سەرەکی » راپۆرت » هه‌ڕه‌شه‌ی‌ به‌رده‌وامی‌ هه‌ردوو رێكخراوی‌ داعش‌و ئه‌لقاعیده‌

هه‌ڕه‌شه‌ی‌ به‌رده‌وامی‌ هه‌ردوو رێكخراوی‌ داعش‌و ئه‌لقاعیده‌

ئێدمۆند فیتۆن براون

و: كوردەوان محەمەد سەعید

نه‌ته‌وه‌ یه‌كگرتووه‌كان لیژنه‌ی‌ تایبه‌تی‌ هه‌یه‌ بۆ چاودێری‌ كردن‌و به‌دواداچوونی‌ رێكخراوه‌ تیرۆریستییه‌كانی‌ وه‌ك داعش‌و ئه‌لقاعیده‌‌و هه‌موو ئه‌و گروپ‌و لایه‌نانه‌ش كه‌ سه‌ر به‌و رێكخراوانه‌ن یان په‌یوه‌ندییان پێیانه‌وه‌ هه‌یه‌. ئێدمۆند فیتۆن براون رێكخه‌ری‌ تیمی‌ تایبه‌ت به‌ شیكاری‌‌و چاودێری‌ كردنی‌ سزاكانی‌ سه‌ر به‌ نه‌ته‌وه‌ یه‌كگرتووه‌كان راپۆرتێكی‌ پیشكه‌شی‌ په‌یمانگای‌ واشنتۆن بۆ سیاسه‌تی‌ خۆرهه‌ڵاتی‌ خواروو كردووه‌‌و تیایدا باس له‌ شێوازی‌ كاری‌ لیژنه‌كانی‌ نه‌ته‌وه‌ یه‌كگرتووه‌كان ده‌كات دژی‌ ترۆر‌و هه‌روه‌ها باس له‌و مه‌ترسیانه‌ش ده‌كات كه‌ تا ئێستا‌و به‌رده‌وام رێكخراوه‌ تیرۆریستییه‌كان له‌سه‌ر جیهانی‌ دروستی‌ ده‌كه‌ن. ئه‌مه‌ی‌ خواره‌وه‌ پوخته‌یه‌كه‌ له‌ راپۆرته‌كه‌ی‌ ئێدمۆند.
ئێدمۆند له‌ راپۆرته‌كه‌یدا ده‌ڵێ: تیمی‌ پشتیوانی‌ شیكاری‌‌و چاودێری‌ كردنی‌ تایبه‌ت به‌ رێكخراوی‌ ئه‌لقاعیده‌ پێكهاتووه‌ له‌ 10 پسپۆڕ له‌ 10 وڵاتی‌ ئه‌ندامی‌ نه‌ته‌وه‌ یه‌كگرتووه‌كان‌و باره‌گا‌و شوێنی‌ كاری‌ تیمه‌كه‌ش له‌ نیویۆركه‌، ئه‌م تیمه‌ یارمه‌تی‌ ئه‌نجومه‌نی‌ ئاسایشی‌ نێوده‌وڵه‌تی‌ ده‌دات له‌ رێگه‌ی‌:
هه‌ڵسه‌نگاندنی‌ ئه‌و هه‌ڕه‌شانه‌ی‌ هه‌ردوو رێكخراوی‌ ده‌وڵه‌تی‌ ئیسلامی‌‌و ئه‌لقاعیده‌ له‌سه‌ر جیهان دروستی‌ ده‌كه‌ن‌و شه‌ش مانگ جارێك راپۆرتی خۆیان به‌رز ده‌كه‌نه‌وه‌، ساڵی‌ جارێكیش راپۆرت له‌ باره‌ی‌ بزوتنه‌وه‌ی‌ تاڵیبانه‌وه‌ به‌رز ده‌كاته‌وه‌.
