سەرەکی » ئەدەب - سێبەر و سایە » وه‌رزی ته‌گه‌ و به‌رانیی

کورتەچیرۆک

وه‌رزی ته‌گه‌ و به‌رانیی

محه‌مه‌د كه‌ریم

پێشكەشە بە خۆپیشاندەرە جوانەكانی لوبنان

حەوت رۆژە لە ماڵەوە كڕكەوتووی، خەریكە دەترشێی، دوای بانگی عەسر، بڕیار دەدەی بچیتە دەرەوە. كە سەیری خۆت دەكەی بە دەرپێی كورت و فانیلەی عەلاگەوە دەرپەڕیوی، نە پارە و نە هیچ شتێكت پێ نییە. سواری پاس دەبی، سایەقی پاسەكە ژنێكی قەیرەی جوانە بە رووت و قووتی پاسەكە لێدەخوڕێ، لە جیاتی ئەوەی كرێ لە نەفەرەكان وەربگرێ پارەیان دەداتێ! تۆ سەیری ئەو مێشكە پووتەی تۆ، ئاخر نەفەرەكانیش وەكو ئەكتەری فیلمە رووتەكان، رووتن، ئیتر پارە لە كوێدا هەڵگرن لە … تا بیدەن بە شۆفێرە رووتەكە؟ لەوانەیە لەناویاندا تۆ پۆشتەترین بەشەر بی. پاسەكە بە بەگ دەڕوات و وەكو تەكسی یەك یەك نەفەرەكان دەگەیەنێ، هەتا نەفەر هەبێت دەیگەیەنێ و كرێی پاسەكەشی دەداتێ. بەردەوام خەڵك بە رووتی سەردەكەون و دادەبەزن. سەیر لەوەدایە كەس سەیری بەژن و باڵای كەس ناكات، تەنانەت ئەو پیاوە چاوباشقاڵانەی لە كاتی ئاساییدا وەك ئەوەی ئەشیعەی بۆ بگرن، لە كەڵەمووستی پێیەوە هەتا تەوقی سەری سەیری كچی دە ساڵە هەتا پیرەژنی نەوەد ساڵە دەكەن، ئێستا ملیان حیز كردووە و وەكو گورگی برسی ناڕوانن. یان ئەو ژنە چاوحیزانەی كامێرای چاویان لەسەر گەڵ و گونی پیاو زووم دەكەن، چاویان شۆڕە و وەك ئەوەی مێخەكەی لێهاتبێ، هەر سەیری سەرپەنجەكانی خۆیان دەكەن. خەتی پاسەكە دیار نییە و كەس نازانێ هەتا كەی لەو گەمە شیرینە بەردەوام دەبێت.
كرێ پاسەكەت وەردەگری و هەر لە خۆتەوە وەكو شێت لە جێگایەك دادەبەزی، كە دەڕوانی سەر قەبرانە، كۆمەڵێك پیاو بە رووت و قووتی لە گۆڕێك گردبوونەتەوە، دەچیتە پێشەوە، بۆن عارەقیان خەریكە كاست دەكات، تەماشا دەكەی یەكێك چۆتە ناو گۆڕە چوارگۆشەكەوە كە مەتر بە مەتر دەبێت، مەترێكی بەدەستەوەیە و سەری مەترەكەش لە سەرەوە بە دەست پیاوێكی ترەوەیە كە مەترەقەكەی بەرەو ناو گۆڕەكە سەری شۆڕكردۆتەوە، تۆمەز دەیانەوێ قووڵایی گۆڕەكە بپێون. ئەوەی ناو گۆڕەكە كە دەنگی بە كزی دێتەوە سەرەوە دەڵێت: «سێ مەتر و بیست سانتیمە» مەلا لەش و لار كوت و كوڵكاوییەكە دەڵێت: «باشە، باش، فیتە، فیت، خۆ بە ناشكوری نەبێت، ئەمە زەلام نییە، دەڵێی خوا لە بری زەڕافە دروستی كردووە.» سەیری تەرمەكە دەكەی لەبەرئەوەی لەناو دارەمەیتدا جێی نەبۆتەوە هەروا لەوێدا رایانكێشاوە و لەجیاتی كفن پەڕۆیەكی سووریان تێوە پێچاوە. چوار كەس دەستی دەدەنێ و شۆڕی دەكەنەوە بۆ ناو گۆڕەكە، لە پێشدا سەری و ئینجا باقی بەدەنی، بنی پێی دەكەنە ئاسمان. هەر لە خۆتەوە جووڵەی «سیرش ئاسانا»ی یوگات بیردەكەوێتەوە، كاتێ لەسەر تەوقی سەر دەوەستیت و ژێر سیسەمەكەت بە جوانی دەبینی. كابرای خوارەوە داوای بەرد دەكات، هەر چوار لای مردووەكە بە بەرد دەتەنێت و وردە وردە دێتە سەرەوە. مردووەكە لنگەوقووچ دەنێژن و دەیشارنەوە، ئینجا لە جیاتی هەموو شتێك دێنە دواوە و بەرد بارانی دەكەن. تۆش دەست دەدەیتە بەرد و چەند بەردێكی تێدەگری.
