سەرەکی » دۆسێ » شەڕو پێكدادانە خێڵەكییەكان لە سودان سەرهەڵدەدەنەوەپەڕە 24

حكومەت هێز رەوانەدەكات

شەڕو پێكدادانە خێڵەكییەكان لە سودان سەرهەڵدەدەنەوە

سودان 300 گالیسكەی سەربازی شەڕكەر رەوانەی ویلایەتی باشووری دارفۆر دەكات، دوای روودانی پێكداهەڵپژانی نەژادی كە دەیان كەس بوونە قوربانی.

بەپێی ئاژانسە خۆجێییەكان لە سودان ئەو هێزانەی رەوانەی ویلایەتی باشووری دارفۆر كراون، لەلایەن عەبدولڕەحیم حەمدان دقلۆ جێگری فەرماندەیی هێزەكانی پشتیوانی خێراوە سەركردایەتی دەكرێن.
دقلۆ لەو بارەیەوە میدیاكانی وڵاتەكەی راگەیاندووە، هێزەكانیان توانیویانەی زیاتر لە دە هەزار سەر ئاژەڵی دزراو لەكاتی پێكداهەڵپژانەكاندا بگێڕنەوە.

بڵاوەپێكردنی ئەو هێزانە لە دوای فەرمانی عەبدولفەتاح بورهان سەرۆكی ئەنجومەنی سەروەریی راگوزەریی سودانەوە بوو بۆ گێڕانەوەی رژێم و یاسا بۆ ئەو بەشانەی وڵاتەكە كە پێكداهەڵپژانی حێڵەكییان بەخۆوەبینی.

شەڕەكە لەنێوان عەرەبی رزەیقات و ئەفریقییەكانی فەلاتە بووە بەهۆی ناكۆكی لەسەر ئاژاەڵ.

پێكداهەڵپژانە خوێناوییەكان سەدان كەسییان لەو ناوچانە ناچار كرد ماڵوحاڵی خۆیان بەجێبهێڵن.

بەپێی ئاژانسی رەسمی سودان (سونا)، «بورهان بەیاننامەیەكی دەركردووە و باسی لە رووداوی پێكداهەڵپژانە خێڵەكییەكان كرد كە لە لەم ماوەیەی دواییدا لە چەند ناوچەیەكی جیاجیای وڵاتەكە رویاندا و رایگەیاندبوو، وڵات بە قۆناغێكی راگوزەری ناسكدا تێدەپەڕێت و پێویستە هەموان بە گیانی نیشتمانییەوە هەڵسوكەوت بكەن».

ئاژانسەكە دەڵیت»سەرۆكی ئەنجومەنی سەروەریی راگوزەریی لە سودلان فەرمانی بە هەموو هێزە نیزامییەكان كردووە، بەرپەرچی هەموو ئەوانە بدەنەوە كە ئاسایشی هاووڵاتیان تێكدەدەن و بەبێ‌ دوو دڵی هەوڵەكانیان بۆ پاراستنی یاسا بخەنەگەڕ».

هەر لە چوارچێوەیەدا رۆژنامەی (الانتباهە) لەسەر پێگەی تایبەتی خۆی لەسەر تۆڕی ئینتەرنێت لە زاری لیوا دەقلۆوە بڵاویكردبۆوە»هێزەكانیان ناوچەكە بەجێناهێڵن تا چەك لە خێڵە بەشەڕهاتووەكان دانەماڵن».
ئەم هەنگاوە دوای كوژران و برینداربوونی 79 كەس بوو لە پێكداهەڵپژانەكانی نێوان خێڵی نۆبە و بەنی عەمر لە ویلایەتی كسلا لە خۆرهەڵاتی سودان.

ئەو پێكداهەڵپژانانە لە دارفۆر و چەند ناوچەیەكی تری سودان، بە رووبەڕووبوونەوەیەكی گەورە بۆ حكومەتی راگوزەریی دادەنرێت كە بەدەست تەنگژەی ئابورییەوە دەناڵێنێت و لەئێستادا هەوڵ بۆ بەرگرتن لە بڵاوبوونەوەی ڤایرۆسی كۆرۆنا دەدات لە وڵاتەكە.

ململانێكانی ناوچەی دارفۆری خۆرئاوای سودان، بۆ ماوەی 17 ساڵ دەچێت بەردەوامن.

هەر لەو چوارچێوەیەدا و بەهۆی پێكداهەڵپژانی گروپە خێڵەكییەكانی بنە عامر و نوبە لە شاری كسلای سنوری خۆرهەڵاتی سودان، دەیان كەس كوژران و برینداربوون.

