سەرەکی » مانشێت » راستگۆیی،وردبینی و سەنگینی

راستگۆیی،وردبینی و سەنگینی

ئەمڕۆ 22/1/2020 سایتی PUKmedia لە كاروانی رۆژنامەگەریی خۆیدا پێدەنێتە 17 ساڵەی تەمەنییەوە.
ئەو سایتە وەكو یەكەم سایتی زمانحاڵی حزب لە هەرێمی كوردستان هەر لەرۆژی یەكەمی دامەزراندییەوە لە 22/1/2003وە بەدروشمی راستگۆیی و متمانە وەك یەكێك لە ئامڕازەكانی میدیای نوێ، كاریگەری سەنگینی لە بواری رۆژنامەگەرییدا هەبووە و هەیە، بابەت و هەواڵەكانی دەبنە سەرچاوەی رەسمیی گرنگی میدیای ناوخۆیی و بیانی، بەو پێیەی بە پرەنسیپی راستگۆیی و خێرایی و پرۆفیشناڵی و بەرپرسیارێتی كاردەكات.
ئەگەرچی ئەم سایتە سایتی رەسمی یەكێتییە، بەڵام هەمیشە خەمی خەڵكی كردووەتە پەیامی خۆی ‌و توانیویەتی بیسەلمێنێت كە میدیای كوردی ئەگەر زمانحاڵی حزبیش بێت، دەتوانێت بە ئەكادیمی و بێلایەنییەوە كاری خۆی بكات.
لەماوەی 17 ساڵەی تەمەنیدا توانیویەتی ببێتە درەوازەیەك بۆ ئاشنابوون بەو رووداو و هەواڵانەی كە لەهەرێمی كوردستان و عیراق و ناوچەكەدا روو دەدەن و بەو هۆیەشەوە وەك سەرچاوەی هەواڵی راست سیمای راستەقینەی ناوچەكە دەگوازێتەوە بۆ جیهان و ئەمەش وایكردووە متمانەیەكی زۆر لە كایەی رۆژنامەگەریدا بۆخۆی مسۆگەر بكات و هەر ئەوەش وایكردووە كە جگە لەزمانی كوردیی زاراوەی سۆرانی ‌و كرمانجی، بەچەند زمانكێكی دیكەی بیانی هەواڵ و زانیارییەكان دەگوزاێتەوە. وەك (عەرەبی، ئینگلیزی و روسی) جگە لە هەواڵە و راپۆرتە سیاسییەكان، بایەخی تایبەتیشی بە بواری هەمەڕەنگ و تەكنۆلۆجیا و ئەدەب و هونەر و وەرزش و ژنان داوە.
لە بواری سۆشیالمیدیاشدا ئەم سایتە لەلینكەكانی سۆشیالمیدیاوە هەواڵ و زانیاریی و گۆڕانكارییەكانی بە زمانی جیاجیا بە خوێنەرانی دەگەیەنێت.
مامەڵەی بابەتیبوون و راستگۆیی پیوكەی میدیا وایكردووە، كە زۆرێك لە كونسوڵخانە و باڵێوزخانەكانی وڵاتان لە هەرێم و عیراق و ناوەندە نێودەوڵەتییەكانیش چاودێریی پیوكەی میدیا بكەن و مامەڵەی میدیایی لەگەڵدا دەكەن، هەروەها زۆربەی دامەزراوە و وەزارەتەكانی حكومەتی عیراق و هەرێمیش پەیوەندیی میدیایی باشیان لەگەڵیدا هەیە.
وێب تیڤی
لە نوێترین پێشڤەچوونی كارەكانی ئەو سایتەش دانانی پێگەی ویب تیڤی-یە كە لێیەوە دیدارو چاوپێكەوتن لەگەڵ سیاسەتمەداران ‌و كەسایەتیی و شارەزایان ‌و پسپۆڕانی بواری سیاسی، ئابووریی، هونەری، كارگێڕیی و….هتد رێكدەخرێت ‌و بەشێوەی راستەوخۆ یان ریكۆرد تایبەت بە بابەتە گەرمەكانی رۆژ پەخش دەكرێت كە ئەم ئەركەش هەر لەلایەن هەمان ستافی ماندوونەناسی سایتەكەوە بەڕێوەدەبرێت سەرباری كارە رۆژانەیی ‌و سەرقاڵییان بە جەنجاڵیی رووداوو پێشهاتە خێراكانەوە لەئاستی ناوخۆ‌و دەرەوە.
هەر بە بۆنەی 17-ـەمین ساڵڕۆژی دامەزراندنی سایتەكەشەوە كەسایەتییە سیاسیی ‌و ئیدارییەكانی یەكێتی ‌و حكومەتی هەرێمی كوردستان لە چەند بروسكەیەكدا یادەكە ‌و رۆڵی ئەو سایتەیان لە بزاڤی رۆژنامەنووسیی كوردیدا بەرزنرخاندووە كە ئەمانەی خوارەوە دەقی چەند بروسكەیەكە كە بەو بۆنەیەوە ئاراستەی سەرنووسەر‌و ستافی سایتەكە كراوە:

