تر و به‌ ئاراسته‌ی پێچه‌وانه‌وه‌ پارك بكات. واتا له‌كاتی ته‌قاندنه‌وه‌ی بۆمبه‌كه‌دا ته‌قینه‌وه‌كه‌ كاریگه‌ری ڕاسته‌خۆی نه‌ده‌بوو له‌سه‌ر ئه‌و بینایه‌ی كه‌ ئۆج ئالانی تێدابوو.
راوێژكاری میت كۆكسال، له‌ناو بینای ده‌زگای میت و له‌ هۆبه‌ی (ئای تی)یه‌وه‌ وه‌ك ئه‌وه‌ی له‌په‌خشی ڕاسته‌وخۆدا بێت، به‌رێگایی (ئایمور) سه‌رۆكی ناوه‌ندی كۆنتر- تیرۆر چاودێری پێشهاته‌كانی ده‌كرد. بڕیاریان دابوو له‌هه‌موو حاڵه‌ته‌كاندا نابێ پاشگه‌زبنه‌وه‌ له‌ئه‌نجامدانی ته‌قینه‌وه‌كه‌دا. شوفێره‌كه‌ په‌نجه‌ی نا به‌دوگمه‌كه‌وه‌ و له‌و ناوه‌ دووركه‌وه‌ته‌وه‌.
ئۆتۆمۆبێله‌ بۆمبرێژكراوه‌كه‌ له‌ماوه‌ی بیست خوله‌كێكدا به‌ده‌نگێكی سه‌رسوڕهێنه‌ر ته‌قیه‌وه‌. له‌هه‌مات كات و ساتدا له‌چه‌ند شوێنێكیتر له‌شار چه‌ند ته‌قینه‌وه‌یه‌كی تری بچووك بچووك ڕوویاندا. به‌كاریگه‌ری ئه‌و مینی پاسه‌ی كه‌له‌پاركه‌كه‌دا ته‌قێنرایه‌وه‌، زیانێكی زۆر به‌خانوو و ماڵه‌كانی چوار ده‌ور گه‌یشت.
به‌پێ گێڕانه‌ویه‌ یه‌كی له‌و به‌رپرسانه‌ی كه‌ ئه‌وكاته‌ له‌ ئه‌نقه‌ره‌ و له‌ناو باره‌گای میت چاودێری پێشهات و ڕووداوه‌كانی شام-ی ده‌كرد «كاتێك ته‌قینه‌وه‌كه‌ ڕوویدا، ئۆج ئالان له‌گه‌ڵ قه‌ندیل له‌په‌یوه‌ندی دا بوو و په‌یوه‌ندیه‌كه‌ی پچڕا و هه‌موو كه‌ناڵه‌كانی په‌یوه‌ندی و گواستنه‌وه‌ی هه‌واڵه‌كانیان بێده‌نگ بوون. له‌ناو باره‌گای میت یشدا هه‌موویان پیرۆزبایان له‌یه‌كتری كرد.
بهڵام ئه‌مه‌ دڵخۆشیه‌كی زۆر بێ هوده‌و زوو بوو. دوای تێپه‌ڕبوونی ته‌نها پێنج خوله‌كێك، له‌و بێته‌له‌ی كه‌له‌قه‌ندیله‌وه‌ گوێیان لێده‌گرت ده‌نگی ئۆج ئالان دووباره‌ بیسترایه‌وه‌ و ده‌یگوت «لێره‌ ته‌قینه‌وه‌یه‌كی زۆر گه‌وره‌ ڕوویدا، هه‌ندێ زیانی گه‌یاندووه‌، بهڵام من باشم و هیچم لێنه‌هاتووه‌…. له‌ژیاندام»
ئۆج ئالان كه‌باسی وورده‌كاریه‌كانی ته‌قینه‌وه‌كه‌ی ده‌ركرد كه‌ چاڵێكی ده‌ بۆ پانزه‌ مه‌تری دروستكردبوو له‌سه‌ره‌تا پێوابوو كه‌ به‌ئامانجی كوشتنی به‌ مووشه‌ك هێرشیان كردووته‌ سه‌ر، دوای چه‌ندین ساڵ له‌م ڕووداوه‌و له‌و كاته‌ی بۆ نوسینی ئه‌م كتێبه‌ كارم ده‌كرد چاوپێكوتنێكم له‌گه‌ڵ مه‌همه‌ت ئایمور كه‌به‌رپرسێكی باڵای ده‌زگای هه‌واڵگری توركیا میت بوو، له‌و كاته‌و له‌هه‌مان كاتدا به‌رپرسی یه‌كه‌م بوو له‌ ئه‌نجامدانی (ئۆپراسیۆنی مه‌رسیدس)، ئه‌و گوتی « هه‌ڵه‌مانكرد… خۆزگه‌ به‌ یه‌شیل ئه‌م كاره‌مان بكردایا، ئه‌و ده‌یتوانی بیكات…ئێستا ئاپۆمان كوشتبوو».
