سەرەکی » وتار » ئازاد ئیبراهیم ‌ » كازمی،خەمی عیراق پێش ویلایەتی دووەمپەڕە 3

كازمی،خەمی عیراق پێش ویلایەتی دووەم

لە واقیعدا ئەوە پێی دەوترێت بەرپرسیارێتی! كە مستەفا كازمی سەرۆك وەزیرانی عیراق سەعات شەشی بەیانی خۆی بكات بە دەزگا و دائیرەكانی بەسرە و چەند بەرپرسێك لە پۆستەكەی دووردەخاتەوە.

هەرگیز لەگەڵ ئەو لۆژیكە كۆك نیم بەم جووڵەی سەرۆك وەزیرانە بڵێت (هەڵكوتانەسەر دەزگاكانی بەسرە لەبەیانیدا)!، بەڕاستی دەبێت چیتر ئەو دیدگایە بگۆڕدرێت كە پێمانوابووە كازمیش وەك هەر سەرۆك وەزیران و بەرپرسێكی دیكەی عیراق دەستپێكێكی خێرای هەیە و لە دواجاردا باڵۆنی قووەت و تاقەی ئەویش دادەمركێتەوە و گەرموگوڕییەكەی جارانی نامێنێت، بەپێچەوانەوە ئێستا دەركەوتووە كازمی بێباكە لەوەی دەتوانێت ویلایەتی دووەمیش بباتەوە یان نا.

كاتێك كازمی دەست دەبات بۆ پۆستگەلێك لە بەسرە و بەڕێوەبەرەكانی دوور دەخاتەوە، بەڵگەی ئەوەیە كازمی ناڕەحەتبوونی هیچ لایەنێكی لەلا گرنگ نییە و خەمی ئەوەشی نییە لەخولی داهاتوودا كێی لە دەور دەمێنێتەوە و كێیتریش دەوری چۆڵ دەكات و پشتیوانیی ناكات بۆ خولێكی نوێ.

تەنها یەك شت لای كازمی گرنگە ئەویش پشیوانیی ئەمریكایە كە تا چ ئەندازەیەك ئاو دەكەنە بەر بێڵی سەرۆك وەزیران.

ئەمریكییەكانیش بەتەواوی كۆكن لەگەڵ جووڵەكانی مستەفا كازمی و پشتیوانیی تەواوی دەكەن. گۆڕینی تەواوی پاسەوانەكانی كازمی لە هاووڵاتی عیراقییەوە بۆ مارێنزی ئەمریكی پەیامێكی گرنگە بۆ كازمی كە نەوەستێت لە خزمەتكردن و چاكسازیی و هەرگیز ترسی ئەوەی نەبێت لەدواوە! بیپێكن.

سەرەتای دەستبەكاربوونەكانی (كازمی)مان وەها دەخوێندەوە هەمان جووڵە و تەقلیدی سەرۆكەكانی ناو مێژووی عیراقە، بەڵام بەڕاستی دەبێت ئەو واقیعە فەرامۆش نەكەین بەو پێیەی روونە پۆستەكانی پارێزگای بەسرە چۆن دانراون و كێ دایناون، ئەوە ئازایەتی دەوێت سەرۆك وەزیران هاتووە بەبێ ئاوڕدانەوە لە زۆرینەی شیعەی بەسرە هەر كەسێك لەلای ئەو پەسەند نەبووە دووری خستۆتەوە.

وەك روونە لە عیراقدا ئەگەر پێكهاتەیەك پشتگیریی كەسێك نەكات بۆئەوەی پۆستێك و بەرپرسیارێتییەك وەربگرێت، هەرگیز وەریناگرێت، كازمی بەبێ ترس لەم واقیعە دەست دەبات بۆ ئازارەكانی جەستەی عیراق و بەویستی خۆی فرێیان دەداتە دەرەوە. نەبوونی ترسی كازمی لەو واقیعە تەوافوقییەی لە عیراقدا هەیە، تێگەیشتنە لە راستییەك ئەویش ئەوەیە كە ئەو دوو شتەی پشتیوانی كازمی دەكات زۆر گەورەترە لە شیعە و سوننە و كورد، ئەو دوو شتەش ئیرادەی شەخسیی كازمی و پشتیوانییەكانی ئەمریكایە.

7ی ئایاری 2020 ئەنجومەنی نوێنەرانی عیراق كۆبۆوە و 266 پەرلەمانتار دەنگیان بە كازمی دا، كازمی لە سێ رۆژی دەستپێكی كاركردنیدا چەند هەنگاوێكی گرنگی نا لەوانە كێوماڵكردنی داعش و سەردانیكردنی دەزگایەكی خانەنشینی بەغدا و سەرزەنشتكردنی «عیماد»ی برای، هەروەها هەڵوەشانەوەی كابینەكەی عادل عەبدولمەهدی و خانەنشینكردنیان، دامەزراندنی لیژنەیەك بۆ هەڵبژاردنی پێشوەختەو ….هتد.

