سەرەکی » هەواڵ » مه‌لا به‌ختیار: به‌ڵێن دووپات ده‌كه‌مه‌وه‌ كۆڵنه‌ده‌ری هه‌مان ئه‌و رێبازه‌بم كه‌ جه‌نابی مام جه‌لال نه‌خشاندوویه‌تی

ته‌ئكید له‌سه‌ر پێویستی به‌ستنی كۆنگره‌ ده‌كات

مه‌لا به‌ختیار: به‌ڵێن دووپات ده‌كه‌مه‌وه‌ كۆڵنه‌ده‌ری هه‌مان ئه‌و رێبازه‌بم كه‌ جه‌نابی مام جه‌لال نه‌خشاندوویه‌تی

مه‌لا به‌ختیار لێپرسراوی ده‌سته‌ی كارگێڕیی مه‌كته‌بی سیاسی، له‌ په‌یامێكی ڤیدیۆییدا، وێڕای پیرۆزبایی له‌ كه‌سوكاری شه‌هیدان ‌و هه‌موو ئه‌ندامان ‌و پێشمه‌رگه‌و كه‌مئه‌ندامان، ئاماژه‌ به‌ پێگه‌و خه‌بات ‌و قوربانییه‌كانی یه‌كێتی ده‌دات ‌و داوای كاركردن به‌ پره‌نسیپه‌ بنچینه‌ییه‌كانی یه‌كێتی ده‌كات‌و جه‌ختیش له‌سه‌ر به‌ستنی چواره‌مین كۆنگره‌ ده‌كاته‌وه‌.
ئه‌مه‌ی خواره‌وه‌ش ده‌قی په‌یامه‌كه‌یه‌:

هه‌ڤاڵانی یه‌كێتی،

ئه‌مڕۆ یادی 44 ساڵه‌ی دامه‌زراندنی یه‌كێتییه‌كه‌مانه‌، پیرۆزبایی گه‌رم له‌ یه‌كه‌ به‌یه‌كه‌تان ده‌كه‌م، له‌ خوشك ‌و برایان، له‌ پێشمه‌رگه‌، له‌ كه‌مئه‌ندام، رێزو نه‌وازشم بۆ كه‌سوكاری شه‌هیدان یه‌كه‌ یه‌كه‌ هه‌یه‌، رێگه‌شم بده‌ن به‌ رۆح بچمه‌ ده‌وری رۆحیانه‌ته‌كه‌ی مام جه‌لال، له‌وێشه‌وه‌ رابمێنم له‌ سه‌ربڵندییه‌كانی سه‌روه‌ره‌كانی یه‌كێتی، كاك عه‌لی عه‌سكه‌ری، كاك شیهاب، كاك ئارام، دكتۆر خالید، ره‌ئوف به‌گ، مامۆستا عه‌زیز، مامۆستا جه‌مال تاهیر. له‌هه‌موو ئه‌و سه‌ركردانه‌ی كه‌ گیانی خۆیان به‌ختكرد، له‌بادینانه‌وه‌ هه‌تا خانه‌قین، هه‌موو ئه‌وانه‌ی كه‌ گیانبازی ئه‌م یه‌كێتییه‌ بوون و گیانبازی رۆژانی میحنه‌ت بوون. فرمێسك له‌سه‌ر كێل به‌كێلی هه‌موویان ده‌ڕێژم.
ئه‌م یاده‌ ده‌توانم بڵێم یادێكی شكۆمه‌نده‌ له‌ مێژووی نوێی گه‌له‌كه‌ماندا، یادێكه‌ كه‌ من ئێستا ئاوڕ له‌ 44 ساڵ له‌مه‌وبه‌ر ده‌ده‌مه‌وه‌، باش باش له‌بیرمه‌، له‌ خانه‌قین له‌ ژوورێكی تاریك ئیزگه‌ی سوریام ده‌كرده‌وه‌ بۆئه‌وه‌ی هه‌واڵێك ببیستم، ئه‌وكاته‌ به‌نده‌ به‌رپرسیاری خانه‌قین بووم له‌ كۆمه‌ڵه‌، ئه‌و شه‌وه‌ی كه‌ گوێم لێ بوو، به‌یاننامه‌ی دامه‌زراندنی یه‌كێتیی نیشتمانیی كوردستان بڵاوكرایه‌وه‌، شه‌وێكی هه‌تا بڵێی مژده‌به‌خش بوو و له‌ناو تاریكستانی فاشییه‌كاندا، هه‌ستمكرد رووناكییه‌كی زۆر جوان دڵ ‌و ده‌روون ‌و به‌رچاومی روونكرده‌وه‌.
