سەرەکی » کەلتوور » چۆن دەستم بە نووسین كرد؟

چۆن دەستم بە نووسین كرد؟

گەلاوێژ

چۆن دەستم كرد بە نووسین و كتێب و رۆمان، بیرم دێت كە تازە چووبوومە مەكتەب قەڵەم و دەفتەرەكانم ریز ئەكردو لەبەر خۆمەوە قسەم لەگەڵ ئەكردن و بە شەڕم ئەدان و ئاشتم ئەكردنەوە، دیارە خۆم لەجیاتی ئەوان قسەم ئەكرد، ئەوە دیار بوو لە مناڵییەوە هەستی رۆمانم لەناخا بوو زۆرم حەز لە قەڵەم و دەفتەرو نووسین بوو، لەوكاتەوە كە گەورە بووم یەكەم نامەی اعجابم بۆ خاتوو سەباحی گۆرانیبێژ كە بوبووە ئەكتەری سینەما یەكەم فیلمی دەركردبوو (القلب لە واحد) زۆرم خۆشویست و هەمیشە گۆرانییەكانی بە دەممەوە بوو.
زۆریش دڵم خۆش بوو كە دیم نامەكەم لە مجەلەی سینمای و الكوكبی میسری بڵاوكرابووەوە، زۆر زۆرم پێ خۆش بوو، هەروەها لە تەمەنێكی كەم یەك رۆمانم خوێندووەتەوە (یومیات نائب فی الاریاف)ی نووسەری زۆر گەورەی میسری تۆفیق الحكیم كە زۆر معجبم بە ئسلوبی نووسینی كە زۆر ئاسان و بێ گرێن و یەكسەر ئەچنە مێشك و دەروونی خەڵكەوە زۆر حەز لە ئسلوبی ئەكەم و زۆری لێ فێربووم، هەروەها معجیبم بە نووسینەكانی مەكسیم گۆركی و نووسینەكانیم زۆر بەدڵە، چونكە من حەز لە نووسینێك ناكەم كە هەر فەقەرەیەكی بخوێنیت ئەبێت فتاح فاڵێك بانگ بكەیت تاوەكو فەقەرەكانی ئاشكرا بكات و پێچ پێچ و گرێیاوی بن.
دواتریش پاش نەمانی شۆڕشی كورد ساڵی 1975 و دەربەدەری روومان كردە لەندەن پێش ئەویش دوو جار بە پەنابەری لە ئێران بووین، لەوێ فێری فارسی بووم كە زۆر خۆشحاڵم، چونكە زۆر ئێرانم خۆشدەوێت، هەروەها ئەدەبی ئێرانیم زۆر لا خۆشەو خۆم دوای ئەوەی دەستم كرد بە كتێب و رۆمان نووسین كتێبی عەزیز نەسین پەروەندەی ئیداری لە فارسییەوە خۆم تەرجومەم كرد بۆ كوردی، لە لەندەن هەندێك ئارام بووین و بێ ترس مناڵەكانم ئەبردە مەكتەب، دوای كەمێك كە هاتینەوە سەر خۆو مناڵەكان ورد بوون نەیاندەتوانی بچنە مەكتەب و توانای بە تەكسی هاتوچوونمان نەبوو، بۆیە بەپەلەو بە زۆر خۆم فێری ئۆتۆمبێل لێخوڕین كرد، هەرچەندە وتیان لێرە زەحمەتە بەڵام من گوێم نەدایەو نەترسام، لەگەڵ ئەوەشدا ئینگلیزیم باش نەئەزانی لەوەی لە مەكتەب بە خوێندن فێری بوبووین زیاتر، بەڵام باوكی هێرۆی خۆشەویستم پشتی گرتم و وتی هەر فێر ئەبیت و ئاخری سوپاس بۆ خرا ئەمە 35 ساڵ زیاترە شۆفێری ئەكەم لە لەندەن.
لەگەڵ ئەوەشدا كە هەندێك ئارام بووینەوە بەڵام دووری لە وڵات و خەفەتی شۆڕشگێڕان لە شاخ و لەژێر فڕۆكە جەنگییەكانی حكومەتی سەدام و دڵ لەلابوونی ماڵی پێشمەرگەی قارەمان و مام جەلال گیان و هێرۆ گیان، كە ئەویش هەروەك پێشمەرگە بوو، ئیتر بەرە بەرە زۆر پەرێشان بووم و هەر ئەگریان بەتایبەتی كە فاكس و دەنگوباسی ناخۆشمان ئەگەیشتە دەست.
بەڕاستی بێجگە لەو خەمەی دووری و دڵم لای پێشمەرگەو هێرۆ و مام جەلال، هەستی غەریبی زۆر كاری تێكردم، هەر ئەگریام و بەڕاستی هیچ رووداو و لێقەومانێك بەقەد غەریبی كوشندە نییە، بۆیە ناو دەروونم لێم هاتە دەنگ و یەكەم هەستم خستە سەر كاغەز، ئەویش ئەوە بوو كە وتم كوردستان خۆشەویستم پاش خوا تۆ ئەپەرستم، بۆ تۆ زۆر پەرێشانم، لەلای تۆیە هۆش و هەستم، نە هیچ شارو وڵات نە هیچ خۆشی و ئاواتێك ناتوانن هەر بۆ ساتێكیشمان دوورتبخەنەوە لە بیرمی جێی بابوباپیرم.

