سەرەکی » ساڵۆنی کوردستانی نوێ » سینەماتۆگراف،لاكردنەوەیەك لە هونەرو پڕۆژەی فیلمسازیی لە كوردستان

ساڵۆنی کوردستانی نوێ

سینەماتۆگراف،لاكردنەوەیەك لە هونەرو پڕۆژەی فیلمسازیی لە كوردستان

لەم ساڵۆنەدا
وەك لە ژمارەكانی دیكەدا‌و لەو بابەتانەدا كە لە ساڵۆنی كوردستانی نوێدا تاوتوێ دەكرێت، ساڵۆنی كوردستانی نوێ گرنگیی بە زۆرێك لە بوارە مێژوویی ‌و كەلتووریی ‌و سیاسی ‌و ئەدەبییەكان دەدات ‌و لەو رێگەیەوە ئامادەبووان ‌و خوێنەران بە چاپكراوی نوێ لەو بوارانەدا ئاشنا دەكرێن.
ساڵۆنی ئەمجارەی كوردستانی نوێ-ش تایبەت بوو بە خستنەڕووی چاپی دووەمی كتێبێكی تایبەت بە سینەما بەناونیشانی « سینەماتۆگراف « كە لە نووسینی بەڕێز هاوار مستەفا خانە، كە بەجۆرێك لە جۆرەكان جیاوازە لە بابەتی كۆڕەكانی دیكەی ساڵۆن و زیاتر بابەتێكی نوخبەوییە‌و زیاتر لاكردنەوەیە لە بابەتێك كە ئەگەرچی هەموو چین ‌و توێژەكان وەك بینەر پەیوەستن بە فیلم ‌و كاری فیلمسازییەوە، بەڵام ئەوانەی كە گرنگیی بەو بوارە دەدەن وەك كارو وەك زانست، دەستەبژێرێكی خەڵكن، بەتایبەتیش لە كوردستاندا كە تا رادەیەك لە بواری فیلم ‌و سینەمادا كەم ئەزموونن ‌و لە بوونی پاشخانی ئەو بوارەدا هەژارن.
لەو بارەیەشەوە رۆژی « « هاوار مستەفا خان لە میانی كۆڕەكەیدا رۆشنایی خستە سەر كاری بەرهەمهێنانی كتێبەكەی ‌و زانیارییە مێژوویی ‌و زانستییە نوێیەكانی ئەو بوارەی بۆ ئامادەبووان خستەڕوو.

ساڵۆنی كوردستانی نوێ

كەریمۆك:
زۆر سوپاس بۆ كوردستانی نوێ كە ئەمڕۆی تەرخان كرد بۆ سینەما، هیوادارم ئەوە دەستپێكی بواری سینەما بێت، من و كاك هاوار هەوڵدەدەین چالاكیمان هەبێت لەو بوارەدا.
20-9-1996 لەسەر قەڵای هەولێر كاك هاوار كۆڕێكی گێڕا لە بواری سینەما، من كۆڕ گێربووم، دوای 22 ساڵ جارێكی تر كاك هاوار كۆڕدەگێڕێت ‌و منیش پێشكەشی دەكەم. هەموولایەك بەخێربێن.
بۆ قسەكردن لەسەر سینەمای كوردی لە رووی بەرهەمێنانەوە، ئاستێكی باشی بڕیووە، لە ساڵی 2003وە زۆر بەخێرایی گەشەی كرد، ئێستا كورد خاوەنی سینەمای باشە، هەر چوار پارچەی كوردستان هەر لە 2003 ەوە سینەمای رۆژهەڵاتی كوردستان بە پاڵپشتی بوودجەی ئێرە گەشەیەكی باشی كرد، وەك تەهای كەریمی یادی بەخێر، ئیبراهیمی سەعیدی ‌و جەمیلی رۆستەمی كە توانییان فیلمی خۆیان پێشكەش بكەن.