سواری پاسێكی تر دەبی، ئەمیان كچێكی تەمەن بیست بیست و دوو ساڵ دەیهاژوێ، لەش و لارێكی جوان و جووتێ مەمكی قوت، بەڵان تۆش هەر تۆزێ سەیری دەكەی و فەرامۆشی دەكەی. لای مەیدانی خۆپیشاندەران دادەبەزی، كە سەیر دەكەی هەر تۆ بە دەرپێی كورت و فانیلەوە دەتەوێ خۆپیشاندان بكەی، ئەمما نازانی بۆچی؟ شەرم دەكەی، بەڵام خۆت گێل دەكەی و دەوەستی. مەلایەكی لەڕ و لاوازی باریكەلەی بۆرەقنە، وەكو كەڵەشێری سەربارەدار چۆتە سەر بەرزاییەك و مایكێكی بە دەستەوەیە، لە جیاتی هەموو شتێك گۆرانی «ئۆخەی ئۆخەی لەو باڵایە» دەڵێت، سەد قاتی حەسەن زیرەك خۆشتر تێی هەڵكردووە. هەرچەند دەكەی نازانی ئەو دەنگە زوڵاڵ و گەورەیە چۆن لە دووتوێی ئەو دوو چڵ ئێسقانەوە دێتەدەرێ و بەشێوەیەك ئەو هەموو خەڵكەی هێناوەتە جۆش و خرۆش و خۆپیشاندانیان لە بیر چۆتەوە. وەك ئەوەی لە نادیارەوە لە ناكاو پەیامێكی بۆ هاتبێ، مەلا لە پڕ دەوەستێ هەتا دەتوانێ هاوار دەكات دەڵێت: «خوشك و برایان، بڕوا بكەن هەتا رۆژی قیامەت لێرەدا خۆپیشاندان بكەین و بشیڕێنین حكومەت گوێی لێ نییە و نایەت بەهاوارمانەوە، بۆیە پێشنیاز دەكەم هەموومان خۆمان رووت بكەینەوە و ئیتر لەمەودوا بە رووت و قووتی خۆپیشاندان بكەین، دڵنیام دوای دوو سەعات ورد و درشتی شار لێمان خڕ دەبنەوە، بەڵام دەبێ رێگە نەدەین كەس بە جلەوە بێتە ناومان، دەبێ هەر كەسێ هات، بە رووت و قووتی بێتە ناومان. لەگەڵ قسەكانیدا وەك ئەوەی كۆتر هەڵبدات مێزەرەكەی هەڵدەدات و دەست دەكات بە خۆڕووتكردنەوە، هێشتا قسەكانی تەواو نەكردووە خەڵكەكەش دەسدەكەن بە خۆڕووتكردنەوە.
