سەرەکی » ئاراستە » یادی شەهید جه‌عفه‌ری حه‌مه‌ده‌روێش

یادی شەهید جه‌عفه‌ری حه‌مه‌ده‌روێش

دڵشاد تاقانه‌

پێشمه‌رگه‌ په‌روه‌ر
له‌ چاوی ماری نه‌ده‌گه‌ڕاوه‌، هه‌تا بڵێی ئازا و جوامێر كوڕی ته‌نگانه‌ی پشت پێبه‌ستن، فه‌رمانده‌یه‌كی پێشمه‌رگه‌په‌روه‌ر، هه‌میشه‌ داكۆكیكاری مافی ئه‌وان بوو له‌ هه‌مبه‌ر سه‌ركرده‌ و به‌رپرسه‌كان، بۆیه‌ زۆرینه‌ی پێشمه‌رگه‌ براده‌ر و هاوده‌می دڵسۆزی بوون، كه‌س نه‌بوو پێیه‌وه‌ په‌یوه‌ستنه‌بێ و خۆشی نه‌وێ، چونكه‌ كه‌سایه‌تیه‌كی گونجاوبوو، هه‌ركه‌سیش جارێك لێی كشابێته‌وه‌ ئێستا به‌خۆیدا ده‌چته‌وه‌ خۆزگه‌ ده‌خوازێ وانه‌بوایه‌.

كوڕه‌ هه‌ژار
هاوكوفی كوڕه‌ هه‌ژار و ڕه‌نجده‌ران هه‌میشه‌ ده‌م به‌پێكه‌نینی خۆشیبه‌خش، گوێی له‌ هه‌مووان ڕاده‌گرت هه‌رگیز خۆسه‌پێنه‌ر و بێزاركه‌رنه‌بوو، له‌گه‌ڵ هه‌موو ئاسته‌كانی هۆشیاری و بێئاگایی یا پابه‌ندان و سه‌ره‌ڕۆكان ده‌گونجا، هه‌مووان گوێڕایه‌ڵیان ده‌كرد كه‌سایه‌تیه‌كی به‌كێش و جێگای ڕێزی هه‌مووان بوو.

كۆپته‌رشكێن
له‌ ڕواڵه‌تدا وا ده‌رده‌كه‌وت شل و شه‌په‌ت، وات ده‌زانی بێ تاقه‌ت و بێباكه‌ له‌ وه‌ستان و ڕۆیشتنیدا، به‌ڵام بۆ شه‌ڕ گورجوگۆڵ و كه‌موێنه‌ بوو جێمتمانه‌ی هه‌موو فه‌رمانده‌كانی سه‌رووی خۆی بوو.

ساڵی 1983 له‌ شه‌ڕی بێتواته‌دا گولله‌ ئاڕبیجی له‌ كۆپته‌ردا و به‌ په‌له‌پڕوزێ گه‌یشته‌وه‌ سه‌ربازگه‌ی چارقوڕنه‌.

ده‌سته‌ی هێرش
به‌شداریی زۆرینه‌ی هه‌ره‌زۆری داستانه‌كانی هێزی پێشمه‌رگه‌ی كوردستانی كردووه‌ له‌ سه‌رتاسه‌ری ناوچه‌كان، له‌ هه‌رهه‌موویان ده‌سته‌ی هێرش و هه‌ره‌پێشه‌وه‌بووه‌.‌ وه‌ك فه‌رمانده‌ سه‌رپه‌رشتی چه‌ندین شه‌ڕی سه‌ختی كردووه‌ له‌ گوندی قۆڕیتان و دۆڵی خه‌له‌كان و …تاد.

جارێك گولله‌ به‌سه‌ر لای چه‌پی سینگی- واتا سه‌ردڵی كه‌وت، ده‌یوت: ئه‌ی پێتان ناڵێم نایبڕێ!.

له‌ ماوه‌ی پێشمه‌رگایه‌تییدا سێجار برینداربووه‌.

خۆشگۆ
جگه‌ له‌ گه‌وره‌یی و شایسته‌یی، كه‌سێكی خۆشبه‌زم و شاییزانێكی كه‌مهاوتابوو، به‌گۆچان سه‌رچۆپی ده‌گرت.

