سەرەکی » دۆسێ » داوا دەكرێت لێكۆڵینەوە لەگەڵ بن سەلماندا بكرێت

گەشتێكی ئەنجامدا

داوا دەكرێت لێكۆڵینەوە لەگەڵ بن سەلماندا بكرێت

محەمەد بن سەلمان جێنشینی شاهانەی سعودیە، لە ناوەڕاستی هەفتەی رابردوو، گەیشتە تونس، ئەمەش لە وێستگەی چوارەمی گەشتەكەی كە ئیمارات و بەحرەین و میسری گرتەوە. هەر لەو چوارچێوەیەدا، رێكخراوی «هیومان رایتس وۆچ» داوای لە ئەرجەنتین كردبوو، سود لە بەندێكی دەستوری وڵاتەكەی وەربگرێت سەبارەت بە تاوانانەكانی جەنگ و لێكۆلینەوە لەگەڵ جێنشینی شاهانەی سعودیە بكات لە ئەگەری تێوەگلانی لە تاوانەكانی جەنگ لە یەمەن و كوژرانی جەمال خاشقچی رۆژنامەنوسی سعودی، ئەمەش لە میانی بەشداریی بن سەلمان لە لوتكەی بیست كە لەلایەن بۆیسن ئایرسەوە میوانداریی كرابوو.
محەمەد بن سەلمان جێنشینی شاهانەی سعودیە، بەردەوامبوو لە گەشتە عەرەبییەكەی و لە قاهیرەوە چووبووە تونس، دوای ئەوەی بۆ ماوەی دوو رۆژ لەگەڵ بەرپرسانی میسر لە وتوێژ و كۆبوونەوەدابوو لەسەر چەند پرسێكی گرنگی تایبەت بە هەردوو وڵات و ناوچەكە.
ئەو گەشتەی بن سەلمان بۆ میسر، دوای ئەوە بوو كە پێشتر سەردانی هەریەك لە ئیمارات و بەحرەینی كردبوو.
جێنشینی شاهانەی سعودیە، دوای ئەوەی لە فڕۆكەخانەی قاهیرە لەلایەن سەرۆكی میسرەوە پێشوازیی گەرمی لێكرا، گفتوگۆی چڕوپڕی لەگەڵ عەبدولفەتاح سیسی و بەرپرسانی باڵای میسردا ئەنجامدابوو.
ئاژانسی دەنگوباسی شەرقولئەوسەت بڵاویكردبۆوە»بن سەلمان و سیسی، پەیوەندیە دوو قۆڵییەكانی نێوان هەردوو وڵات، و پتەوكردنیان لەسەر ئاستە جیاجیاكان و چەند دۆسێیەكی سیاسی جێبایەخی هاوبەشیان لە چوارچێوەی هاوبەشی ستراتیژی نێوان قاهیرە و ریازدا تاوتوێ‌ كردبوو».