کورتەیەک لەسەر ژیانی خاتوو گەلاوێژ
گەلاوێژ ساڵح فەتاح كەهەڵگری نازناوی گەلاوێژە ، لەدایكبووی موسڵ، 6 ئەیلول 1930، لەخێزانێكی كوردپەروەر وتێكۆشەر ونیشتمان پەروەر هاتۆتە دونیاوە.عەشیرەتی باوكی، قووچەبەگی، یەكێك بووە لەعەشیرەتە بەناوبانگەگانی باكوری كوردستان لەڕەسەنایەتی ودێرینیدا.باپیری(باوكی دایكی) كەئەفسەرێكی دەوڵەتی عوسمانی بوو، لەجەنگی یەكەمی جیهانیدا شەهید دەبێت.خاڵە موحەمەدی، كەهاوڕێیەكی نزیكی عەبدولكەریم قاسم بوو، یەكێك بووە لەشۆڕشگێڕانی شۆڕشی 14تەموز .هەمزە عەبدوڵڵای خاڵی مافپەروەر وسیاسەتمەدار دامەزرێنەری پارتی دیموكراتی كوردستان ویەكەم سكرتێری ئەو پارتە بوو.لەساڵی 1947 هاوسەرگیری لەگەڵ بیرمەند ونووسەر وسیاسەتدمەدار برایم ئەحمەد دەكات.دواتر، مام جەلال بەهۆی هاوسەرگیری كچە گەورەكەیەوە (هێرۆخان) زیاتر تێكەڵ بەخێزان دەبێت بەوپێیەی پێشتر، بەهۆی كاری سیاسییەوە، هاوڕێیەتی لەگەڵ هەمزە عەبدوڵڵا وبرایم ئەحمەدا زۆر پتەو بووە.
هەر لەمنداڵییەوە خولیای خوێندنەوە ونووسین بووە. لەسەرەتاوە، وەك خۆی دەڵێت، كاریگەری تۆفیق ئەلحەكیم ومەكسیم گۆرگی لەسەر بووە.برایم ئەحمەدی هاوسەری تەواو پشتگیری لەخۆیندنەوە ونووسینەكانی كردووە. لەهەمان كاتیشدا بەرهەمەكانی مامۆستا بۆتە سەرچاوە وسەرچاوەلێگرتنێك بۆ نووسینەكانی بەگشتی وچیرۆك ڕۆمانەكانی بەتایبەتی.بەرهەمە گێڕانەوەگەرییەكانی ئەوە دەسەلمێنن كەئاستی تەكنیكی لەئاستێكی بەرزی داهێناندایە.ئەمەش لەڕێگەی كاریگەرییە لاوەكی ودەرەكییەكانەوە سەرچاوەی گرتووە.گەر بەچاوی ڕەخنەوە پشكنین بۆ دەقەكانی بكرێت ئەوا هەر زوو دەگەین بەو ڕاستییەی كەگەلاوێژ خاوەن دەسەڵاتێكی بیركردنەوە وشێوازی دەربڕین وزمانی خۆیەتی كە جودایان دەكاتەوە لەبەرهەمی نووسەرانی تر.تەواو یاسا وپێوەرەكانی چەمكی گێڕانەوەگەری بەكارهێناوە .
گەلاوێژ خاوەنی نزیكەی (27) بیست وحەوت بەرهەمە كەزۆربەیان خۆیان لەچیرۆك وڕۆماندا دەبینێتەوە بەنموونەی ، بەرەو ئەشكەوتی دلێران( سێ بەش)، دایك وكوڕ، بووكی ئاتەخان، پایز وخونچە، دنیا بێشەیە، ڕێبوارێكی سەرگەردان، كارەكەر، لەسەر باڵی سیمرخ، ئەفسانەی گەلی ناوگردان …هتد.

 114 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*