هێشتا ده‌نگۆی ئه‌وه‌ له‌ئارادایه‌ كه‌ ئه‌و سیخوڕه‌ به‌ڕه‌گه‌ز سوریه‌ كه‌به‌هۆی خۆدزینه‌وه‌ له‌ پۆلیسی هاتووچۆوه‌ ئۆتۆمۆبیله‌كه‌ی له‌شوێنێكی هه‌ڵه‌ وه‌ستاندبوو به‌قورسی سزادراوه‌.. تا ئێستاشی له‌گه‌ڵدابێ كه‌س هیچ له‌باره‌یه‌وه‌ نازانێ و هیچیشی له‌سه‌ر نه‌بیستراوه‌. (سزای قورس له‌زمانی توركیدا واتا له‌سێداره‌دان یاخود گولله‌بارانكردن…… وه‌رگێر)

په‌راوێز:
39- «هێزه‌ سپیه‌كه‌« یاخود ئه‌و پێناسه‌یه‌ی كه‌ ئه‌جه‌وید له‌ساڵی 1973 به‌سه‌ر ڕای گشتیه‌وه‌ كردی به‌ماڵ رێكخراوی «كۆنتر-گه‌ریلا». ئه‌م رێكخراوه‌ پرۆژه‌یه‌كی ناتۆ بوو، له‌و وڵاتانه‌ی له‌ژێر داگیركاری سۆڤیه‌تدا ئه‌ندامانی هه‌موو جۆره‌ كرده‌وه‌كانی وه‌ك كوشتن، ته‌خریبات، هه‌واڵدان، ڕفاندن،پڕپاگه‌نده‌ی خراپ دامه‌زرا. بهڵام له‌هه‌موو ئه‌و وڵاتانه‌ی ئه‌م رێكخراوه‌ی تێدا دامه‌زرا له‌ناو سیاسه‌تی ڕاستڕه‌وه‌كاندا ڕۆچوو. بۆ نمونه‌ له‌ شوێنێكی وه‌كو ئیتاڵیا به‌ رێكخراوی (گڵادیۆ) ناوی ده‌ركرد. له‌توركیاش ئه‌و ناوه‌ی كه‌ پێی ته‌لقین ده‌كرێ (ئه‌رگه‌نه‌كۆن) ….
40- به‌پێی سه‌رچاوه‌ هه‌واڵگرییه‌كان. به‌ هه‌وڵێكی زۆر ده‌گمه‌ن له‌سه‌رچاوه‌یه‌ك ئه‌وه‌م ده‌ستكه‌وت. ئه‌م سه‌رچاوه‌یه‌ گوتی «ئه‌وكه‌سه‌ی باسمان لێوه‌كرد كه‌وته‌ ژێر لێكۆڵینه‌وه‌یه‌كی زۆر توندو به‌سزایه‌كی زۆر قورس گه‌یشت.
41-رۆژی 6-ی مایس رۆژی له‌ سێداره‌دانی ئه‌ندامانی پارتی (تی.جی.كه‌ی.ئۆ) ده‌نیز گێزمیش، یوسف ئه‌سڵان و حوسه‌ین ئینان له‌ ئه‌نقه‌ره‌ و له‌ساڵی 1972.
كه‌چی ئه‌و سه‌رچاوه‌ هه‌واڵگیریانه‌ی كه‌ ته‌ماسم له‌گه‌ڵیاندا گرت له‌سه‌روبه‌ندی ئاماده‌كاریه‌كانم بۆ نوسینی ئه‌م كتێبه‌، ئه‌وان ئه‌م مه‌سه‌له‌یه‌یان به‌ته‌واوه‌تی به‌رێكه‌وت به‌سته‌وه‌. ئه‌وه‌شیان گوت كه‌ هه‌واڵگری ته‌نها ته‌ركیزیان له‌سه‌ر ئه‌وه‌بووه‌ ئه‌وكاته‌ی ئۆج ئالان به‌مه‌به‌ستی ته‌له‌فۆنكردن ده‌چێته‌ ناو بیناكه‌وه‌.
