سەرەکی » چاوپێکه‌وتن » وته‌بێژی یه‌كێتی: ئه‌ركی نه‌ته‌وه‌یی‌و نیشتمانیی ئێمه‌یه‌ پشتیوانیی له‌ خه‌باتی باكوور‌و پارچه‌كانی تری كوردستان بكه‌ین

لە دیدارێکی لەگەڵ سۆشیال میدیای كوردستانی نوێ دا

وته‌بێژی یه‌كێتی: ئه‌ركی نه‌ته‌وه‌یی‌و نیشتمانیی ئێمه‌یه‌ پشتیوانیی له‌ خه‌باتی باكوور‌و پارچه‌كانی تری كوردستان بكه‌ین

سه‌عدی ئه‌حمه‌د پیره‌ ئه‌ندامی مه‌كته‌بی سیاسی‌و وته‌بێژی یه‌كێتیی نیشتمانیی كوردستان له‌ دیدارێكی تایبه‌تی سۆشیال میدیای كوردستانی نوێ- دا،تیشكی خسته‌سه‌ر چه‌ندین پرسی گرنگیی ناوخۆی هه‌رێمی كوردستان‌و عیراق‌و ناوچه‌كه‌‌و هه‌ڵویستی له‌ باره‌یانه‌وه‌ خسته‌ڕوو.

سه‌ره‌تا ده‌رباره‌ی ئه‌و ته‌وه‌ره‌ گرنگانه‌ی كه‌ له‌ كۆبوونه‌وه‌كه‌ی ئه‌م دواییه‌ی مه‌كته‌بی سیاسییدا تاوتوێكران، سه‌عدی ئه‌حمه‌د پیره‌ رایگه‌یاند: ئه‌و ته‌وه‌رانه‌ی گرنگیمان پێدان‌و به‌شێك بوون له‌ به‌رنامه‌ی ئه‌م كۆبوونه‌وه‌یه‌ی مه‌كته‌بی سیاسی، یه‌كه‌میان بریتی بوو له‌ بارودۆخی هه‌رێمی كوردستان‌و عیراق‌و كێشه‌كانی كه‌ هه‌یه‌. له‌سه‌ر ئه‌م بابه‌ته‌ زۆر به‌درێژی‌و به‌چڕی باسمان كرد كه‌ بارودۆخی هه‌رێمی كوردستان، بارودۆخی عیراق، ته‌نانه‌ت پێش هاتنی داعش-یش، له‌ ئه‌نجامی نه‌بوونی رای هاوبه‌ش له‌ نێوان هه‌رێمی كوردستان‌و عیراق، بووه‌ هۆكاری بڕینی مووچه‌ی خه‌ڵك‌و به‌شی كوردستان له‌ بودجه‌ی گشتیی عیراقدا. ئه‌وه‌ سه‌ره‌تای ناكۆكییه‌كه‌ بوو، به‌ڕاستی ئه‌و كێشانه‌ش هه‌ر هه‌بوون له‌ نێوان هه‌رێمی كوردستان‌و حكومه‌تی فیدراڵی عیراق، به‌ڵام هه‌تا سه‌رۆك مام جه‌لال سه‌رۆك كۆماری عیراق بوو، ئه‌و كێشانه‌ی به‌ ئاسانی چاره‌سه‌ر ده‌كرد، هه‌مپه‌یوه‌ندییه‌كی ته‌ندروست‌و باشی هه‌بوو له‌گه‌ڵ به‌رپرسانی هێزه‌ سیاسییه‌كانی عیراق له‌ شیعه‌‌و سوننه‌ كه‌ له‌ ده‌سه‌ڵات بوون، هه‌میش ده‌یتوانی له‌ هه‌رێمی كوردستان رۆڵێكی ئیجابی بگێڕێت، كه‌ په‌یوه‌ندی هه‌بوو به‌پارتی‌و سه‌رۆكی پارتی‌و مه‌كته‌بی سیاسیی پارتی‌و براده‌رانی یه‌كێتی‌و هێزه‌ سیاسییه‌كانی عه‌لمانی‌و ئیسلامیی له‌ هه‌رێمی كوردستان. به‌ نه‌خۆش كه‌وتنی مام جه‌لال ئه‌م پرده‌ نه‌ما، كه‌ بتوانێت ناكۆكییه‌كان گه‌مارۆبدات ‌و ده‌رچه‌یه‌كی بۆ بدۆزێته‌وه‌، به‌داخه‌وه‌ گه‌یشته‌ نزیكی پچڕان. له‌ دوای ئه‌وه‌ مه‌سه‌له‌ی داعش-یش په‌یدا بوو كه‌ جه‌بهه‌یه‌كی كرده‌وه‌، له‌ نێوان هه‌رێمی كوردستان‌و عیراقدا جه‌بهه‌یه‌كی 1000‌و 50 كیلۆمه‌تری، كه‌ ئه‌مه‌ش پێموایه‌ كێشه‌یه‌كی زۆر گه‌وره‌ی بۆ عیراق‌و هه‌رێمی كوردستانیش دروستكرد، كه‌ رۆژانه‌ له‌جوڵانی هێزه‌كان، له‌ به‌كارهێنانی هێزه‌كان له‌ شه‌ڕه‌كان، ئیمكانیاتێكی زۆری هه‌رێمی كوردستان‌و عیراق سه‌رف ده‌بوو. شانبه‌شانی ئه‌وه‌ش نرخی نه‌وت داده‌به‌زی به‌شێوه‌یه‌ك كه‌ له‌ 120 دۆلار دابه‌زی بۆ 28 دۆلار‌و 30 ‌و 32 دۆلار، كه‌ ئه‌مه‌ نیوه‌ی پێویستییه‌كانی هه‌رێم‌و پێویستییه‌كانی عیراق كه‌ له‌ رابردوودا هه‌بوو، دا نه‌ده‌پۆشی. شانبه‌شانی ئه‌وه‌، ئه‌و ناكۆكییانه‌ی به‌هۆی داعشه‌وه‌ له‌ رۆژئاوای كوردستان‌و سوریا هاته‌پێش‌و رۆڵی توركیا هه‌م ماوه‌یه‌ك چاو نوقاندن له‌ هاتوچۆی داعشیه‌كان، ئه‌وانه‌ی كه‌ له‌ ده‌ره‌وه‌ ده‌هاتن‌و هه‌روه‌ها ئه‌و سنوورانه‌ی كه‌ له‌گه‌ڵ سوریا هه‌ن، ئه‌وانه‌ی كه‌ بۆ ئێمه‌ تیرۆریستن، بۆ توركیا هاوپه‌یمان بوون‌و هه‌ڵوێستی توركیا له‌ كۆبانی، هه‌ڵوێستی توركیا له‌م دواییه‌ له‌ هێرشی بۆ داگیركردنی عه‌فرین‌و ناوچه‌كانی تر، هه‌روه‌ها ئه‌و هه‌ڕه‌شانه‌ی توركیا هه‌میشه‌ له‌ هه‌رێمی كوردستانی ده‌كات، ئه‌وه‌ بارودۆخێكی ئه‌منیی دروستكردووه‌ كه‌ ژماره‌یه‌كی زۆر له‌ دێهاته‌كانی دۆڵی باڵه‌ییان، ناوچه‌ی برادۆست، ناوچه‌ی گه‌ردی‌و له‌ چه‌ند ناوچه‌یه‌كی دیكه‌، بۆته‌ هۆی ئه‌وه‌ی كێشه‌یه‌كی یه‌كجار زۆربۆ هه‌رێمی كوردستان‌و ئه‌و دێیانه‌ی كه‌ ئێمه‌ زۆر به‌ زه‌حمه‌ت ئاوەدانمان كردوونه‌ته‌وه‌، خه‌ریكه‌ ورده‌ ورده‌ له‌ ئه‌نجامی هێرشه‌ ئاسمانییه‌كانی توركیا به‌ناوی مۆڵگه‌‌و سه‌نگه‌ره‌كانی په‌كه‌كه‌وه‌، دێیه‌كان بۆردوومان ده‌كات‌و بۆته‌ هۆی شه‌هیدكردنی هاووڵاتی بێده‌ره‌تان، ئه‌مه‌ بارودۆخێكی ئه‌منیی خراپی دروستكردووه‌، وتیشی: ئێمه‌ له‌م كۆبوونه‌وه‌یه‌دا باسمان له‌وه‌كرد كه‌ ئه‌مانه‌ چۆن چاره‌سه‌ر ده‌كه‌ین؟ له‌گه‌ڵ توركیا چۆن قسه‌ بكه‌ین؟ له‌گه‌ڵ ئێران چۆن قسه‌ بكه‌ین؟ له‌گه‌ڵ عیراق چۆن قسه‌ بكه‌ین؟ئایا ئه‌م بابه‌ته‌ ئه‌منی‌و ئابوورییه‌، راسته‌ بكرێته‌ بابه‌تێكی هه‌ڵبژاردن، یان ئه‌وه‌ به‌ده‌ره‌ له‌ هه‌ڵمه‌تی هه‌ڵبژاردن؟چونكه‌ ئه‌وه‌ په‌یوه‌ندیی به‌هه‌ر تاكێكه‌وه‌ هه‌یه‌ له‌ كوردستان‌و په‌یوه‌ندیی به‌سه‌روه‌ریی خاكی عیراق‌و خاكی هه‌رێمی كوردستانه‌وه‌ هه‌یه‌. ئه‌وه‌ بابه‌تێكه‌ چۆن مه‌سه‌له‌ی سنوور ده‌سه‌ڵاتی فیدرالییه‌ (حه‌سرییه‌) په‌یوه‌ندیی به‌ حكومه‌تی فیدراڵه‌وه‌ هه‌یه‌، چۆن حكومه‌تی عیراق له‌سه‌ر یه‌ك ده‌روازه‌ی سنوور ده‌ڵێ ئه‌وه‌ سه‌ڵاحیاتی خۆمه‌، ده‌بێ له‌پاراستنی سنووریش سه‌ڵاحیاتی خۆی بێ، ده‌بێ بیشیپارێزێ، بۆ ده‌بێ هه‌رێمی كوردستان سنووره‌كان بپارێزێ؟ به‌ڵام كه‌ ده‌كه‌وێته‌ سه‌ر مه‌سه‌له‌ی حساب‌و كتاب، له‌ به‌غدا ده‌ڵێن ئه‌وه‌ سه‌ڵاحیاتی حكومه‌تی فیدراڵه‌.

لیستێكی سه‌ربه‌خۆ بۆ یه‌كێتی
سه‌باره‌ت به‌ هه‌ڵبژاردنی په‌رله‌مانی عیراق،وته‌بێژی یه‌كێتیی نیشتمانیی كوردستان ئاماژه‌ی به‌وه‌كرد: بابه‌تێكی تر كه‌ ئێمه‌ پێویست بوو قسه‌ی له‌سه‌ر بكه‌ین‌و قسه‌مان له‌سه‌ر كرد، بابه‌تی هه‌ڵبژاردنی په‌رله‌مانی عیراقه‌، هه‌ڵبژاردنی په‌رله‌مانی عیراق پێداویستیی هه‌یه‌، پێداویستییه‌كانی بریتین له‌ پاره‌‌و ئه‌و كه‌ره‌ستانه‌ی وه‌كو روونكردنه‌وه‌ له‌ بابه‌تی ره‌سم‌و پۆسته‌ر‌و دانانی به‌رنامه‌ی ته‌له‌فیزیۆنی‌و رۆژنامه‌ بۆ خۆناساندن‌و پاشان ئاماده‌كردنی پرۆگرامی یه‌كێتیی نیشتمانیی بۆ ئه‌م هه‌ڵبژاردنه‌، ئه‌مانه‌ هه‌موو كه‌ره‌سته‌ی باشی ده‌وێ‌و ده‌بێ ئاماده‌ بكرێ، زیاتریش ده‌بێت هه‌ڤاڵانی سه‌ركردایه‌تی‌و مه‌كته‌بی سیاسی، ئه‌وانه‌ی كه‌ كاندید نین، هه‌ر كه‌سه‌یان بگه‌ڕێنه‌وه‌ بۆ ناوچه‌كانی خۆیان، هه‌ولێرییه‌كان بۆ هه‌ولێر‌و سلێمانییه‌كان بۆ سلێمانی‌و كه‌ركوكییه‌كان بۆ كه‌ركوك‌و گه‌رمیانی بۆ گه‌رمیان‌و خانه‌قینی بۆ خانه‌قین‌و دهۆكی بۆ دهۆك، بۆئه‌وه‌ی پشتیوانیی بكه‌ن له‌ كاندیده‌كانی كه‌ هه‌ڵمه‌تی هه‌ڵبژاردن بكه‌ن، رۆڵی سه‌ركردایه‌تی‌و مه‌كته‌بی سیاسیی رۆڵی سه‌رپه‌رشتیكاری به‌رنامه‌كه‌یه‌، به‌ڵام هه‌ڵمه‌ته‌کە كاندیده‌كان‌و مه‌ڵبه‌نده‌كان ده‌یكه‌ن، له‌كوێ پێویستیان بێت ئه‌و به‌رپرسانه‌ی كه‌ داده‌نرێن بۆ ناوچه‌كان، له‌وێ هاوكارییان ده‌كه‌ن.
وته‌بێژی یه‌كێتیی نیشتمانیی كوردستان ده‌رباره‌ی چۆنێتیی خۆئاماده‌كردنی یه‌كێتیی بۆ هه‌ڵبژاردن رایگه‌یاند: بۆ هه‌ڵبژاردن یەکێتی به‌لیستی تایبه‌ت، لیستێكی سه‌ربه‌خۆ بۆ یه‌كێتیی نیشتمانیی كوردستان بەشداریی دەکات، ئێمه‌ ئه‌زانین مه‌سه‌له‌ی زۆربوونی ژماره‌ی گروپه‌كان، قه‌واره‌ سیاسییه‌كان به‌تایبه‌تی له‌ سنووری پارێزگای سلێمانی، ره‌نگه‌ موفاجه‌ئاتی تێدا روو بدات، هه‌وڵی ئه‌وه‌ ده‌ده‌ین كه‌ ده‌نگی خۆمان بهێنینه‌وه‌ ئه‌گه‌ر زیاتر نه‌هێنین، كاری بۆ ده‌كه‌ین، قسه‌ زۆره‌ ئێستا كه‌ هه‌ریه‌كه‌ له‌ چوارچێوه‌ی هه‌ڵمه‌تی هه‌ڵبژاردن به‌شان‌و باڵی خۆیدا هه‌ڵده‌ڵێ، به‌ڵام ده‌بێ خه‌ڵك له‌ هه‌رێمی كوردستان ئه‌وه‌ی به‌بیردا بێ كه‌ ئێمه‌ له‌ رۆژی دروستبوونی یه‌كێتیی نیشتمانیی كوردستانه‌وه‌، هه‌نگاو به‌هه‌نگاو، قۆناغ به‌ قۆناغ، وێستگه‌ به‌ وێستگه‌، خوێنمان داوه‌ له‌ پێناوی گواستنه‌وه‌ی میلله‌ته‌كه‌مان له‌ قۆناغێكه‌وه‌ بۆ قۆناغێكی تر.
