سەرەکی » وتار » عەتا کەریم‌ » ناهەقی لە 100 تا 150 مەتریی هەولێردا

ناوه‌ڕاستی هه‌فته‌

ناهەقی لە 100 تا 150 مەتریی هەولێردا

پڕۆژەی رێگاوبانی 100، 120، 150 مەتریی لە هەولێر، پێویستە و غەدری گەورەیشی لێكرا كە پایتەختی هەرێم بێت و بە درەنگ وەختەوە بووە خاوەنی ئەم سێ رێگە ستراتیژییە، بەڵام جارێكی دیكەش غەدری لێكرایەوە، كە تەنیا وەك رێگەیەك بۆ ئۆتۆمبێل حسابی بۆ كراوە، بەبێ ئەوەی ئەڵتەرناتیڤی ئۆتۆمبێلیش لەو سێ شاڕێیەدا هەبن.
لە هەموو پڕۆژەیەكدا دوورایی ستراتیژیی زۆر گرنگە، بەڵام لە زۆربەی پڕۆژەكانی كوردستاندا كە كراون، ئەو دوراییانە رەچاو نەكراون، ئەوانەیشی كە دەكرێن، دیسانەوە هەر نابینرێن (ئەویش بە خستنەڕووی ماكێت و پڕۆپۆزەڵی پڕۆژەكان)، بەوپێیەی ئەم پڕۆژانەی هەولێر كە بە دەستكەوتی گەورە وێنا دەكرێن، دەبوایە لە ئاست گەورەیی ناوی پایتەختیشدا بن، نەك وەك ئەوەی بە باراناوێك بەسەر شەقامەكاندا هاتن و بەشێكیان داڕمان.
كاتێك ئەم پڕۆژانە لە ئاست ناوبانگی پایتەختێتیدا دەبن، كە بەدیلی رێگەی ئۆتۆمبێلیش هەبوونایە، كە ناكرێت چیتر هەرێم بەبێ هێڵی هاتوچۆی میترۆ بێت كە دەبێتەوە بە بەدیلێكی زۆرباش بۆ هاتوچۆ.
هەروەها دەكرا دیسان هەمان رووبەری بازنەیی حسابی راكێشانی هێڵی ترامی بۆ بكرێت، ئەوكاتە لەجیاتی بەدیلێك، دوو بەدیل بە ترام و میترۆ بۆ هاتوچۆی ئۆتۆمبێل دەدۆزرانەوە.
رەنگە باس لە قەیرانی دارایی و ئابووریی ببنە بیانووی حازربەدەستی كاربەستانی هەرێم، بەوپێیەی تەنیا هۆكارەكە نەبوونی پلانی ستراتیژییە لە پڕۆژە ستراتیژییەكاندا.
دەكرا بەو بودجەیەی بۆ رێگای هاتوچۆی ئۆتۆمبێلی 120 و 150 مەتریی هەولێر سەرفكرا، ئەوا لانیكەم دەتوانرا بەهاوبەشیی كۆمپانیایەكی بیانیی لەسەر رێگای 100 مەتری هەولێر هێلی میترۆ رابكێشرایە، هەرنا هێڵی ترام، گریمان لە 100 مەتریدا لەبیركرا، خۆ دەكرا لە 120 مەترییەكە بیری لێ بكرایەتەوە، لەوێش لەبیركرا!! ئەدی نەدەكرا لە 150 مەتریدا لەبیرتان بوایە؟
بەهەرحاڵ بەهۆی نەبوونی پلان بۆ هاتوچۆ و دۆزینەوەی بەدیلی ئۆتۆمبێل، هەولێری پایتەخت لە ترام و میترۆ بێبەش مەكەن، چونكە هێشتا ئومێدی ترام هەیە، بەڵام ئەوەی گرنگە هێشتا شەقامی 100 مەتریی سلێمانی كاری تێدا نەكراوە و دەشێت پلانی ستراتیژی بۆ دابنرێت و حسابی ورد بۆ راكێشانی هێڵی ترام و میترۆی بۆ بكرێت، لانیكەم یەكێكیانی بۆ بكرێت كە باشترە میترۆبێت، بەو پێیەی كارەكانی لەژێرخاندایە و ئاسنترە لە ئێستادا و بۆ دوورایی ستراتیژیش دەشێت لە ئایندەدا ترامی بۆ رابكێشرێت.
پایتەخت لەمەدا كرایە قوربانیی بێ پلانیی ستراتیژیی، بەڵام دەشێت بە لەبەرچاوگرتنی هەڵەی هەولێر لە پڕۆژەی 100 مەتریی سلێمانیدا دووبارە نەبێتەوە، چونكە 100 مەتری دوا بازنەی رێگایە بەدەوری سلێمانیدا رادەكێشرێت و بەهۆی هەڵكەوتە جوگرافییەكەیەوە شاخی گۆیژە و هەزارمێرد رێگەی بازنەی دیكەی پێنادەن.
گرنگیی بەدیلی ئۆتۆمبێل، سوودی زۆری هەیە لەڕووی كەمكردنەوەی گوشار لەسەر رێگەكان و هەروەها پاراستنی ژینگە و گێڕانەوەی هاووڵاتیان بۆ بەكارهێنانی بەدیلی ئۆتۆمبێل و هەروەها سەرچاوەی داهاتێكی درێژخایەنیشە بۆ هەرێم.

 159 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*