سەرەکی » وتار » عه‌بدوڵڵا عه‌باس » ئینسان ئەم گیاندارە عەجیبە

ئینسان ئەم گیاندارە عەجیبە

( ١ )کۆرۆنا گوڵی مەجلیس ..!
ئەم ماوەیە لە زۆربەی هەستان و دانیشتنی رۆژانەماندا و بێ ئیختیاری ئارەزووی خۆمان، بۆ ماوەیەکی نادیاری دی (کۆرۆنا) و بەڵاکانی باسی سەرەکی بەیەک گەیشتنەکانمان دەبێ و هەتا ئەگەر باسی دی بەسەراهات بەجۆرێ لەجۆرەکان پەیوەندی بەوەوە دەبێ.
لەم رۆژانەدا، لەگەڵ چەند برایەک دانیشتبووین ، قسە لەسەر درێژبوونەوەی ماوەی تەنگ هەڵچنین بە ئارامی رۆژانەی خەڵک، بەهۆی ئەو بەڵایەوە، کلیلی کردنەوەی دەرگای قسەکردن بوو، باسی ئەوەکرا کە بنەڕەتی گرێداریی پەتاکەو ، سەرقاڵیی بێگەیشتنە ئەنجام،لە لایەنە بەرپرسیارەکانی پاراستنی تەندروستی نێو دەوڵتیەوە لەوەوەهاتووە،کە خەوشیی تواناو بێ هێزی بەرنامەیان سەلما ، چونکە دەرکەوت، چارەکێکی ئەوەی چالاکی لایەنی ژیان بە ئارەزووە لاوەکیەکانیانەوە خەریکی کردون ، بۆنموونە بەئیمزایەک بەملیار دۆلار بۆ کرینی یاریزان و مەیدانی تۆپین لە پەیوەندی نێو دەوڵەتاندا بەئاسانی دابین دەکرێ، کەچی سەرهەڵدانی کۆرۆنا دەریخست درۆیانکرد بایەخ بە ئارامی درێژخایەنی ژیانی ئینسان لەلایەنی زانستی یەوە زامنکراوە! ، دەیان کۆبوونەوەو بیروڕا گۆڕینەوە لەبانقی دراوی نێودەوڵەتی ئینجا تۆزی لەزامنی خەرجی دروستکردنی دەرمانی چارە سەر نزیکیان ئەکاتەوە .

( ٢ ) ئینسان ..ماڵی زل و دێ وێران ..!
بەرامبەر ئەم بەڵایەی سەرتاپای دنیای گرتۆتەوە دەرکەوت ئینسان ئەو هێزە کەون بڕە نییە لەناو خۆیاندا گروپ گروپ خۆیان بەسەریەکا هەڵدەکێشن ..!!
هەمووجار کە قسە میژووییەکەی ( کارل مارکس – ئینسان بەهادارترین سەرمایەیە لە وجوودا ) لەقسەوباسدا لەگەڵ شاعێری نەمر (شێرکۆ بیکەس ) ئەهاتە بیر، بەتەوسەوە ئەیوت : بەڵام مارکس دیاری نەکردوە : کام ئینسان ، یان چۆن ئینسانێ بەهادارترین سەرمایەیە ؟ ئاخر ( هێتلەرو مۆسۆلۆنی و فرانکۆو ئەتاتورک ….هتد ) یش ئینسان بوون ..!
جارێ، یەکەم نا تەبایی زەق لە سەر ئەرزی واقع بەنیسبەت ئینسانەوە هەیە هەر لەسەرەتای مرۆڤایەتیەوە ، ئەوەیە دەستەیەک، یان لەهەندێ قۆناغی میژوودا ( نەفەرێک ) لە بەشەر ، زووربەی هەرەزۆری ئینسان، وەک رانەمەڕ ئیجبار ئەکات وەک کۆیلە مل کەچی ئیرادەی (فەردیی ) ئەو بن و فەرعۆنی بەناو دامەزرێنەری شارستانیەتی میسر تاقە نموونە نییە لەمیژوودا ئەم راستی یەی سەلماندوە ..!!
میژوو هەڵپەکانی (فیرعەون) و (زوولقەڕنەین) و (ئەسکەندەرە) گەورەکان و (قەیسەرە)دەست ڕۆشتوەکانی نووسیوەتەوە چۆن ئەمسەروو ئەوسەری بازنەی زەویان تەیکردوە بە لەشکرو چۆن لەهەرکوێەک بارو بارەگایان خستبێ ، زووربەی رەعیەتەکانیان بە زەبری قامچی خستۆتە رەتانەوە، تەلاری باڵایان پێ بیناکردون تائیستا هەرهەموو ئەو دەستکەوتانە بەناوی ئەو (تاک نەفەرا نەوە ) تۆمارکراون .
پرسیار ئەوەیە : ئینسانێ وەک (فیرعەون – بۆ نموونە ) چۆن ئیرادەی خۆی بەسەر ئەو هەموو ملیونان ئینسانانەی دیدا فەرزکرد؟ میژوو پەندو بیرۆکەی زۆری تیایە باسی ئیرادەو بەهێزی و هەروەها بێ هێزی ئینسان دەکەن، بەدەگمەن نەبێ، ئەو ئینسانانە لەمیژوودا کەمن کە شکۆیان بە ئیرادەی عەدالەت دە ستکەوتبێ،رووداوەکانی رەوتی بەشەریەت زۆر حیکایەتی دوولایەنیەکەی عەدالەت و زوڵمی ئینسان بەرامبەر ئینسان ئەگێڕنەوە ، لەروودانی بەڵا کاندا دەرکەوتووە کە : ئینسان ، بەتەنیا وەک ئینسان بەسەر سەلامەتی بژی ئاسانە، بەڵام ئینسانی هەڵوێست و بیناکردن بێ کارێکی سەختە ..! چونکە لەو حاڵەدا پێویستی بە چوارینەی : راهاتنە بەهاوسەنگی وزەی رۆح و ژیری و جەستەو سۆزی ئینسانی، هاوسەنگی ئەم چوار وزەیە وەک هەندێ داستانی رەوتی ژیانی بەشەریەت بۆمان ئەگێڕنەوە، پێویستی بەفیکرە،زۆرینەی ئینسانیش وەک تەبیعەتی ئینسانیی خۆی چونکە قوڵبوونەوەی فیکریی بەلاوە سەختە، پەنای بۆ خۆ خەریککردن بردوە بەکارەوە، تا لە پاڵە پەستۆی فیکرکردنەوە بەدووربێ و، لەوانەیە هەمیشە، گەڕانی ئینسان بەدوای نموونەیەکی بەهێز لەناوخۆیاندا لەو ئارەزوەوە هاتبێ .
کتێبە پیرۆزەکان ( قورئان و ئینجیل بۆ نموونە ) لەوەسفی تەبعی ئینساندا لەم راستی یە نزیکن ، لەئیسلامدا سیفەتی ئینسانی بیناکار ئیمانە، بێ ئەوە گیاندارێکی بەرەڵای لەبەهێزبووندا بەڵایەو لە بێ هێزبوونیا دەسەپاچەو ڕاڕایە، لەکتێبی مەسیحیشدا لەو هەڵسەنگاندنە نزیکە : ئینسان کە ئیمان بەرچاوی رووناک دەکاتەوە، رووناکی کەون و نمەکی ئەرزە …! کە ئیرادەی ئیمانی نەما ئەبێتە نیچیری شەڕ .