كۆسرەت رەسوڵ: هیوادارم لە پێشكەوتنی بەردەوامدا بن
بەڕێزان سەرنووسەرو ستافی ماڵپەڕی PUKmedia
لە حەڤدەهەمین ساڵیادی دامەزراندنی ماڵپەڕی PUKmedia ئۆرگانی فەرمی یەكێتیی نیشتمانیی كوردستان، پیرۆزبایی گەرمی خۆم ئاڕاستەی یەكە بە یەكەتان دەكەم و هیوادارم لە پێشكەوتنی بەردەوامدا بن.
دامەزراندنی ماڵپەڕی PUKmedia لەو رۆژگارەداو لە سەردەمی پێشكەوتنەكانی بواری میدیادا، وەك دەستپێشخەرییەكی گرنگی یەكێتیی نیشتمانیی كوردستان لەبوارەكەدا كەوتە كارو لەماوەی تەمەنی خۆیدا ماڵپەڕەكەتان توانیویەتی بە زمانە جیاوازەكان ببێتە سەرچاوەیەكی وردو متمانەپێكراوی هەواڵ و زانیاری و لە ناوەوەو دەرەوە وەك ماڵپەڕێكی پیشەیی و هەواڵی لێی بڕوانرێ.
بۆ ئەمڕۆ و دوای تێپەڕبوونی ١٧ ساڵ بەسەر تەمەنی دامەزراندنی و زۆربوونی ژمارەی میدیای ئەلیكترۆنی و سۆشیال میدیا، ئەركە لەسەر ستافی ماڵپەڕی PUKmedia وردتر لەجاران كاربكەن و ببنە وێستگەی خزمەتكردنی زیاتر بە كۆمەڵگەی كوردی و هاوكات سەرچاوەی فەرمیش بن بۆ دنیای دەرەوە و گەیەنەری بەرنامەكانی یەكێتی بە هەموولایەك.
لەپاڵ دووبارە پیرۆزباییم بۆ ستافە ماندوونەناسەكەتان، پاڵپشتی و پشتیوانی خۆمتان بۆ دووبارە دەكەمەوەو هەموومان پشتیوان دەبین بۆئەوەی راگەیاندنی یەكێتی بكەینەوە پێشەنگی راگەیاندنە كوردییەكان.
كۆسرەت رەسوڵ عەلی
سەرۆكی ئەنجومەنی باڵای سیاسی و بەرژەوەندیی
یەكێتیی نیشتمانیی كوردستان

هێرۆ ئیبراهیم ئەحمەد: چاوەڕوانی بەردەوامی و داهێنانتانین
بەڕێزان، سەرنووسەر و ڕۆژنامەنووسان و كادیرانی PUKmedia ی ئازیز
بە بۆنەی ساڵیادی دامەزراندنی ماڵپەڕی PUKmedia وە، گەرمترین پیرۆزبایی خۆم پێشكەشی یەك بە یەكتان دەكەم، ئومێدی پێشكەوتن و گەشەكردنی زیاترتان بۆ دەخوازم.
پیوكەی میدیا، لەماوەی ساڵانی خزمەتیدا بە سەلیقە و دڵسۆزی ستافە ماندونەناسەكەی لە بەدواداچون و بڵاوكردنەوەی هەواڵ‌ و زانیاریدا، پابەندبووە بەئیتیكی كاری رۆژنامەوانییەوە، بۆیە ئەو شێوازە كاركردنەتان لەبواری میدیای ئەلیكترۆنیدا جێگەی دەستخۆشی و بەرزنرخاندنە، بۆ داهاتووش چاوەڕێی بەردەوامی و داهێنانی پیشەیی دیكەتان لێدەكەین.
هیوادارم پیوكەی میدیا بە بەرنامەو پلانی نوێوە پێ بنێتە ساڵێكی نوێی تەمەنییەوە و خۆتان بۆ راپەڕاندنی ئەركەكانتان ساز بدەن، تاوەكو لەپێشەنگیدا بمێننەوە.
هەر لە پێشكەوتن و سەرفرازییدا بن.
هێرۆ ئیبراهیم ئەحمەد