به‌ر له‌ ئۆپراسیۆنه‌كه‌.. ئایا زانیارییه‌كان دزه‌یان پێكرابوون؟
به‌ڵێ، به‌هۆی هه‌ڵه‌كانه‌وه‌ ئۆپراسیۆنی مه‌رسیدس شكستی هێنا. بهڵام له‌ناو خودی ده‌وڵه‌تدا مقۆمقۆی ئه‌وه‌ په‌یدابوو كه‌ به‌ر له‌ئه‌نجامدانی ئۆپراسیۆنه‌كه‌ زانیارییه‌كان دزه‌یان پێكرابوون و به‌ده‌ست په‌كه‌كه‌ گه‌یشتبوون.
زیاتر باس له‌وه‌ده‌كرا كه‌ گوایه‌ یالچین كوچوك كه‌ ڕاوێژكاری مه‌سعود یه‌ڵماس كاتێك له‌ پاریس چاوی كوتبوو به‌ ئه‌ندامانی په‌كه‌كه‌ ئه‌م زانیارییه‌ی دزه‌ پێكردبوو بۆیان و پێڕاگه‌یاندبوون كه‌ ئه‌گه‌ری پلانێك له‌ ئارادایه‌ بۆ كوشتنی ئۆج ئالان. بهڵام ئۆج ئالان دوای ده‌ستگیركردنی له‌لێكۆڵینه‌وه‌كاندا ئه‌وه‌ی ڕه‌تكردبۆوه‌ كه‌ هیچ زانیاری پێشوه‌ختیان له‌م باره‌یه‌وه‌ پێگه‌یشتبێ. ئۆج ئالان گوتوبووی: ئه‌گه‌ر وابوایا رێوشوێنمان ده‌گرته‌به‌ر.
له‌لایه‌كی تر دوابه‌دوای شكستهێنانی ئۆپراسیۆنه‌كه‌، سۆنماز یۆكسال ڕاوێژكاری میت ده‌چێته‌ لای ئیسماعیل هه‌قی كه‌رادایی سه‌رۆكی ئه‌ركانی سوپای توركیا و سكاڵایی ئه‌وه‌ی لاده‌كات كه‌ سه‌رۆكی هۆبه‌ی هه‌واڵگری سوپا ئۆرگه‌نه‌ڕاڵ چه‌تین سانه‌ر پێش ئه‌نجامدانی ئۆپراسیۆنه‌كه‌ به‌ماوه‌یه‌ك له‌په‌یوه‌ندیه‌كی ته‌له‌فۆنی له‌گه‌ڵ باڵیۆزی توركیا له‌شام ئاسكیرا ئاتاشسی گوتویه‌تی «ئه‌زانم ئێستا ئه‌وانه‌ی ئێوه‌ گوێبیستی قسه‌كانمانن، با گوێبیست بن، په‌ت ئه‌خه‌ینه‌ ملی ئه‌م ئاپۆیه‌ و تا توركیا ڕایئه‌كێشین…. تیمه‌كانمان وا له‌رێگان، به‌دواوه‌یه‌یین». قسه‌كان سه‌ره‌ڕایی ئه‌وه‌ی ده‌زانرێ له‌لایه‌ن هه‌واڵگری سوریاوه‌ گوێی بۆ ئه‌گیرێ، بهڵام ده‌كرێ. دوای ئه‌م په‌یوه‌ندیه‌ ته‌له‌فۆنیه‌، بۆ نمونه‌ كه‌مپی ئه‌كادیمیایی مه‌عسوم قورزماز كه‌ده‌كه‌وته‌ سه‌ر رێگای فرۆكه‌خانه‌ی شام، هه‌روه‌ها ئه‌و ڤێلایه‌ی كه‌ ئۆج ئالانی لێده‌مایه‌وه‌ ژماره‌یه‌كی زۆر له‌ پاسه‌وانی ده‌وڵه‌ت بۆ پارێزگاریكردن لێین زیاد ده‌كرێن. به‌هه‌مان شێوه‌ ده‌وره‌ییه‌كانی پۆلیس زۆر به‌چڕی به‌چوارده‌وری ناوچه‌كه‌دا ده‌سوڕێنه‌وه‌.
