سەرەکی » ئاراستە » مام ئەحمەد خۆڵە تێكۆشەرێك بەر لە شۆڕشپەڕە 22

مام ئەحمەد خۆڵە تێكۆشەرێك بەر لە شۆڕش

عومەر كەریم*

لە بەرەبەیانی پێش هەڵگیرساندنەوەی شۆڕش، پیاوێكی گەنم رەنگی روكار كوردانەی ئازاو بوێر و راستگۆ، لە دەم دەریاچەی دوكان و لە زێدی كوردانی مامەنداوە، بەگژ رژیم دا دەچێتەوە لە بناری ئاسۆس.

كوانوو بۆ شۆڕش دروستدەكات، خۆی بەدوای پێشمەرگە و شۆڕشدا دەگرێت بۆ ئەوەی ببێتە پێشمەرگە، بۆ یەكەمینجار ئاشنا دەبێ‌ بە شەهید عەلی عەسكەری و لەو ساتە بە دواوە ئیتر دەبێتە فەرماندە و پێشمەرگەیەكی دڵسۆزی كوردستان، ناو وناو بانگیشی لە تەواوی ناوچەكەدا بڵاودەبێتەوە.

سەبارەت بەم تێكۆشەرە، هەڤاڵ قادر عەزیز دەڵێت: بەدرێژایی 42 ساڵ، خزمەتی بە یەكێتیی نیشتمانیی كوردستان كرد، هەر لە گەڵیشی دامایەوە، ساتێك دانەبرا، هەر لە رەحمەتی سەرۆك مام جەلالەوە تا سەركردەكانی تری یەكێتی گوێی لێڕادەگیرا.
مام ئەحمەد لە كۆنگرەدا شوێنێكی تایبەتی بۆ دانرابوو لە پێشەوە، وەك رەمزێكی ئەم شۆڕشە تەماشا دەكرا، مام ئەحمەد هەرخۆی پێشمەرگە نەبوو، خزم و كەسوكاریشی كە چەند خێزانێك و چەند بنەماڵەیەك بوون، هەموویان هاتبوونە ناو شۆڕشەوە.

هەورەها عیماد ئەحمەد دەڵێت: یادو یادگارێكی زۆری لەگەڵ هەڤاڵانیدا هەبووە، دۆستی زۆربەی سەركردەكان بوو.

مام ئەحمەد پیاوێك بوو، راستگۆو قسە خۆش، ماڵەكەی دیوەخانێك بوو بۆ هەڤاڵەكانی، سفرەكەی پڕ بەرەكەت بوو.

قسە خۆشی و دەستكراوەیی و بەوەفایی، لە پاڵ ئازایی و بوێرییەكەی بوونە ناسنامەی مام ئەحمەدی خۆڵە، لەسەر زاری هاوڕێ‌ و هاو سەنگەرانی وەك شانازی دەگێڕدرێتەوە كە لەو رۆژگارەدا چ پیاوێك هەڵ كەوتوە كە بتوانێ‌ بەو شێوەیە ئاشانا و دۆستیان بێت و خزمەتی شۆڕش بكات.

مام ئەحمەد خۆڵە پێشمەرگەی سەرەتای شۆڕش و هەڵگری مەدالیای ئاڵتونیی شۆڕش، لە دایكبووی ساڵی 1920ی گوندی (مەمەنداوا)ی سنووری بنگردە، قۆناغە ساختەكانی زۆڵم زۆری رژێمە یەك لەدواییەكانی عیراقی بینوە، هەمیشە دەنگێكی نارازی و دژ بەری ئەو زۆڵم زۆرییە بووە كە بەرامبەر نەتەوەكەی كراوە، بەو هۆیەشەوە خۆی و بنەماڵەی تووشی چەرمەسەریی زۆر هاتوون، بەڵام چۆكی بۆ گوشارەكانی دوژمن دانەداوە.

هەر لە ساڵی 1975دا بەر لە هەڵگیرسانەوەی شۆڕشی نوێ، خۆی لە دەست رژێم قوتار دەكات و لەگەڵ (شەهید عەلی)ی كوڕی دەچنە شاخ و ئیتر بۆ هەمیشە لە ژێر دەستی رژێم رزگاری دەبێت.

وەستا رەسوڵ دەگێڕێتەوە: دەیانجار گوێم لەو قسەیەی مام ئەحەمەد بووە كە دەیگوت مام جەلال زۆر گەورەیە، قەدری بگرن تا لە ژیانداماوە، وەكو مام جەلالمان دەستناكەوێتەوە.

مام ئەحمەد یەكێك بوو لەو پیاوانەی باوەڕناكەم كەس دڵی لێ عاجزبووبێ‌، پێموایە هەموو خەڵك قەرزداری مام ئەحمەد بێ‌، لەبەرئەوەی نەسیحەتی خێری كردوون.

مستەفا چاوڕەش-یش وەك سەركردەیەكی دیاری سەرەتاییەكانی شۆڕش ئەوە باس دەكات: لەو رۆژگارەی كورد پێوستی بە پێشمەرگەبوو مام ئەحمەدهەبوو، ناڕەحەتی زۆری دیوە، عەلی كوڕی كە یەكێك بوو لە پێشمەرگە ئازاكانی تیپی 43، شەهید بووە.

كە لەگەڵ كاك نەوشیروان گەڕاینەوە بۆ بناری كۆسرەت، یەكێك لەو پێشمەرگانەی بینیمان مام ئەحمەد بوو لە ساڵی 1977 دا، واتا پێش ئێمە پێشمەرگەبوو لەگەڵ شەهید عەلی كوڕیدا.