44 ساڵ له‌مه‌وبه‌ر، هێشتا پێشمه‌رگه‌ نه‌بوو، هێشتا رێكخستنه‌كانی یه‌كێتیی نیشتمانیی كوردستان ته‌نانه‌ت شانه‌یه‌كیشی له‌ كوردستاندا نه‌بوو، هێشتا ده‌ستمان نه‌كردبوو به‌ په‌یوه‌ندیی به‌و تێكۆشه‌رانه‌ی كه‌ له‌و رۆژگاره‌دا ئاماده‌بوون پێشمه‌رگه‌ بن، پێشمه‌رگه‌ به‌مانای راسته‌قینه‌ی پێشمه‌رگه‌.
ئێستا كه‌ ئاوڕ ده‌ده‌مه‌وه‌ قۆناغه‌ سه‌خته‌كانی پێشمه‌رگایه‌تی، خه‌باتی نهێنی، چۆنێتیی رێكخستنی رێكخستنه‌كان، كۆكردنه‌وه‌ی هه‌ڤاڵان… تێكۆشه‌ران، ئێستا بیر له‌وه‌ ده‌كه‌مه‌وه‌ كه‌ یه‌كه‌م به‌یاننامه‌مان چۆن چاپ ده‌كرد له‌ ناوه‌وه‌ی وڵات، یه‌كێتیی نیشتمانیی كوردستان بۆچی؟ كه‌ شه‌هید ئارام وه‌ریگێڕابوو، چاپمان كرد، ئێستا بیر له‌وه‌ ده‌كه‌مه‌وه‌ چۆن یه‌كه‌مین جار له‌ رێگه‌ی شه‌هید جه‌ماله‌ ره‌شه‌وه‌، كه‌ من ئه‌وكاته‌ له‌ماڵیاندا موخته‌فی بووم، یه‌كه‌مین نامه‌ی كۆمیته‌ی هه‌رێمه‌كان كه‌ شه‌هید ئارام نووسی ‌و ناردمان بۆ مام جه‌لال، وه‌ڵامه‌كه‌مان بۆ هات، ئه‌و وه‌ڵامه‌ چ مانایاكی ده‌به‌خشی به‌ ئێمه‌، چۆن به‌رچاوی روون كردینه‌وه‌ له‌وه‌ی كه‌ ئێمه‌ له‌ناو وڵاتدا چی ده‌كه‌ین، ئه‌وانیش له‌ ده‌ره‌وه‌ی وڵات چی ده‌كه‌ن؟
ئێستا كه‌ بیر له‌ چۆنێتیی پێكهێنانی مه‌فره‌زه‌كان ده‌كه‌مه‌وه‌، یان كه‌ بیر له‌ چۆنێتی ناردنی مه‌فره‌زه‌كان ده‌كه‌مه‌وه‌، كه‌ بیر له‌ كۆبوونه‌وه‌ نهێنییه‌كانی سلێمانی ده‌كه‌مه‌وه‌، گه‌ڕه‌ك ‌و ماڵه‌كانی سلێمانی، بیر له‌و قاره‌مانێتی ‌و له‌خۆبوردوویی ‌و جوامێرییه‌ی هه‌موو ئه‌و ماڵانه‌ ده‌كه‌مه‌وه‌ كه‌ ئێمه‌یان داڵده‌دابوو وه‌كو كۆمیته‌ی هه‌رێمه‌كان ‌و ده‌یان هه‌ڤاڵی هه‌ڵاتوویان داڵده‌ دابوو. بیر له‌و ژن ‌و خوشكانه‌ ده‌كه‌مه‌وه‌ كه‌ ئێمه‌ له‌ماڵیان موخته‌فی بووین، مه‌گه‌ر هه‌ر ئێمه‌ بزانین ئه‌وانه‌ چه‌ند به‌ئه‌مه‌ك بوون، چه‌ند به‌نمه‌ك بوون، چه‌ند په‌رۆش بوون بمانپارێزن، چه‌ند په‌رۆش بوون خزمه‌تمان بكه‌ن، ده‌یانزانی ئێمه‌ ئه‌ركێكی جوان ‌و مێژووییمان له‌سه‌رشانه‌.