روونیشیكرده‌وه‌: ئێمه‌ به‌رنامه‌ی سیاسیمان ئه‌وه‌یه‌ كه‌ له‌ ئاوه‌دانكردنه‌وه‌ به‌رده‌وام بین، كێشه‌ی گه‌نجان، له‌ ئیشكردن به‌رده‌وام بین، له‌ چاره‌سه‌ركردنی كێشه‌ی كه‌مئه‌ندام‌و ماڵه‌ شه‌هید كه‌ پێموایه‌ مافێكی ئه‌خلاقی‌و سیاسی‌و كۆمه‌ڵایه‌تییان له‌سه‌ر ئێمه‌ هه‌یه‌، لێنه‌گه‌ڕێین موحتاج بن، له‌هه‌مانكاتدا ئه‌وه‌ی په‌یوه‌ندیی به‌جوتیار‌و به‌رهه‌مهێنه‌رانی كوردستانه‌وه‌ هه‌یه‌‌و به‌رهه‌مه‌كانیان ته‌سلیم كردووه‌، گوشار له‌ حكومه‌تی عیراق بكه‌ین كه‌ پاره‌ی كه‌ڵه‌كه‌بووی چه‌ند ساڵی به‌رهه‌مه‌كانیان بدات، چونكه‌ ئه‌گه‌ر وا نه‌بێت، هانیان ده‌دات دێیه‌كانیان جێبهێڵن‌و له‌مه‌ودوا كشتوكاڵ نه‌كه‌ن.له‌هه‌مانكاتدا گرنگییه‌كی ته‌واو بده‌ین به‌كوردانی تاراوگه‌، چونكه‌ كوردانی تاراوگه‌ له‌سه‌رده‌مێكدا سه‌رچاوه‌ی ئابووری زۆر گرنگ بوون بۆ كه‌سوكاره‌كانیان‌و به‌شداریكردنیان له‌ دۆخی ئابووری وڵاته‌كه‌مان، ئێستاش سه‌رچاوه‌یه‌كی زۆر گرنگن بۆ پێگه‌یاندنی زانا‌و دانای ئه‌وتۆ كه‌ له‌ زانكۆكانمان له‌ بواری فێركردندا زۆر پێویستمان پێیان ده‌بێ. ئه‌وه‌ بێجگه‌ له‌ مه‌سه‌له‌ی كۆچكردن‌و چاره‌سه‌ری بژێوی‌و مووچه‌ی مامۆستا‌و فه‌رمانبه‌ر‌و گێڕانه‌وه‌ی ئه‌و متمانه‌یه‌ی كه‌ مووچه‌خۆر به‌حكومه‌تی هه‌رێمی كوردستان نه‌یماوه‌، هه‌روه‌ها پێدانی مووچه‌ی بێ پاشه‌كه‌وت له‌كاتی خۆیدا.وتیشی: ئێمه‌ به‌رنامه‌كانمان ئه‌وه‌یه‌ كه‌ گرنگیی زیاتر به‌ مه‌سه‌له‌ی خوێندن‌و به‌رزكردنه‌وه‌ی ئاستی خوێندن بده‌ین‌و پێمانوایه‌ ئه‌و رێگه‌یه‌ی دراوه‌ به‌ زانكۆ جیهانییه‌كان كه‌ بێن لێره‌ لق‌و به‌ش بكه‌نه‌وه‌، هه‌وڵ بدرێت ورد بكرێته‌وه‌ كه‌ چۆن ده‌توانن ئاستی خوێنده‌واری‌و ئاستی زانیاریی لێره‌ به‌رزبكه‌نه‌وه‌، له‌گه‌ڵ ئه‌وه‌شدا هه‌رێمی كوردستان ده‌ست بكات به‌ پڕۆژه‌ی ستراتیژیی كه‌ ده‌رفه‌تی كار زیاتر بدا‌و ئێمه‌ پێویسته‌ هه‌وڵی ئه‌وه‌ بده‌ین به‌شێكی زۆر له‌ ده‌رچووه‌كان، ئه‌وانه‌ی خوێندنیان ته‌واو كردووه‌ یان ئه‌وانه‌ی بێكارن، كاریان بۆ بدۆزینه‌وه‌.

خه‌ڵكی كوردستان كردوویه‌تی له‌ چوارچێوه‌ی یه‌كێتیی نیشتمانیی كوردستاندا
ده‌رباره‌ی بۆچوونی یه‌كێتیی له‌سه‌ر چۆنێتیی به‌ڕێوه‌چوونی هه‌ڵمه‌تی هه‌ڵبژاردن، وته‌بێژی یه‌كێتیی نیشتمانیی كوردستان رایگه‌یاند: ئێمه‌ لایه‌نگری ئه‌وه‌ین كه‌ به‌زمانێكی زبر موخاته‌به‌ی یه‌كتری نه‌كه‌ین، هه‌وڵی ئه‌وه‌ بده‌ین له‌م هه‌ڵمه‌تی هه‌ڵبژاردنه‌دا كه‌م ئێسك‌و پروسكی تێدا بشكێ، چونكه‌ ئه‌م هه‌ڵبژاردنه‌ بۆ په‌رله‌مانی عیراقه‌، لایه‌نه‌ كوردستانییه‌كان هه‌موو به‌یه‌كه‌وه‌ لاوازن، جا ئه‌گه‌ر په‌رته‌وازه‌ بن ده‌بێ چۆن بێ؟ هه‌ندێجار یه‌كێ خۆی پێ گه‌وره‌ ده‌بێ‌و ده‌چێ له‌سه‌ر لیستێكی عه‌ره‌بی خۆی هه‌ڵده‌بژێرێ، پێموایه‌ ئه‌مه‌ خۆڕیسواكردنه‌، بۆیه‌ پێمباشه‌ له‌و هه‌ڵمه‌تی هه‌ڵبژاردنه‌دا، هه‌ركه‌س ته‌ئكید له‌سه‌ر به‌رنامه‌كه‌ی خۆی بكاته‌وه‌، من ده‌ڵێم به‌رنامه‌كه‌ی من باشه‌، به‌رنامه‌كه‌ی ئه‌وی تر با خه‌ڵك بیخوێنێته‌وه‌، میلله‌تی ئێمه‌ به‌سیاسی كراوه‌، ده‌توانێ به‌راورد بكات، ئه‌وه‌ مه‌سه‌له‌یه‌كه‌، مه‌سه‌له‌ی دووه‌م، له‌م رۆژانه‌ی دواییدا هه‌ڵمه‌ت‌و هێرشی زۆر هه‌یه‌ بۆ سه‌ر یه‌كێتیی نیشتمانیی كوردستان، به‌داخه‌وه‌ ئه‌و گروپانه‌ی