سەرەکی » مانشێت » نوێبوونەوەی یەكێتی و خەباتی مافەكان

لە پەراوێزی پەیامەكەی سەرۆكایەتیدا

نوێبوونەوەی یەكێتی و خەباتی مافەكان

سەرۆكایەتیی یەكێتیی نیشتمانیی كوردستان، لە پەیامی تایبەت بە یادی 45هەمین ساڵیادی دامەزراندنی یەكێتیدا، چەندین پرسی گرنگ و جێگەی بایەخ دەوروژێنێت كە دەكرێت وەك هێڵ و خەتی فیكری و سیاسیی ئێستای سەركردایەتیی نوێی یەكێتی لە دوای چوارەمین كۆنگرەی نوێبوونەوەی حزبەكە، سەیری بكەین. وەك پابەندبوون بە ئەركی نوێی خەباتی سیاسی، سەرخستنی باوەڕە نەگۆڕەكانی یەكێتی بۆ پرسی ئاشتی و ئازادی، مافی چارەی خۆنووسین، دیموكراسی، مافی مرۆڤ و دادپەروەریی كۆمەڵایەتی و دابینكردنی ژیانێكی باشتر بۆ كۆمەڵانی خەڵكی كوردستان و.. تاد.

بەڵام ئەوەی كە ئێستا لە ئەدەبیات و رەوتی فیكری و سیاسیی یەكێتیدا دەكرێت وەك جۆرێك لە وتاری سیاسیی حزبەكەش سەیر بكرێت، كاركردنە بۆ دووبارە بایەخدانەوە بە «خەباتی مافەكان»ی خەڵكی كوردستان. كاركردن و قووڵبوونەوەی ئەمجۆرە دەستەواژانە لە ئەدەبیاتی یەكێتیدا نوێ نین، لە دامەزراندنی یەكێتییەوە، كە ئەو كات یەكێتی لە ژێر تەوژمی بیری چەپدا خەباتی سیاسی لە هەرێمی كوردستاندا ژیاندەوە. زۆر جەختی لە خەباتی مافەكان دەكردەوە، بێگومان خەباتی مافەكان لەوكاتەدا، خۆی لە چوارچێوەی قەوارەیەكی سیاسی و ئازاد و دیموكراتی نەتەوەیی لە بازنەی باشووری كوردستاندا دەبینییەوە. لە قۆناغەكانی دواتریش یەكێتی كەم و زۆر كاری لەسەر خەباتی مافەكان كردووە، بەڵام وەك چۆن دەوترێت هەموو قۆناغێك پێداویستی مێژوویی و سیاسی خۆی هەیە، خەباتكردن لە پێناوی مافەكاندا جیاواز بووە.

هەنووكە بۆچی خەباتی مافەكان؟ هاوسەرۆكان و سەركردایەتیی نوێی یەكێتی بۆچی دەیانەوێت ئەم پرسە تۆخ بكرێتەوە؟ بێگومان دۆخی سیاسی و ئابووریی و كۆمەڵایەتی و مافەكانی مرۆڤ، لە ئێستای ناوچەكە و هەرێمی كوردستانیش لە گۆڕاندان، ئەمەش پابەندیی حزبە سیاسییەكان بۆ خەبات لە پێناوی دابینكردنی ژیانێكی باشتر و دوورخستنەوەی خەڵكی هەرێم لە هەر جۆرە مەترسییەك زیاتر دەكات. سەركردایەتیی نوێی یەكێتی، دراسەیەكی وردی قۆناغی ئێستای هەرێمی كوردستانی كردووە، ئەمەش بەڕوونی لە دوایین پەیامدا رەنگی داوەتەوە.

بۆیە بەر لە هەر هێز و لایەنێكی تر دەیانەوێت خەباتی مافەكانی خەڵكی كوردستان بكەن، بۆ ئەوەش یەكێتی لەو رێیەوە بەپێی میكانیزم و سیاسەتی تیمەكەی لە حكومەت و پەرلەمان خەبات دەكات.

بوونی یەكێتی لە دەسەڵاتدا بەتایبەت لەم قۆناغەی ئێستای هەرێمی كوردستاندا، بەرپرسیارێتی زیاتر دەكات، بەڵام بۆ ئەوەش ئەگەر لە وتاری سیاسی دوای چوارەمین كۆنگرەی یەكێتی بڕوانین، بەڕوونی داوای ئەوە كراوە كە ژیانێكی باشتر بۆ خەڵكی هەرێمی كوردستان دابین بكرێت. باوەڕی سەركردایەتیی نوێی یەكێتی وایە كە ئەرك و مافی خەڵكی كوردستان جێگەی گرنگی پێدانن. وەك لە پەیامەكەشدا لە بارەی خەباتی مافەكان بەڕوونی وتراوە كە: «لەم ساڵیادەدا رایدەگەیەنین كە دوای كۆنگرە یەكێتی نوێ (خەباتی مافەكانی) بەرەو پێشبردووە. ئێمە لە سەرۆكایەتیی یەكێتی دەمانەوێت بە سوودوەرگرتنی تەواو لە بنەما فیكری و دامەزراوەییەكانی سۆشیال دیموكرات و پیادەكردنی لە كۆی سیستمی حوكمڕانیدا كێشە بنچینەییەكانی ئێستای هەرێمی كوردستان چارەسەر بكەین.»

یەكێتی بۆ ئەم قۆناغە بە گەڕانەوە بۆ بنەماكانی سۆشیال دیموكرات و پیادەكردنی لە كۆی سیستمی سیاسیی ئێستای هەرێمی كوردستان، كار بۆ چارەسەری كێشە بنچینەییەكان لە بچووكترین مافەوە دەكات.
یەكێتی بۆ بەدیهێنانی ئەو خەباتە، روئیای سیاسی خۆی بەڕوونی خستۆتەڕوو، ئەویش نەهێشتنی قۆرغی سیاسی و دابەشكردنەوەی ئەرك و مافەكانە بەشێوەیەكی هاوسەنگ، دیدی یەكێتی وایە كە پڕۆسەی سیاسی و دابینكردنی ژیانێكی باشتر بۆ كۆمەڵانی خەڵكی كوردستان، بە قۆرغی سیاسی و ناهاوسەنگی نایەتە دی.

چونكە ئەوە جگەلەوەی كۆی مافەكان لە هەرێم دەخاتە مەترسییەوە، لە هەمانكاتدا چاوچنۆكی سیاسیش زیاتر دەكات. بۆیە سەرۆكایەتیی یەكێتی لەمڕووەوە پێیوایە شاڕێی گەیشتن بە خەباتی مافەكانی خەڵكی كوردستان »دروستكردنی باڵانسی هێز و رێزگرتنە لە ماف و ئازادییەكان».

کوردستانی نوێ

print

 205 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*