ئێستا كه‌ بیر له‌وه‌ ده‌كه‌مه‌وه‌ خیانه‌تنامه‌ی جه‌زائیر ده‌كرێت، سه‌رده‌م سه‌رده‌می جه‌نگی سارد، رژێمی عیراق هه‌مان رژێم، رژێمی شا، هه‌مان رژێم، رژێمی توركیا هه‌مان رژێم، هیچ گۆڕانكارییه‌ك رووینه‌دابوو، ته‌نها گۆڕانكاریی له‌ مه‌عنه‌ویاتی كۆمه‌ڵه‌ وه‌كو ژیله‌مۆی خه‌بات، مه‌عنه‌ویاتی چۆنێتی دامه‌زراندنی یه‌كێتی ‌و ره‌نگدانه‌وه‌ی له‌ناو خه‌ڵك و وره‌ی خه‌ڵكدا، ته‌نها ئه‌مه‌ هه‌بوو، هیچ له‌ دۆخه‌كه‌ نه‌گۆڕدرابوو، كه‌ خیانه‌تنامه‌ی جه‌زائیر سه‌پێنرایه‌ سه‌ر شۆڕشی ئه‌یلول و غه‌درێكی گه‌وره‌ له‌ شۆڕشه‌كه‌ كرا، هیچ له‌ مه‌سه‌له‌كه‌ نه‌گۆڕدرابوو.
ئای كه‌ چه‌ند مه‌زنن ئه‌وانه‌ی كه‌ ئه‌وكاته‌ ئاماده‌ بوون له‌ هه‌مان دۆخێك كه‌ شۆڕشێكی 14 ساڵه‌ تیاده‌چێ، له‌ هه‌مان هه‌لومه‌رجێكدا كه‌ موئامه‌ره‌ له‌ شۆڕشی ئه‌یلول ده‌كرێت، له‌ هه‌مان هه‌لومه‌رج و دۆخدا! چه‌ند مه‌زنن ئه‌وانه‌ وتیان نا، ئێمه‌ درێژه‌ به‌خه‌بات ده‌ده‌ین، له‌ یه‌كێتییه‌وه‌ له‌ حزبه‌كانی تریش كۆمه‌ڵه‌ و باڵه‌كانی تری یه‌كێتی به‌ڕاستی 44 ساڵ له‌ مێژووی یه‌كێتی كه‌ ئاوڕی لێده‌ده‌مه‌وه‌ ئه‌و چركه‌ ساته‌ی یه‌كێتی وتی نا، بڕیاریش درا یه‌ك ساڵ له‌ دوای دامه‌زراندنی یه‌كێتیی شۆڕش ده‌ست پێبكه‌ینه‌وه‌، ئێستا كه‌ بیر له‌ده‌له‌لاته‌كانی ئه‌و سه‌رده‌مه‌ ده‌كه‌مه‌وه‌، ئیتر تێده‌گه‌م ئه‌م یه‌كێتییه‌ بۆ به‌رگه‌ی قۆناغه‌ سه‌خته‌كانی گرت، تێده‌گه‌م راگواستنی دیهات پاشان گرتنی كه‌سوكاری پێشمه‌رگه‌ ئینجا بۆ شه‌ڕی ئێران و عیراق ‌و ئه‌نفال و كیمیاباران، هه‌موو ئه‌مانه‌ روویداو یه‌كێتی له‌ناو رووداوه‌كاندا هه‌تا ده‌هات قاڵ ده‌بوو، قوڵ ده‌بوو، جۆشی ده‌خوارده‌وه‌و خۆیان ئاماده‌ده‌كرد بۆ هه‌موو ئه‌گه‌رێك له‌ ئه‌گه‌ره‌كان.