كەناڵەكان راستەوخۆ خۆپیشاندانە رووتەكە پەخش دەكەن، هێندە نابات خەڵكی پۆل پۆل بە رووتی بەرەو شوێنی خۆپیشاندانەكە دێن، دوای سەعاتێك زیاتر لە نیو ملیۆن خەڵك بە قنگی رووتی هەڵدەپەڕن و هەڵدەخەنەوە. یەكێكی دەنگ كەورگ دەچێتە شوێنی مەلاكە و دروشمی خۆپیشاندانەكە دەكات بە شتێكی بڤە و دەقیژێنێ:
حكومەتی كەڕەواڵە- نەڵێی میللەت مناڵە
ئەمشەو هەتا بەیانی-دێیتە ژێربار بە جوانی
نایەی هەر خۆت بەرپرسی- لە وەشوومە و مەترسی
هەر لەم مەیدانە بەیانی- دەیكەین بە تەگە و بەرانی
هەتا رۆژ ئاوا دەبێت، كابرای دەنگ زل ئەو شیعرە قۆڕانە دەڵێتەوە و خۆپیشاندەران لە خۆشیدا وەها هاوار دەكەن بە ژن و پیاو و پیر و گەنج و مناڵەوە خەریكە كۆمپلێت قۆڕ دەبن. ئێ چی لەوە خۆشترە سێكس ئازاد بێ و سەراپای گەلێك بیكەن بە تەگە و بەرانیی و گەلەگان و سواربوون و دابەزین. هەر هەموو خەڵكەكە بە ریشنە شەرواڵ كورتەكانیشەوە كە رۆژانی تر وەها خۆیان نیشان دەدا كوڕی پێغەمبەرن، لە خۆشیدا هەڵبەز و دابەزیانە و خواخوایە حكومەت ملهوڕی بكات و دیسان كەڕ و كاس بێت، بۆ ئەوەی بیكەن بە تەگەو بەرانیی، ئەمما حكومەت…
وردە وردە مەیدانەكە چۆڵ دەبێت، هەمووان بەدەم وتنەوەی دروشمەكانەوە بەرەو ماڵ دەبنەوە، بۆ ئەوەی هەتا بەیانی خەون بەوەوە ببینن سبەینێ لەگەڵ چەند كەس جووت دەبن. تۆش سواری پاسێك دەبی، بەو ئومێدەی هیچ نەبێ نزیكت بكاتەوە. كابرایەكی كوڵكنی وەكو مەیموونی شەمپازی بە رووتی پاسەكە لێدەخوڕێ، ئەوەندە گرژ و مۆنە پیاو حەز ناكات سەیری سەر و فەساڵی بكات. ملت لار دەكەیتەوە و سەیری دەرەوە دەكەی، پیرەژنێك دەبینی قۆڵی كردووە بە قۆڵی مێردمناڵێكی چواردە پانزە ساڵدا، سمتە زلەكانی بۆ دواوە دەرپەڕاندووە و مەمكە میزەڵانەكانیشی بۆ پێشەوە، لەو بەرەوە كوڕ و كاڵ هاواری لێدەكەن: «سلیكۆن، سلیكۆن» كەچی یەك هۆقە بنێشتی لە دەمدایە، ورد ورد دەڕوات و مێش میوانی نییە. مەسئوولێكی كەچەڵی ورگ زلی كوڵ، بەتفەنگێكی چینی قۆناغدارەوە بەسەر میك زەمینییەكەوە، حیمایەی حیمایەكانی دەكات كە لە ئوتومبیلی وەنەوشەی یەكەم و دووەمدا، تەنیا بۆینباخیان لە ملدایە و وەكو بەگزادە پاڵیان لێداتەوە و شا بە سەپان راناگرن. ژنێكی باریكەلەی قنگ رەق، لەسەر فەردە ئاردێكی هەشتا كیلۆییەوە، وەكو كەر سواری مێردەكەی بووە و ناوە ناوە نەقیزەیەك دەكات بە ملە تووكنەكەیدا و دەڵێت: «هەچچە!» كۆمەڵێ مناڵی چەتوون، پەتێكیان بەستووە بە زمانی رۆشنبیرێكی گەورەی گەلەكەتانەوە و ئەوەندەیان راكێشاوە، مەترێك زمانی هاتۆتە دەرەوە، ناوە ناوە زیاتر پەتەكە رادەكێشن و دەڵێن: «فەرموو فشەمان بۆ بكە، زمان كوڵ!» سەرمایەدارێكی نیشتمانپەروەری شار، دەسڕێكی داخستووە و سواڵ دەكات، كەچی لە جیاتی پارە تەرسەقول فڕێدەدەنە سەر دەسڕەكەی. پیاوێكی نەخوێندەواری لادێی دەست وپل قڵیشاو، سایكۆلۆجیا بۆ دكتۆرێكی زانكۆ راڤە دەكات…
