سەرەکی » وتار » شوان کەریم کابان » چەند لایەنێكی شاراوەی ژیانی باوكم، كەریم كابان

لە یادی سێ ساڵەی سەفەری ئەبەدییدا

چەند لایەنێكی شاراوەی ژیانی باوكم، كەریم كابان

زۆربەی هەرە زۆری خەڵكی كوردستان، بەتایبەت ئەوانەی هۆگر و شەیدای دەنگی كەریم كابان بوون، جگە لە هاوڕێ زۆر نزیكەكانی، كەریم كابانیان وەك هونەرمەندێك ناسیووە و هەمیشە دەم بە خەندە و پێكەنین دیویانەو پێشیان وابووە كە هەر لە سلێمانی بووە و ژیانێكی ئارام و سەقامگیر و بێ گێرمە و كێشەی بەسەربردووە، ناهەقیشیان نەبووە، چونكە هەر لە قەدەر ئەو زانینە زانیارییان هەبووە.
لەم بۆنەیەدا، وێڕای ناردنی سڵاو بۆ گیانی پاكی و جارێكی تر دەربڕینی خەم و حەسرەت بۆ كۆچی ئەو پیاوە و دەربڕینی ئەو راستییەی كە نەمانی ئەو لەژیانماندا كەلێنێكی گەورە و بۆشاییەكی رۆحیی بە پانتایی خۆشەویستی خۆی جێهێشتووە، بە پێویستم زانی هەندێ لایەنی شاراوەی ژیانی ئەم پیاوە بخەمەڕوو.
ئەم لە سلێمانی لەدایكبووە، كاتێك تەمەنی دەگاتە كاتی سەربازی، لەبری چون بۆ ئەو خزمەتە، چۆتە بەغدا لەوێ بەشداریی خولێكی كاری بێسیمی كردووە لەبەڕێوەبەرایەتی پۆلیس بەشی بێ تەل، هەر لەو سەردەمەشدا پەیوەندی بە ئیزگەی بەغداوە كردووە و یەكەمین گۆرانی خۆی تۆماركردووە و بڵاویكردۆتەوە، ئەمە لەساڵی 1945 بووە.
پاش تەواوكردنی خولەكە دەگوازرێتەوە بۆ ئەو شوێنەی پێویستیان بە شارەزایی و خزمەتی هەیە و بۆ ئەمەش دەنێردرێتە دینارتە لە سنووری ئاكرێ، پاش ئەوە بەماوەیەك دەگوازرێتەوە بۆ دیانە و ئەمجا بۆ رەواندوز و بەهۆی حەزی خۆیەوە لەو شوێنانە فێری دیالێكتی كرمانجی ژووروو دەبێ.
پاش ئەوەی ساڵی 1956 دەگوازرێتەوە بۆ شیوەكەڵی سنووری شارباژێرو لەوێ لەمەخفەری سنووری دەبێ بە بێتەل. پاش دوو سێ ساڵ دەگوازرێتەوە بۆ شاری رانیە و لەوێ لە مەخفەری رانیە دەبێتە بێتەل.
لە رانیە پەیوەندی بە رێكخستنەكانی پارتی دیموكراتی كوردستانەوە دەكات و لەگەڵ هاوڕێكانیدا رۆڵی گرنگ دەگێڕێ، هەم لە گەیاندنی هەواڵی جموجوڵی هێزەكانی حكومەتی ئەو سەردەمەی عیراق بە پارتی و شۆڕش، هەم لە گرتنی سەرای رانیەشدا، لەم بارەیەوە بەڕێز ئیبراهیم جەلال لە كتێبەكەیدا خوارووی كوردستان و شۆڕشی ئەیلول، بنیاتنان و هەڵتەكاندن 1961_1975 لە لاپەڕە 94 دا دەڵێ: 5/9/1962 سەعات 11ی شەو بە راوێژ لەگەڵ عەریف رفیق و مەلا عەبدوڵڵای بێ سیم و فەریق كەریم كابانی بێ سیم چوینە سەر سەرا و دەرگا كرایەوە و بە یارمەتی پۆلیسە كوردەكان دەست بەسەر هەموو سەرادا گیرا.. پاشان دەڵێ: مەلا عەبدوڵلا و كەریم كابان و دوو پۆلیسی عەرەبمان لەسەر بێ سیمەكان دانا بۆ پەیوەندی بەردەوام بەدەوڵەتەوە…. تەواو.
دیارە مەبەستی سەرەكی لەم كارە، بۆ ئەوە بووە كە حكومەت نەزانێ سەرای رانیە گیراوە و كەوتۆتە دەست شۆڕش.