عومەر فەتاح: هەمیشە جێگای متمانەی خۆێندەواران بوون
بەڕێزان سەرنوسەرو ستافی ماڵپەری pukmedia
بەبۆنەی یادی 17ساڵەی دامەزراندنی ماڵپەری pukmedia گەرمترین پیرۆزبایتان لێدەكەم، ئومێدی سەركەوتنتان بۆ دەخوازم. ماڵپەرەكەتان، 17ساڵە بەشێوازێكی سەنگین وڕاستگۆییانە رووماڵی هەواڵ و رووداوەكان دەكەن، هەمیشە جێگای متمانەی خوێندەواران بوون. هیوادارم ئەم یادە بكەن بەدەرفەت بۆ پێداچوونەوەو گەشەپێدانی ماڵپەرەكەتان، بۆ ئەوەی بتوانن لەگەڵ گۆڕانكارییەكان و پێشكەوتنەكانی میدیا، بەتایبەتی میدیای نوێ خۆتان بگونجێنن و وەك هەمیشە پێشەنگ بن. هەربژین و سەركەوتووبن.
عومەر فەتاح
ئەندامی ئەنجومەنی باڵای سیاسی ی.ن.ك

گەلاوێژخان: هیوای بەردەوامی و نوێبوونەوەتان بۆ دەخوازم
برایان و خوشكانم لەوێب سایتی pukmedia
لەیادی 17 ساڵەی دامەزراندنی ماڵپەڕی pukmedia–دا، جوانترین پیرۆزبایی لەدامەزرێنەران و بەڕێوەبەرو تەواوی كارمەندانی ئەم میدیا ئەلیكترۆنییە دەكەم كە یەكێكی ترە لەدەنگە بڵندو هەقبێژەكانی رۆژنامەوانی ئەلیكترۆنی.
هیوای بەردەوامی و نوێبوونەوەتان بۆ دەخوازم بەتایبەت لەم سەردەمەدا كە میدیای ئەلیكترۆنی هەنگاوی گەورەی ناوە بۆ تێپەڕاندنی جۆرەكانی تری میدیاو بۆتە ئەو تۆڕە فراوانەی پێشبڕكێی رووداوە هەنووكەییەكان دەكات.
ئومێدەوارم پی یوكەیەكەمان شانبەشانی دەستەخوشكەكانی تری لە میدیای ئەلكترۆنیدا، سەرچاوەی زانیاری و گەیاندنی هەواڵەكان بێت بۆ هەموو لایەك.
دەخوازم لە پاڵ هەواڵ و زانیارییەكانی رۆژدا، بایەخێكی تایبەت بەبوارەكانی رووناكبیری و كەلتوری و كۆمەڵایەتی و كایەكانی تری ژیانی كۆمەڵی كوردەواری بدەن كەشایەنی گرنگیپێدانی زیاترە.
وەك هەمیشە سەركەوتووبن و دووبارە ئەم یادە جوانە جوانترو پیرۆزتربێت.
گەلاوێژ