كه‌ له‌یه‌كێتی جیاده‌بنه‌وه‌، هه‌موویان له‌ یه‌كێتی جیاده‌بنه‌وه‌ چونكه‌ به‌حساب یه‌كێتی زۆر له‌گه‌ڵ پارتی به‌یه‌كه‌وه‌ حكومه‌ت پێكده‌هێنێت، به‌ڵام له‌ڕاستیدا هاوكاریی پارتی ده‌كه‌ن دژی یه‌كێتی، دژایه‌تیی یه‌كێتی ده‌كه‌ن‌و له‌ یه‌كێتی ده‌خۆن. وتیشی: من ده‌مه‌وێت ئه‌وه‌ بڵێم، یه‌كێتی بزووتنه‌وه‌یه‌كه‌ له‌ ئه‌سڵدا كراوه‌ بۆ كۆتاییهێنان به‌م ته‌مومژه‌ی كه‌ رێكه‌وتننامه‌ی جه‌زائیر به‌سه‌ر خه‌ڵكی كورستانیدا هێنا‌و خه‌ڵكی كوردستان له‌و نه‌هامه‌تییه‌ رزگار بكات، گۆڕان له‌لایه‌ن كاك نه‌وشیروانه‌وه‌ دامه‌زرا له‌به‌رئه‌وه‌ی گۆڕان رازی نه‌بوو به‌ئیداره‌ی سه‌ركردایه‌تیی یه‌كێتیی بۆ یه‌كێتی، خۆ له‌پێناوی گۆڕان دروست بوو، ئه‌وه‌ی ئێسته‌ كه‌ هاوپه‌یمانه‌كه‌ی كاك به‌رهه‌م هاتووه‌، كاك به‌رهه‌م وه‌كو قه‌شه‌ له‌ هۆڵه‌كاندا ده‌سوڕێته‌وه‌‌و قسه‌ بۆ خه‌ڵك ده‌كات‌و ده‌ڵێ كه‌رامه‌ته‌كه‌ت ئه‌گێڕمه‌وه‌، ده‌وڵه‌مه‌ندت ئه‌كه‌م، وات بۆ ئه‌كه‌م‌و وات بۆ ئه‌كه‌م، خه‌ڵك هه‌قیه‌تی لێی بپرسێ چۆن‌و چی ده‌كه‌ی؟ له‌ڕابردوودا ئێمه‌ تۆمان تاقیكردۆته‌وه‌، پێویست ناكا له‌مه‌دا وشه‌ی زبر به‌كاربهێنی، خه‌ڵك هه‌قیه‌تی بڵی چۆن دژایه‌تی گه‌نده‌ڵی ده‌كه‌ی؟ ئه‌ی خۆت چۆن ژیاویت له‌و كاته‌ی كه‌ له‌ ده‌سه‌ڵات بووی؟ پاشان ئه‌م بابه‌تی كه‌رامه‌تی ئێمه‌ به‌ڕۆژو دوو رۆژ وایلێنه‌هاتووه‌، به‌شێكی له‌و سه‌رده‌مه‌دا بوو كه‌ تۆی تێدا بوو، مه‌سه‌له‌ی هه‌موو جومگه‌ ئابوورییه‌كان به‌ نه‌وتیشه‌وه‌، له‌و كاته‌ی ئه‌و سه‌رۆك وه‌زیران بوو، ئه‌وه‌ هه‌بوو، ئه‌و چی كردووه‌ له‌و كاته‌دا؟ بۆیه‌ له‌و بابه‌ته‌دا پێویست ناكات ئێمه‌ وشه‌ی به‌رز‌و نزم به‌یه‌ك بڵێین، به‌ڵكو دابنیشین‌و موناقه‌شه‌یه‌كی ته‌ندروستی یه‌كتر بكه‌ین‌و بزانین تۆ ئه‌ته‌وێ چی بكه‌ی؟ هه‌رێمی كوردستان به‌و شێوه‌یه‌ی كه‌ هه‌یه‌، به‌ڵێ له‌ ئه‌نجامی خه‌باتی خه‌ڵكی كوردستان به‌ ژن‌و پیاوه‌وه‌ له‌ چوارچێوه‌ی یه‌كێتیی نیشتمانی‌و هێزی تر گه‌یشتۆته‌ ئه‌مڕۆ، به‌ڵام ئه‌گه‌ر تۆ پێتوایه‌ كه‌سێكی ئه‌وه‌ ده‌كه‌ی، نه‌خێر من ئه‌ڵێم ئه‌وه‌ خه‌ڵكی كوردستان كردوویه‌تی له‌ چوارچێوه‌ی یه‌كێتیی نیشتمانیی كوردستاندا.

كه‌ركوكییه‌كان ده‌بێ به‌یه‌كه‌وه‌ چاره‌سه‌ری كێشه‌ی كه‌ركوك بكه‌ن
ده‌رباره‌ی دۆخی كه‌ركوك،سه‌عدی ئه‌حمه‌د پیره‌ روونیكرده‌وه‌:من پێموایه‌ مه‌سه‌له‌ی سێیه‌م كه‌ گرنگ بوو باسمان كرد، مه‌سه‌له‌ی بارودۆخی كه‌ركوك بوو، ئێمه‌ نیگه‌رانین له‌ دۆخی كه‌ركوك، نیگه‌رانییه‌كه‌ی ئێمه‌ گه‌یشتۆته‌ ئه‌و راده‌یه‌ی كه‌ له‌گه‌ڵ عیراق پێویسته‌ له‌و باره‌یه‌وه‌ قسه‌ بكرێ‌و هه‌وڵ بدرێت كه‌ رێگه‌ نه‌درێ دۆخی كه‌ركوك بشێوێنرێت، شۆڤێنیزم هه‌یه‌ له‌ ده‌ره‌وه‌ی كه‌ركوك ده‌یه‌وێت له‌ ناو كه‌ركوك به‌رنامه‌ شۆڤێنییه‌كانی خۆی بسه‌پێنێت، یان هه‌وڵی هه‌نارده‌كردنی ئه‌فكار‌و دروستكردنی سیستمێكی دینی نه‌ژادپه‌رستی له‌ كه‌ركوك ده‌درێت، ده‌یه‌وێت بارودۆخی كه‌ركوكێكی ته‌ندروست، پێكه‌وه‌ژیانی پێكهاته‌ی جیاجیای سیاسی، مه‌زهه‌بی‌و ئیتنی له‌ كه‌ركوك زه‌حمه‌ت بكات، له‌و بابه‌ته‌دا ئێمه‌ له‌خه‌می ئاینده‌ی‌ كه‌ركوكین، ئێمه‌ پێمانوایه‌ ئه‌وه‌ی كه‌ په‌یوه‌ندیی به‌كورده‌وه‌ هه‌یه‌، له‌به‌رئه‌وه‌ی كورد له‌وێ زۆرینه‌یه‌، پێویسته‌ كورد