دەمەوێت بڵێم فیلمسازیی كوردی لە رووی فێستیڤاڵەكانەوە ئامادەیی باشی هەیە.
ئەم كتێبەی كاك هاوار گرنگییەكی باشی هەیە كە مێژووی سینەمای جیهانی بەشێوەیەكی جوان بۆ ئەوانە دەگێڕێتەوە كەخوازیارن بزانن سینەما چۆن گەشەی كردووە، ئێستا دوو فێستیڤاڵی گەورە هەیە یەكێكیان فێستیڤاڵی سینەمای سلێمانییەو ئەوی تریان لە دهۆكە. فیلمی كوردی لە فێستیڤاڵی دهۆك ئامادەیی لە 40% بووە، 8 فیلمی بڵندی سینەمای كوردی دروستكراوە، هەر ئێستا دوو فیلمی بڵندی كوردی دروستدەكرێت، یەكێكیان لە سلێمانی ‌و ئەوی تریان لە شەقڵاوەو ناوچەكانی تر، بەو مانایە سینەمای كوردی خاوەن ناسنامە نییە، سینەمایەكی شپرزەیە، سینەمایەكی ناجێگیرە، چەند پارچەكانی تری كوردستان جێگیربێت، سینەماش جێگیر دەبێت.
ئەم كتێبە ناوی سینەماتۆگراف كە ئامێری وێنە گرتنە كە دوو برا بوون كوڕی لۆمێرن كە ئەم ئامێرەیان دروستكردووە لە 28-12-1895، یەكەمین فیلم لە كافێیەكی پاریس نمایشكرا، بوو بە یەكەم فیلم. من بۆچوونێكم هەیە، ئەدیسۆن ئامێرێكی دروستكرد، من زۆرم پێ سەیرە بۆ مێژووی سینەما لە ئەدیسۆنەوە دەستی پێنەكرد؟ مێژووی سینەمای جیهانی 123 ساڵە، سینەما لەم ماوە كەمەدا توانیی گرەوی خۆی بباتەوە، دەوڵەتان بە بایەخەوە سەیری بكەن، دەوڵەت چۆن كار لەسەر سیاسەت دەكات، بەهەمان شێوەش سینەمایان ئاراستە كردووە، بەتایبەتی ئەمریكاو ئێران.
ساڵی 1895 ئەو ئامێرە دروست بوو دوای دوو ساڵ شای ئیران دەچێتە پاریس ئەو ئامێرە نامۆیە دەبینێت ‌و دەیكڕیت. ئێستا سینەمای ئێرانی ئاوها بەهێزە هی ئەو سەردەمەیە، بەداخەوە سینەما لە كوردستان كۆنتاكتی لەگەڵ رۆشنبیران ‌و چین و توێژەكان ‌و دەسەڵاتدا نییە، هۆكارەكەشی ئەوەیە خاوەنی كەلتورو سینەما نین. ئەوسا دەیانوت كتێبی كوردی لە پەنجەكانی دەست تێناپەڕێت، خۆشبەختانە ئەم ساڵ 5 كتێب چاپكراوە، دوو كتێبیان هی كاك هاوارە لە 2019 چەند كتێبێك چاپ دەكات من نامەوێت كاتان زۆر بگرم فەرموو كاك هاوار .
هاوار مستەفا خان:
زۆر سوپاس كاك كەریمۆك هاوڕێی دێرینم، بۆ وەڵامی پرسیارەكەت ئەدیسۆن پێش برایانی لۆمێر ئامێریان ئامادە كردو دەیانتوانی فیلم دروست بكەن، ئەوكاتە كۆپی رایت هەبوو، ئەوكاتە ئەدیسۆن نەیتوانی ئامێرەكە بە 1500 دۆلار بدات، تۆماری بكات، ئەوەبوو كەوتە دەستی برایانی لۆمێر، هۆكارەكەشی ئەوەبوو پارەی نەبووە، ئەویش قەرزار بووە.