قادر عەزیز: وێستگەیەكی سەنگینی كاری رۆژنامەوانی‌ و میدیاییە
تێپەڕینی حەڤدە ساڵ بەسەر كۆشش ‌و بەرهەمە بەپێزەكەی میدیای ئەلیكترۆنی یەكێتی‌و سەرمەشقی بوارەكەی خۆی، ماڵپەڕی puk میدیای ئازیز پیرۆزبایی گەرم لە سەرنووسەر‌و تەواوی كارمەندانی ئەو ماڵپەڕە ئازیزە دەكەم‌و هیوا دەخوازم وەك هەمیشە لەسەر ئەو شاڕێگە سیاسییە سەنگینە بەردەوام بن كە لە رووماڵكردنی رووداوە سیاسیی‌و كۆمەڵایەتی‌و ئابووری‌و فەرهەنگییەكانی كۆمەڵگە لەتەمەنی ئەو ماڵپەڕە پەیڕەوتان كردووە، هەر ئەو سەنگینی‌و هەستكردن بە بەرپرسیاریەتییەش بووە كە ماڵپەڕی puk میدیای لەسەر ئاستی كوردستان كردۆتە وێستگەیەكی سەنگینی كاری رۆژنامەوانی‌و میدیایی.
ماڵپەڕی pukی میدیا كە بەشێكە لە جەستەی راگەیاندنی یەكێتیی نیشتمانیی كوردستان، ساڵانێكە سەرباری كاركردنی لەسەر گۆڕەپانی ناوخۆیی، لەڕێگەی روماڵكردنی هەواڵەكانی كوردستان‌و هەڵوێستەكانی یەكێتی بەزمانەكانی عەرەبی‌و ئینگلیزی‌و روسی بۆشاییەكی گەورەی پڕكردۆتەوەو بۆتە ئەڵقەی پەیوەندیی لەنێوان روداوەكانی كوردستان‌و وەرگرانی وڵاتانی دیكە، هەروەك بۆتە سەرچاوەیەكی گرنگ‌و جێی متمانە بۆ زۆربەی كەناڵ‌و دامەزراوە میدیاییەكانی كوردستان‌و عیراق‌و جیهان، بۆ بەردەوامبوون لەسەر ئەو چەشنە روماڵ‌و ئەو سیاسەتە راست‌و دروستە، وەك هەمیشە پاڵپشت‌و پشتیوانی ماڵپەڕی سەنگینی پیوكەی میدیا دەكەم‌و ئومێدی بەردەوامیتان لەو سیاسەت‌و بەرپرسیاریەتییە نیشتمانی‌و نەتەوەییە بۆ دەخوازم. جارێكی تریش پیرۆزباییتان لێدەكەم.

قادر عەزیز
ئەندامی ئەنجومەنی گشتیی سەركردایەتیی یەكێتیی نیشتمانیی كوردستان

قوباد تاڵەبانی: PUKmedia یەكێكە لەشانازی و دیارییەكانی یەكێتی
بەڕێزان سەرنوسەر و ستافی رۆژنامەوانی ماڵپەڕی PUKmedia
حەڤدەیەمین ساڵیادی دامەزراندنی ماڵپەڕی سەنگینی PUKmedia پیرۆز دەكەم.
ئەم ماڵپەڕە ڕەنگینە كە هەمیشە پێشبڕكێ لە گەڵ كات دەكات بۆ گەیاندنی هەواڵ و وێنەو چالاكییە جۆربەجۆرەكانی ناوەوەو دەرەوەی كوردستان، یەكێكە لە شانازی و دیارییەكانی یەكێتی و خزمەتگوزارییەكی هەواڵیی پڕ زانیارییە بۆ خوێنەران و چاودێرانی كورد لەهەموو جێگایەكی جیهان، بەهەوڵ و ماندوبوون و شەونخونی ستافە پشوو درێژەكەشی بەردەوام بەرەو سەركەوتنی زیاتر دەڕوات.
ساڵیادی ماڵپەڕی PUKmediaلەكاتێكدایە‌ كە‌ یەكێتیی نیشتمانیی كوردستان خۆی لە وێستگەو قۆناغێكی سیاسی نوێیدایە‌ پاش بەستنی كۆنگرە، ڕەوشی میدیاش بەتایبەت میدیای ئەلەكترۆنی چ لە كوردستان و چ لەسەر ئاستی جیهان لە پەرەسەندنی خێرادایەو لەم نێوەندەشدا خۆشبەختانە PUKmedia خاوەن سەنگ و پێگەی خۆیەتی و شان بەشانی ئەركە سیاسییەكانی وەك ئۆرگانێكی زمانحاڵی یەكێتی، سەرچاوەیەكی كوردی خێراو هاوسەنگ و پڕ زانیاریە‌.
دووبارە پیرۆز بێت و سەركە‌وتوو بن.
قوباد تاڵەبانی
جێگری سە‌رۆكی ئە‌نجومە‌نی وە‌زیران