له‌ هه‌موویان پشوو درێژتر بێت‌و كاربكات له‌ پێناوی خۆشكردنی زه‌مینه‌ بۆئه‌وه‌ی بتوانن چۆن ئه‌مانه‌ به‌یه‌كه‌وه‌ هه‌ڵبكه‌ن‌و به‌یه‌كه‌وه‌ بژین، من پێموایه‌ ئه‌و توركمانانه‌ی یان ئه‌و عه‌ره‌بانه‌ی له‌ كه‌ركوك ورته‌ورت ده‌كه‌ن، خۆیان خه‌ڵكی كه‌ركوك نین‌و له‌وێش دانه‌نیشتوون، توركمانه‌كان به‌شێكیان یان له‌ قه‌ڵاكه‌ دانیشتوون، یان له‌ به‌غدا له‌ سه‌فاره‌تی توركیا ئیش ئه‌كه‌ن، یان له‌ ئه‌سته‌نبوڵ‌و ئه‌نقه‌ره‌ ئه‌فسه‌رن له‌ جه‌ندرمه‌ی توركیا، ئه‌گینا ئه‌وانه‌ی له‌ كه‌ركوكن، خه‌ڵكی رێكوپێك‌و پێكه‌وه‌ژیانن‌و ده‌مێكه‌ به‌یه‌كه‌وه‌ ده‌ژین. عه‌ره‌به‌كانیش ئه‌و كۆنه‌ به‌عسییانه‌ن كه‌ له‌ عه‌مان‌و كه‌نداوو ئه‌سته‌نبوڵ دیپلۆماتن، هه‌میشه‌ باسی كه‌ركوك ده‌كه‌ن. ئێمه‌ باسی ئه‌وه‌مان نه‌كردووه‌ كه‌ كه‌ركوك له‌ كه‌ركوكییه‌كان بسه‌ندرێ‌و باسی ئه‌وه‌مان نه‌كرد كه‌ كێشه‌ی كه‌ركوك به‌بێ كه‌ركوكییه‌كان چاره‌سه‌ر بكرێ، پێمانوایه‌ كه‌ركوكییه‌كان ده‌بێ به‌یه‌كه‌وه‌ چاره‌سه‌ری كێشه‌ی كه‌ركوك بكه‌ن،به‌بێ ده‌ستوه‌ردان، چ له‌ هه‌رێم چ له‌ به‌غدا، جارێ له‌ تاران‌و ئه‌نقه‌ره‌ چاره‌سه‌ر نابێت، یان له‌ عه‌مان‌و سعودیه‌، له‌ كه‌نداویش چاره‌نابێت، به‌ڵكو كه‌ركوكییه‌كان خۆیان ده‌توانن چاره‌سه‌ری بكه‌ن.

به‌یه‌كێتیی ناو یه‌كێتیی بتوانین كێشه‌كانمان چاره‌سه‌ر بكه‌ین
سه‌باره‌ت به‌ دۆخی ناوخۆی یه‌كێتی‌و ئه‌و ده‌نگۆیانه‌ی باس له‌ ناكۆكی نێوان به‌رپرسانی یه‌كێتی ده‌كه‌ن، سه‌عدی ئه‌حمه‌د پیره‌ ئاماژه‌ی به‌وه‌كرد: ئه‌وه‌ بابه‌تی ناكۆكیی نێوان براده‌ران نییه‌، ئه‌و ناكۆكییه‌ له‌ناو یه‌كێتیدا هه‌ر هه‌بووه‌، بۆیه‌ هه‌میشه‌ یه‌كێك له‌ دروشمه‌ دیار‌و خۆشه‌ویسته‌كانی مام جه‌لال، به‌یه‌كێتیی ناو یه‌كێتیی بتوانین كێشه‌كانمان چاره‌سه‌ر بكه‌ین، یه‌كێتیی ناو یه‌كێتی، واته‌ یه‌كێتییه‌كی دوور له‌ كلك گرێدان‌و ته‌كه‌تولات، یه‌كێتی له‌ ئانوساتێكدا دامه‌زراوه‌‌و له‌هه‌مانكاتیشدا له‌بنه‌ڕه‌تدا له‌ سه‌رچاوه‌‌و چوارچێوه‌ی فیكری جیاجیا وه‌كو هێزێكی نیمچه‌ به‌ره‌یی پێكهاتووه‌، پاشان له‌ كۆنگره‌ی یه‌كه‌مدا كراوه‌ به‌یه‌ك، بۆیه‌ پێموایه‌ ئێستا كه‌ ئێمه‌ پێمانوابێت ئه‌وه‌ شتێكی تازه‌یه‌‌و دیارده‌یه‌كی تازه‌یه‌ له‌ناو یه‌كێتی، نه‌خێر ئه‌وه‌ مانای ئه‌وه‌یه‌ یه‌كێتیی ناناسێ، ئه‌وه‌ هه‌ر هه‌بووه‌، بۆیه‌ پێموایه‌ كێشه‌كه‌ له‌وێوه‌ ده‌ستپێده‌كات كه‌ پێشتر چونكه‌ دیزاینه‌ری یه‌كێتیی سه‌رۆك مام جه‌لال بووه‌، به‌ڕێوه‌بردنه‌كه‌شی مام جه‌لال بووه‌‌و ئه‌و توانیویه‌تی له‌سه‌ر بنه‌مای یه‌كێتی و ململانێی یه‌كێتی،براده‌رانی یه‌كێتیی كۆبكاته‌وه‌، به‌ئاراسته‌ی وه‌فا بۆ نیشتمان، وه‌فا بۆ نه‌ته‌وه‌، وه‌فا بۆ داخوازییه‌كانی نه‌ته‌وه‌، له‌ چوارچێوه‌ی كۆكردنه‌وه‌ی ئه‌و هێزانه‌ی كه‌ ئه‌و ناویلێناون هێزه‌كانی بیرو بازوو، زۆرجاریش له‌وه‌ش ده‌ترازا‌و داوایده‌كردچه‌په‌كانی كوردستان كۆبكاته‌وه‌ له‌ به‌رامبه‌ر راستڕه‌وو موحافیزكاره‌كانی كه‌ له‌ هه‌رێمی كوردستانن. پێموایه‌ ئێستا ئه‌و كێشه‌یه‌ی كه‌ هه‌مانه‌، به‌شێكیان كێشه‌ی به‌ڕێوه‌بردنه‌، ئه‌و براده‌رانه‌ی سه‌ركردایه‌تیی یان به‌رپرسیارێتیی به‌ڕێوه‌بردنی یه‌كێتییان هه‌بوو، نه‌یانتوانی ئه‌و بۆشاییه‌ی مام جه‌لال پڕبكه‌نه‌وه‌.