زۆر بەخێربێن، دەمەوێت سوپاسی چاپخانەی كارۆ بكەم، راستە كاك عەتا بزنس دەكات، بەڵام كاری جوان دەكات، كتێبی (سینەما تۆ گراف) 21 ساڵ پێش ئێستا نووسراوە، كاك حەسەن ئاگادارە ئێمە لە ئاڵای ئازادی بووین ئەوكاتە شەڕ مابوو، هەموو جارێك دەیانوت: ئەو لۆمیرەی تۆ ئێمەشی كوشت. لە پێشەكییەكەشدا باسی ئاڵای ئازادیم كردووە، سوپاس بۆ خوا كە لەو دۆخە تێپەڕین ‌و ناخوازین هەر گیز بیبینینەوە.
ئەمجارە كە كردمانەوە بە كتێب، بە وێنەی جوان ‌و كاری باشترو دیزاینی جوانتر چاپمان كردۆتەوە، ئێستا ئاستی فیلم باشبووە، بەشی سینەمامان هەیە، ئەم كتێبە بەلای منەوە گرنگ بوو، ئەم سینەمایەی ئێمە دەیبینین 70 ساڵ زانایانی دونیا خەریكی كاركردن بوون كە چۆن ئامێرێك دروستبكەن ژیانی ئاسایی تۆمار بكات؟ دەركەوت سینەما زادەی سەرمایەدارییە، هەڵبەت بیرۆكەكە ئەوروپاییە، بەڵام ئەمریكا قۆستییەوە‌و كردی بە دامەزراوەیەك كە بازرگانی ‌و بزنس بێت، هۆلیودیش نموونەی ئەو دامەزراوەیەیە كە كێبڕكێ لەگەڵ بۆلیودو نۆلیود دەكات، لەوانەیە كەمتان گوێتان لێ بووبێت كە لە وڵاتی نەیجیریا كە سینەمای مەنزلی پێ دەڵێن، سینەما نییە، لە وڵاتی ئەوان بەیانیان دەردەچن فیلم دەردەكەن، لە سەر دی ڤی دی دەیفرۆشن، بەرهەمیان لە هۆلیود و بۆلیود زیاترە.
باسی ئەم كتێبە، چەند ئامێرێكە هی چەند زانایەكە بە پێی ساڵەكان دروستكراوە، ئەگەر سەیری زاناكان بكەین، لە شێوەدا هەڵكەووتوون، تۆپن، 150 ساڵ لەمەوبەر كە هونەرێكی لەو جۆرە دەبینین كە چەندین زانا هاتن پارچە پارچە ئەو فیلمەیان گرت، لە هۆڵێكدا 35 كەس هاتووە بلیتی بەیەك فرانك بووە، بۆیە سینەما هەر لە لەدایكبووینەوە بزنس بووە، بۆیە تائێستا وشەی هاتن بۆ هەمووانە دەبێت شۆڕشێك بكەین تا ئەو وشەیە بگۆڕین، چونكە هاتن بۆ هەمووان واتا بەخۆڕایی، من هەوڵ دەدەم كتێب بۆ سینەماش ببێت بە بزنس.