(٣ ) تاقانەگیانداری زمانزان ..!
ئەو پەندەتان بیستوە دەڵێ (قسەیەت ..قسەدەبڕێ )، کەباسێ دەنووسی دەکرێ باسێک بێتە بیرت و بچێتە سەر ئەسڵی باسەکە، مادەم باس، باسی وجوودو کاریگەری ئینسانە، ئەم رووداوە حەقیقەتەم هاتەوە بیر کە برادەرێکی هونەرمەندی کەرکوکی بۆی گێڕامەوە و وتی :
( مامۆستای دەرسی قەواعیدی زمانی عەرەبیمان لە قوتابخانەی ناوەندی کەرکوک بەکەسایەتیەکی قسەخۆش ناسرابوو هەندێجاریش هەڵوێستی سەرنج راکیشی نا ئاسایی لێ ئەوەشایەوە، رۆژێ لەکاتی دەرس وتنەوەدا هەستی کرد دوو لەقوتابیەکانی پۆلەکەمان چرپە چرپیانە ،قسەی دەرسەکەی بڕی و چووە سەریان و لێپرسین : ئەوەچیتانە ؟ یەکێکیان هەستاو وتی : مامۆستا ئەوە پێم ئەڵێ حەیوان …!! مامۆستا زۆر ئاسایی بە پێکەنینەوە پێی وت : هەرئەوە ؟ کورم عاجزبوونی ناوێ مەگەر تۆ نەتبیستوە ( انسان حیوان ناطق ) دەی دەی گوێی مەدەرێ کوڕم ( انت حیوان هو حیوان …حتی مدیر المدرسە حیوان ناطق..) نەمانزانی چۆن قسەکەگەیشتبوە مودیر ، رۆژی دوایی ناردبووی بەدوایدا و گلەیی لێکردبوو چۆن دەبێ وەسفی مودیر بە حەیوان بکات لەبەردەم قوتابیەکاندا ؟ ئێمە دەرسی جوغرافیامان هەبوو ئەونەمانزانی مامۆستای قەواعد خۆی کرد بە ژووراو روخسەتی لە مامۆستای جوگرافیا خواست و رووی لە ئێمەکردو ئەم خوتبە کورتەی بەعەرەبی بۆداین :
_ قلنا لکم فی درس السابق ان الانسان حیوان ناطق ، فانتم کلکم حواوین و مدیر المدرسە ایضا … حتی عبدالسلام عارف حیوان ناطق …!!!!)

•دوا ویستگە :
وا نایەتە بەرچاوتان هەندێجار کە خۆر ئاوا ئەبێ ، وایەتە بەرچاو بەرەو ژوور هەڵدەکشێ ؟ / جەلالەدینی رۆمی

 570 جار بینراوە