سەرەکی » وتار » ماردین عەبدولکەریم » كۆرۆنا و داعش كامیان مەترسیدارترە؟!پەڕە 3

دەرگا

كۆرۆنا و داعش كامیان مەترسیدارترە؟!

لە دوو زەمەنی بەدوایەكدا، دوو ڤایرەسی جیاواز كۆرۆنا و داعش، دروستبوون و سەرجەم مرۆڤایەتییان تۆقاند.
كۆرۆنا و داعش روخسارێكی جیا، بەڵام هاوئامانج لە كوشتنی مرۆڤگەلێك لە هەر كوێیەكی جیهان بن.
كۆرۆنا سنوور ناناسێ‌ و لە ووهانی چینەوە سەریهەڵدا و بەخێرایی تیر ئاسا خۆیكرد بە نێو (104) ووڵاتی جیهاندا و تا ئەمڕۆش رۆحی (3571) كەسی كێشاوە، تەنانەت لە كاتی نووسینی ئەم وتارەدا نەك عیراق بگرە شارەكەم سلێمانی وەك هەموو جارێك پشكی خۆی لە خەم بەركەوتووە.
داعشیش سەرەتا لە عیراق و شامەوە دەركەوت و دواتر پەلی هاویشتە زۆربەی وڵاتانی ئاسیا و ئەفریقا و بە كردەوە تیرۆریستییەكانیشی ئەوروپا و ئەمریكاشی بێدڵ نەكردووە.
كۆرۆنا لە ووهان زۆرترین قوربانیدا، جینۆسایدی داعشیش لە شەنگال و موسڵ مرۆڤایەتی شەرمەزاركرد جگە لە كوشتنی (3) هەزار ئێزدی، نزیكەی (5) هەزار كەسی بێسەروشوێن كرد و لە موسڵیش تا رزگاركردنی( 9-11) هەزار كەس بوونە قوربانی، ئەمە جگە لە ئاماری قوربانیان لەسەر ئاستی جیهان.
كۆرۆنا روخسارێكی ناشیرینی هەیە بەوە نییە تاجی لەسەر ناوە، لە وشەی مەرگ بەولاوە هیچیتر نازانێ‌، مەگەر كەسێك بە ئیرادەی بەرزی، خۆی لە ژێر چنگی رزگار بكات.
داعشیش دەموچاوی خۆی شاردۆتەوە چونكە لە ژێریدا وەحشێك خۆی مەلاس داوە بۆ كوشتن، سەربڕین، سووتاندن، لاقەكردن، فرۆشتنی رۆحێك لەژێر ناوی ئیسلامدا.
كۆرۆنا شەقام و كۆڵان، قوتابخانە و مزگەوت، چێشتخانە و كافێكانی چۆڵكردووە، بەڵام دەروون و زوبان و راگەیاندنی هەموو جیهانی بە باسی خۆی تەیكردووە. هەندێ‌ جار ترس و دڵەڕاوكێ‌ و بیركردنەوە لە مەرگی ئازیزانت، هەندێ‌ جاریش بێباكی تەنانەت لە مەرگی خۆشت.
ئەو دێت و بە دەستلێدانێ‌ میدالی مەرگ لە یەخەت دەدات، ئیدی پێویست ناكات دا و بنێیتەوە بۆ چوونە خزمەتی، بەڵام داعش هەموو رێگا ناشەرعی و نایاساییەكانی گرتەبەر بۆ فۆرماتی مێشكی مرۆڤەكان بەبیر و هزرە سەلەفی و بەناوجیهادییەكەی.
كرۆنا بەزەیی نییە و جیاوازی ناكات لە كێشانی رۆحی مرۆڤەكان گەورە بن یان بچووك، تاك بن یان كۆ، بێ‌ جیاوازی ناوچە یان دین، ئیسلام بێت یان مەسیحی، جولەكە بن یان بێدین.
داعشیش بە ناوی خەلافەتی ئیسلامەوە بەكردەوە تێرۆریستییەكانی هەزاران ئیسلام و مەسیحی نغرۆی خوێنكرد.