وەك باسمكرد بە چەند قۆناغێك دەستی پێكرد، ئەو ئامێرە هەتا 70 ساڵ هەموو زاناكان گرفتیان هەبوو كە چۆن كامڵ ببێت؟ چۆن وێنە بگرێت؟ لە ساڵی 1882 كۆداك دێت، دەڵێت لەسەر تۆیە دوگمەكە دابگریت ‌و باقێكەكەی لەسەر خۆمان، دوای ئەوە ئامێرێكیش پێویستە كە ئەو فۆتۆیە نیشان بدات، بۆ نموونە لۆمێرەكان ئەم ئامێری فۆتۆ گرافەیان دروستكرد، فیلمەكانی ئەوان لەسەر ئەم ئامێرە رۆیشت، وایلێهات لۆمێرەكان موڵكییەی تۆماركردنیان بردەوە، سینەما هەر بەوەوە نەوەستا، سینەما ئەگەر سەیری فیلمی چارلی چاپڵن بكەین، جووڵەكانی خێرایە، كاتی فیلمەكە گواستراوە 75 فرێد بووە لە چركەیەكدا كە پارچە پارچە بووە، من نامەوێت هەموو كتێبەكە باس بكەم، سوپاس بۆ ئامادەبوونتان من بەشێكی باش لە سینەماكارانم بانگهێشت كردبوو، بەڵام دیارە سەرقاڵ بوون بۆیە نەهاتوون، ئێمە گەشبینین ‌و ئومێدێكی زۆر هەیە، زۆربەمان كەوتینە رق و كینەوە، كاتێتی لەگەڵ دەسەڵاتدا قسە بكەین، چونكە فیلمیش تەواوكەری شۆرشی كوردبووە كە دەستی پێكردووە، من دەمەوێت ئەوە بڵێم: «ئێوە وەك ئەكادمی ‌و رۆژنامەنووس گرنگی پێ بدەن، من ئاگادارم حكومەت لە ساڵانی رابردوو 25 ملیۆن دۆلاری تەرخان كردووە، تازە خەریكین كتێبەكان پەنجەكانی دەست تێدەپەڕێنن، ژێرخانی سینەمامان نییە، لە كوردستان هەمووشتێك هەیە، بەڵام دەبێت رێكیان بخەینەوە، هەر لە ساڵۆنی كوردستانی نوێ كاك ستران ‌و برایانی مەكتەب ئەو دەرگایەیان كردۆتەوە، لە داهاتوودا كلیپیش پێشكەش بكرێت.

د.حسێن محەمەد عەزیز:
ئێستا سەیری كتێبەكەم كرد، ئایا مێژووی سینەماكان باسكراوە؟ داواكارم لە داهاتوودا ئەوەش زیاد بكەیت ‌و باسی سینەماكانی كوردستان بكەیت، من منداڵ بووم بیرمە لە ماڵێك بووین بە پارە سەیری فیلممان دەركرد.
هاوار مستەفا خان:
بۆ مێژووی سینەما من وەختی خۆی لە قاسمە ڕەش بووین، فۆڕمێكم نووسی كە بگەڕێمەوە چۆن فیلم كۆبكەینەوە، ئێستا فیلمی كوردی نزیكەی 600 فیلمە، لە هەوڵی ئەوەدام دیراسە لەسەر مێژووی فیلمی كوردی ‌و ئاستەنگەكانی نزیكەی 12 ناونیشانم داناوە، من داتام لایە فیلمی كوردی 30 هەزار دیناری تێچووە، یەك ملیۆن دینار داهاتی هەبووە! ئەمە بەرهەمهێنانە، بۆیە ئەمەیان تەنها مێژووی جیهانە، بۆیە باسی ئەوەشم كردووە كە مێژووەكە بناسین، لە ئێران گەورەترین فیلم دەرهێنەرەكەی كورد بووە، لە میسر لە سێ كەسایەتی دیاری سینەما، یەكێكیان كورد بووە، لە سوریا لە عیراق لە توركیا خۆشبەختانە ئەوانەی لەو بوارە كاریان كردووە بەرهەمەكانیان ژیان دۆستین، مایەی خۆش بەختییە هونەرمەندانی گەلی كورد بەگشتی كاری نا ئینسانیان نە نواندووە، بۆ مەسەلەی سلێمانی لە ساڵی 1967 نامیلكەیەك لەسەر سینەما نووسراوە كە مستەفا رابەر نووسیوێتی. من لە ساڵی 1989 هەموو كتێبەكەم بەدەست نووسیووە، ئەوەندە موعجیبی ئەو كتێبە بووم. من لە ماستەركەم باسم كردووە، عیراق رێگەی نەداوە هیچ لەسەر كورد بكرێت، دەرفەتی باشمان لە پێشە كە خۆمان كۆبكەینەوە‌و دەرفەتمان لە پێشە.