كۆكردنه‌وه‌ی‌ زانیاری‌ ورد له‌ وڵاتانی‌ ئه‌ندامه‌وه‌ له‌ باره‌ی‌ كه‌س‌و لایه‌نه‌كانی‌ سه‌ر به‌ ئه‌لقاعیده‌ .
ئاماده‌كردن‌و پێشكه‌ش كردنی‌ راسپارده‌ی‌ پێویست بۆ گرتنه‌به‌ری‌ رێوشوێنی‌ گونجاوی‌ تایبه‌ت به‌ سه‌پاندنی‌ سزا به‌سه‌ر ئه‌و لایه‌نانه‌دا، سزاكانیش سیانن، ته‌جمید كردنی‌ قه‌واڵه‌ بانكییه‌كان، قه‌ده‌غه‌ كردنی‌ سه‌فه‌ر‌و رێگرتن له‌ كڕینی‌ چه‌ك.
بۆ به‌هێز كردن‌و باشتر به‌ڕێوه‌بردنی‌ ئه‌م ئه‌ركانه‌ تیمی‌ پشتیوانی‌ شیكاری‌‌و چاودێری‌ كردن هه‌ماهه‌نگی‌‌و هاوكاری‌ ده‌بێت له‌گه‌ڵ وڵاتانی‌ ئه‌ندام‌و نێردراوه‌كانی‌ نه‌ته‌وه‌ یه‌كگرتووه‌كان‌و لایه‌نه‌ په‌یوه‌ندیداره‌كانی‌ وه‌ك ئینته‌رپۆل، رێكخراوی‌ فڕۆكه‌وانی‌ نێوده‌وڵه‌تی‌ مه‌ده‌نی‌‌و رێكخراوه‌ی‌ گومرگی‌ جیهانی‌. جگه‌ له‌وه‌ش تیمه‌كه‌ ده‌ستكراوه‌یه‌‌و ده‌توانێ راوێژ له‌گه‌ڵ ده‌زگا هه‌واڵگری‌‌و ئه‌منییه‌كانی‌ وڵاتانی‌ ئه‌ندام بكات، تیمه‌كه‌ هاوكاری‌ ده‌زگاكانی‌ نووسینگه‌ی‌ به‌ره‌نگاربوونه‌وه‌ی‌ تیرۆر‌و به‌ڕێوه‌به‌رایه‌تی‌ به‌ره‌نگاربوونه‌وه‌ی‌ تیرۆر‌و به‌شدار له‌ ستراتیژی‌ نه‌ته‌وه‌ یه‌كگرتووه‌كانی‌ تایبه‌ت به‌ به‌ره‌نگاربوونه‌وه‌ی‌ تیرۆر ده‌كات.
هه‌روه‌ها تیمی‌ پشتیوانی‌ شیكاری‌‌و چاودێری‌ كردن ناوبه‌ناو‌و به‌ شێوه‌ی‌ وه‌رزی‌ كۆبوونه‌وه‌ له‌گه‌ڵ فه‌رمانده‌‌و به‌ڕێوه‌به‌رانی‌ ده‌زگا هه‌واڵگرییه‌كان‌و ده‌زگاكانی‌ ئاسایشی‌ تایبه‌ت به‌ به‌ره‌نگاربوونه‌وه‌ی‌ تیرۆر له‌ وڵاتانی‌ جیاجیا ده‌كات، ئه‌وه‌ش وه‌ك به‌شێك له‌ ئامانجه‌كانی‌ نه‌ته‌وه‌ یه‌كگرتووه‌كان له‌ پێناو به‌هێز كردنی‌ هاوكاری‌ نێوان هه‌موو ئه‌و لایه‌نانه‌ی‌ به‌شداری‌ له‌ به‌ره‌نگاربوونه‌وه‌ی‌ تیرۆردا ده‌كه‌ن.