لە پشت قوربانییەكانی ڤایرۆسی كرۆناوە دەیان چیرۆكی تاڵ هەن كە مرۆڤایەتی دەهەژێنێ‌، وەك ئەوباوكەی تووشی كرۆنا بوو، بردیانە نەخۆشخانە بۆ چارەسەر، بەڵام كوڕە كەمئەندامە بێ‌ كەسەكەی لە ماڵەوە لە برسا مرد.
لە پشت تاوانەكانی رێكخراوی داعشیشەوە دەیان چیرۆكی ئابڕوبەر هەن، كە نەدین نە ویژدان نە مرۆڤایەتی قبوڵی ناكەن. وەك كوشتنی دایك لەبەردەم منداڵ، لاقەكردنی ژنان و دواتر نرخ دانان لەسەریان بۆ فرۆشتن لە پاڵ مەڕوماڵاتدا بەپێوەری جوانی و گەنجی لە (50-200) دینار و لە بازاڕەكانی موسڵ و رەققەدا ساخ دەكرانەوە.
(دڵدارەكەم داعشە) خوێندنەوەی ئەم رۆمانە پڕ ئازارە هەوێنی نووسینی ئەم بابەتەم بوو، دەڵێن كۆرۆنا ژن ناكوژێ‌، هەڵبەت لۆژیك ئەوەیە كە ژن لە رووی بایەلۆژییەوە لەشی هەندێ‌ هۆرمۆن دەردەدات كە وادەكات بەرگریی لەشی بەرانبەر ڤایرۆس بەهێزتربێ‌ لە پیاوان. بەڵام ژەهری بەناو ئیسلامی داعش لەمەدا لە كرۆناش بكوژترە زۆرترین قوربانی دەستی داعش ژنان بوون، هەڵبەت بە ناوی دەستكەوتی شەڕ بۆ تێركردنی ئارەزووە شەیتانییەكانیان زیاتر لە (1500) ژن و كچیان لاقەكرد، نادیە موراد كچە كوردی ئێزدی كە توانی خۆی لەدەستی ئەم جەلادانە رزگار بكات خۆی و دایك و شەش خوشكی نموونەی قوربانی دەستی ئەو دڕندانە بوون.
بڵاوبوونەوەی تۆڕێك لە ژنانی داعش بەگشت جیهاندا بۆ فریودانی ژنان لەسەرجەم نەتەوە جیاوازەكان بەناوی خزمەتكردن بەماڵی خودا پلانێكی تری قێزەونی داعشە نەگریسەكان بوو.
هەڵبەت لەیلای میسری پاڵەوانی رۆمانی (دڵدارەكەم داعشە) یەكێكی ترە لە قوربانییەكانی داعش كە خۆی و دەستە خوشكەكانی سەرەتا هەریەك بەهۆی چیرۆكێكی جیاواز بۆ نێو ریزەكانی داعش هەڵاتن، بەڵام دواتر هەمووان بوونە خاوەنی یەك چیرۆك.
هەرچەند لەبارەی ئەم رۆمانەوە بڵێم ناتوانم تەرجەمەی فرمێسكەكانی نە نادیە موراد و نە لەیلای میسری و نە خۆم بكەم لە خوێندنەوەی رۆمانەكەدا بۆ وشە.
دوا سەرنج ئەوەیە دەۆترێ‌ كۆرۆنا جەنگێكی بایۆلۆژییە و هەڕەشەیە بۆ سەر هاووڵاتییانی مەدەنی، وەلێ‌ داعش دەهێندەی سەرباز، خەڵكی سڤیلی كوشت، بە زیندوویی ئاگری لە جەستەی پێشمەرگە بەردا، سەری خەڵكی بێتاوانی پەڕاند، ئابڕووی ژن و كچانی برد، كەچی نیوهێندەنی كۆرۆنا لێی نەترساین!!
ئەرێ‌ بەراست كامیان مەترسیدارترە؟!

*گۆشەیەكە دوو هەفتە جارێك لە دەرگای بابەتێك دەدات

print

 691 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*