كه‌ بیر له‌ هه‌موو ئه‌و رۆژگاره‌ ده‌كه‌مه‌وه‌ كاتێك بیر له‌هه‌موو ئه‌م شه‌هیدانه‌ ده‌كه‌مه‌وه‌، به‌دبه‌ختییه‌ بۆ یه‌كێكی وه‌ك و من به‌شی هه‌ره‌ زۆری شه‌هیده‌كانی شۆڕش تا ساڵی 83 و84 ده‌ناسم، به‌شی زۆری سه‌ركرده‌ شه‌هیده‌كان هاوڕێم بوون، فه‌رمانده‌ شه‌هیده‌كان هاوڕێم بوون، كادره‌ شه‌هیده‌كان هاوڕێم بوون، به‌شی زۆری ئه‌وانه‌ی كه‌ به‌ڕاستی له‌ رێكخسته‌نه‌كاندا شه‌هید كران ‌و ئیعدامكران بناغه‌ی رێكخستنه‌كان، من یه‌كێك بووم له‌وانه‌ی بناغه‌ی رێكخستنه‌كانی یه‌كێتیم دانا، هی كۆمه‌ڵه‌م دانا، لێپرسراوی هه‌موو رێكخستنه‌كانی هه‌موو عیراق بووم له‌ ساڵی 1976 وه‌ تا یه‌كه‌م كۆنفرانسی كۆمه‌ڵه‌، من به‌رپرسی رێكخستنه‌كان بووم، هی كۆمه‌ڵه‌و هی یه‌كێتی، بیر له‌هه‌موو ئه‌مانه‌ ده‌كه‌مه‌وه‌، كاره‌سات زۆره‌. به‌ڵام چركه‌ساتی راپه‌ڕین چركه‌ساتێكه‌ ساڕێژكه‌ری زۆرێك له‌ برینه‌كانه‌، وه‌كو سه‌ركه‌وتن وه‌كو كۆتایهێنانی مۆته‌كه‌ی فاشییه‌ت و كه‌ بیریش له‌ راپه‌ڕین ده‌كه‌مه‌وه‌، ئه‌و سه‌ركه‌وتنه‌ گه‌وره‌یه‌ ده‌رگای كرده‌وه‌ بۆئه‌وه‌ی له‌ مه‌حه‌ك بدرێین، بۆ راستگۆیه‌تیمان له‌ چۆنێتی به‌جێهێنانی په‌یامی شۆڕش، ئینجا په‌یامی راپه‌ڕین. چركه‌ساتی راپه‌ڕین چركه‌ساتی ئیمتیحان كردنه‌وه‌ی ئێمه‌ بوو، به‌داخه‌وه‌ كۆمه‌ڵێك هه‌ڵه‌ كرا تا ئێستاش پێمانه‌وه‌ دیاره‌، هه‌ڵه‌ی یه‌كه‌می ئه‌وه‌بوو فه‌رمانگه‌كان تاڵان كران، وه‌كو تاڵان ده‌كران، ئاودیو ده‌كرا بۆ ئیران و گومرگ وه‌رده‌گیرا، هه‌موو ئه‌و حزبانه‌ی له‌ به‌ره‌ی كوردستانیدا بوون، هه‌م له‌ تاڵانییه‌كه‌یدا به‌شدارییان كرد، هه‌م پاره‌ی گومرگه‌كه‌یان ده‌هێنا دابه‌شیان ده‌كرد له‌ نێوان خۆیاندا. ئه‌مه‌ سه‌ره‌تایه‌كی زۆر ناله‌باربوو كه‌ مه‌عنه‌ویاتی شۆڕشگێرانه‌ی شكاند، شكۆی شۆڕشگیرانه‌ و مه‌عنه‌ویاتی شۆڕشگێرانه‌ی دابه‌زاند، خه‌ڵك فێری چڵێسی بوو، فێری ئه‌وه‌بووین ئاسان بێت ئه‌م وڵاته‌ تاڵان بكرێت، تێپه‌ڕی، كۆچ هات، تێپه‌ڕی، هاتینه‌وه‌ شه‌ڕی ناوخۆ روویدا، هه‌رچی چۆنێك بێت ئه‌ویش تێپه‌ڕی، واچاوه‌ڕوان ده‌كرا له‌ شه‌ڕی ناوخۆ كۆتایمان بێت، به‌ڵام تازه‌ كێشه‌ی كورد بوو به‌ شێك له‌ هاوكێشه‌كانی ناوچه‌كه‌ و كه‌وتینه‌ ناو به‌رژه‌وه‌ندیی ده‌وڵه‌ته‌ گه‌وره‌كان و ئینجا ده‌وڵه‌ته‌ ئیقلیمیه‌كانیش.