وتیشی: ئێمه‌ نه‌مانتوانی كێشه‌كانی ناوخۆمان چاره‌سه‌ر بكه‌ین، به‌شێوه‌یه‌ك كه‌ بتوانین یه‌كێتی ئیداره‌ بده‌ین، پێشتر كه‌ براده‌رانی به‌رپرسی یه‌ك‌و دوو یان بڵێین سێ‌و چوار له‌ دوای مام جه‌لال، ناز‌و گله‌ییان هه‌بوو، مام جه‌لال بۆی پینه‌ ده‌كردن، ئێستا مام جه‌لال نه‌ماوه‌، ئه‌وه‌ی كه‌ خه‌ڵك ده‌بێ نازی له‌سه‌ر بكات ئێوه‌ن، ئێوه‌ ده‌بێت كه‌ یه‌كێك شتێكی شكاند چاكی بكه‌نه‌وه‌، بارودۆخی یه‌كێتی له‌ هه‌ر روویه‌كه‌وه‌ كه‌موكوڕی هه‌بوو ئێوه‌ راستی بكه‌نه‌وه‌، مام جه‌لال ئێمه‌ به‌و هه‌موو ده‌یان ساڵه‌ی له‌گه‌ڵی ژیاوین، فێری سه‌نعه‌تێك كردووه‌ كه‌ چۆن ئیداره‌ی ناكۆكییه‌ سیاسییه‌كان ده‌ده‌ین‌و چۆن ده‌توانین له‌ هه‌ڵبژاردنی وشه‌‌و له‌ هه‌ڵبژاردنی پێگه‌ی دۆست‌و دوژمن ورد ده‌بین، ئه‌وانه‌ی فێر كردووین، پێویسته‌ ئێمه‌ له‌وێوه‌ ده‌ست پێبكه‌ین‌و هه‌وڵی ئه‌وه‌ بده‌ین كه‌ ئێمه‌ چۆن ده‌توانین به‌و كه‌ره‌سته‌یه‌ی له‌ به‌رده‌ستمانه‌،هاوكاربین له‌گه‌ڵ لایه‌نه‌كانی تری كوردستان بۆ گه‌یاندنی هه‌رێمی كوردستان‌و پرسی نه‌ته‌وه‌كه‌مان بۆ كه‌نارێكی ئارام، ئه‌م بابه‌ته‌ به‌شێكی گرنگی كێشه‌كانه‌و پێویسته‌ براده‌رانی خۆمان ئه‌وانه‌ی كادر‌و به‌رپرسن به‌شێكی زۆریان ژیاننامه‌یان به‌شێكه‌ له‌و بارودۆخه‌ی كه‌ یه‌كێتیی له‌ زه‌مانی مام جه‌لال‌و كاتی مام جه‌لال‌و دوای مام جه‌لالی تێدابووه‌، ئێستا بۆ وا پیشانی بده‌ن وه‌كو ئه‌وه‌ی ئاگایان له‌ هیچ نییه‌؟ ئه‌و ناكۆكییانه‌ له‌ناو یه‌كێتیدا هه‌ر هه‌بووه‌، ته‌نها ئه‌وانه‌ی به‌یارمه‌تی مام جه‌لال هه‌وڵی ئیحتیواكردن‌و گه‌مارۆدان‌و پووكانه‌وه‌ی ئه‌و ناكۆكییانه‌یان ده‌دا، ئێستا داری تێوه‌رده‌ده‌ن‌و گه‌وره‌تری ده‌كه‌ن، ئه‌وانه‌شی كه‌ داری تێوه‌رده‌ده‌ن‌و ده‌یانه‌وێ گه‌وره‌تری بكه‌ن، زۆرترن له‌وانه‌ی كه‌ ده‌یانه‌وێ گه‌مارۆی ناكۆكییه‌كان بده‌ن‌و كه‌میانبكه‌نه‌وه‌.

یه‌كێتی بووه‌ به‌یه‌كێك له‌ سه‌نگه‌ره‌ هه‌ره‌ قایمه‌كانی نیشتمانی‌و نه‌ته‌وه‌یی
سه‌باره‌ت به‌ هه‌ڵوه‌شاندنه‌وه‌‌و پێكهێنانه‌وه‌ی مه‌كته‌بی سیاسی، وته‌بێژی مه‌كته‌بی سیاسیی یه‌كێتیی نیشتمانیی كوردستان وتی: من پێموایه‌ له‌ 4/3 ‌و له‌ 5/3 ‌و له‌ 6/3 له‌ پاش ئه‌و كۆبوونه‌وانه‌ی كردمان، له‌ كۆبوونه‌وه‌ی سه‌ركردایه‌تیی مه‌سه‌له‌ی مه‌كته‌بی سیاسیمان چاره‌سه‌ر كرد، ئێمه‌ له‌ 4/3 لێره‌بووین له‌ كۆبوونه‌وه‌یه‌ك كه‌ هێرۆخان بانگهێشتی كردین، ژماره‌یه‌كی زۆر له‌ ئه‌ندامانی مه‌كته‌بی سیاسی هه‌ڵوه‌شاوه‌ باسمان له‌وه‌كرد كه‌ له‌ 4/11 وه‌ كه‌ ده‌كاته‌چوار مانگ، هه‌ندێك له‌ هه‌ڤاڵانی سه‌ركردایه‌تیی مه‌كته‌بی سیاسییان هه‌ڵوه‌شانده‌وه‌، پێموایه‌ ئه‌مه‌ پێویسته‌ هه‌ڵوه‌سته‌یه‌كی تێدا بكرێ، بزانین هه‌ریه‌كه‌مان له‌ ئاستی به‌رپرسیارێتین له‌ به‌رامبه‌ر هێزێكی سیاسیی ئه‌ساسی كه‌ یه‌ك شاكاری تۆماركردووه‌ له‌ رۆژی دروستبوونیه‌وه‌‌و باجی خوێنی داوه‌ بۆئه‌وه‌ی ته‌مومژی دوای ئاشبه‌تاڵ بڕه‌وێنێته‌وه‌‌و ببێته‌ هۆكاری گه‌یاندنی كورد‌و كورردستان به‌م قۆناغه‌ی ئێستا، جگه‌ له‌وه‌ش یه‌كێتی بووه‌ به‌یه‌كێك له‌ سه‌نگه‌ره‌ هه‌ره‌ قایمه‌كانی نیشتمانی‌و نه‌ته‌وه‌یی نه‌ك ته‌نها بۆ پرسه‌كانی په‌یوه‌ند به‌ باشووری كوردستان، به‌ڵكو بۆ هه‌موو پارچه‌كانی تری كوردستان، ئه‌م هه‌ستكردن به‌ لێپرسراوێتییه‌ پێویسته‌ بجوڵێنرێت. وتیشی: دوای ئه‌و كۆبوونه‌وه‌یه‌، كۆبوونه‌وه‌یه‌كی سه‌ركردایه‌تیمان كرد، هه‌موولایه‌ك به‌وپه‌ڕی لێپرسراوێتییه‌وه‌ بڕیاری ئه‌وه‌یان دا كه‌ مه‌كته‌بی سیاسی هه‌ڵببژێرنه‌وه‌، به‌تایبه‌تی مه‌كته‌بی سیاسیی له‌ به‌شێكی زۆری هه‌ڤاڵانی پێشووی مه‌كته‌بی سیاسیی هه‌ڵبژێردرایه‌وه‌، ئه‌م بارودۆخه‌ی ئێستا هه‌رێمی كوردستانی پێدا تێده‌په‌ڕێ كه‌ مه‌كته‌بی سیاسییه‌كمان هه‌یه‌ كاك كۆسره‌ت به‌ده‌سه‌ڵاتێكی زۆره‌وه‌، هه‌موو كێشه‌كانی به‌ره‌وڕوو كراوه‌ته‌وه‌ به‌هاوكاریی له‌گه‌ڵ مه‌کته‌بی سیاسیی، پرسی هه‌ریه‌ك له‌ كادره‌كان‌و پرسی هاووڵاتی‌و پرسی یه‌كێتی‌و رۆڵی یه‌كێتی‌و هه‌ڵوێستی یه‌كێتی له‌ به‌رامبه‌ر كێشه‌كانی كه‌ هه‌یه‌، دابڕێژێته‌وه‌‌و فۆرمه‌له‌ بكا‌و له‌ڕێگه‌ی كه‌ناڵه‌كانی خۆمان‌و له‌ڕێگه‌ی راگه‌یاندنه‌وه‌ ئاراسته‌ی بكات، بۆئه‌وه‌ی خه‌ڵك سوودی لێوه‌ربگرێت. من پێموایه‌ ئێستا چه‌ند هه‌نگاوێكمان بڕیوه‌ به‌ڵام به‌دڵنیاییه‌وه‌ له‌و كۆبوونه‌وه‌یه‌ی سه‌ركردایه‌تیدا كه‌ دێ، هه‌نگاوی تریش ده‌بڕین‌و هه‌وڵی ئه‌وه‌ ده‌ده‌ین ئه‌و بابه‌تانه‌ به‌ته‌واوی بهێنینه‌وه‌ سه‌ر رێچكه‌ی خۆی.