داوایەك لە ئەرجەنتین دەكرێت
لای خۆیەوە، رێكخراوی «هیومان رایتس وۆچ» كە بایەخ بە مافەكانی مرۆڤ دەدات و بارەگاكەی لە شاری نیویۆركی ئەمریكایە، داوای لە ئەرجەنتین كردبوو، بەندێكی دەستوری وڵاتەكەی بقۆزێتەوە كە تایبەتە بە تاوانەكانی جەنگ و لێكۆڵینەوە لە رۆڵی محەمەد بن سەلمان جێنشینی شاهانەدا بكات لە ئەگەری تێوەگلانی لە تاوانی دژ بە مرۆڤایەتی لە یەمەن و كوژرانی جەمال خاشقچی رۆژنامەنوسی سعودی.
دەستوری ئەرجەنیتن دان بە پسپۆڕیی جیهانیدا دەنێت لە بواری تاوانەكانی جەنگ و ئەشكەنجە، ئەوەش بەو مانایەی كە دەسەڵاتی داوەریی لە وڵاتەكەدا دەتوانێت لێكۆڵینەوە لە تاوانەكان و دادگایی كردنی ئەنجامدەرانی بكات، بەبێ‌ رەچاوكردنی شوێنی روودانی تاوانەكان.
ئەو رێكخراوە كە بایەخ بە مافەكانی مرۆڤ دەدات، داواكارییەكی لەو بارەیەوە رەوانەی دادوەر ئەرییل لیخۆ كردبوو. نوسینگەی لیخۆ و نوسینگەی داواكاریی گشتی ئەرجەنتین وەڵامی داواكارییەكەیان نەدابۆوە.
سارە لیا وتسن، بەڕێوەبەری بەشی خۆرهەڵاتی ناوەڕاست و باكووری ئەفریفا لە «هیومان رایتس وۆچ» رایگەیاندبوو»رێكخراوەكەیان داواكەی پێشكەش بە ئەرجەنتین كردووە، چونكە میر محەمەد ئامادەی كردنەوەی لوتكەی گروپی بیست دەبێت لە بوینس ئایرس».
بە گوتەی لیا وتسن»زانیارییەكانمان لەو بارەیەوە پێشكەش بە داواكاریی گشتی ئەرجەنتین كردووە، بەو هیوایەی لێكۆڵینەوە لە ئەگەری تێوەگلانی محەمەد بن سەلمان بكرێت لە تاوانەكانی جەنگ لە یەمەن و ئەشكەنجەدانی مەدەنییەكان، لەوانەش جەمال خاشقچی».
میدیاكانی ئەرجەنتین لە زاری سەرچاوە دادوەرییەكانی وڵاتەكەیانەوە بڵاویان كردبۆوە كە پێناچێت دەسەڵاتداران ئەو داوایە لە دژی جێنشینی شاهانەی سعودیە جێبەجێ‌ بكەن، بەو پێیەی میر محەمەد فەرمانڕەوایی تەواوەتی شانشینی عەرەبی سعودیە.

رەخنە لە پادشای ئیسپانیا دەگیرێت
لە ئیسپانیا، خوان كارلۆس پادشای پێشوو رووبەڕووی رەخنەی توندبۆوە، دوای ئەوەی چەند وێنەیەكی كە لەگەڵ جێنشینی شاهانەی سعودیەدا گرتبووی لە ئەبو زەبی، بڵاوبوونەوە.
هەردوو حزبی چەپی توندڕەو «بۆدیمۆس» و «ئەزكیردا ئۆنبیدا»ی ئۆپۆزسیۆن، رەخنەیان لە پادشای پێشوو گرتبوو، بەو هۆیەی بەشێوەیەكی ناچاوەڕوانكراو، لە هەفتەی رابردودا، چاوی بە جێنشینی شاهانەی سعودیە كەوتبوو كە فەرمانڕوای تەواوەتی عەرەبستانی سعودیەی دەوڵەمەند بە نەوتە.
لەو بارەیەوە پابلۆ ئیخینیك، ئەندامی دەركەوتوو لە بۆدیمۆس لەسەر تۆڕی كۆمەڵایەتی (تویتەر) نوسیبووی «ئەو كارە سوكایەتییە بۆ ئیسپانیا و ئیسپانییەكان».
ئەلبرتۆ گارزۆن، سەركردەی حزبی (ئەزكیردا ئۆنیدا)ش، لەسەر تۆڕی كۆمەڵایەتی (تویتەر)، ئیدانەی دۆستایەتییەكانی خانەوادەی شاهانەی ئیسپانیای كردبوو و نوسیبوی»ئەوە كاردانەوەی سەردەمێكە كە پێویستە كۆتایی بێت».
لە 26ی تشرینی دووەمی 2018، وتەبێژی خانەوادەی شاهانەی ئیسپانیا، لە گرنگی ئەو چاوپێكەوتنەی كەمكردبۆوە و رایگەیاندبوو»ئەوەی رویدا، گوزارشتە لە سڵاوێك كە پرۆتۆكۆڵەكان سەپاندویانە، بەبێ‌ ئەوەی چوارچێوەیەكی رەسمی هەبێت».

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*