ئه‌وه‌ی ڕاستی بێت به‌ر له‌وه‌ی ئه‌م هه‌وڵی تیرۆركردنه‌ ئه‌نجام بدرێت، زانیارییه‌كی وه‌ها كه‌وته‌ ده‌ستی ناوه‌نده‌ هه‌واڵگرییه‌كانی ئه‌نقه‌ره‌وه‌ كه‌وا له‌ (گۆلجولك) نزیكه‌ی یه‌ك ته‌ن له‌ ماده‌ی ته‌قه‌مه‌نیه‌كان دزراون وئه‌م مادانه‌ش له‌لایه‌ن سه‌ربازه‌كانه‌وه‌ دراوه‌ به‌ میت و ده‌زگای ئاسایش. داموده‌زگاكانی ده‌وڵه‌ت هاوشێوه‌ی كه‌وگیری لێهاتبوو. ئه‌و زانیاریانه‌ی كه‌ پێویست بوو زۆر به‌نهێنی بمێننه‌وه‌، زۆر به‌ ئاسانی دزه‌یان پێده‌كراو بڵاوده‌بوونه‌وه‌.
به‌شێكی تری رووداوه‌كه‌ له‌ دانپێدانانی ئۆج ئالان بخوێننه‌وه‌
له‌وهڵامی پرسیاری هه‌ردوو دادوه‌ر جه‌وده‌ت ڤالكان و ته‌لعه‌ت شالیك سه‌باره‌ت به‌هۆكاری هه‌ڕه‌شه‌كردن و به‌ئامانجگرتنی سه‌رۆكی شاره‌وانی ڤێرانشه‌هیر خه‌لیل ئیبراهیم كه‌ له‌شابای ئۆغڵو له‌ساڵی 1998 ئۆج ئالان گوتبووی «ئامانج كوشتنی من بوو، له‌سه‌ر ئه‌م ڕووداوه‌ش وه‌ك رێكخستن لێكۆڵینه‌وه‌یه‌كمان كرد، گه‌نجێكمان ده‌ستگیركرد له‌كوردانی سوریا و سه‌ر به‌ بنه‌ماڵه‌ی (مه‌لاسینۆ) و لێكۆڵینه‌وه‌مان له‌گه‌ڵیدا كرد. به‌پێی ئه‌و زانیاریانه‌ی دران به‌من ئه‌و گه‌نجه‌ هه‌مان ئه‌و كه‌سه‌بوو كه‌ ئۆتۆمۆبیله‌كه‌ی لێ خوڕیبوو. ئێمه‌ له‌م مه‌سه‌له‌یه‌ زیاتر لێكۆڵینه‌وه‌مان كرد، ئه‌ومان بۆ ڕوون بۆوه‌ كه‌ له‌سیڤه‌ره‌ك و ڤێران شه‌هیره‌وه‌ به‌سه‌ر هێلی حه‌سه‌كه‌ له‌سوریا هه‌ریه‌ك له‌ سادات بۆجاك و كه‌له‌شبای ئۆغڵو –ی سه‌رۆكی شاره‌وانی بنه‌ماڵه‌ی مه‌لاسینۆ رێكه‌تبوون له‌سه‌ر ناردنی ئه‌م گه‌نجه‌ به‌مه‌به‌ستی كوشتنی من. هۆكاری سه‌ره‌كی به‌ئامانج گرتنه‌كه‌ش ئه‌وه‌بوو كه‌ ئه‌و ده‌ستی هه‌بوو له‌ڕووداوی ته‌قینه‌وه‌كه‌ كه‌تێدا كوشتنی من ئامانجی سه‌ره‌كی بوو».
خێڵی مه‌لا سینۆ…. یاخود بنه‌ماڵه‌ی مه‌لاسینۆ له‌ ناوچه‌ی حه‌سه‌كه‌ی سوریا تایبه‌تمه‌ندیه‌كی هاوبه‌شیان له‌گه‌ڵ خێڵی بۆجاكه‌كان كه‌ له‌ناوه‌ندی شاری ئۆرفاوه‌ نیشته‌جێ بوون هه‌یه‌، ئه‌ویش دژایه‌تی و ناكۆكیه‌كانیان له‌گه‌ڵ په‌كه‌كه‌ بوو. كه‌ ئه‌وه‌ش خاڵیك بوو بۆ ئه‌وه‌ی په‌یوه‌ندی باشیان له‌گه‌ڵ یه‌كتریدا هه‌بێت.
میت له‌ (ئۆپراسۆنی مه‌رسیدس) نه‌یتوانی بگات به‌ ئامانجی خۆی. له‌به‌رامبه‌ر ئه‌وه‌ی سه‌ركه‌وتوو نه‌بوون له‌كوشتنی ئۆج ئالان، ده‌ستیانكرد به‌جموجۆڵێكی ئه‌كتیف له‌بواری كاری سیخوڕی و هه‌واڵگری له‌ناوچه‌كه‌دا، ئه‌مه‌ش بووه‌ هۆی دروستكردنی نیگه‌رانییه‌كی زۆر سه‌رتا له‌لایه‌ن ده‌زگایی هه‌واڵگری سوریاو پاشانیش یۆنان و به‌شه‌ یۆنانیه‌كه‌ی قوبرس.