باسی له‌وه‌شكرد: تا كاتی كۆنگره‌ دوو شتمان كردووه‌، یه‌كێكیان ئه‌وه‌یه‌ جۆرێك له‌ ئاشته‌وایی ناو ریزه‌كانی یه‌كێتی له‌ سه‌ركردایه‌تیه‌وه‌ تا خواره‌وه‌‌و ئاشتكردنه‌وه‌ی جه‌ماوه‌ری یه‌كێتی له‌گه‌ڵ سه‌ركردایه‌تیی یه‌كێتی، چونكه‌ قاعیده‌ی یه‌كێتیی هه‌ڵوێستێكی وه‌رگرتووه‌ له‌سه‌ر سه‌ركردایه‌تیی یه‌كێتی، ئه‌و هه‌ڵوێسته‌ی وه‌ریگرتووه‌، په‌نجا له‌ سه‌دی رازین له‌سه‌ری، به‌ڵام په‌نجا له‌ سه‌دی له‌ ده‌ره‌وه‌ی ده‌سه‌ڵاتی سه‌ركردایه‌تیی یه‌كێتییه‌، بارودۆخه‌ ئابووریی‌و ئه‌منییه‌كه‌ دۆخێكی وای هێناوه‌ته‌ پێش، به‌ڵام په‌نجا له‌ سه‌دی ئه‌وه‌ی په‌یوه‌ندیی به‌بژێوی خه‌ڵكه‌وه‌یه‌، په‌یوه‌ندیی به‌بژێوی كادره‌وه‌یه‌، په‌یوه‌ندیی به‌هاوپه‌یمانێتی‌و سوور بوون له‌سه‌ر وه‌فا یا پابه‌ندبوون به‌ به‌رنامه‌كانی خۆمان، ئه‌مه‌یان هه‌قیانه‌، پێویسته‌ گوێیان لێڕابگیرێ‌و لێیان فێر ببین.

یه‌كێتیی خۆپیشانده‌ران ده‌پارێزێ
سه‌عدی ئه‌حمه‌د پیره‌ ده‌رباره‌ی خۆپیشاندانه‌كانی ئه‌م دواییه‌ی مامۆستایان‌و فه‌رمانبه‌ران‌و شێوازی پشتیوانیی به‌كێتی له‌ داواكانیان، ئاماژه‌ی به‌وه‌كرد: له‌ پێش خۆپیشاندانیش،یه‌كێتیی نیشتمانیی كوردستان پشتیوانی له‌ داخوازییه‌كانی مامۆستایان‌و فه‌رمانبه‌ران كرد، ئه‌وه‌ی په‌یوه‌ندیی به‌ مووچه‌وه‌ هه‌یه‌، ئێمه‌ له‌بنه‌ڕه‌تدا دژی ئه‌وه‌ین كه‌ ئه‌م بابه‌ته‌ به‌سیاسی بكرێ‌و له‌به‌رده‌می دادگای سلێمانی خه‌ڵك بچێته‌ سه‌ر سته‌یج‌و وتار بخوێنێته‌وه‌، وه‌كو ئه‌وه‌ی خۆی ئه‌و خۆپیشاندانه‌ی دروست كردبێت، ئه‌و خۆپیشاندانه‌ موڵكی هیچ لایه‌نێكی سیاسی نه‌بوو، ئه‌و خۆیشاندانه‌ خۆپیشاندانی مامۆستایانه‌ له‌ هه‌موو خه‌ڵكی كوردستان بوو.
روونیشیكرده‌وه‌: ئیداره‌ی ئه‌م ناوچه‌یه‌ زۆنی سه‌وز به‌ده‌ست یه‌كێتیی نیشتمانیی كوردستانه‌وه‌یه‌، جێگری سه‌رۆكی حكومه‌ت‌و جێگری وه‌زیری ناوحۆ‌و به‌رپرسی فه‌رمانده‌یی هێزه‌كانی پێشمه‌رگه‌‌و ئاسایش هه‌مووی به‌ده‌ست یه‌كێتییه‌وه‌ن، یه‌كێتیی خۆپیشانده‌ران له‌ هه‌موو ده‌ستدرێژییه‌ك ده‌پارێزێ، له‌هه‌مانكاتیشدا رێگه‌ ده‌گرێ له‌ هه‌ركه‌س په‌ڵپیان پێبگرێ، به‌ڵام بابه‌تی رێگه‌ نه‌دان به‌هیچ لایه‌نێكی سیاسی، ئه‌و لایه‌نه‌ سیاسییه‌ بیه‌وێت خۆی بكاته‌ پاڵه‌وانی چیرۆكه‌كه‌، ئه‌وه‌ ناكرێ‌و خۆیان رێگه‌ به‌یه‌كتری ناده‌ن، تۆ ده‌بینی جاریوایه‌ هه‌ندێك خه‌ڵك ده‌چنه‌ سه‌ر سته‌یج دایده‌به‌زێنن به‌فیكه‌، واته‌ ئه‌م جۆره‌ هه‌وڵه‌ بۆ خۆكردن به‌پاڵه‌وانی ئه‌م چیرۆكه‌، تائێستا سه‌رنه‌كه‌وتووه‌. من پێموایه‌ پێویست ناكا ئێمه‌ هیچ قسه‌یه‌كی تێدا بكه‌ین، خۆیان خۆپیشانده‌ره‌كان بای ئه‌وه‌ وشیارن كه‌ لێنه‌گه‌ڕێن ئه‌مان به‌كاریانبهێنن. ئه‌و خۆپیشاندانانه‌ش هه‌ر له‌ سلێمانی نییه‌، له‌ زاخۆوه‌ تا خانه‌قین هه‌یه‌، به‌ڵام هه‌ر جێیه‌‌و به‌حوكمی ئه‌و ئازادی‌و پانتاییه‌ی دیموكراسیی كه‌ هه‌یه‌.
