سەرەکی » ئاراستە » لە یادی شەهیدبوونی هاوار هیرانی جوانە مەرگدا

لە یادی شەهیدبوونی هاوار هیرانی جوانە مەرگدا

شاناز هیرانی*

هاوار گیان، ئەم ئێوارەیە، دیسان وەك هەموو ساڵێك لەم ساتەو و وەختەدا، زۆر ئارەزووم بووو بتبینمەوە و لە ئامێزت بگرم، وەك هەموو پایزەكانی دیكە بەپێكەنینەوە یادەوەرییەكان بەش بكەین، وەك هەموو پایزێك باسی وەرینی گەڵای دارهەنارەكانی هیرانت بۆ بكەم، وەك هەموو پایزێك بەیەكەوەو لەگەڵ دایك وباوك و خوشك و براكانت، چایەكی شیرین خوانی ئێوارەیەك كۆمان بكاتەوە.
هاوار، هاواری هەموو ساڵێكی بێ تۆیی، جەرگی كون كون كردووین، لەپێكەنین و خۆشیی كردوین، هاواری پڕ هاوارم، تۆ دەزانی چەندین ساڵە خوانی ئێمە بێ تۆیە؟ هاواری برا، بێ تۆیی بۆ هەموومان زۆر بە سوێیە، چیبكەم برینی كۆچی تۆ بەهیچ شتێك سارێژ نابێت، ویستم ئەمجارەش بێیتەوە تاكو شنەی غوربەتی تۆ كەمێك جەستە ماندوەكەم خاڵی بكاتەوە، هاوای بێ هاوارم، ویستم دیسان گلەیی رۆژگارت لا بكەم، پێت بڵێم چەندە چۆڵە شوێنەكەت!، هەموو ساڵێك لەم رۆژەدا چاوەڕێین بەڵكو خەبەرێكی خۆش لەلای تۆوە بێت، پێمان بڵێی خەمتان نەبێ‌ رۆژێك دێ دیمەوە! داخەكەم بزواندنم و چرپایەكەم وەكو رۆژانی تر نییە و وەكو جاران ناتوانم تاكو شەفەق بەدیارهەڵاتنی خۆرێكی نوێ و چاوە پڕ ئومێدەكانی تۆوە‌ دانیشم و لێت بڕوانم.
خەمەكان ئێستا لە باڵای ئەو دار گوێزە باڵاترن و چرۆی زۆریان كردووە، كە لە باخچەكەی خۆمان لە هیران تۆ سەدان جار سەرخەوێكت لێكردووە، بەردەوام لەگەڵ بیرەوەرییەكانی تۆ دەژیم و هەمیشە دەرگا واڵا دەكەم و چاوەڕێ چرپەیەك، بزەیەك، روناكیەكی تۆ دەكەم، وەك هەمیشە بە زەردەخەنە جوانەكەت بێیتەوە ژوورەوە و دونیام رۆشن بكەیتەوە، تۆ نازانی شیرینەكەم من هەمیشە بیرەوەرییەكانی تۆ رۆشنم دەكاتەوە، بەڵام گیانەكەم چی بكەم ئێستا گوزەران و یادگارییەكان وەكو جاران نەماون و چەرخی گەردون بە جۆرێكی تر دەگوزەرێ. چیتر بەرگەی چاوەڕوانی بێ هودەی گەڕانەوەت ناگرین، تۆ لە لوتكەی گەشیدا هەڵوەرایت و بەهاری جوانی عومرت هێشتا چرۆی نەكردبووو سیس و كوژایەوە.
بەمە ئەڵێن غەدری رۆژگار و سروشت، بەڵام نا، ئەوە چەوت و چێڵیی سیاسەت بووو، دەستی چەپڵی خیانەت بووو، دڵ ڕەشی دڕندەكان تۆیان لەئێمە سەند و بەرەو مەنزڵگەی هەتاهەتاییان بردی، ئاخر تۆ زۆر خەونت مابووو، دڵت سەدان هیوای تیابووو، تۆ ئەتویست كوردستان گەش بێت، تۆ ئەتویست ژیان بكەیت. ئەتویست بڕوانامەی ژیان وەكو میدال بدەیت لە یەخەی خۆشەویستانت، ئەتویست داهاتوو شیرین بكەیت، لێوی وڵات پڕ لە خەندە و پێكەنین بكەیت، تۆ ئەتویست عەشق دیاریی بێت.
ئای لەم هەموو خەون و ویستانە، چەندە مەزنن ئەو مرۆڤانەی پڕن لەخەون و هیوا بۆ نیشتمانیان، بۆ خۆشەویستانیان، تا ئیستاش دۆڵی هیران، بەیادو بیرەوەری و خەونە بەدی نەهاتوەكانی تۆ چاولێك دەنێت، ئاخر ئەو دۆڵە تا ئێستاش‌ هاوڕێیەكی وەفاداری وەك تۆی نەدیوە، كە هاوڕێی‌ هەمیشەیی‌ بێت و بەشەو و ڕۆژ، هەر چوار وەرزە لەگەڵی‌ بێت.
ئێستاش رۆژانە هەواڵی شەهیدبووونی دەیان رۆڵەی ئەم خاكە، هەموو لایەكی تەنیوە، لەگەڵ شەهیدبووونی هەر لاوێك، هەر كوردێك خوێن لەجەستەی هەمومان دەچۆڕێت، لەگەڵ شەهیدبووونی هەر جوانخاسێك، برینێكی تر دەخاتە سەر لاشەی ئەم وڵاتە، هەموو رۆژێك بەدەیان خەون و هیوا لەم نیشتمانە لەگۆڕ دەنێرێن. كوردستانم، كوردستانەكەی تۆ بۆتە گۆرستانێكی گەورە و هەموو رۆژێك جوامێرێكی تێدا دەنێژرێت.
شەهید هاواری جوانە مەرگ، لاوێكی هۆشیار و هەست ناسك و خۆشەویست. پێشمەرگەیەكی گورج وگۆڵ و گۆشكراو بە بە بیروباوەڕی كوردایەتی و نیشتمانی. گەنجێكی پڕ هیوا و ئومێد، هەمیشە روو لە ئاسۆ و لەهەڵاتنی خۆرێكی نوێ. سادە و پڕواپڕ لە هەڵویستی جوان و سادەیی. لە رێكەوتی 9/11/1997 لە گردجاسوسان- دۆڵی هیران لە ڕووبەرووبوونەوەی سوپای داگیركاری توركیا لەگەڵ فەرماندەی ناسراو (تەحسین كاوانی) لەیەك سەنگەردا شەهیدبوون.
سڵاو لەوانەی سینگی خۆیان كردە قەڵغان بۆ وڵات و نیشتمان.
سڵاو لەو شەهیدە لاوانەی تەمەنی بەهاری خۆیان بەخشیە ئازادی وڵات
سڵاو لەسەرجەم شەهیدانی كوردستان شاناز هیرانی خوشكی شەهید.
*خوشكی شەهید

print

 209 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*