سەرەکی » ئابووری » زیانی گۆڕانكاریی كەش و هەوا لەسەر سێكتەری ئابووری

زیانی گۆڕانكاریی كەش و هەوا لەسەر سێكتەری ئابووری

یەکەی ئابووری

رێكخراوی نێودەوڵەتیی كار باس لە گۆڕانكاری ژینگە دەكات و باس لەو كاریگەرییانە دەكات كە لەسەر ئابووری دروستی دەكات، بەشێوەیەك گۆڕانكاری كەشوهەوا دەبێتە هۆی ئەوەی كە هەلی كار بۆ 80 ملیۆن هاووڵاتی دروست بكات.

كەمبوونەوەی بەڕێژەی (2,2%)
گۆڕانكاری كەشوهەوا بۆتە هۆی ئەوەی كە پلەكانی گەرما بەشێوەیەكی بەرچاو بەرزببێتەوە، بەپێی راپۆرتێك كە لەلایەن رێكخراوی نێودەوڵەتیی كارەوە بڵاوكراوەتەوە، تا ساڵی 2030 ئەگەر بەرزبوونەوەی پلەی گەرما بەم شێوەیە بەردەوام بێت، ئەوا بەشێوەیەكی راستەوخۆ كار دەكاتە سەر سێكتەری ئابووری.
رێكخراوی نێودەوڵەتیی كار راستەوخۆ پەیوەستە بە نەتەوە یەكگرتووەكانەوە، بەپێی ئەم راپۆرتەی كە لەلایەن ئەم رێكخراوەوە بڵاوكراوەتەوە لە ماوەی 10 ساڵدا كاتژمێرەكانی كاركردن بەڕێژەی (2,2%) هەلی كار بەهۆی پیسبوونی ژینگەوە كەم بووەتەوە.
هەر بەپێی راپۆرتەكە، زۆرترین كاریگەری لە بوارەكانی كشتوكاڵ و بیناكردندا دەبێت.

زیانەكان زۆر لەوە زیاترە
لەڕاپۆرتەكەدا ئاماژە بەوە كراوە، بەهۆی بەرزبوونەوەی پلەی گەرماوە زەرەرێكی زۆر لە ئابووری دەكەوێت كە بەبڕی دوو تریلیۆن و 400 ملیۆن دۆلار دەخەمڵێنرێت، ئەمەش دەبێتە هۆی ئەوەی كە (1,4%)ی ئابووریی جیهان بەرەو دواوە بچێت.
شارەزایان ئەم راپۆرتە بە راپۆرتێك دەزانن كە زەرەرەكانی گەرمی ژینگە بەلایەنی كەمەوە بەو شێوەیە بێت و ئەگەری ئەوە هەیە كە زیانەكە زۆر لەوە زیاتر بێت كە لە راپۆرتەكەدا باسی لێوە كراوە، چونكە بەوتەی ئەوان راپۆرتەكە بە شێوەیەك كراوە كە ئەگەر پلەی گەرمای ژینگە وەك ئێستا ساڵانە بە رێژەی (1,5%) بەرز بێتەوە.

كەمبوونەوەی سەعاتەكانی كاركردن
كاسەرین ساگات یەكێك لەو شارەزایانەی كە ئەم راپۆرتەیان ئامادە كردووە، رایگەیاندوە، «ئەم راپۆرتە بەپێی باشترین ئەو ئەگەرانەن كە لەبەردەمانە ئەنجام دراوە، ئەگەر بەرزبوونەوەی پلەی گەرما بەم شێوەیە لە بەرزبوونەوەدا بێت، ئەوا مەترسییەكان بۆ خاوەن كارو بێكارو سێكتەری ئابووریی ناوخۆیی و جیهانیی دروست دەبێت».
ئەو مەترسییە گەورانەش لە كەرتی كشتوكاڵدا زیاتر هەڵدەدات كە لەو كەرتەدا لە جیهاندا 940 ملیۆن هاووڵاتی كاری تێدا دەكات. بەپێی ئەو راپۆرتەی كە ئەنجامدراوە تا ساڵی 2030 كەرتی كشتوكاڵ بەڕێژەی (60%)ی كاتژمێری كارەكانی كەم دەبێتەوەو كەرتی بنیاتنانیش بە رێژەی (19%)ی كاتژمێرەكانی كاری كەم دەبێتەوە.
هەروەها پلەی گەرما لە رۆژئاوای ئەفریقا و باشووری ئاسیا بەشێوەیەكی بەرچاو زیاد دەكات، ئەمەش ئەو ناوچانە دەگرێتەوە كە دۆخی ئابوورییان باش نییەو زەرەرێكی زۆریان پێ دەگەیەنێت. ئەمەش دەبێتە هۆی ئەوەی كە نایەكسانی ئابووریی بەشێوەیەكی بەرچاو زیاد بكات.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*