ئاسۆ مامەند PUKmedia بووەتە سەرچاوەیەكی باوەڕپێكراو
بەڕێزان/ سەرنووسەرو رۆژنامەنووسانی PUKmedia ی ئازیز
بەبۆنەی (17)‌یەمین ساڵەی دامەزراندنی وێب سایتی(PUKmedia) بە گەرمی پێرۆزبایی خۆمتان پێڕادەگەیەنم و ئومێدەوارم سایتەكەتان لە گەشەكردن و سەركەوتنی بەردەوامدا بێت.
یادی (17) ساڵەی دامزراندنی وێب سایتی (PUKmedia) هاوكاتە لەگەڵ قۆناخ و هەلومەرجێكی تازە كە ناوچەكە و عیراق و هەرێمی كوردستانی پێدا تێدەپەڕێ، لەم رووەوە پێدان و گەیاندنی؛ هەواڵ، راپۆرت، زانیاری، شیكاریی و بە دواداچون بۆ كێشەو ئاریشەكان ئەركی سایتەكەتان دەبێ و لەم چوارچێوەیەشدا بێ درێغ لە رابردوودا هەوڵی بێوچانتان داوە و توانیوتانە ببنە سەرچاوەیەكی باوەڕ پێكراوی بۆ ناوچەكە و بۆ دەرەوەی هەرێم.
لە ماوەی چەند ساڵی رابردوودا سایتەكەتان بە شێوەیەكی پیشەییانە و بە فۆڕمێكی تازەوە توانیوێتی رووداوو گۆڕانكارییەكان بێ لایەنانە بۆ خوێنەران بگوازێتەوە. هەروەها (PUKmedia) بە گەڕانەوە بۆ ئیتیكی رۆژنامەوانیی، هەواڵ و رووداوەكانی بە شێوازێكی راستگۆیانە بۆ خوێنەرانی گواستووەتەوە.
دووبارە (17)‌یەمین ساڵەی دامەزراندنی (PUKmedia) پیرۆز لە ئێوەو تەواوی رۆژنامەنووسان پیرۆز دەكەین
ئاسۆ مامەند
ئەندامی ئەنجومەنی سەركردایەتیی گشتی ی.ن.ك

شاناز ئیبراهیم ئەحمەد: بەردەوام بن بۆ گەیاندنی پەیامی راستگۆیی
بەڕێزان/ سەرنووسەرو دەستەی نوسەرانی PUKmedia ی ئازیز
بەبۆنەی تێپەڕینی ساڵێكی تر لەخزمەت و ماندوونەبوون و دامەزراندنی ماڵپەڕەكەتان پیرۆزبایی لە بەڕێوەبەرو تەواوی ڕۆژنامەنووس و كادرو كارمەندانی سایتە ئازیزەكەتان دەكەم و دەخوازم بەردەوام بن بۆ خزمەتكردنی تاكی كورد و گەیاندنی پەیامی ڕاستگۆیی و بیری نەتەوەیی هەمیشە لەكارتاندا دڵسۆز و وبێلایەن و پیشەیی بوون و بۆیە داواتان لێدەكەم بەمشێوەیە بەردەوام بن ، لەساڵی نوێدا پەرە بەكاری داهێنانی زیاتر بدەن، بەڵێنیش دەدەم بۆ سەركەوتن و بەردەوامی لەكار و پێشكەوتنتان ئەوەی بەمن بكرێت لەخزمەتتان ئەبم.
دووبارە تێپەڕینی ساڵێكی تر لەخزمەتكردن پیرۆزە لە ئێوەی ئازیز.

