سەرەکی » ئاراستە » شەهید ئاسۆی شێخ عارف

ونناوەکانی شۆڕش

شەهید ئاسۆی شێخ عارف

ئازاد سه‌راوی

تۆ زنجیری قفڵگیری زیندانی دوژمنت شكاند لە كەركوكدا، لە زینداندا میدالی سەربەرزی و سەركەوتنت لە بەرۆكدا، هەیئەی كەركوك دیوارەكانی لە لای تۆ، شێرە بەفرینەی دوژمن بوو لە بەردەم گڕی هەناسەت دەتوایەوە، دەرگاكانی لە بەردەم ئیرادەی تۆدا دەكرایەوە.
ئاسۆ بۆ ئاسۆ دەیڕوانی، دەیڕوانیە كوڕاداوێ‌، تا لەوێوە هەنگاوەكانی هەڵباوێ‌، لەوێوە بڕیار بدات و نەخشەی نیشتمان بگۆڕێ‌، نیشتمانێك، مێژوویەكە هەر خوێناوی لێدەچۆڕێ‌، لێرەوە هەنگاو هەڵاوێ‌، تفەنگێك بكاتە شانی، ئەو شاخ و كێوو هەردانەی ملی شەوگار دەشكێنن و دەیگەیەنن بە بەیانی.
بازەگیرو لوتكەو بناری سەر شیوی كوڕاداوێ‌، پڕە لە قریوەی تفەنگ، لە تروسكایی شەوە زەنگ، لە دوا چرپە و هاوارو دەنگ، پڕە لە ناڵەو هەڵمەتی خێرای ئاسۆ، لە هەزاران كەڵە پشكۆ.
كوڕاداوێ‌ بەری گەورەو بەری بچوك، كاتێك كازیوەی دەمبەیان لەمبەراو بەری دێی ئەدا، لە نێو شەونمی بەیانیان وادەخەمڵی و ئاونگی تەڕی لێ‌ دەتكا، دەبوو بە بووك، بووكی جوانی كوردەواری، پڕ بوو لە نان و لە گەنم، لە سەدان هەناسەی گەرم، هەناسەی گەرمی دەروێشان، دەروێشانی ڕێی تێكۆشان.
كوڕاداوێ‌ مەڵبەندی كوردایەتی بوو بارەگای تیپی سی و حەوت، بە هەورازو تولە ڕێیدا هەر ڕێبوار بوو سەردەكەوت، ڕێبواری ڕێگەی ڕزگاری و ڕەنجدەرانی بیروو بازوو، ئەو ڕێبوارانەی نەسرەوتن هەتاكو شۆڕش سەركەوت.
جێگە پێی تۆ ئێستاش بە ڕێگە و شوانە ڕێی شارباژێڕ و نۆدێی ئالان، سەرە ڕێی دوانزە دێی دۆڵێ‌ جێماون و نەخشاون، بوونە هێڵێ‌، هێڵێك لە تابلۆیەكی سوور، لە ڕێبوارانی ڕێگەی دوور، بە سەر بەژنی تا ئەژنۆ باریووی گمۆ، لە بەرزایی خۆڵە پەتە جێ‌ پێ‌ و پوزەوانەكەت و هەناسەكەت بوونە تابلۆ، لە سەر بەفری سپی ئەوێ‌ هەموو وەرزێ‌ بەفر پشتێنێك دەكەوێ‌، جێ‌ پێ‌ و پوزەوانەكەت و ڕەختی تفەنگەكەی شانت، هاڵاوو گڕەی هەناسەت دەبینرێت و سەردەكەوێ‌، لە دوورەوە بە دیدەكەم بەژن و باڵای كەڵەگەتت لە ناو تەموومژی ئەوێ‌ ون نابێت و سەردەكەوێ‌.
شاناخسێ‌ بووە تابووتی دوا وەرزی تۆ، لە بەهاردا بووە خەزان بۆ مەرگی تۆ، لە نێو دوكەڵی كیمیایی دوا هەناسەت خنكاو سپارد، پێڵووی چاوەكانت لێكنا، بارگەو تەدارەكەت لێكنا بەرەو دوا هەوار ڕێكەوتی، تۆ پیاوێك بووی تا دوا هەناسە نەسرەوتی، دوا هەناسەت سپاردە دایكی نیشتمان، لە باوەشی خاكدا خەوتی.
هاوڕێكانت بەڵێنیان دابوو لەگەڵ تۆ پەیامەكەیان جێبێنن، مەشخەڵی شۆڕش لە شارو گەوەی شاخ دا داگیرسێنن، كۆڵ نەدەن تا شەهید دەبن بەڵێنەكەیان جێبێنن، هەروایانكرد تۆ ئێستاكە سەر هەڵبڕەو تەماشاكە لە گۆڕستانی شاناخسێ‌ لە تەنیشتا ڕاكشاون هەر هاوڕێكانی جارانن بەڵام كەمێك سەرو قژیان هاڵۆسكاوەو پووش مردە بوون و ژاكاون.
چەڕە دوكەڵی كیمیایی سەرو سیمایان ژاكاندبووی چاوەكانی پێ‌ لێكنابووی خەندەی لە لێوان تاراندبووی، وەك درەختێكی پایزەی باڵا بەرزی كوڕاداوێ‌ ڕووت ببوویتەوە لە گەڵا، گەڵاو گوڵی وەراندبووی، تەزبیحەكەت دەنكەكانی سپی ببوون ڕەنگی دوكەڵیان گرتبوو، كاتژمێری دەستی وردو خاش كردبوو شكاندبووی، بەڵام مەرگ هێشتاكە نەیبەزاندبووی.
ئاسۆی شێخ عارفی كوڕاداوێ‌ ئەو ناوەیە كە دێتەوە ناو یادگاری و یادەوەریم هەر خۆی نایە، لە گەڵ خۆیدا جەمالی عەلی باپیرو هێمن سەراوی و مەجیدی حاجی عەلی و شێركۆ جدی و حەمەی حاجی سەعید دێنێ‌، یەكەیەكەیان دەدوێنێ‌، بەر هەیوانم پڕ دەكات لە گەورە پیاوان لە قریوە، لە سرودەكەی مەشخەڵان، لە باڵندە خۆشخوانەكان لە جریوە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*