گرنگترین روودا‌و‌و گۆڕانكارییه‌كانی‌ ئه‌م دواییانه‌ په‌یوه‌سته‌ به‌ تێكشكانی‌ رێكخراوی‌ ده‌وڵه‌تی‌ ئیسلامی‌ له‌ رووی‌ سه‌ربازییه‌وه‌، كه‌ له‌ مانگی‌ ئاداری‌ 2019 گه‌یشته‌ دوا قۆناغ‌و ئه‌نجامی‌ ئه‌و هه‌موو شه‌ڕو پێكدادانه‌ش ژماره‌یه‌كی‌ زۆر خه‌ڵك ئاواره‌ بوون‌و كه‌وتنه‌ ناو ئۆردوگاكانه‌وه‌، له‌به‌ر ئه‌وه‌ هه‌نگاوی‌ گرنگی‌ دواتر گرنگیدان بوو به‌ ئاسته‌نگ‌و كێشه‌ مرۆییه‌كان.
رووداوێكی‌ دیكه‌ی‌ گرنگی‌ ئه‌م دواییانه‌ ته‌قینه‌وه‌كانی‌ سریلانكا بوو له‌ رۆژی‌ جه‌ژنی‌ مه‌سیحییه‌كاندا، ته‌قینه‌وه‌كان سێ كه‌نیسه‌‌و سێ هۆتێلی‌ گرانبه‌هایان له‌ كۆڵۆمبۆی‌ پایته‌خت كرده‌ ئامانج‌و چه‌ند ته‌قینه‌وه‌یه‌كی‌ بچووكی‌ دیكه‌ش به‌ دوایاندا هات‌و سه‌ره‌نجام 259 كه‌س كوژران كه‌ 25 كه‌سیان بیانی‌ بوون، ئه‌م رووداوه‌ باشترین به‌ڵگه‌یه‌ له‌سه‌ر ئه‌وه‌ی‌ رێكخراوی‌ داعش له‌ هه‌یكه‌لی خۆیدا له‌ مه‌ركه‌زیه‌ت ده‌رده‌چێت، چونكه‌ رێكخراوه‌كانی‌ ده‌ره‌وه‌ كه‌ هه‌مان ئایدیۆلۆژیایان هه‌یه‌‌و سه‌رسامن به‌ داعش‌و له‌ ناوخۆی‌ سریلانكا دروست بوون كاره‌كه‌یان ئه‌نجام داوه‌‌و پێشتر داعش ئاگاداری‌ كرده‌وه‌ تیرۆریستییه‌كه‌ نه‌بووه‌.

مه‌ترسی‌ تیرۆر له‌ عیراق‌و سوریا
راسته‌ له‌ رووی‌ سه‌ربازییه‌وه‌ داعش له‌ عیراق‌و سوریا تێكشكاوه‌، به‌ڵام هێشتا كۆنترۆڵ كردنی‌ بارودۆخی‌ ئه‌منی‌ له‌و دوو وڵاته‌ به‌ ته‌واوی‌ سه‌ری‌ نه‌گرتووه‌‌و پرۆسه‌ی‌ ئاوه‌دان كردنه‌وه‌ی‌ دوای‌ شه‌ڕو وێرانكارییه‌كانیش زۆر به‌ شێنه‌یی به‌ڕێوه‌ ده‌چێت. ئه‌وه‌ش زانراوه‌ كه‌ داعش له‌ دوای‌ ئه‌و تێكشكانه‌ی‌ له‌ سوریا هه‌وڵ ده‌دات خۆی‌ له‌گه‌ڵ دۆخه‌كه‌دا بگونجێنێت‌و له‌سه‌ر ئاستی‌ پارێزگاكان ژێر به‌ ژێر كار بۆ ئه‌وه‌ ده‌كات، له‌ نزیكترین ده‌رفه‌تدا دووباره‌ سه‌ر هه‌ڵبداته‌وه‌، به‌ تایبه‌ت ناوچه‌كانی‌ باكووری‌ خۆرئاوای‌ سوریا خه‌ڵكی‌ په‌ڕگیر‌و توندڕه‌وی‌ زۆر تێدایه‌، راپۆرتیكیش باس له‌وه‌ ده‌كات له‌ كۆی‌ 40 هه‌زار چه‌كداری‌ رێكخراوی‌ ده‌وڵه‌تی‌ ئیسلامی‌ زیاتر له‌ نیوه‌یان هێشتا ماون‌و نه‌كوژراون.
