سەرەکی » مانشێت » چاپکراوی نوێی کوردستانی نوێ رامانی مامپەڕە 23

چاپکراوی نوێی کوردستانی نوێ رامانی مام

کتێب: رامانی مام
چاوپێکەوتن: هۆمەر شێخ موس
کاری هونەری: شۆڕش ئەحمەد
وێنەی بەرگ: حەمە عومەر
تیراژ: (1000) دانە
چاپ: چاپخانەی کارۆ

لەبڵاوکراوەکانی رۆژنامەی کوردستانی نوێ

دیداری دوو دۆست لەسەر دەستپێكی خەباتی مام و ئەندێشەی لەسەر بزووتنەوەی رزگاریخوازی گەلی كوردستان شەهادەتێكی مێژووییە لەسەرچیەتی كوردایەتی‌و رێوشوێنی چارەسەری مەسەلەی كورد.
ئەمە دەقی چاوپێكەوتنەكەی سەرۆك مام جەلال-ە كە لە دەورانی نێوان 1988-1990 بەڕێز مامۆستا عومەر شێخ موس لەگەڵیدا سازیكردبوو. لەم دیدارەدا دوو دۆست پێداچوونەوە بە رەوت و رێبازەكانی كوردایەتی و تێكۆشانی یەكێتی لەپێناو مەسەلەی نەتەوەیی و دیدی مام جەلال لەسەر سروشتی بزووتنەوەی رزگاریخوازی گەلی كوردستاندا دەكەن. دیدارەكە لەبنچینەدا لەسەر داوای كاك عومەر كراوە كە دیارە ویستویەتی دیدی مام جەلال لەسەر ئەو پرسانە وەربگرێت و لە تێزێكدا بەكاریان بێنێت.
دوو جار ئەم دیدارە لە رۆژنامەكەماندا بڵاو بۆتەوە كە دەنگدانەوەی زۆری لەناو خوێنەراندا هەبوو. جاری یەكەم لە ژمارەكانی( 6884 هەینی و شەمە 29-30/1/2016)‌و جاری دووەمیش لە بۆنەی ماڵئاوایی یەكجارەكی مام لەسەریەك لە ژمارەی(7382 هەینی و شەمە 6-7/10/2017) بڵاو كرایەوە.
بایەخی مێژوویی ئەم دیدارە دۆستانە لەوەدایە كە لەگەرمەی دوای قۆناغی ئەنفالەكان و بەهێزبوونەوەی رژێمی سەددام حسێن و سیاسەتی گەلەکۆمەکێی ئیقلیمیدا سەرۆك مام جەلال وەك رابەرێكی بە ورەو دووربین، رەهەندەكانی مەسەلەی كورد لە عیراق و لە خۆرهەڵاتی ناوەڕاست تاوتوێ دەكات و لەناو نائومێدی ئەو سەردەمەدا چرۆی ئومێدێكی بوژانەوە بەدیدەكات و كوردایەتی وەك بزووتنەوەیەكی مێژووكرد دەخاتە سەر سیاقی مێژوویی خۆی كە سەرەنجام رووی لە سەربەخۆیی كوردستان و خاوەندارێتی كوردە لە وڵاتی خۆی، لە خێر‌وبێری سەرزەمین‌و ژێرزەمینی خۆی.
لەم نامیلكەیەدا ئەم دیدارە وەكو خۆی بێ دەسكاری بڵاو دەكەینەوە، بەو بڕگە لابراوەنەشەوە كە كاتی خۆی بۆ سیاسەتی رۆژنامە نەدەگونجان‌و ناچار بووین لێی بقرتێنین بێ ئەوەی مانا بگۆڕین.
ئەم دیدارە (360) خولەكییە بەتایبەتی دەكەینە دیاری بۆ نەوەی نوێ، بۆئەوەی لە دیدی ساف و بێگەردو بێ غلوغەشی یەكێتی و سەرۆك مام جەلال لەسەر پرسی سەربەخۆیی تێبگەن و بنچینەی ئەدەبیاتی كوردایەتی نوێ لە سەرچاوە رەسەنەكەی خۆیەوە ببینن. پێویستە لێرەدا سوپاسی هەڤاڵی دێرینی یەكێتی و ئەندامی دەستەی دامەزرێنەر و هاوڕێی خەباتی میدیاییمان مامۆستا هۆمەر شێخ موس بكەین كە لەكاتێكی هەستیاردا ئەم دیدارەی بۆ مێژوو سازكردو ئەمڕۆ بۆتە كەرەستەیەكی مێژوویی چاك بۆ ئەدەبیاتی كوردایەتی و مێژووی تێكۆشانی یەكێتی. هەروەها سوپاسی هاوكار و هاوپیشەمان نەوزاد عەلی ئەحمەد بكەین كە چەندین ساڵە لە بواری ئەرشیفكردنی ئەدەبیاتی یەكێتیدا هاوكاری كوردستانی نوێ دەكات و ئەم دیارییە بەنرخەی لای ئەو پارێزراوە، كردە خەڵاتی خوێنەرانی كوردستانی نوێ.
جا لەوەختێكدا جۆرێك لە پاشەكشێ‌و شۆكی نەتەوەیی تووشی گەلەكەمان هاتووە بڵاوكردنەوەی ئەم دیدارە‌و بۆچوونەكانی مام لەم بەستێنەدا بایەخی خۆی هەیە تا گەلەكەمان‌و بزووتنەوە رزگاریخوازییەكەی، هەروا یار‌و نەیاری كوردیش بزانن ئەم بزاوتە رەوایە هەر دەمێنێ‌و دۆسێكەی داناخرێ تا لە مەنزڵگای رەوای بەدەستهێنانی مافی چارەنووسدا، سەربەخۆیی یەکجارەکی دەگیرسێتەوە.
كوردستانی نوێ

print

 27 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*