جوانیەكانی مام ئەحەمەد و بنەماڵەكەی لە بارەی سەرڕاستی و وەفا و قوربانیداندا هەر زوو لەلای سەركردایەتیدا دەبێتە جێگەی سەرنج، ماڵ و سامانی خۆی لەگەڵ شۆڕش بەشدەكات، دەبنە پشتیوانێكی بەهێز بۆ بەردەوامیدانی تا ئەو ئاستەی پێكەوە خۆشی و ناخۆشییەكانی ئەم شۆڕشە بەش دەكەن و هیچ كامیان پشتیان لەویتر ناكات.

شاڵاوعەلی عەسكەری لە بارەی پەیوەندی خۆیان و رۆڵی ما ئەحمەد دەڵێت: مام ئەحمەد قسەڕاست و توندبوو، تاقەتی موجامەلەی درۆی نەبوو، پەیوەندیی ئێمە و مام ئەحمەد پەیوەندێكی بنەماڵەیی بوو، ئەو زیاتر لە ئێمە ئەو پەیوەندییەی دەپاراست و سەردانی دەكردین.

مام ئەحمەد یەكێك بوو لەو پێشمەرگانی كە ساڵی 1976 لە هەڵگیرسانەوەی شۆڕشدا پەیوەندی بە شەهید عەلی عەسكەرییەوە كردووە.

ئاراس شێخ جەنگی لە چەند روییەكەوە باس لەو تێكۆشەرە دەكات و دەڵێت: مام ئەحمەد پیاوێك بوو خەڵك خۆشی دەویست، پێشمەرگە، سەركردەكان خۆشیان دەویست و قسە خۆش بوو.

مام ئەحمەد پیاوێكی سادەبوو، هەمیشە ورەو هێزی پێ‌ دەداین، لە وەختی تێكشانەكانیشدا هەر بە ورەبوو و نەدەشكا، مام ئەحمەد پیاوێكی تیكۆشەر خاوەن شەهیدە.

محەمەد وەتمان لە باسی ئەم پێشمەرگە سەرەتاییەی شۆڕش و بنەماڵەكەیەوە رایگەیاند: مام ئەحمەد كە هاتبوو بۆ پێشمەرگایەتی ساڵی 1976 زیاتر لە 20 پارچە چەكی خۆیان هەبوو لەگەڵ شەهید عەلی كوڕی دا، كە ئەو وەختە چەك یەكجار كەم بوو لە كوردستاندا.

ئەم بنەماڵەیە، بنەماڵەیەكی تێكۆشەربوون هەم خەباتی چەكداریان هەبوو هەم خەباتی سیاسیشیان هەیە.

عەزیز ئەحمەد كوڕی مام ئەحمەدیش لە یادی ئەم تێكۆشەرەدا وتی:
ئێمە هەر خۆمان ئەزێت و ئازارمان بەدەست رژێمەوە نە چێشتووە، لەبەر ئەوەی باوكم پێشمەرگە بووە، باپیرم چەندانجار گیراوە، مامە ئەبوبەكرم بۆ ماوەی شەش مانگ بێ‌ سەرو شوێن كراوە، شەهید عەلیی برام ئەو رۆژەی بوكی بۆ دابەزیوە لە شەڕدا بووە.

ئێمە شانازی دەكەین كە باوكمان چۆن بە پاكی و دڵسۆزی بۆ نیشتمانەكەی ژیا و خۆی كردەقوربانی، هەرئاواش بە پاكی و دڵسۆزی مایەوە و هەموو كەس بۆی پەرۆش بوو كە كۆچی دوایكرد.

هەر لە بارەی مام ئەحمەدەوە، مەلابەختیار لە واڵی تایبەتی خۆی لە فەیسبووك نووسیویەتی:
مام ئەحمەد، پێشمەرگەی كۆڵنەدەری سەرەتای شۆڕش، بێ دابڕان لە شۆڕش و یەكێتی، پیاوێكی سادە، راستگۆ، بە خزمەت، دابونەریتی بناری ئاسۆس و كوردەواریی ئەو دەڤەرەی پاراستبوو.

مام ئەحمەد كۆڵی نەدا، مام جەلال و شۆڕشی بۆ ماڵی دونیا جێنەهێشت.

هەمیشە دەیگوت: بە خوڵای.. مام چی بێ.. من هەوم.

مام ئەحمەد، هەر لەگەڵ سەركردایەتیداو لەگەڵ مام جەلالدا مایەوە، هەتا سەركردایەتی چۆڵكرا لە خڕی نێوزەنگ، ئەركی پێشمەرگایەتی، لەوێ جێبەجێ دەكرد.

مام ئەحمەد، هەموو كەس لێی رازی بوو، پیاوی جوامێری وا جێگەی شانازییە. كۆڵنەدەر، پاك.. لەهەموو تەمەنی پێشمەرگایەتیدا، كەس دڵی لێی نەڕەنجا.

بە سەربەرزی ژیا، بە سەربەرزی كوردستانی خزمەت كرد، چۆن بە پاكی و بێباكی هاتە دەرەوە، هەر بەو شێوەیەش لەدوای راپەڕین پاكیی خۆی پاراست و بەو پاكیەش كۆچی دوایی كرد.

هەزار رەحمەت لە گۆڕەكەی.

*راپۆرتی تەلەفزیۆنی گەلی كوردستان

 200 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*