جیابوونه‌وه‌ ته‌نها به‌ راپرسیی ناكرێ
سه‌باره‌ت به‌ په‌یوه‌ندیی نێوان هه‌رێمی كوردستان‌و حكومه‌تی عیراق كه‌ دوای ریفراندۆم گرژی‌و ئاڵۆزی به‌رچاوی به‌خۆیه‌وه‌ بینی، وته‌بێژی یه‌كێتیی نیشتمانیی كوردستان ئاشكرایكرد: ده‌بێ هه‌وڵی ئه‌وه‌ بده‌ین كه‌ تێبگه‌ین له‌ هۆی ساردبوونی ئه‌م په‌یوه‌ندییه‌ی نێوان حكومه‌تی فیدراڵی عیراق‌و هه‌رێمی كوردستان، ئه‌مه‌ له‌ ئه‌نجامی ریفراندۆمه‌، له‌ ئه‌نجامی هه‌وڵێكی سه‌رنه‌كه‌وتوو بوو بۆ جیابوونه‌وه‌، ئه‌و ریفراندۆمه‌ ئێمه‌ راپرسیمان له‌سه‌ر كردووه‌‌و 7و92% ده‌نگ به‌ڕه‌سمیی هاتووه‌، ئه‌م رێژه‌یه‌ له‌مێشكی منی لایه‌نگری ریفراندۆم‌و له‌ مێشكی ئه‌وبراده‌ره‌ی به‌غدای دژی ریفراندۆم تۆمار بوو، ئێمه‌ له‌ ئه‌نجامی جیۆپۆله‌تیكێكی سه‌قه‌ت له‌ رۆژهه‌ڵاتی ناوه‌ڕاست، بۆمان روونبۆوه‌ ئه‌وه‌ ته‌نها به‌راپرسیی ناكرێ، ئێمه‌ مافمانه‌ داوای زیاتر بكه‌ین، به‌ڵام له‌ڕووی سیاسییه‌وه‌ مۆڵه‌تمان نییه‌ ئه‌وه‌ بكه‌ین، چونكه‌ لۆژیكی هێز، نه‌ك هێزی لۆژیك، لۆژیكی هێز زاڵه‌، ئه‌وه‌ی ئێمه‌ ده‌یكه‌ین هێزی لۆژیكه‌، به‌ده‌نگدان داوای زیاتر ده‌كه‌ین، ئه‌وه‌ی ئه‌وان ده‌یكه‌ن لۆژیكی هێزه‌، ده‌یانه‌وێ به‌زۆر ناچارت بكه‌ن كه‌ نابێ ئه‌وه‌ بكه‌ی.بۆیه‌ ئێمه‌ له‌ داهاتووشدا وه‌كو مام جه‌لال هه‌ر ده‌یفه‌رموو كوڕم ئه‌گه‌ر ده‌ته‌وێ باسی سیاسه‌ت بكه‌ی، پێشتر سه‌یری نه‌خشه‌ بكه‌، پێویسته‌ ئه‌مجاره‌ دووجار سه‌یری نه‌خشه‌ بكه‌ین، ئه‌وجا بیر له‌ هه‌نگاوێكی وا بكه‌ینه‌وه‌، هه‌نگاوێكی له‌و بابه‌ته‌ش به‌بێ لێكتێگه‌یشتن له‌گه‌ڵ عیراق‌و وڵاتانی ده‌وروبه‌ر ناكرێ.

ئه‌م هه‌ڵوێسته‌ی توركیامان پێ هه‌ڵوێستێكی نادروسته‌
سه‌باره‌ت به‌ په‌یوه‌ندییه‌كانی نێوان یه‌كێتیی نیشتمانیی كوردستان‌و توركیا كه‌ به‌هۆی ئه‌و سنوربه‌زاندنانه‌ی توركیا له‌ هه‌رێمی كوردستان ده‌یكات یان به‌هۆی داگیركاریی عه‌فرین، یه‌كێتی هه‌ڵوێستی خۆی ده‌ربڕی‌و له‌ به‌رامبه‌ریشدا په‌رچه‌كرداری توركیای به‌دوادا هات، وته‌بێژی یه‌كێتی وتی: له‌ڕاستیدا یه‌كێتیی نیشتمانیی كوردستان له‌ سه‌ره‌تاوه‌ هێڵی له‌ ژێر سیاسه‌تی كوردستانیی خۆی كێشاوه‌، ئه‌ركی نه‌ته‌وه‌یی‌و نیشتمانیی ئێمه‌یه‌ پشتیوانیی له‌ خه‌باتی باكوور‌و پارچه‌كانی تری كوردستان بكه‌ین، ئێمه‌ سیاسه‌تی توركیامان به‌رامبه‌ر خه‌ڵكی كوردستان پێ قبوڵ نه‌كراوه‌‌و توركیا نه‌یتوانیوه‌ ئێمه‌ بكات به‌دۆستی سیاسه‌تی خۆی، چونكه‌ ئه‌وه‌مان لا روونبۆته‌وه‌ كه‌ له‌ ئه‌نجامی راوه‌دونان‌و زیندانیكردنی ئه‌ندامانی په‌رله‌مان‌و شاره‌وانیی هه‌ڵبژێردراو له‌ باكوور، له‌ ئه‌نجامی قڕكردنی خه‌ڵكی عه‌فرین‌و سه‌ری كانی‌و كۆبانی، له‌ ئه‌نجامی ده‌ستوه‌ردانی له‌ كاروباری ناوخۆی هه‌رێمی كوردستان، ئه‌م ده‌ستوه‌ردانانه‌ ئێستا ده‌یكات، ئێمه‌ گه‌یشتووینه‌ته‌ ئه‌نجامێك كه‌ ئه‌گه‌ر دوو كه‌س بیانه‌وێت سه‌نته‌رێكی كلتووری كوردستانی له‌ جێیه‌ك بكه‌نه‌وه‌، توركیا سه‌ربازیان بۆ ده‌نێرێت، ئه‌مه‌ خراپه‌، تا ئێستا ئیسپاتی نه‌كردووه‌ كه‌ ئه‌وه‌ وا نییه‌، بۆیه‌ ئێمه‌ ئه‌م هه‌ڵوێسته‌ی توركیامان پێ هه‌ڵوێستێكی نادروسته‌‌و مه‌حكوممان كردووه‌، به‌ڵام ئه‌مه‌ ئه‌وه‌ ناگه‌یه‌نێت كه‌ ئێمه‌ له‌گه‌ڵ توركیا 400 كیلۆمه‌تر سنووری هاوبه‌شمان هه‌یه‌، ئێمه‌ بتوانین توركیا موقاته‌عه‌ بكه‌ین، موقاته‌عه‌ كردن هه‌نگاوێكی نه‌زۆك و بێ ئه‌نجامه‌ له‌ كاری سیاسیدا، بۆیه‌ ئێمه‌ له‌سه‌ر مه‌سه‌له‌ی به‌رده‌وامبوون له‌ په‌یوه‌ندی‌و هه‌وڵدان بۆ چاره‌سه‌ری ئه‌و كێشه‌یه‌ به‌شێوه‌ی دیپلۆماسی ده‌بێت. من پێموایه‌ زوو ده‌ستیان پێكرد كه‌ ئۆفیسی یه‌كێتی له‌وێ دابخه‌ن له‌ ئه‌نجامی ئۆپه‌راسیۆنێكی سه‌رنه‌كه‌وتوو كه‌ ده‌بوایه‌ باجه‌كه‌ی یه‌كێتی بیدات، هه‌رچه‌نده‌ یه‌كێتی خه‌تای نه‌بوو،بۆیه‌ ده‌بێ ئه‌م مه‌سه‌له‌یه‌ چاوی پێدابخشێنرێته‌وه‌.

 

print

 81 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*