سەرەکی » ئاراستە » لە بیرەوەریی داستانی قەیوان-ماوەتدا

لە بیرەوەریی داستانی قەیوان-ماوەتدا

كاروان شێخ عوسمان

سەلكە بزوت
دوای سەنگەری شاخەكانی دوو توێ و خەجەلەرزۆك، شاخی حەسەن بەگ و بەردەسپیانی پشتی كونەماسی و وڵاخلویان پێ سپاردین، شانس وبەختی ئێمە هەر لە ناوەڕاستی مانگی نۆوە بارانمان لێباری و لە سەرەتای تشرینیشدا سەرما و شڵێوە و زوقم تەنگی پێ هەڵچنین.

سەنگەر و چەپەر و كوختە بچوك و نزمەكان و ژێر خێمەكانیشمان باراناو زەفەری پێهێنابوو، سەنگەرەكانمان لە جیاتی ئەوەی بچینە ناوی، وەك مریشك لە قەراغەكانیدا هەڵدەنیشتین، چونكە وەك بانوێ پڕ ببووون لە ئاو، پۆشاكەكانمان لە قەمسەڵەكەوە تا فانیلە و لیباسەكانیشمان یەك پارچەتەڕ بوون.

دوای چەندین شەو و ڕۆژی باراناوی، ڕۆژێكیان هەورەكە ڕەوییەوەو دار و چیلەكەوچەواڵمان كۆكردەوە و بڕێكی زۆرحەشۆ و باروتیشمان پێوە نا، دووكەڵ كوێری كردبوین نە ئەبوو بە ئاگرێكی خۆش، لەو لا ئێمە وەو لە خوارتر سەنگەرێكی كەمێك باشتر هەبوو كەشوێنەكەیان نەدیوبوو لە ڕەبایەكانی دوژمنەوە، ئاگرێكی خۆشیان كردبۆوە، كاك دەروێش و كاك ئازاد هۆنەرێنەیی وتیان( كاروان بچۆ لای ئەوان سەلكە بزوتێك بهێنە ئاگرەكەمانی پێ خۆش بكەین).

منیش چومەلایان، لە دوو پێشمەرگەی شلەشاری وەك خۆمم پرسی: ئەرێ سەلكە بزوتتان هەیە؟، ئەوانیش لە من كڵۆڵتربوون لەو شتانەیا، وتیان: نەوەڵا.

منیش لۆش لۆش هاتمەوە، جەماعەت وتیان: ئەوە بۆ نەتهێنا؟ منیش وتم: نەیان ماوە، كاك ئازاد و دەروێشیش وتیان: ئەی ئەوەپەرەمێزە دایان گیرساندووە؟ وتم: نا ئاگری دار بوو، وتیان: ئێ عاسمانەكە سەلكەبزوت لقە دارێكی ئاگراوییە خۆ قاڵبەكێك نییە.

دۆشكاكەی شاخی كۆڕەنگ
لەگەڵ تاوسەندنی هێرش وپەلامارەكانی هێزەكانی ڕژێمی بەعس بۆ كەڵكی قەیوان بۆ ئەوەی هێڵی پشتەوەی ئەو بەرەیەی پێشمەرگە شكست پێ بێنن وكۆنتڕڕۆڵی ناوچەكانی مۆكەبە تا كارێزە كۆن وكونەماسی و شانی بەرزایی حەسەن بەگ بكەن، لەبەری ناحیە كارێزەشەوە هێرشی هێزەكانی بەعس بۆ سەر شاخی كۆڕەنگ دەستی پێكرد، بۆیە دوژمن لە نزیكەی بیست ڕۆژدا و بەشەو وڕۆژ چەندین هێرشی یەك لە دوای یەكی بۆ ئەو لوتكەیەكرد، بەڵام لە بەرامبەردا پێشمەرگە لەوچەند رۆژەی بەرگرییەدا داستانێكی وایان تۆماركرد ئەگەر لەم چەند ساڵەدا ئەقڵ و ئیدراك هەبوایە شایستەترین فیلم لەسەر ئەو شوێنە و بەرگریی ئەو چەند ڕۆژە بەرهەمدەهێنرا.

بەرگریی چەند ڕۆژەی شاخی كۆرەنگ بە چەند مەفرەزەیەكی كەم و تەنها یەك دۆشكای یەك لولەی دوانزە ملیم بوو.

ئەو پێشمەرگانە لەو بەشە ئاوەی كە بۆ خواردنەوەیان ئەیانبرد بۆ سەر شاخ، شوێنی دانانی دۆشكاكەیان پێ تەڕ دەكرد تا لەكاتی تەقەكردندا تەپوتۆزی فشاری كاردانەوە شوێنەكەیان ئاشكرا نەكات.

كە دوژمن هێرشیان دەهێنا و پیشمەرگەكان لەشوێنێكەوە تەقەیان دەكرد تاهێزە هێرشبەرەكە ئەشكان، ئینجا پێش ئەوەی دوای شكانەكە دەست بە تۆپباران بكەن، ئەمان دۆشكاكەیان ئەگواستەوە بۆ ناو سەنگەرێكی تر و خۆیان بۆ هێرشێكی تری دوژمن ئامادە دەكرد.

پێشمەرگە بەم تەكنیكە ئەو چەند ڕۆژە بەرگرییان كرد، شایەتحاڵەكان كەدانیشتوانی ناحیەی كارێزەبوون، دەیانگێڕایەوە: ئەفسەری سەرپەرشتیاری هێزشەكان وتویەتی ئەوانە یان غەیبین یان شتێكیان لە ئێمە، زیاترە! وتوشییەتی: ئەگەر ئەوانەم بەساغی دەست بكەوێت، ئەمری سەروو خۆمیان بۆ وەردەگرم كە لەجەیشدا بكرێنە ڕاهێنەری جەنگی مقاوەمە.

ئەم بەرگرییە بەردەوام بوو تا ئەو كاتەی فڕۆكەی سەمتی و غەزال و حەماڵ و پیلاتۆزو هەنتەر كە تایبەت بون بە جەنگی پارتیزانی و هەروەها تۆپخانەكانی ماوەت، چوارتا، سیتەك، قەڵاچواڵان، سەربازگەی سارداو، سەربازگەی سەلام بەتواوی توانیانەوە گوشاریان خستە سەر ئەو شاخەو ئەو ناوەیان كرد بەئاگر و ئاسن و بارود و چەندین شەهید و برینداری لێكەوتەوە، ئیتر بە ناچاری پاشەكشێ كرا بۆ شاخی دوو توێ كە چەند كیلۆمەترێك لە كۆڕەنگەوە دور بوو.

 235 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*