دوای ئه‌وه‌ ماینه‌وه‌، شه‌ڕی ناوخۆش كۆتایی هات، له‌و ساوه‌ تائێستا ئه‌وه‌ی جێی خه‌فه‌ته‌، هاوشانی هه‌موو ئه‌و سه‌ركه‌وتن و پێشكه‌وتن و ده‌ستكه‌وته‌ی كه‌ بۆ میلله‌ته‌كه‌ هاتۆته‌دی، ئاوه‌دانییه‌كی جوان له‌ كوردستاندا هه‌یه‌، ته‌نها له‌ ده‌ڤه‌ری سه‌وز شه‌ش قه‌زا و 28 ناحییه‌ و 2750 و چه‌ند گوندێك ئاوه‌دانكراوه‌ته‌وه‌، ئه‌م هه‌موو زانكۆیه‌، ئه‌م هه‌موو په‌یمانگایه‌، ئه‌م هه‌موو جاده‌وبانه‌، ئه‌م هه‌موو جوانییه‌، ئه‌م هه‌موو خزمه‌ته‌، ئه‌م هه‌موو دامه‌زراندنه‌، ئه‌م هه‌موو نه‌خۆشخانه‌یه‌، ئه‌م هه‌موو بنكه‌ی ته‌ندروستییه‌، ئه‌م هه‌موو خوێندنگه‌یه‌، ئێستا ملیۆنێك و شه‌ش سه‌د هه‌زار زیاتر خوێندكار هه‌یه‌ كه‌ خوێندنگاكانی كوردستان ئیستیعابیان ده‌كات، ئه‌مانه‌ هه‌مووی گرنگن، زۆر زۆر گرنگن، به‌ڵام كه‌ بیریش له‌وه‌ ده‌كه‌مه‌وه‌ ئێمه‌ ئه‌و عه‌قڵییه‌ته‌ی كوردستانی تاڵانده‌كرد له‌ سه‌رده‌می به‌ره‌ی كوردستانیدا، ئێستا ئه‌و عه‌قڵییه‌ته‌، ئه‌وكاته‌ سیستم نه‌بوو، مه‌ركه‌زییه‌تی ده‌سه‌ڵات نه‌بوو، به‌ڵام ئێستا له‌په‌نای سیستم و مه‌ركه‌زییه‌تی ده‌سه‌ڵاتیشدا به‌داخێكی زۆره‌وزه‌ گه‌نده‌ڵی زۆر ته‌شه‌نه‌ی سه‌ندووه‌، به‌داخه‌وه‌ ئه‌مساڵ له‌پار خراپتره‌، پار له‌پێرار خراپتره‌، پێرار له‌به‌سرپێرار خراپتره‌، به‌داخه‌وه‌ دیارده‌ی گه‌نده‌ڵی هه‌موو خۆرهه‌ڵاتی ناوه‌ڕاستی گرتۆته‌وه‌، هه‌موو حكومه‌ته‌كانی گرتۆته‌وه‌، كه‌چی ئێمه‌یشی گرته‌وه‌، ئێمه‌ میلله‌تێكین هێشتا به‌سه‌دان ئاماجمان ماوه‌ نه‌هاتۆته‌دی، نه‌ته‌وه‌یه‌كین هێشتا له‌ خۆرهه‌ڵاتی ناوه‌ڕاستدا ته‌نها له‌ باشووری كوردستاندا بۆمان هه‌یه‌ به‌ زمانی كوردی بخوێنین، لانیكه‌م ئازادیی له‌ هیچ به‌شێكی كوردستان نییه‌، ئه‌م نه‌ته‌وه‌یه‌ هه‌موو ئومێدی ئێمه‌یه‌، چاوی له‌ ئێمه‌یه‌، هه‌موو رووناكییه‌كی ئێره‌ تاریكستانی به‌شه‌كانی تری كوردستان رووناك ده‌كاته‌وه‌، به‌ڵام ئه‌م ره‌فتارانه‌ش خه‌ڵكی زۆر زۆر نیگه‌ران كردووه‌، گه‌نده‌ڵی خه‌ڵكی زۆر زۆر نیگه‌ران كردووه‌، هه‌رگیز نه‌ده‌بوو تێكۆشه‌رانی حزبه‌كانی ده‌سه‌ڵاتی نه‌ته‌وه‌یه‌ك كه‌ نیشتیمانه‌كه‌ی داگیرو دابه‌شكراوه‌، هێشتا خه‌وی ئێجگار زۆری ماوه‌ به‌دی بێت، هه‌رگیز نه‌ده‌بوو گه‌نده‌ڵی به‌و راده‌یه‌ ته‌شه‌نه‌ بسه‌نێت له‌ناوه‌وه‌.