هه‌رده‌م وره‌ به‌رز و نه‌شێواوی یه‌كه‌م ته‌قه‌ تا دوا ته‌قه‌ی شه‌ڕ بوو، له‌ شه‌ڕی كۆپته‌ر له‌ سه‌ربانی واڵا ڕێزه‌ فیشه‌كی زنجیری بیكه‌یسی له‌ كۆپته‌ردا به‌تاڵ ده‌كرد، ئه‌وانه‌ی نه‌یانبینیوه‌ له‌وه‌یه‌ به‌خه‌ون و فیلم بێته‌ به‌رچاویان، به‌ڵام جه‌عفه‌ر كه‌سایه‌تییه‌ قاره‌مانه‌ ڕاسته‌قینه‌كه‌بوو هیچ كه‌سێك نكۆڵی پێ لێ ناكرێ.

قائید یان ده‌روێش
قائید بوویته‌ ناسناوی تایبه‌ت به‌خۆی، له‌ناو برا پێشمه‌رگه‌كانی پڕ به‌واتای ناسناوه‌كه‌ی فه‌رمانده‌یی ده‌كرد، زۆربه‌ی پێشمه‌رگه‌كان هێز و وزه‌ی ئازایه‌تیان لێ وه‌رده‌گرت، ته‌نانه‌ت ئه‌وانه‌ی ته‌قه‌یان نه‌دیتبوو به‌پشتیوانی ئه‌و چاویان ده‌كرایه‌وه‌. له‌ خۆشه‌ویستییه‌وه‌ به‌ده‌روێشیش بانگ ده‌كرا.

فه‌رمانده‌ی پارتیزان
له‌ دوای ئه‌نفالیش له‌خاكی سۆتماكی ده‌شتی كۆیه‌ی بێ ئاوه‌دانی، فه‌رمانده‌ی‌ پێشمه‌رگه‌ پارتیزانه‌كانی كرد، دووه‌مین سه‌رتیپی 93ی كۆیه‌بوو له‌ دوای كاك ڕه‌هبه‌ری سه‌یدبرایم كه‌ خه‌ڵكی كۆیه‌ سه‌رپه‌رشتی ئه‌و تیپه‌ی كردبێ.

له‌ ڕاپه‌ڕینی 1991 شه‌ڕی ئازادكردنی یه‌كه‌مجاره‌ی كه‌ركوك به‌ دۆشكه‌ی كۆپته‌ر له‌سه‌ر خاكی بابه‌گوڕگوڕ خوێنی پژایه‌ سه‌ر بیره‌ نه‌وته‌ كوردیه‌كان و تا ئێستاش بڵێسه‌یه‌كی سووری به‌ئاگری بابه‌گوڕگوڕ و به‌ نه‌ورۆز، داوه‌.

له‌ دواڕسته‌ی دوان و یادمانی قائید

تۆ پێشمه‌رگه‌ی پارتیزانی
تۆ فه‌رمانده‌ی هاوڕێمانی
بێ نازوفیز گه‌لێ ساده‌ی
قاره‌مانیت هه‌رئاماده‌ی
چاو له‌گومله‌ش ناتروكێنی
وره‌ی دوژمن ده‌ڕوخێنی
نه‌ده‌شێوێیت نه‌ده‌پرسی
هه‌رگیز له‌ مردن ناترسی
ئێستا ده‌سته‌ی شه‌هیدانی
هه‌روای له‌ناو دڵ و گیانی

شه‌هید جه‌عفه‌ر حه‌مه‌ ده‌روێش، پێشمه‌رگه‌و فه‌رمانده‌یكی ئازاو قاره‌مان بوو، اڵی 1959 له‌ دایكبووه‌، ده‌رچووی ئاماده‌یی پیشه‌سازییه‌.

ساڵی 1981 بووه‌ به‌ پێشمه‌رگه‌ و سێجار برینداربووه‌، به‌شایسته‌یی خۆی چه‌ندین پله‌ی وه‌رگرتووه‌، له‌وانه‌: فه‌رمانده‌ی تیپی 93ی كۆیه‌، فه‌رمانده‌ی پارتیزانه‌كانی كۆیه‌.

ساڵی 1991 له‌ ئازادكردنی شاری كه‌ركوكدا، شه‌هیدكرا.

print

 621 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*