سەرەکی » وتار » نه‌وزادى موهه‌ندیس‌ » ساڵی 2020 ، پڕ ناسۆرترین ساڵەكانی ئەم چارەكەی…

ساڵی 2020 ، پڕ ناسۆرترین ساڵەكانی ئەم چارەكەی…

ساڵی 2020 ، پڕ ناسۆرترین ساڵەكانی ئەم چارەكەی سەدەی 21

*بەداخەوە مێژووی مرۆڤایەتی سیخناخە لە كارەسات و جەنگ و كاولكاریی و نەخۆشی و ململانێی ناڕەوا و داگیركاریی و زوڵمی مرۆڤ بۆ مرۆڤ و زیندەوەران و تەنانەت ئەو ژینگەیەی كە خۆشی تیایدا دەژی.

مرۆڤ بۆخۆی بوونەوەرێكی لەلایەك داهێنەر و ئاوەدانكەر و خاوەنی شارستانێتییە نەمرەكانی مرۆڤایەتییە و زیاد لە پێنج هەزار ساڵە لەسەر گۆی زەوی گوزەران دەكات و گەلێك داهێنانی گەورە و ناوازە و سەرسوڕهێنەری كردووە، تا كاروانی مرۆڤایەتی و گەشەسەندن و ئاوەدانی گەیاندۆتە ئەم قۆناغەی ئێستا، بەڵام لە پاڵ هەموو ئەم كار و چالاكییە بێوێنە و سەرسوڕهێنانەیدا، سەدان و هەزاران كارەسات و كاولكاریی بەسەر مرۆڤایەتی و شارستانێتییەكانیشدا هێناوە، كە زۆرێكیان بێ مەبەست و لە نەزانین و غافڵگیرییەوە بووە و زۆربەی ئەوانەی تریشیان بە مەبەست و بەپلانی پێشوەختە كراوە.

گەلێك جاران هۆكارەكان كەسی و بنەماڵەیی و نەتەوەیی و یان ئاینی و مەزهەبی بوون، كە بوونەتە هۆی هەڵایسانی جەنگە گەورەكانی جیهان یان جەنگە ناوخۆییە نەبڕاوەكان یان سەرهەڵدانی دوژمنایەتی و كوشت و كوشتار و كاولكاریی كە لەكۆتایشدا تەنها و تەنها مرۆڤایەتی و ژینگەی گۆی زەوی زیانی گەورەیان بەركەوتووە.

*جا هەر قۆناغە یان سەدە یان ساڵ و مانگ و رۆژەكانی مێژووی مرۆڤایەتی هەریەكەیان بە رووداوێكی گەورە و گورچكبڕ و كارەساتبار دەناسرێنەوە، ئەوەتا سەدەكانی ناوەڕاستی ئەوروپا بە پەتای تاعون دەناسرێتەوە كە بە ملیۆنان كەسی كوشتووە، ساڵانی 1914-1918 جەنگی یەكەمی جیهان و ساڵی 1929-1933 چەقبەستوویی گەورەی ئابووریی و ساڵانی 1939-1945 جەنگی دووەمی جیهان و ساڵانی 1952-1991 جەنگی سارد و دەیان نموونەی زیندووی تر، كە هیچ كات مرۆڤایەتی بەبێ‌ جیاوازیی ئاوات بۆ ئەو قۆناغ و سەردەمە تاریكانەی مرۆڤایەتی ناخوازێت.

*جا لەو چوارچێوەیەشدا سەدەی 21 بە دیاریكراویش ساڵی 2020 كە سەرەتای بەناو سەدە و قۆناغێكی نوێ‌ بوو، بە كارەساتێكی مرۆڤایەتی دەستیپێكرد كە بریتییە لە پەتای كۆڕۆنا ((كۆڤید-19)) كە لەسەرەتای ساڵەوە تاكو ئێستا كە دەچینە ساڵی نوێوە، هەر بەردەوامە و هیچ كەس و لایەن و وڵاتێكیش ناتوانێت پێشبینی كۆتاییەكەی بكات. تائێستا تەواوی مرۆڤایەتی و زانست و زانیاری و زاناكان دەستەوستانن لەبەردەم ئەم پەتا كوشندەیەدا كە لەماوەی تەنها 12 مانگدا زیاتر لە 80 ملیۆن كەس تووشبوون و زیاتر لە ملیۆنێک و 500 هەزار كەسی تری كردۆتە قوربانی و بە سەدان ملیار دۆلار زیانی ئابووریی گەیاندۆتە تەواوی گۆی زەوی و بە رادەیەكی بەرچاو ترس و دڵەڕاوكێ‌ و مەترسیی بڵاوكردۆتەوە بەناو تەواوی وڵاتان و كۆمەڵگەكاندا و ئاشتی كۆمەڵایەتیشی خستۆتە بەردەم مەترسی و داڕمانی ئابوورییەوە و زۆرێك لە وڵاتانی پێشخستووە و كورتهێنانی بودجە و داهاتی ساڵانەیان و گەشە و ئاوەدانیانی خستۆتە بەر مەترسییەوە.