شاناز ئیبراهیم ئەحمەد
ئەندامی ئەنجومەنی سەركردایەتیی گشتی ی.ن.ك

د.جوان ئیحسان فەوزی: سەركەوتووبن ئایندەتان پڕدەسكەوت و بەرهەمی زیاتربێت

بەڕێزان/ سەرنووسەرو رۆژنامەنووسانی PUKmedia ی ئازیز
بەبۆنەی ساڵیادی دامەرزاندنی ماڵپەڕەكەتان پیرۆزبایی لەبەڕێوەبەرو تەواوی میدیاكارو كادرو كارمەندانی دەزگا ئازیزەكەتان دەكەم و دەخوازم بەردەوام بن بۆ رۆشنكردنەوەی هزرو خزمەتكردن بە هەموو تاكێكی كۆمەڵگەی كوردەواری بەسەرجەم رەنگەكانییەوە. هیوادارم چۆن لەساڵانی ڕابردوودا بەوپەڕی دڵسۆزییەوە لەگەیاندنی هەواڵ و زانیارییەكان بەخوێنەرانی كورد ڕۆڵێكی گرنگ و بەرچاوتان هەبووە و بوونەتە سەرچاوەیەكی باوەڕپێكراو بەهەمان نەفەس و بەداهێنانی نوێ و كاری باشترەوە سایتەكەتان لەگەشەكردن و سەركەوتنی بەردەوام دابێت، هەمیشە بەدڵسۆزی و بێلایەنییەوە لەكاری ڕۆژنامەوانی بەردەوام بن، لەساڵی نوێدا درێژە بەكاری داهێنان و زیاتری بواری میدیایی ئەلیكترۆنی بدەن بە ئامانجی بەردەوامبوونتان لەو خزمەتە نیشتمانی و كۆمەڵایەتییەی پێشكەشی تەواوی چین و توێژەكانی كۆمەڵگەی كوردستانی دەكەن.
دووبارە پیرۆزبایی لە ئێوەی بەڕێزو سەرجەم ڕۆژنامەنووسان وخوێنەرانی كورد دەكەم ، بەردەوام بن سەركەوتووبن ئایندەتان پڕدەسكەوت و بەرهەمی زیاتربێت.
د.جوان ئیحسان فەوزی
ئەندامی ئەنجومەنی سەركردایەتیی گشتی ی.ن.ك

زوبێر عوسمان: دامەزراندنی ئەم سایتە پێویستیەكی سەردەمیانە بوو
هەڤاڵان/ سەرنوسەر و سەرجەم كادیر و كارمەندانی PUKmedia
بە بۆنەی یادی ١٧ ساڵەی دامەزراندنی سایتی پیوكەی میدیاوە پیرۆزبایی گەرم ئاراستەی بەرێزتان و سەرجەم كادیر و كارمەندانتان دەكەم.
یەكێتی نیشتمانی كوردستان هەر لەسەرەتای دامەزراندنیەوە گرنگی و بایەخێكی ئێجگار گەورەی بە راگەیاندن داوە و چەندین كەناڵی راگەیاندنی لە قۆناغە جیاوازەكاندا هەبووە، لەگەڵ پێشكەوتنی ئامرازەكانی راگەیاندن و كاریگەری سەردەمی بەجیهانیبوون و رۆڵ و كاریگەری سۆشیاڵ میدیا، دامەزراندنی پیوكەی میدیا پێویستیەكی سەردەمیانە بوو، ماڵپەری پیوكەی میدیا لەماوەی ١٧ ساڵی تەمەنیدا ، پەیام و سیاسەتی فەرمی یەكێتی نیشتیمانی كوردستان و هەواڵ و زانیاریی لەسەر كوردستان و عێراق و ناوچەكە و جیهان لەسەرجەم بوارەكاندا بە پەیڕەویكردنی یاسا و ئیتیكی رۆژنامەوانی بڵاو كردوەتەوە و سەرچاوەی زانیاریی بووە بۆ خوێنەران و كەناڵەكانی راگەیاندن، هیوادارم هەمیشە پێشەنگ بن لە كاروانی رۆژنامەوانی كوردی و سۆشیال میدیادا.
دووبارە پیرۆزباییتان لێدەكەم و هیوای سەركەوتنی زیاترتان بۆ دەخوازم .
زوبێر عوسمان
ئەندامی ئەنجومەنی سەركردایەتی گشتیی ی.ن.ك

