سەرەکی » زانست » بۆمبەكانی جەنگی جیهانیی هەڕەشەن بۆ..

بۆمبەكانی جەنگی جیهانیی هەڕەشەن بۆ..

بۆمبەكانی جەنگی جیهانیی هەڕەشەن بۆ ئەڵمانیا

لەئەڵمانیا پاشماوەی چەك‌و بۆمبە نەتەقیوەكانی جەنگی دووەمی جیهانیی هەرەشەن بۆ سەر ژینگەی وشكانی و ئاویی و ئاژەڵ و مرۆڤ و ژینگەی ئەو وڵاتە.
بوچوونێكی هەڵەیە كەسێك وا بیر بكاتەوە ئاگری جەنگ بەكۆتایی ئەو جەنگە دەكوژێتەوە، بۆ نمونە وڵاتێكی وەك ئەڵمانیا تا ئێستاش بە دەست پاشهاتەكانی دوای جەنگی دووەمی جیهانییەوە دەناڵێنێت، چونكە لەسەر زەوییەكەشی و لەدەریاكانیشیدا تا ئێستا دەیان هەزار تەن بۆمب هەن و هەڕەشەن بۆ دانیشتوانی ئەو وڵاتە، چارەسەركردنی ئەو گرفتەش لە خودی گرفتەكە پڕكێشەترە.
ماوەیەك لەمەوبەر دەسەڵاتدارانی ئەڵمانیا ئاشكرایانكرد: ژمارەی ئەو باڵندانەی بەهۆی پاشماوە پلاستیكییەكانەوە لەدورگەی هلگۆلاندی ئەو وڵاتە لەناوچوون زۆر زیاترە لەو ژمارەیەی باسكراوە، چەند كاتژمێرێكی نەبرد هەواڵێكی تر بڵاوكرایەوە كە بە هۆی تەقاندنەوەی چەند بۆمبێكی پاشماوەی جەنگی دووەمی جیهانیی لەدەریاچەی بەڵتیك لەلایەن سوپای ئەڵمانیاوە (18) نەهەنگی جۆری ( بەرازی دەریایی) لەناوچوون.
ئەمە بووە هۆی ناڕەزاییەكی زۆر لەناوەندەكانی بەرگریكار لە ئاژەڵان و خەڵكانی ئاسایی و سیاسییەكانی ناو پارتە ئۆپۆزیسیۆنەكان و داوایان لەحكومەتی ئەو وڵاتە كرد كە سەرەتا گیانی ئەو ئاژەڵانە بپارێزێت كە لەژێر هەڕەشەی لەناوچووندان، چونكە ئەوان لەپێشترن لە پاككردنەوەی ئاوەكان لە پاشماوەی چەكەكانی جەنگی دووەمی جیهانیی.

میراتییەكی قورس
بەپێی هەندێك ئاماری پرۆگرامی (كیم زی)ی ئەوروپیی كە تایبەتمەندە بەتوێژینەوەی مەترسییەكانی پاشماوەكانی جەنگ لەسەر سیستمی ژینگەیی نزیكەی (1.6) ملیۆن تەن پاشماوەی جەنگیی لەقوڵایی كەنارەكانی ئەڵمانیادا ژێر ئاو كەوتوون، لەو ژمارەیەش (1.3) ملیۆن تەن بەتەنها لەدەریای باكوردایە ئەمە جگە لە نزیكەی(40) ملیۆن تەن لە پاشماوەی كیمیایی لە دەریای بەڵتیك و 280 هەزار تەن لە دەریای باكور، كە هەموویان كاریگەریی خراپیان هەیە لە سەر زنجیرەی خۆراكیی.
هەر ئەو پرۆگرامە بەڵگەی حاشاهەڵنەگری خستەڕوو سەبارەت بە پیسبوونی ماسییەكان بەو ماددانەی ئەو چەكانەیان لێدروستكراوە. ئەوەش بەپێی هەندێك توێژینەوە كە بۆیان دەركەوتووە پێكهاتەی كیمیایی زیانبەخش لە (10% بۆ13%)ی گۆشتی ماسییەكانی دەریای بەڵتیكدا هەبووە.
چی بكرێت؟
حكومەتی ئەڵمانیا ناچارە بەمەبەستی پاراستنی ژینگەی دەریایی ئەو پاشماوانەی جەنگ لابەرێت و لە ناویان ببات، بەڵام هاوكات ئەو كارەی دەیكات دەبێتە هۆی زیانێكی ژینگەیی و سەركێشیكردن بە ژیانی هەزاران ماسییەوە كە لەو ناوچانەدا هەن.
هیوایان بە ڕۆبۆتەكانە
لەئاست ئەم گرفتەدا، پسپۆڕان خەریكی گەشەپێدانی جۆرە ڕۆبۆتێكن كە بتوانێت لە دوورەوە كاریگەریی ئەو بۆمبانە پووچەڵ بكاتەوە، بەشێوەیەك پێویست بە تەقاندنەوە نەكات، بۆ ئەوەش حكومەتی ئەڵمانیا بودجەیەكی بە بڕی 3.5 ملیۆن یۆرۆ تەرخان كردووە و هەریەك لە وەزارەتەكانی ئابوری و وزە بە هاوكاریی زانكۆی ( لایبزیگ) و پەیمانگای (فراونهۆڤەر)ی زانستیی چاودێریی ئەو پرۆژەیە دەكەن.
ئێستاش لەبەر ئەوەی ئەو ڕۆبۆتە ئامادە نییە بۆ لابردن و لەناوبردنی پاشماوە ژەهراویی و ترسناكە بێدەنگەكانی جەنگ، پشت بەڕێگە كلاسیكییەكان دەبەسترێت كە تێیدا بۆمب بەبۆمبێكی تر پوچەڵ دەكرێتەوە و لەناو دەبرێت، بەو هۆیەشەوە مەترسییەكان بۆ سەر مرۆڤ و ئاژەڵان و ژینگەش لەو وڵاتە هێشتا بەردەوامە.

سەرچاوە: Ghadi news

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*