هه‌ر له‌ سوریا هه‌ردوو گروپی‌ ده‌سته‌ی‌ رزگاری‌ شام‌و پاسه‌وانانی‌ دین كه‌ هاوپه‌یمانی‌ رێكخراوی‌ ئه‌لقاعیده‌ن، هێشتا چالاكن، ئه‌وانیش كه‌م نین، چونكه‌ به‌ ته‌نیا ده‌سته‌ی‌ ته‌حریری‌ شام 12 بۆ 15 هه‌زار چه‌كداری‌ هه‌یه‌‌و شه‌ڕی‌ سه‌ره‌كیشیان دژی‌ هێزه‌كانی‌ حكومه‌تی‌ سوریایه‌، گروپی‌ پاسه‌وانانی‌ دینیش ژماره‌ی‌ چه‌كداره‌كانیان به‌ نزیكه‌ی‌ سێ هه‌زار‌و 500 بۆ پێنج هه‌زار چه‌كدار مه‌زه‌نده‌ ده‌كرێت، كه‌ له‌ ئیدلب‌و ده‌وروبه‌ی‌ خۆیان قایم كردووه‌. كێشه‌ی‌ سه‌ره‌كی‌ عیراق‌و شام له‌وه‌دایه‌، له‌ رووی‌ سیاسییه‌وه‌ ناجێگیر‌و نائارامه‌‌و رێكخراوه‌ تیرۆریستییه‌كانیش ئه‌و بۆشاییه‌ وه‌ك هه‌لێك ده‌قۆزنه‌وه‌.
مه‌ترسییه‌كی‌ دیكه‌ی‌ داعش ئه‌وه‌یه‌ ئه‌گه‌ر بتوانێ خۆی‌ رێك بخاته‌وه‌، ره‌نگه‌ هێرشه‌كانی‌ بگوازێته‌وه‌ بۆ ده‌ره‌وه‌‌و له‌ هه‌ندێك شوێن كرده‌وه‌ی‌ تیرۆریستی‌ ئه‌نجام بدات، پێشبینی‌ نه‌كرا‌و‌و چاوه‌ڕوان نه‌كراو بێت، چونكه‌ پێشتریش ره‌فتاری‌ له‌م جۆره‌ له‌ داعش‌و له‌ ئه‌لقاعیده‌ش بینراوه‌، بۆ ئه‌نجامدانی‌ كرده‌وه‌ی‌ له‌و جۆره‌ش له‌ وڵاتانی‌ جیاجیا، داعش سه‌رچاوه‌ی‌ دارایی هه‌یه‌‌و مه‌زه‌نده‌ ده‌كرێت دارایی داعش له‌ نێوان 100 بۆ 300 ملیۆن دۆلار بێت، جگه‌ له‌وه‌ش رێكخراوی‌ ده‌وڵه‌تی‌ ئیسلامی‌ له‌ عیراق وه‌به‌رهێنانی‌ هه‌یه‌‌و هه‌ندێك پڕۆژه‌ی‌ ئابووری‌‌و بازرگانی‌ هه‌یه‌‌و سوودیان لێ وه‌رده‌گرێت، وه‌ك كۆمپانیاكانی‌ ئاڵۆگۆڕی‌ دراو.