یادی 44 ساڵه‌ ده‌كه‌ینه‌وه‌، به‌داخه‌وه‌ بڕیاری لێبڕاو بۆ كۆتایی هێنان به‌م گه‌نده‌ڵی و به‌دبه‌ختییه‌ نییه‌، ئینجا ئێستاش دۆخی سیاسیم به‌دڵ نییه‌، دۆخی سیاسی ناله‌ باره‌ به‌داخه‌وه‌، به‌هیچ شێوه‌یه‌ك نه‌ده‌بوو له‌م هه‌موو دۆخه‌ی كه‌ ترسێكی گه‌وره‌ هه‌یه‌ مۆته‌كه‌ی جه‌نگ ببێت، ترسێكی گه‌وره‌ هه‌یه‌ كه‌چی‌ هه‌تا بێت لێكده‌ترازێین، حزبه‌ سیاسییه‌كان ئه‌مه‌ش هه‌ڵه‌یه‌كی گه‌وره‌یه‌، من به‌ش به‌حاڵی خۆم سه‌ره‌ڕای ئه‌وه‌ی كه‌ پێم ره‌وایه‌ یه‌كێتی پێداده‌گرێت له‌سه‌ر هه‌موو مافه‌كانی خۆی، به‌ڵام پێم باش نییه‌ رێگه‌ و شوێنی چۆنییه‌تی به‌دیهێنانی ئه‌م ئامانجه‌مان به‌و شێوه‌یه‌ی ده‌یدۆزینه‌وه‌ گونجاو بێت، له‌گه‌ڵ ئه‌م هاوكێشه‌یه‌ی كه‌ ئێستا هه‌یه‌، هه‌موو ئامانجێك له‌ ئامانجه‌ ره‌واكانی یه‌كێتی قابیلی به‌دیهێنانه‌، به‌ڵام كاتی ئه‌وێ، شێوه‌ی ده‌ربڕین و مفاوه‌زاتی ده‌بێت جیاوازبێت، به‌ڵام به‌داخه‌وه‌ ئه‌وه‌تا فه‌رموو دیسان لێكترازان روویدا، ئه‌م لێكترازانه‌ له‌ نێوان یه‌كێتی و پارتی بێگومان جێگه‌ی نیگه‌رانییه‌، به‌ڵام له‌گه‌ڵ ئه‌وه‌شدا ئه‌م دوو حزبه‌ زۆربه‌ ئه‌زموونی هه‌ردوو حزبه‌كه‌ و سه‌ركرده‌كانیان، توانای ئه‌وه‌یان هه‌یه‌ ئه‌زموونی بكه‌ن، پیاوی وه‌كو كاك مه‌سعود ته‌جروبه‌ی حزبه‌كه‌ی، بنه‌ماڵه‌كه‌ی، هه‌موو راپه‌ڕینه‌كان و ئه‌وانه‌ كۆبكاته‌وه‌، بایی ئه‌وه‌یه‌ كێشه‌ی زۆر گه‌وره‌تر له‌مه‌ چاره‌سه‌ر بكات، كێشه‌ی زۆر له‌مه‌مان چاره‌سه‌ركرد، شه‌ڕی ناوخۆمان چاره‌سه‌ركرد، دوو ئیداره‌ییمان چاره‌سه‌ركرد، ده‌ستتێوه‌ردانی ئیقلیمان چاره‌سه‌ركرد، جه‌نگی عیراق و ئێرانمان كۆتایی پێ هێنا، به‌رگه‌ی ئه‌نفالمان گرت.
دوای 11ی سێپته‌مبه‌ر باش خۆمان كۆكرده‌وه‌ له‌ عیراقدا، رۆڵێكی گه‌وره‌مان بینی، له‌ خۆرهه‌ڵاتی ناوه‌ڕاستدا رۆڵێكی گه‌وره‌مان بینی، گه‌وره‌ترین كێشه‌ له‌ نێوان ئێمه‌ و ئێراندا هه‌بوو، چاره‌سه‌ركرا، گه‌وره‌ترین كێشه‌ له‌ نێوان ئێمه‌و توركیادا هه‌بوو چارسه‌ركرا، گه‌وره‌ترین كێشه‌ له‌ نێوان ئێمه‌و عیراقدا هه‌بوو به‌كێشه‌كه‌ی ئه‌و دواییه‌ی ریفراندۆمیشه‌وه‌ وا چاره‌سه‌رده‌كرێت. بۆ یه‌كێتی و پارتی نه‌توانن كێشه‌كانیان چاره‌سه‌ر بكه‌ن؟ ده‌بێت چاره‌سه‌ربكرێت، ده‌بێ هه‌ردوولا له‌خۆبوورده‌یی زاڵ بكه‌ن، سه‌ره‌ڕای ئه‌وه‌ی كه‌ ئه‌مڕۆ برای به‌ڕێز كاك نێچیرڤان هه‌ڵبژێردرا به‌ سه‌رۆكی هه‌رێم، مادام هه‌ڵبژێردراوه‌ من پیرۆزبایی لێده‌كه‌م، به‌ڵام له‌هه‌مان كاتدا داوای لێده‌كه‌م ئێستا له‌هه‌موو كاتێك لێبردووتر بێت و سووربێت له‌سه‌ر ئه‌وه‌ی كێشه‌كان چاره‌سه‌ربكرێت، له‌گه‌ڵ هه‌موو لایه‌نه‌كان به‌تایبه‌تی یه‌كێتیی نیشتمانی كوردستان.