رەهبەر سەید برایم:
سوپاس بۆ كوردستانی نوێ بۆ ئەو كارە جوانانەیان، دەستخۆشی لە هاوار مستەفا خان دەكەم، من دەمەوێت ئاماژە بەوە بدەم یەكەم كامێرای سینەمایی دكتۆر خالید هێناویەتی لە شۆڕشی نوێ، ئەو كامێرایەش پێموابێت هاوار خان دەزانێت پارێزراوە لە قشڵەی كۆیە ئەرشیف كراوە بەناوی دكتۆر خالید، هەموویمان كۆكردۆتەوە، دووبارە دەستخۆشی لە كاك هاوار دەكەین.
ئەنوەر قەرەداغی:
من بۆ مێژوو دەیڵێم ساڵی 1971 كامێرەیەك كڕادرابوو بۆ زانكۆی سلێمانی بۆ تۆماركردنی كارەكان ، 16 ملم بوو، ، لە پێش ئەوەشدا لیژنەیەك دروستكرا لە پەروەردەی سلێمانی بە بۆنەی 11ی ئازار بۆنەیەك هەبوو لەگەڵ خوالێخۆشبوو ئەنوەر تۆفیق، سمكۆ عەزیز و من لیژنەیەك دروستكرا سەردانی هاوینە هەوارەكانمان كرد، تەنها بۆ وێنە گرتن، دواییش كاری ترمان پێدەكرد، ساڵی 1983 حەمە عەلی خان پەیوەندیی پێوەكردم كە فیلمێكیان گرتووە هی پێشمەرگە لە ماڵی ئێمە مۆنتاژ كرا، سەعات 12ی شەو «بەرەو قەندیل»، ئەو شتانەش لەو سەردەمانە كراون.
هاوار مستەفا خان:
من مامۆستا ئەنوەرم لە چوار ساڵیدا بینیووە كەمانچەی لێداوە لە شاخ، ئەمانە هەمووی فیلمن، من ماستەرەكەم باسی سینەمای كوردییە، ئەوەی كاك رابەریش باسی كردووە، باسی دكتۆر خالید، من باسی كاك عەباس عەبدولڕەزاق ‌و هێرۆخانیشم كردووە، كاتی خۆی وتارێكم نووسی ئایا كێ لەو سێ كەسە یەكەم كەس بوون كە لە شۆڕشی نوێ فیلمیان گرتووە؟ بەڕاستی بەلامەوە گرنگە مامۆستا ئەنوەر بیرەوەرییەكانی خۆی بنووسێتەوە، چونكە پڕە لە زانیاریی و سوپاس بۆ كاك رابەریش پێویستە سەرێك لە قشڵەی كۆیە بدەین ‌و سەیری ئەو شتانە بكەین.
هیوا حەمید:
سوپاس بۆ ساڵۆنی كۆردستانی نوێ، من شتێك دەڵێم بۆ دەوڵەمەندكردنی باسەكەی كاك هاوار. لەسەر دەستی كاك هاوار توانیمان دوو فێستیڤاڵی كورتە فیلم بكەین، وابزانم ئێمە یەكەم رێكخراوبووین ئەو فێستیڤاڵە بكەین، پێم خۆشە هاوكاریی كاك هاوار بكرێت و ئینتیمای حزبی لێك نەدرێتەوە‌و پشتگیریی بكرێت.
هاوار مستەفا خان:
یەكێتیی نیشتمانی كوردستان ئەوكات من مێرد منداڵبووم ئەو بڵاوكراوانەی كە دەهات بۆ شاخ، من سەرنجم دەچووە سەر بەشی سینەما، هیوادارم ئێستا دۆخی سینەما بەرەو پێش چووە، دەتوانین هاوكاریی زیاتری یەكتریی بكەین.