رێكخراوی‌ ده‌وڵه‌تی‌ ئیسلامی‌ له‌ ناوخۆیدا، كێشه‌ی‌ جێگره‌وه‌ی‌ خه‌لیفه‌ كوژراوه‌كه‌یان هه‌یه‌، هه‌رچه‌نده‌ له‌ دوای‌ كوشتنی‌ ئه‌لبه‌غدادییه‌وه‌ رایانگه‌یاند، ئه‌بو ئیبراهیم ئه‌لقرشی‌ جێگه‌ی‌ ده‌گرێته‌وه‌‌و ده‌بێته‌ خه‌لیفه‌ی‌ داعش، دوای‌ ده‌ستنیشان كردنی‌ ئه‌لقرشی‌ وه‌ك خه‌لیفه‌ هه‌ڵمه‌تێكی‌ پڕوپاگه‌نده‌ی‌ رێكخست گوایه‌ كۆمه‌ڵێكی‌ زۆر كه‌ له‌ سینا‌و سۆماڵ‌و به‌نگلادیش‌و پاكستان‌و یه‌مه‌ن ویلایه‌تی‌ خوراسانن به‌یعه‌تیان داوه‌ته‌ خه‌لیفه‌ی‌ تازه‌.

مه‌ترسییه‌كانی‌ ئه‌لقاعیده‌
هه‌واڵی‌ كوژرانی‌ حه‌مزه‌ی‌ كوڕی‌ ئوسامه‌ بن لادن له‌ مانگی‌ ئۆكتۆبه‌ری‌ رابردوودا بڵاو بۆوه‌، ئێستاش سه‌ركرده‌ی‌ رێكخراوی‌ ئه‌لقاعیده‌ كه‌ ئه‌یمه‌ن زه‌واهیرییه‌ ته‌ندروستی‌ باش نییه‌، ئه‌م دوو رووداوه‌ ده‌مانگه‌یه‌نێت به‌و رایه‌ی‌ پێشبینی‌ بكه‌ین كه‌ ئه‌بو محه‌مه‌د ئه‌لمیسری‌ جێگه‌ی‌ ئه‌یمه‌ن زه‌واهری‌ بگرێته‌وه‌‌و ببێته‌ سه‌ركرده‌ی‌ رێكخراوی‌ ئه‌لقاعیده‌. بابه‌تێكی‌ گرنگیش هه‌یه‌ ده‌بێ ئاماژه‌ی‌ پێ بكرێت، ئه‌ویش ئه‌وه‌یه‌ كه‌ رێكخراوی‌ ئه‌لقاعیده‌ به‌ پارێزه‌وه‌ مامه‌ڵه‌ له‌گه‌ڵ لایه‌نی‌ داراییدا ده‌كات‌و دارایی زیاتر بۆ كاروباری‌ ئیداری‌‌و كرێ خه‌رج ده‌كات، به‌ڵام گروپی‌ دیكه‌ هه‌ن كه‌ سه‌ر به‌م رێكخراوه‌ن وه‌ك پاسه‌وانانی‌ دین له‌ ئیدلبی‌ سوریا، مه‌یلیان هه‌یه‌ بۆ ئه‌نجامدانی‌ كرده‌وه‌ی‌ تیرۆریستی‌ له‌ ده‌ره‌وه‌، واته‌ له‌ وڵاتانی‌ جیاجیا، به‌ڵام ئه‌م گروپه‌ش ئێستا ده‌ستی‌ گیراوه‌‌و به‌هۆی‌ فشاری‌ سه‌ربازییه‌وه‌ جموجۆڵی‌ بۆ ناكرێت.
یه‌كێك له‌و وڵاتانه‌ی‌ تا ئێستاش مه‌ترسی‌ زۆری‌ تیرۆری‌ له‌سه‌ره‌‌و جێگه‌ی‌ نیگه‌رانییه‌، ئه‌فغانستانه‌ كه‌ تا ئێستاش رێكخراوی‌ ده‌وڵه‌تی‌ ئیسلامی‌ كرده‌وه‌ی‌ تیرۆریستی‌ تێدا ئه‌نجام ده‌دات‌و هه‌موو قورساییه‌كیشیان له‌ ویلایه‌تی‌ خوراسانی‌ ئه‌فغانستانه‌، ئه‌م گروپه‌ جیا له‌ داعشه‌كه‌ی‌ عیراق‌و سوریا كار ده‌كات‌و كاریگه‌ریشیان زۆره‌، ته‌نانه‌ت له‌ قوتابخانه‌‌و زانكۆكانی‌ كابوڵیش رێكلام‌و پڕوپاگه‌نده‌ بۆ خۆیان ده‌كه‌ن.