لە بەیاننامەیەكدا لیوا روكن بابەكر هەمەد حاكمی سەربازی ویلایەتی كسلا رایگەیاندبوو، شارەكە كە نزیكەی 800 كیلۆمەتر لە خەرتومی پایتەختەوە دوورە لە 7ی ئایاری 2020، پێكداهەڵپژانی خێڵەكی لەنێوان هەردوو خێڵی بەنی عامر و نوبەوە بەخۆوەبینی و دواتر پێكداهەڵپژانەكان كۆنترۆڵكران.

بە وتەی هەمەد»لەدوای كۆنترۆڵكردنی رەوشەكە لە سەرلەبەیانی 8ی ئایاردا سەرلەنوێ‌ پێكداهەڵپژانەكان سەریانهەڵدایەوە و ژمارەیەك برینداربوون و چەند ماڵێكیش سوتێنران.
بە گوێرەی هەواڵ، 3 كەس لە خێڵی بەنی عامر كوژران و ژمارەی بریندارانی نێوان هەردوولاش گەیشتە 79 كەس.

لە وتارێكدا كە لەڕێی تەلەفیزیۆنەوە بڵاوكرایەوە، فەریق عەبدولفەتاح بورهان سەرۆكی ئەنجومەنی راگوزەریی، داوای لە هێزە نیزامییەكان كردبوو» بەرپەرچی هەموو ئەوانە بدەنەوە كە دەیانەوێت ئاسایش و سەقامگیریی هاووڵاتیان دەشێوێنن»، بەێ‌ ئەوەی ناوی هیچ لایەنێك بهێنێت.

بورهان رایگەیاندبوو»ئەنجومەنی سەروەریی و وەزیران، و دەزگای راپەڕاندنی دەوڵەت بە نیگەرانییەوە دەڕوانێتە ئەو رووداوە خێڵەكیانە، چونكە ئەو پێكداهەڵپژانە خێڵەكیانە دەبنە مایەی لەگەڕخستنی ئەركەكانی ماوەی راگوزەریی».

لە كۆتایی قسەكانیدا سەرۆكی ئەنجومەنی دەسەڵاتی راگوزەریی سودان، جەختی لەسەر «پێویستی یەكڕیزی لەدژی یاخیوان و لێدان لە دژمنانی شۆڕشی گەورەی گەل»كردبۆوە.
رووداوەكە لە شەڕی نێوان سێ‌ كەس لە كۆگایەكدا دروستبوو وەك شایەتحاڵەكان باسیان كردبوو.

ئاژانسی (فرانس پرێس) لە زاری یەكێك لە هاووڵاتیانی شاری كسلاوە بڵاویكردبۆوە»شەڕەكە لەنێوان كەسێكی سەر بە خێڵی بەنی عامر و كەسێكی تری خێڵی نوبەوە دەستیپێكرد، بەڵام هەریەك لەو دوانە كەسانی تری سەر بە خێڵەكەیان بۆ نێو شەڕەكە بانگكرد».

ئەو شایەتحاڵە دەڵێت»پۆلیس وەك هەوڵێك بۆ بڵاوەپێكردنی گردبوونەوەی هەردوولا، بۆمی دەنگی و تەقەی بە ئاسماندا كرد».

خێڵی بەنی عامر سەر بە گروپە خێڵەكانی (البجە)یە كە لە خۆرهەڵاتی سودان نیشتەجێن، لەكاتێكدا خێڵی نوبە لە گروپە خێڵەكییە كۆچەرەكانن لە ناوچە شاخاوییەكانی نوبەی ناوەڕاستی سودان كە ناكۆكی نێوان حكومەت و یاخیبوان بەخۆوەدەبینن».

لە مانگی حوزەیرانی ساڵی رابردوو شەڕوپێكدادان لەنێوان ئەو دوو خێڵە لە شاری بۆرتسودان لە كەناری دەریای سور رویدا، دواتر لە مانگی ئابدا پێكدادانەكان لەنێوانیدا سەریانهەڵدایەوە، بەر لەوەی لەلایەن دەسەڵاتدارانەوە سنورداربكرێن.

لە 6ی ئایاۆری 2020، بەهۆی ناكۆكییەكی خێڵەكی لە باشووری دارفۆری خۆرئاوای وڵاتەكە، 30 كەس كوژران.

لەو دەمەی حوكمڕانی عومەر حەسەن بەشیر سەرۆكی پێشووی وڵاتەكە لە مانگی نیسانی رابردوو روخا، سودان ماوەیەكی راگوزەریی بەخۆدەبینێت كە ماوەكەی سێ‌ ساڵە.

print

 79 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*