ئەم دەسپێكە وا لێكدرایەوە كازمی تەنها لەپێناو جێ پێ قایمكردنی خۆی ئەو هەوڵانەی دەست پێكردووە، هەر ئەوكات «سەدر» تەنها سەد رۆژی دانا بۆ سەرۆك وەزیران و دوای سێ رۆژیش لەدەست بەكاربوون، خۆپیشاندان و ناڕەزایەتی شەقامەكانی چەند پارێزگایەكی شیعەنشینی گرتەوە، ئێستا كازمی بەردەوامە لە چاكسازیی و جووڵەكانی، هەم دەیەوێت تەواوی بەربەستەكان بەسەد رۆژەكەی موقتەدا سەدریشەوە تێپەڕێنێت و هەم تەوافوقی پێكهاتەكانیش، لەگەڵ ئەوەشدا ئەمریكا رێگەی لەبەردەم كازمی دا تەختكردووە چۆن دەیەوێت بەوشێوەیە ئەسپی تواناكانی تاو بدات.

لەگۆشەنیگای هەوڵەكانی كازمییەوە بۆ گۆڕانكاریی لە عیراق و كەمكردنەوەی گەندەڵی، ئەوە رووندەبێتەوە كە ئێستا كازمی خەمی عیراق و عیراقییەكانێتی پێش ئەوەی هەوڵ بدات بۆ گەیشتن بە ویلایەتی دووەمی خۆی، كازمی نەك ترسی نییە لەوەی بگاتەوە ویلایەتی دووەم، بەڵكو رەنگە بەم خزمەتەی ئێستا دەیكات، دەنگ و پشتیوانیی زۆرینەیەكی ناوخۆیی لە پێكهاتە جیاوازەكان و تەواوی ویستی ئەمریكایش بەدەستبهێنێت، ئەوكات ئاسانترین شت بۆ كازمی كە بتوانێت بەدەستیبهێنێت پۆستی خولی دووەمی سەرۆك وەزیرانی دەبێت و هیچ بەربەستێكیش نابێت.

ئەوەی ئەمریكییەكان ئەمڕۆ بۆ مستەفا كازمی دەكەن، بۆ هیچ سەرۆك وەزیرانێكی عیراقیان نەكردووە لەدوای ساڵی 2003 و ئەنجومەنی حوكمەوە، لەڕاستیدا هەم كازمی بۆخۆی كەسایەتییەكی تایبەتە و دەیەوێت لەناو گلەیی و هاتوهاواری لایەن و پێكهاتە عیراقییەكاندا كاری خۆی بكات و جیاواز دەربكەوێت، هەم ئەمریكییەكانیش پێیانخۆشە كازمی ئەو ئیرادەیەی هەیە و دوورە لە سیاسەتی بەرەیی ناوچەكە و وڵاتانی ئیقلیمی.
كازمی باش گوێ لە ئەمریكاییەكان دەگرێت كە بەهەمان نەفەس و ژیریی گوێ بۆ وڵاتانی دراوسێی عیراق ناگرێت.

بەشێكی زۆری لایەنە سیاسییەكانی عیراق ئێستا لەدژی مستەفا كازمی مانۆڕی سیاسییان خستۆتە كار، بەڵام لەواقیعدا پێناچێت چیتر هیچ بازوویەك بەو ئاسانییە بتوانێت بازووی كازمی لەسەر مێزی دەسەڵات بشكێنێتەوە مەگەر ئەمریكییەكان خۆیان بیانەوێت.

وەك میدیا و ماڵپەڕە عیراقییەكان ئاماژەی پێدەدەن، مستەفا كازمی بەم زوانە رۆژێك بۆ هەڵبژاردنی پێش وەختە دیاری دەكات، هەر وەك ئەو میدیایانە دەڵێن بۆ هەڵبژاردنی داهاتووی عیراق كازمی لیستێكی ئامادەكردووە كە بەشدارئی هەڵبژاردن دەكات و خۆی دەبێتە سەرۆكی لیستەكە، ئەگەر تائەوكات كازمی بەردەوام بێت لەسەر ئەم سیاسەتەی ئێستا، ئەوا هەڵبژاردنی داهاتووی عیراق هەڵبژاردنێكی توندو پڕ ململانێی سیاسی دەبێت، هەردوو بەرەی دۆستەكانی كازمی و نەیارەكانیشی لەئێستاوە شەقامی سیاسی عیراقیان شەق كردووە و دەبینرێت.

ئەگەر كازمی تا هەڵبژاردنی داهاتوو بەردەوام بێت لە سیاسەت و ویستی دژایەتی گەندەڵكاران و بەرژەوەندییەكانیان و بەم شێوەیە خەمی باشتركردنی عیراق و نەهێشتنی گەندەڵی و …هتد، ببێتە خەمێكی گەورە و پێش خەمی خۆی بێت بۆ گەیشتنەوە بە ویلایەتی دووەم، ئەوا بەدڵنیاییەوە عیراقییەكان سەرەڕای چەندان ئەزموونی تاڵی پێشووتر، دەنگ دەدەن بە سیاسەت و لیستەكەی كازمی و وەرگرتنەوەی ویلایەتی دووەمیش بۆ كازمی ئاسان دەكات.

 277 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*