ئەردەڵان عەبدوڵڵا:
من دەستخۆشیت لێدەكەم كارێكی زۆر باشە من حەزم دەكرد لەم كتێبە باسی وڵاتانت بكردایە، بۆ نموونە هۆڵیود لە ئەمریكا، لەخۆرهەڵاتیشدا باسی میسرت بكردایە، من لەو باوەڕەدام باسی ئەو ئەزموونانەت بكردایە دەوڵەمەندتر دەبوو.

هاوار مستەفا خان:
بەشی بیست كتێب ئامادەیە بەڵام وەك وتم، باسی هەوڵی زانایانەیە لەو 70 ساڵەدا، ئەگەر تەمەن باقی بێت، كار لەسەر ئەوانەش دەكەم.
جەواد حەیدەری:
دەستان خۆشبێت، من بە پێچەوانەی ئەو قسانەوە ئەگەر ئاسایی بێت، من لەگەڵ ئەوەدا نیم كوردێك بەهەر زمانێك نووسبێتی، خزمەتی بە كورد نەكردووە، بەلای منەوە گرنگ نییە دەرهێنەرێكی میسری كوردبێت یان نا، لام گرنگە چی بۆ كورد كردووە؟ سینەمای كوردی هیشتا دەڵەمە نەبووە، مەهزەلەكە ئەوەیە شارێك فیلمی نەبێت، فێستیڤاڵی فیلم ساز بكات، سینەمامان نییە، ئێمە ئەنفال‌و كیمیا بارانمان هەیە، تا ئێستا چی كراوە جگە لە تۆزێك كڕوزانەوەو لاوانەوە؟ من دەڵێم تۆزێك وێنە‌و گرتە گیراوە، ئێمە بەهمەنی قوبادیمان سینەماكەی بە ئێرانی ناسراوە، ئەو هەموو پارەیە خەرجكراوە، چی كراوە؟ ئێمە با بێن خەمێك لەوە بخۆین دوبلاژی توركی قوڕی كردووە بەسەر خێزانی كورددا، بە ئەنقەست ئەو فیلمانە دروستكراوە، حزبی كوردی دەكات بە تیرۆریست، با لەسەر ئەوانە قسە بكەین.
هاوار مستەفا خان:
قسەكانی تۆ زۆر زۆر هەڵدەگرێت، ئێمەش شتمان هەیە، هەر بۆ نموونە ئەم كتێبە بزنسە، مادام پارەی تێچووە، زانیاریی تێدایە، بڵاوكرایەوە بزنسە،سینەما چەند خەسڵەتێكی تەنها بڵاوكردنەوەی نییە، بازاڕەكەی كزە، بووترێت نیمانە بەشێوەیەكی رەها رەتی دەكەمەوە، بەڵام فیلمی كوردی سەیر بكەین، رەنگە هەزاران خەڵات هەبێت كە بۆ فیلمە كوردییەكان رۆشتووە، پێشینەیەكی باشمان هەیە، ئەو كەسانەش كە كوردن ‌و خزمەتیان كردووە، بەلای منەوە گرنگن، هەم وەك مرۆڤایەتی ‌و هەم وەك كوردیش زۆر كەس تێبینی هەیە لەسەر یەڵماز گۆنای، دەڵێن كوردیی نییە، باشە زمانەكە بەڕەسمی قەدەغەیە، هەتا ئەو كاتەی یەڵماز خەڵاتی لەسەر فیلمی «یۆڵ- رێگا» وەرگرت، دەوڵەتی توركیا ناسنامەكەی لێ سەندەوە! مێژووەكەمان وایە، كورد سینەماو مێژووی لە ناوەوەو لە دەرەوە هەیە، ئیمكانات هەیە دەبێت رێك بخرێتەوە.