هەر لەو ماوەیەدا كەریم كابان بەهۆی كردنەوەی شیفرەیەكی رژێمەوە سەركردایەتی شۆڕشی لە تیاچوونی حەتمی رزگار كردووە و پاش ئەوەی روون بۆتەوە رژێم بەنیازە شوێنی كۆبوونەوەیەكی سەركردایەتی شۆڕش كە بڕیاربووە بە سەرپەرشتی خوالێخۆشبوو مستەفا بارزانی بێ، بۆردومان بكات و ئەم شۆڕشی لەو نیازە ئاگادار كردۆتەوە و بەرپرسانیش شوێنی كۆبوونەوەكەیان گواستۆتەوە و رژێمیش لە سات و كاتی دیاریكراودا بۆردومانەكەی ئەنجامداوە.
هەر لەبەرئەو هۆكارانە و ئاشكرابوونی پەیوەندی بە شۆڕشەوە، بڕیاری دوورخستنەوە و نەفیكردنی دەدرێت، سەرەتا دەگوازرێتەوە بۆ بەغداو لەوێ بۆ ماوەی شەش مانگ لە گەڕەكی – تل محمد- دەبن كە پاشان دەگوازرێتەوە بۆ خوارووی عیراق بۆ شاری ناسریە، هەم بۆ شیوەكەڵ و هەم بۆ رانیە و ئەمجا بەغداد و دواتریش ناسریە ماڵ و منداڵی لەگەڵدا دەبێ، لە ناسریە دوو كچی لەتەمەنی یەك ساڵیدا كۆچ دەكەن و هەر لەو غەریبیییە دەنێژرێن. پاش ناسریە دەگوازرێتەوە بۆ دیوانیە. كچە گەورەكەی و هەردوو كوڕەكەی لە ناسریە و دیوانیە خوێندنی سەرەتایی دەخوێنن.
كەریم كابان لە سەرەتای 1969دا دەگوازرێتەوە بۆ شاری سلێمانی. پاش بەیانی ئازاری 1970 بە بیانوی پەیوەندی بە باڵی مەكتەبی سیاسی پارتیەوە، دووردەخرێتەوە – نفی- دەكرێ بۆ شاری رومادی و ماوەی حەوت مانگ لەوێ دەبێ و دواتر دەگەڕێتەوە بۆ شاری سلێمانی. لەو ماوەیەدا تەرفیع دەكات و دەبێ بەمفەوەزی 3 ئەستێرەی قورگ و بە بڕیارێكی بەڕێوەبەرێتی گشتی پۆلیسی عیراق دەبێتە بریكاری ئەفسەری بێ سیم (بێ تەل) لە بەڕێوەبەرێتی پۆلیسی سلێمانی.
ساڵی 1974 پەیوەندی بە شۆڕشەوە دەكات و لە ناوپردان دەبێتە بێ سیمی شۆڕش. ساڵی 1975 پاش نسكۆ دەگەڕێتەوە و رژێم لەكاری پۆلیسیەوە دەیگوازێتەوە كاری مەدنی و دەینێرێتە شاری نەجەف لە بەڕێوەبەرێتی كارەبای نەجەف دەستبەكار دەبێت.
پاش ئەوەی ساڵی 1981 قادر كابان-ی برای دەگیرێت و وندەكرێت و كوڕە گەورەكەشی پەیوەندی بە شۆڕشەوە دەكات، چاوی پیاوانی رژێمی دەچێتە سەر و بەردەوام لە دڵەڕاوكێ و ترسدا دەژی و چەندین جاریش بۆ بەڕێوەبەرێتی ئەمنی سلێمانی بانگ دەكرێت و جارێكیان بەڕێوەبەری ئەمن وێڕای ئەوەی بەهۆی ناسراویەوە و رێزێكی زۆری لێدەنێ، پێیدەڵێ، ئوستاز كەریم حەزدەكەین بچیت كوڕەكەت لە شاخ بهێنیتەوە، ئەویش پێی دەڵێ من هیچ دەسەڵاتێكم بەسەر كوڕەكەمدا نییە، ئێوە حكومەتن و دەسەڵاتتان هەیە، بچن خۆتان بیهێننەوە.
كەریم كابان تا دوو مانگ بەر لە كۆچكردنی لەو خانووەدا بوو كە لە بنەڕەتدا موڵكی جەلال كابانی باوكی بوو لە ساڵی 1976 لەلایەن شارەوانی سلێمانییەوە لەگەڵ ژمارەیەك خانووی تری گەڕ‌كی شێخان ئیستملاك كراو بووە موڵكی شارەوانی، یانی ئەو خانووەی دوا ساڵەكانی تەمەنی پیریی تێدا بەسەربرد، خانووی خۆی نەبوو، خانووی شارەوانی بوو مانگانە كرێی دەدا.
كەریم كابان سەعات 5,20 دەقیقەی سەرلەبەیانی 14/1/2016 كۆچی دواییكرد و ماڵئاوایی لێكردین.
هەزاران سڵاو لە گیانی پاكی.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*