پێشتر ئه‌و گروپه‌ له‌ ویلایه‌تی‌ نانگه‌هار تووشی‌ شكستێكی‌ گه‌وره‌ بوو، بنكه‌‌و باره‌گاكانیان له‌و ویلایه‌ته‌ له‌ده‌ست دا، ئێستاش ئه‌و رێكخراوه‌ مه‌زه‌نده‌ ده‌كرێت ته‌نیا دوو هه‌زار‌و 500 چه‌كداری‌ هه‌بێت، زۆربه‌شیان له‌ ویلایه‌تی‌ كونار جێگیرن، له‌گه‌ڵ ئه‌وه‌شدا هه‌ر جێگه‌ی‌ مه‌ترسین‌و به‌رده‌وامیش خه‌ڵكی‌ تازه‌ راده‌كێشنه‌ ناو رێكخراوه‌كه‌یانه‌وه‌، ره‌نگه‌ تواناكانی‌ خۆی‌ په‌ره‌ پێ بدات‌و رۆژێك وای‌ لێ بێت له‌ ده‌ره‌وه‌ی‌ ئه‌فغانستانیش كرده‌وه‌ی‌ تیرۆریستی‌ ئه‌نجام بدات.
هه‌ر له‌ ئه‌فغانستان گروپی‌ په‌ڕگیری‌ زۆر هه‌ن كه‌ هاوپه‌یمانی‌ ئه‌لقاعیده‌‌و تاڵیبانن، جگه‌ له‌وه‌ش رێكخراوی‌ ئه‌لقاعیده‌‌و بزوتنه‌وه‌ی‌ تاڵیبان تا ئێستاش په‌یوه‌ندییه‌كی‌ پته‌ویان هه‌یه‌‌و پێكه‌وه‌ كار ده‌كه‌ن، ئه‌لقاعیده‌ دارایی بۆ تاڵیبان فه‌راهه‌م ده‌كات‌و له‌به‌رامبه‌ریشدا تاڵیبان ئه‌لقاعیده‌ ده‌پارێزێت، وڵاتانی‌ دراوسێی‌ ئه‌فغانستانیش له‌وه‌ ده‌ترسن مه‌ترسی‌ ئه‌و گروپ‌و رێكخراوانه‌ سنووره‌كان تێپه‌ڕێنن.