كۆتایی قسه‌كانیشم له‌سه‌ر یه‌كێتی خۆیه‌تی، یه‌كێتی له‌دۆخێكدایه‌، رێك ده‌بێت بڵێم له‌ دۆخێكدایه‌ ئێمه‌ له‌ساڵ و دوو ساڵی ئاینده‌ ده‌بێت كۆنگره‌ ببه‌ستین، ده‌بێت ره‌خنه‌ له‌ خۆمان بگرین، ده‌بێت كه‌موكوڕییه‌كانمان چاره‌سه‌ر بكه‌ین، ده‌بێت باشترین سیاسه‌ت به‌ ره‌خنه‌ له‌خۆگرتنێكی بێ ته‌مومژ له‌سه‌ر هه‌موو ئه‌و گله‌یی و ناڕه‌زایی و بێزارییه‌ی خه‌ڵك له‌ئێمه‌ هه‌یه‌تی، ده‌بێت ره‌خنه‌ی زۆر رۆشن له‌ خۆمان بگرین و په‌یمان به‌ خه‌ڵك بده‌ین كه‌ ئه‌م ره‌خنه‌یه‌ وا له‌خۆمان ده‌گرین جارێكی تر ئه‌و هه‌ڵه‌یه‌ دووباره‌ ناكه‌ینه‌وه‌.
یه‌كێتی به‌ پینه‌و په‌ڕۆ مه‌حاڵه‌ جارێكی تر پێگه‌كه‌ی خۆی و خۆشه‌ویستی خۆی و متمانه‌ فراوانه‌كه‌ی خۆی بگێڕێته‌وه‌، مه‌حاڵه‌، جه‌ماوه‌ری كوردستانی ئێستا له‌ناو دۆخێكدایه‌ كه‌ گه‌نده‌ڵی ده‌بینێت، كه‌ ره‌فتاری خراپ ده‌بینێت، كه‌ سیاسه‌تی خراپ ده‌بینێت، كه‌ هه‌ڵسوكه‌وتی خراپ ده‌بینێت، كه‌ چه‌ندین كه‌س له‌ خۆیه‌وه‌ قسه‌ ده‌كات له‌سه‌ر ته‌له‌فزیۆن، قسه‌ی ئه‌م له‌گه‌ڵ ئه‌و تێكناكاته‌وه‌. هه‌موو ئه‌مانه‌ كه‌ ده‌بینێت، بێگومان به‌ پینه‌و په‌ڕۆ جارێكی تر ئه‌م خه‌ڵكه‌ متمانه‌ ناده‌نه‌وه‌ به‌ئێمه‌، ئیلا به‌به‌ستنی كۆنگره‌و به‌هه‌ڵسه‌نگاندنی كۆی سیاسه‌ته‌كانی یه‌كێتی و سه‌رله‌نوێ داڕشتنه‌وه‌ی له‌سه‌ر بنچینه‌ی ره‌خنه‌ له‌ هه‌ڵه‌ گرتنه‌كان.
من پڕ به‌دڵ ئومێده‌وارم ئۆرگانه‌كان، كادره‌كانی یه‌كێتی، ئه‌ندامانی یه‌كێتی، له‌و راستییه‌ تێبگه‌ن كه‌ یه‌كێتی له‌ دووڕیانێكی چاره‌نووسسازدایه‌، ئێستا چه‌ند گرنگه‌ سه‌ركردایه‌تی بڕیاری مه‌سئولانه‌ بدات دوو ئه‌ونده‌ گرنگه‌ بنكه‌ی جه‌ماوه‌ریی یه‌كێتی هۆشیارانه‌ تێبكۆشێت له‌پێناوی به‌ستنی كۆنگره‌.