هەر لە خۆتەوە لە جێگایەكدا دادەبەزی، بە پێ بەرەو ماڵەوە دەیكوتی، هەتا دەگەیتە سەری كۆڵانەكەی خۆتان ئەوەندە گێژ و وڕ دەبی، گونی خۆت گیزەر لێك ناكەیتەوە. خۆت دەكەی بە ماڵی دراوسێكەتاندا، ژنە مێردەكەی ئێشكگرە، ئەوەندە بەجوانی پێشوازییت لێدەكات، وەكو مێردەكەی دەچیتە لای سەرووەوە لێی دادەنیشی، لە بەیانییەوە بۆ یەكەمجار دەزانی جووتێ گۆرەوی سپیت لە پێدایە، گۆرەوییەكانت دادەكەنی، گرێیەكیان لێدەدەیت و تووڕیان دەدەیت بۆ لای شوێنی پێڵاوەكان. وەك ئەوەی پەلاماری بەچكە چۆلەكە بدات خێرا پڕی پێدا دەكات و دەیانشوات و هەڵیان دەخات، مناڵەكانی دەكاتە ژوورەكەی تر و هەر ئەوەندە بڵێی یەك و دوو خواردن دادەنێ و دوو قۆڵی دەستدەكەن بە نانخواردن. ئەوەندە جوان رەفتارت لەگەڵ دەكات هەست ناكەی ماڵی خۆت نییە. دوای نانخواردن هێدی هێدی وەكو دوو درەختی شان و مل رووتی پاییزی، لاولاو ئاسا لێك دەئاڵێن و دەستدەكەن بە ماچكردن و لستنەوە. كەستان درێغی ناكەن، دەیڕەتێنی و دەتڕەتێنێ، دەیگەوزێنی دەتگەوزێنێ … شیعرەكەی شێخ رەزات بیردەكەوێتەوە: «گەهێ سەیرانی گون بوو گەهی …»
هەروا بە نیمچە تەڕی گۆرەوییەكانت لە پێ دەكەیتەوە و پێڵاوەكانت دەكەی بەسەر پێوە، لە ناوجەرگەی حەوشەكەدا بە مەكر و نازەوە سەیرت دەكات و دەڵێت:
«قوربانی تین و تاوت بم! قاپە نەوت، دە ساڵە خەون بەوەوە دەبینم، كاتێ كابرا ئێشكگرە بێیت و هەتا بەیانی بمژەنی و…»
«بۆچی تۆ مەشكەی؟ ئەرێ بێزەحمەت ناوت چی بوو؟»
یەك قاقا لێدەدات، دڵنیایت ژنەكەت لەوبەرەوە گوێی لێیە.
«هەر لەبەرئەوەیە سوێم بۆتەوە بۆت، چونكە پیاوێكی سەنگینی، چاوباشقاڵ و حیزەڵ نیت. لەم دنیایەدا ئاواتم ئەوەبوو پیاوێكی باڵابەرزی چاو و برۆ و سمێڵ رەشی وەكو تۆم بەنیسب بێت، كەچی كەچەڵێكی بێ سمێڵی گول هاتە رێم، ئاخر ئەم ماینە بەو رەشسوارە دابین دەبێ؟ دەی تازە ناوی منت بۆچییە؟» قاقایەكی تر لێدەدات.
دەرگای حەوشەكەتان هەمیشە قڵیشێكی تێدایە و دانەخراوە، هەر رۆژێ هەژدیهایەكی حەوت سەر خۆی بكات بە كۆڵانەكەتاندا، بێگومان دەبێتە میوانی ماڵی ئێوە. خۆت دەكەیت بە ژوورا، ژنەكەت بە رووت و قووتی قنگە و تلوور كەوتووە و سەیری تەلەفزیۆن دەكات و پێدەكەنێ. پێش بەخێرهاتنەوە یان هەر ناماقووڵییەكی تر، دەڵێت:
«ئەوە چ قەحبەی ماكەرێ بوو، قاقای پێكەنینی دەگەیشتە ئێرە؟»
«…»
دەیمەنی ناو تەلەفزیۆنەكە ئەوەندە سەرسوڕهێنەرە، جورئەتی ئەوەت دەداتێ وەڵامی ژنەكەت نەدەیتەوە كە هێندەی جوولەیەك لێی دەترسی. سەرۆكی دەوڵەت بە گەڵ و گونی رووتەوە لە تەلەفزیۆنەوە قسە دەكات و دەڵێ: « بەڵێنی شەرەفتان دەدەمێ لە بەیانییەوە دەست دەكەین بە دابەشكردنی مووچەی هەر سێ مانگەكەتان و لە ماوەی سێ رۆژدا هەر هەمووتان مووچەی سێ مانگ وەردەگرن… تكایە تكایە تكایە، هیچ مەكەن تەنیا جل و بەرگەكانتان لەبەر بكەنەوە و سبەینێ هەر هەمووتان بچن مووچەكانتان وەربگرن… ئەمە حاڵ نییە منیش و ئێوەشی تیاین، تكایە لەوەزیاتر شەرمەزارم مەكەن، ئێمە میللەتێكی خاوەن ئاكارین…»

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*