مه‌ترسی‌ تیرۆر له‌ خۆرئاوای‌ ئه‌فریقا
گروپی‌ نوسره‌ت ئه‌لئیسلام وئه‌لموسلمین كه‌ هاوپه‌یمانی‌ رێكخراوی‌ ئه‌لقاعیده‌یه‌، گه‌وره‌ترین مه‌ترسی‌ له‌ ناوچه‌ی‌ خۆرئاوای‌ ئه‌فریقادا دروست كردووه‌‌و هه‌ڕه‌شه‌یه‌ بۆ سه‌ر ئه‌و وڵاتانه‌ی‌ لاوازن، ئه‌م گروپه‌ خۆی‌ له‌ به‌شداری‌ كردن له‌ شه‌ڕه‌كاندا ده‌پارێزێت‌و زیاتر هاوكاری‌ گروپه‌كانی‌ دیكه‌ی‌ ناوچه‌كه‌ ده‌كات، وه‌ك رێكخراوی‌ ده‌وڵه‌تی‌ ئیسلامی‌ له‌ بیابانی‌ گه‌وره‌ له‌ مالی‌‌و نه‌یجه‌ر، هه‌روه‌ها گروپی‌ ئه‌نسار‌ولئیسلام له‌ بۆركینا فاسۆ. ئه‌م گروپانه‌‌و ئه‌ندامه‌كانیان مه‌ترسییان بۆ سه‌ر وڵاتانی‌ ئه‌وروپاش كردووه‌، چونكه‌ زۆربه‌ی‌ وڵاتان تووشی‌ كێشه‌ ده‌بن كاتێك تیرۆریستێكی‌ بیانی‌ ده‌گه‌ڕێته‌وه‌ بۆ ئه‌و وڵاته‌ ئه‌وروپاییه‌ی‌ لێی‌ داده‌نیشێت‌و له‌و وڵاته‌دا كرده‌وه‌ی‌ تیرۆریستی‌ ئه‌نجام ده‌دات، وه‌ك هێرشانه‌ی‌ له‌م دواییانه‌دا عوسمان خان‌و سودیش عه‌مان له‌ بریتانیا ئه‌نجامیان دا، ژماره‌یه‌كی‌ زۆریش له‌و تیرۆریسته‌ بیانیانه‌ی‌ گه‌ڕاونه‌ته‌وه‌ بۆ وڵاتانی‌ ئه‌وروپا، به‌ بڕیاری‌ دادگا بۆ ماوه‌یه‌كی‌ كه‌م زیندانی‌ كراون‌و هێنده‌ نابات ئازاد ده‌كرێن، له‌ دوای‌ ئازاد كردنیشیان كێشه‌كان زیاتر ده‌بن‌و زۆر وڵات كێشه‌كه‌ی‌ بۆ چاره‌سه‌ر ناكرێت.
له‌ كۆتاییدا هه‌ردوو رووداوی‌ تێكشكانی‌ رێكخراوی‌ ده‌وڵه‌تی‌ ئیسلامی‌‌و كوژرانی‌ ئه‌بوبه‌كر به‌غدادی‌ دڵخۆشكه‌رن، به‌ڵام دوای‌ ئه‌وه‌ كۆمه‌ڵێك كێشه‌ی‌ دیكه‌ سه‌ر هه‌ڵده‌ده‌ن كه‌ ره‌نگه‌ مامه‌ڵه‌ كردن له‌ ته‌كیان ئاسان نه‌بێت، یه‌ك له‌و كێشانه‌ باس له‌وه‌ ده‌كات كه‌ 25 هه‌زار چه‌كداری‌ بیانی‌ كه‌ له‌ وڵاتانی‌ جیاجیاوه‌ چوونه‌ته‌ ناو داعشه‌وه‌‌و شه‌ڕیان بۆ كردووه‌، تا ئێستاش ماون، سه‌رباری‌ ئه‌وه‌ خێزانی‌ ئه‌و چه‌كدارانه‌ش دیسان كێشه‌یه‌كی‌ دیكه‌یه‌. له‌به‌ر ئه‌وه‌ كۆمه‌ڵی‌ نێوده‌وڵه‌تی‌ رووبه‌ڕووی‌ مه‌ترسی‌ ده‌بێته‌ له‌سه‌ر ئاستی‌ كورت مه‌ودا‌و مه‌ودای‌ مامناوه‌ند‌و درێژ مه‌وداش، ئه‌گه‌ر هه‌ڵه‌یه‌ك بكرێت له‌ مامه‌ڵه‌ كردن له‌گه‌ڵ بابه‌ته‌كه‌دا، چونكه‌ بارودۆخه‌كه‌ له‌ باره‌ بۆ ته‌شه‌نه‌ كردنی‌ دیارده‌ی‌ په‌ڕگیری‌‌و توندڕه‌وی‌‌و بڵاوبوونه‌وه‌ی‌ زیاتری‌ فیكری‌ جیهادی‌.

معهد واشنطن لسیاسه‌ الشرق الا‌دنی‌

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*