پەتای كۆرۆنا بۆتە پەتای سەردەم و سەدەی 20 و 21 و بۆتە بكوژ و مەترسییەكی گەورە بۆسەر ئێستا و ئایندەی تەواوی مرۆڤایەتی.

*بەم شێوەیە ساڵی 2020 لە مێژووی مرۆڤایەتیدا بۆتە ساڵێكی رەش و پڕ مەترسی و كوشندە و ناسۆر بۆ تەواوی گۆی زەوی، ئەم ساڵە ساڵی نەهامەتی و برسێتی و بێكاریی و دواكەوتوویی و راوەستانی گەشەی ئابووریی تەواوی مرۆڤایەتی بوو. ساڵێك بوو كە هیچ كات ئاواتی پێناخوازرێت، ساڵێك بوو كە لەناو ساڵەكانی ئەم سەدەیەدا رەنگە ببێتە وێسگە و خاڵێكی تاریكی ئەوتۆ كە جیاكەرەوە دەبێت لە پێش و لەدوای خۆی.

ئەگەر هەندێك ساڵ بۆ ئەو كۆكەڵگە یان ئەو وڵات یان ئەو ناوچەیەی جیهان ساڵێكی پڕ وەیشومە و كارەسات و جەنگ و كارەساتی سروشتی و ژینگەیی كوشندە بووبێت، ئەوا ساڵی 2020 ساڵێكی ئیقلیمگیریی سەرتاسەری و جیهانی بوو بۆ تەواوی مرۆڤایەتی و هەموانی وەكو یەك بێزار و دڵتەنگ و كارەساتبار كردوە بەهۆی لەدەستدانی زۆرێك لە خۆشەویستان و ئازیزانیان و زۆرێك لە خێزانەكانی هەڵوەشاندۆتەوە و زیاتریشی لە منداڵان بێ دایك و باوك و بێ‌ سەرپەرشتیار خستوە، گەلێك كەسی كۆستباران كردوە و لەوەش زیاتری بێكار و برسی كردوە، ئەم ساڵە و ئەم پەتایە هەموو مرۆڤایەتی یەكسانكردوە لە تووشبون و كوشتن و نەهامەتی و برسێتی و هەژاركەوتندا، چونكە دەوڵەمەند و هەژارانی وەكو یەك گرتۆتەوە، خۆرهەڵات و رۆژئاوای پێكەوە گرێداوە لە نەهامەتیدا، جەنگ و ململانێكانیشی تاڕادەیەك گەرمتر كردوە، رەنگە ببێتە هۆكاری سەرهەڵدانی ناچاریی هێرش و پەلامار و جەنگی گەورەتریش لە جیهاندا.

*بەداخەوە بۆ كوردستانیش چەندان هێندە بە ناسۆر و ناخۆشی و برسێتی و بێ‌ مووچەیی و بێكاریی و ناڕەزایی و خۆپیشاندان و ململانێی ناڕەوا بووە و ساڵی رشتنی خوێنی رۆڵەكان بووە بە ناهەق. هەربۆیە بەهەق ئەم ساڵی 2020 و ئەم سەرەتای سەدەی 21-ەش ئەوەمان پێدەڵێت كە ئایندەی مرۆڤایەتی زۆر رۆشن نابێت لەبەر چاوچنۆكیی هەندێك لە سەرمایەداران و دونیای سەرمایەداریی لەلایەك و سەرهەڵدانی جەنگ و ململانێ ناڕەوا سیاسی و ئابووریی و ئەمنییەكانیش لەلایەكی ترەوە لە نێوان هەموواندا لە نێوان خۆرهەڵات و خۆرئاوادا، لەنێوان باكوور و باشووریەكانیشدا، لەنێوان دەوڵەمەند و هەژارەكاندا، لەنێوان رەش پێست و سپی پێستەكاندا، بۆیە ئەگەر بیركردنەوە و ركابەرایەتی مرۆڤەكان بگاتە رادەی شێتبوونی تەواوەتی و لە عەقڵ و ئاوەز دەربچێت، ئەوا رەنگە دەیان ساڵی تری وەكو ساڵی 2020 لەم سەدەیەدا دووبارە ببنەوە و هێندەی دی ئایندەی مرۆڤ و مرۆڤایەتی و ئاوەدانی و گەشە و پێشكەوتنەكان بەرەو تونێڵێكی تاریك و تونتر ببەن و ژیان و گوزەرانی سەر گۆی زەویش بكەنە مێژوویەكی رەش و كاولكاریی و ئەم شارستانێتییە پێشكەوتوەش بكەنە هەواڵێكی رابردوو لەنەمان و لە ناوچوونی وەك هەموو شارستانێتییەكانی سۆمەری و بابلی و گریكی و رۆمانی و یۆنانی و …هتد.

*بەهیوای ئەوەی ساڵی 2020 زوو كۆتایی پێبێت و قۆناغ و سەردەمێكی ئومێدبەخش چاوەڕوانی هەمووان بكات و هەموو بەڵا و ناسۆر و ناخۆشییەكانی ساڵی 2020 مان لە بیربباتەوە. بڕواش ناكەم هیچ كەسێك ئاوات بە ساڵی 2020 بخوازێت و بڵێت خۆزگەمان بە پار.

 357 جار بینراوە