به‌رپرس له‌ ئۆپراسیۆنه‌كه‌ مه‌همه‌ت ئایمور بوو كه‌ ئه‌وكاته‌ سه‌رۆكی ده‌زگای (كۆنترا- تیرۆر) بوو. بۆ ئاماده‌كردنی ئه‌م كتێبه‌ قسه‌م له‌گه‌ڵیدا كرد. ئه‌و پێی وابوو كه‌بۆ ده‌زگای هه‌واڵگری توركیا كاتێك توانی ئۆتۆمۆبیلێكی پڕ له‌ ته‌قه‌مه‌نی له‌توركیاوه‌ بهێنیته‌ ناو جه‌رگه‌ی پایته‌خت و له‌پاڵ لووتی ڕژێمه‌كه‌ی ئه‌سه‌د بیته‌قێنێته‌وه‌. ئه‌مه‌ نه‌ك ته‌نها بۆ سوریا، به‌ڵكو بۆ ناوچه‌كه‌ش نمایشی هێزبوو. به‌مانایه‌كی تر فاكته‌رێكی كاریگه‌ربوو به‌وه‌ی له‌داهاتوودا ڕۆڵێكی به‌رچاوی هه‌بێ له‌سنورداشكردنی ئۆج ئالان له‌سوریاوه‌.
هه‌وڵی كوشتنه‌كه‌ ئه‌گه‌ر له‌لایه‌نی سیاسییه‌وه‌ كاریگه‌ریه‌كی له‌مجۆره‌شی هه‌بووایه‌، بهڵام شكست هه‌ر شكسته‌. ئامانج كوشتنی ئۆج ئالان بوو، نه‌شتوانرا ئه‌مه‌ بكرێ. ئۆپراسیۆنه‌كه‌ی مه‌رسیدس نه‌یتوانی ئامانجه‌كه‌ی خۆی بپێكێت.
دوای ئه‌مه‌ش میت له‌هه‌وڵێكی تریشی بۆ كوشتنی ئۆج ئالان، تیمێكی تر ده‌نێرێت بۆ دۆڵی بیقاع له‌ لوبنان. ئۆج ئالان وه‌ك نه‌ریتێك هه‌موو ساڵێك له‌27ی تشرینی دووه‌مدا و به‌بۆنه‌ی ساڵیادی دامه‌زراندنی پارته‌كه‌ی ئه‌گه‌ر هه‌بوو له‌ماڵه‌كه‌ی خۆی له‌ بیقاع-ی لوبنان په‌یامێكی به‌ شێوه‌ی ڕاسته‌خۆ په‌خش بكات. ئه‌و ئۆپراسیۆنه‌ به‌رێگای گروپێك له‌ ماردینییه‌كان جێ به‌جێ ده‌كراو دووباره‌ یه‌شیل له‌ناو كاره‌كه‌دا هه‌بوو. بهڵام به‌هۆی نه‌بوونی زانیاری پشتڕاستكه‌ره‌وه‌ و ته‌نها به‌ئه‌گه‌ر نه‌یانتوانی پلانه‌كه‌یان جێبه‌جێ بكه‌ن. هۆكارێكی ترش هه‌بوو كه‌خانوه‌كه‌ كاری نوژه‌نكردنه‌وه‌ی تێدا ده‌كراو ئۆج ئالان ئه‌و ساڵه‌ نه‌ده‌چوو بۆ ئه‌وێ.
خۆی له‌خۆیدا چه‌ند هه‌فته‌یه‌ك پێش ئه‌م شكسته‌، واتا له‌3ی تشرینی دووه‌م هاوكات بوو له‌گه‌ڵ ئه‌و ئابرووچوونه‌ی له‌گه‌ڵ ئه‌و ڕووداوه‌ی هاتووچۆ كه‌ له‌سوسولك هاته‌كایه‌وه‌. به‌هۆیشیه‌وه‌ سه‌رۆكایه‌تی ئه‌ركانی سوپا گه‌یشته‌ ئه‌و بڕیاره‌ی كه‌ به‌هیچ شێوه‌یه‌ك پشتیوانی له‌هه‌وڵه‌كان بۆ ئه‌نجامدانی كاری هاوشێوه‌ نه‌كات. میتیش ملكه‌چی ئه‌وه‌بوو.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*