كەریمۆك:
بۆ سینەمای كوردی، دەبێت بەزانیارییەوە قسە بكەین، لە فێستیڤاڵی كوردی وتم 40% فیلمی كوردی بوو، لە فێستیڤاڵی سلێمانی لە 35% كوردی بوو، هەر ئێستا دوو فیلم كاری لەسەر دەكرێت، ئێستا فیلمی كوردی پەنجەرەی بۆ كراوەتەوە، چەندین فیلمی كوردی هەیە كە نابینرێت، هۆكاری نەبوونی كۆنتاكتە لە نێوان سینەماكاران ‌و حكومەتدا، زۆر شتی تر هەیە سینەماكاران كردوویانە، باسی رووە سیاسییەكەی ناكەین، فیلم هەیە، بەڵام خاوەن ستایل نین، سینەمای كوردی هاوشانی میللەتی كورد لە بارێكی دەرونیی خراپدا دەژی.
د. هەژار محەمەد:
من بۆخۆم پشتگیریی بەشێك لە قسەكانی جەواد حەیدەریی دەكەم، حەزم دەكرد كاك هاوار باسی مێژوویەكی بكردایە كە دەڵێت سینەمای كوردی نییە، ئەوە سینەماكارانی كورد نییە، ئەوە ئەو دەسەڵاتە سیاسییەیە لە هەرێمی كوردستان دەرفەت نادات دەستەیەكی تایبەت بە سینەما دروست ببێت، ساڵی 2014 لە فێستیڤاڵی 36ی قاهیرە من ‌و كاك هاوار لەوێ دەمانخوێند، بووین بە میوانی فێستیڤاڵ، لەوێ كاك سەفیر فەرید سەرۆكی لیژنەی باڵای فێستیڤاڵەكە یەك هەفتەیان بۆ سینەمای كورد تەرخان كردبوو، بەڵام حكومەتی كوردی كەسی نەنارد، هەفتەكەی ئێمەیان دا بە یۆنان، هەتا بەدەمی پێی وتین: وایزانی ئێمە نوێنەری كوردین! وتی ئێمە لە فێستیڤاڵەكانەوە كورد دەناسین، بەڵام ئێوە خۆتان ناتانەوێت هیچتان هەبێت، كاك هاوار هەستا قسەی كرد، خەڵكەكە زۆری پێ خۆشبوو.
بۆ بەشی دووەمی قسەكانی حەیدەری، ئێمە لەگەڵ كاك ستران بڕیارە كۆڕێكمان هەبێت لەسەر دراما دۆبلاژكراوەكان، ئەگینا قسەكانت راستە بەڵام هەڵیدەگرین بۆ ئەو كۆڕە.


هاوار مستەفا خان:
من زیاتر لە 30 ساڵە خەریكم، با بەكەم سەیری سینەمای كوردی نەكەین، ئێستا كورد بەشدارە لە لیژنەی ئۆسكار فیلم هەڵدەبژێرێت، كورد پێش فارس ‌و عەرەب ‌و تورك خەڵاتی كانی وەرگرتووە، كتێبەكەی یەڵماز گۆنای بخوێنەرەوە، چاپخانەی كارۆ چاپی كرد، دەرهێنەرێكی سویسرییە كە یەڵماز گۆنای دەرباز كرد لە توركیا، ساڵی پار نووسیویەتی، ئەمساڵ كاك هێژا دڵشاد وەرگێڕاوە بۆ كوردی، دەڵێت: كاتێك یەڵماز گۆنای چوو بۆئەوەی خەڵاتە وەربگرێت، دوو حیمایەیان بۆ دانابوو، دەوڵەت دەڵێت چوار كەس هاتوونەتە هۆڵەكە میوان نین، بۆیە كاتێك گڵۆپ دەكوژێتەوە، نووسەری كتێبەكە و یەڵمازو دوو حیمایەكە رادەكەن ‌و لە دەرەوە ئۆتۆمبێلێكیان بۆ دابینكراوە‌و هەڵهاتن. دەوڵەتێك بەدوای سینەماكارێكەوە بووە لەساڵی 1982. زۆر سوپاس بۆ هەموولایەك‌و بۆ ئامادەبوونتان دووبارە بەخێربێن.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*