به‌شی زۆری چاره‌نووسی یه‌كێتی كه‌وتۆته‌ ده‌ست بنكه‌ی جه‌ماوه‌ریی یه‌كێتی و كه‌وتۆته‌ ده‌ست ئه‌نجومه‌نی ناوه‌ندی. ده‌بێت به‌ دیالۆگی عه‌قڵانی و په‌رۆشانه‌ قسه‌ له‌گه‌ڵ سه‌ركرادایه‌تی و ئۆرگانه‌كان بكرێت، دوور له‌ ته‌كه‌تول، دوور له‌ شه‌خسه‌نه‌كردنی كێشه‌كان و دوور له‌ پلانگێڕان، با هه‌موومان په‌رۆشی زاڵبێت به‌ سه‌رماندا، بۆئه‌وه‌ی به‌ره‌و كۆنگره‌ بڕۆین له‌ دوو سێ مانگی ئاینده‌دا.
پڕبه‌دڵ ئومێده‌وارم یادی 44 ساڵه‌ یادی وه‌رچه‌رخان بێت له‌ ره‌وشتی سیاسیمان، له‌ویژدانمان له‌تێگه‌یشتنمان له‌په‌رۆشیمان له‌ په‌یمان نوێكردنه‌وه‌مان بۆ شه‌هیده‌كانمان.
به‌ئارایشت كۆتایی نایه‌ت، دڵنیابن سه‌ركرده‌و مه‌كته‌بی سیاسی و به‌رپرسان، دڵنیابن بنكه‌ی ئێمه‌ 90% داوای كۆنگره‌تان لێده‌كات، دڵنیابن به‌بێ كۆنگره‌ ئاشتبوونه‌وه‌ی راسته‌قینه‌ له‌ نێوان سه‌ركردایه‌تی یه‌كێتی و ئۆرگانه‌كانی یه‌كێتیدا روونادات، دڵنیابن.
پڕبه‌دڵ ئومێده‌وارم پله‌و پایه‌ ئه‌وه‌ ناهێنێت مێژووی ئه‌م حزبه‌ قفڵ بده‌ین و رێگه‌ نه‌ده‌ین كۆنگره‌ ببه‌سترێت، ئه‌م حزبه‌ موڵكی كه‌س نییه‌، ئه‌م حزبه‌ پێش هه‌موو شتێك موڵكی شه‌هیده‌كانه‌، ئینجا موڵكی پێشمه‌رگه‌ كه‌مئه‌ندامه‌كانه‌، ئینجا موڵكی پێشمه‌رگه‌ قاره‌مانه‌كانه‌، موڵكی كه‌سوكاری شه‌هیده‌كانمانه‌. ئه‌م سه‌ركردایه‌تییه‌ بۆی نییه‌ تاسه‌ر كۆنگره‌ نه‌به‌ستێت، ناتوانێت، به‌دڵنیاییه‌وه‌ نه‌یبه‌ستێت دۆخی یه‌كێتی خراپتر ده‌بێت، به‌ڵام بیبه‌ستێت هه‌موومان پێی سه‌ربه‌رزده‌بین.
جارێكی تر من په‌یمان نوێ ده‌كه‌مه‌وه‌ كه‌ كۆڵنه‌ده‌ری هه‌مان ئه‌و رێبازه‌بم كه‌ جه‌نابی مام جه‌لال نه‌خشاندوویه‌تی و شه‌هیده‌ گه‌وره‌كانی ئێمه‌ شكۆی یه‌كێتیان برده‌ ناو مێژوویه‌كی ئێجگار جوانی ناو ئه‌م سه‌رده‌مه‌، به‌ دڵنیاییه‌وه‌ به‌ش به‌حاڵی خۆم كێشه‌م له‌سه‌ر كه‌س نییه‌، به‌ڵام گه‌وره‌ترین خه‌مم خه‌می به‌ستنی كۆنگره‌یه‌.
سڵاوتان لێ بێت هه‌ڤاڵانی یه‌كێتی، سڵاو له‌ هه‌موو ئه‌وانه‌ی په‌رۆشی راسته‌قینه‌ی یه‌كێتین و دڵسۆزی راسته‌قینه‌ی رێبازی مام جه‌لالن به‌ پاكی و به‌ ڕاستگۆیی، سڵاوتان لێ بێت.

print

 5 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*