تابان گەرمیانی: PUKmedia نازناوی سەرچاوەی باوەڕپێكراوی بەدەستهێناوە
ساڵڕۆژی دامەزراندنی سایتی پیوكەی میدیا پیرۆز بێت، لەساڵیادی ماڵپەری پیوكەی میدیادا ، پیرۆزبایی لە بەرپرس و تەواوی كارمەندانی دەكەم، ئێوە ماندوونەناسانە راستی و دروستی هەواڵەكانی رۆژ بە زانیاری ورد دەگوێزینەوە بۆ خوێنەران، هەر ئەمەش وایكردووە پیوكەی میدیا ببێتە جێگای متمانەی پانتاییەكی زۆر لە خوینەر و شەرەفی نازناوی سەرچاوەی باوەڕپێكراو بەدەست بهێنێت.
تابان گەرمیانی
ئەندامی ئەنجومەنی سەركردایەتی گشتی ی.ن.ك

ئاراس جانگیر: PUkmedia هەر لەپێشكەوتن و درەوشانەوەدا بێت

بەڕێزان/ سەرنووسەرو رۆژنامەنووسانی PUKmedia ی خۆشەویست كارمەندە دڵسۆزەكانی PUKmedia
لەیادی 17هەمین ساڵیادی دامەزراندنی ماڵپەڕی PUKmedia ئازیزەوە لەناخی دڵمەوە گەرمترین پیرۆزباییتان ئاڕاستە دەكەم، ھیوای بەردەوامی و سەركەوتنی زیاترتان بۆ دەخوازم و دڵسۆزی و ماندوبوونی رۆژنامەنووس و كارمەندە ماندونەناسەكانی خزمەتێكی گەورەیانكردووە لە كاری میدیایی لە كوردستان جێگەی شانازی هەمووانە، ئومێد دەكەم سایتی PUKmedia لەگەڵ داگیرساندنی مۆمی تەمەنی خۆیدا هەر لەپێشكەوتن و درەوشانەوە و گەشەسەندنی زیاتردابێت و درێژە بەو رێبازە پیرۆزەی بدات.
بەهیوای ئەوەی هەمیشە سەركەوتو و سەرفرازبن لە كارەكانتاندا.
ئاراس جانگیر محەمەد ئاغا
ئەندامی ئەنجومەنی سەركردایەتی گشتی ی.ن.ك

مەكتەبی رێكخستن: pukmedia توانییەتی خزمەتێكی زۆر بەمیدیای كوردی بكات
بەڕێزان بەڕێوبەر وكادر وكارمەندانی سایتی pukmedia
لەیادی 17هەمین ساڵیادی دامەزراندنی ماڵپەڕی pukmedia دا كە سایتی فەرمیی یەكێتی نیشتیمانی كوردستانە بەناوی لێپرسراوو تەواوی هەڤاڵانی مەكتەبی ڕێكخستنی یەكێتی نیشتیمانی كۆردستانەوەگەرمترین پیرۆزبای یادی ئەم سایتە ئازیزەتان لێدەكەین وهیوای بەردەوامی و سەكەوتن و داهێنانتان بۆدەخوازین ودەستی ماندونەبونتان دەگوشین puk mediaلەسەرەتای دامەزراندنییەوە تاكو ئێستا توانیوێتی بەبێ وەستان كارەكانی بكات و ببێتە یەكێك لە ماڵپەڕە دیرەكانی نێو میدیای كوردی و بەماڵپەڕێكی ڕاستگۆو جێی متمانە ناودەبرێت و توانییەتی خزمەتێكی زۆر بەمیدیای كوردی بكات ‌و مەڵۆیەك بخاتە سەرخەرمانی كاری ڕۆژنامەگەری لە دنیای میدیای نوێدا توانیوێتی لەگەڵ پێشكەوتنی تەكنەلۆژیدا خۆی بگونجێنێ و بەردەوام خۆی ئەبدەیت بكاتەوە یەكێك لە شانازییەكانی ئەم سایتە ئەوەیەكە بەچەند زمانێكی جیاواز خزمەت بە بینەر و خوێنەری ماڵپەڕەكە بكات بەیەكێكی تر لە سەروەرییەكانی یەكێتیی نیشتمانیی كوردستان دادەنرێت بۆیە ئێمەوەك مەكتەبی ڕێكخستن پشتگیری و پشتیوانیی تەواوتان دەكەین لە پێناوی پشخستنی زیاتری ئەم سایتە راستگۆیە.
جارێكی تر پیرۆزە و بەهیوای سەركەوتن
مەكتەبی ڕێكخستنی یەكێتیی نیشتمانیی كوردستان

print

 125 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*