سەرەکی » مانشێت » لاهور شێخ جەنگی لە رێگەی ڤیدیۆکۆنفرانسەوە لەگەڵ نوێنەرانی یەکێتی لە وڵاتانی دەرەوە کۆبووەوە

لاهور شێخ جەنگی لە رێگەی ڤیدیۆکۆنفرانسەوە لەگەڵ نوێنەرانی یەکێتی لە وڵاتانی دەرەوە کۆبووەوە

ئێوارەی ئەمڕۆ یەکشەممە ١٧ـی١ـی٢٠٢١، لاهور شێخ جەنگی هاوسەرۆکی یەکێتیی نیشتمانیی کوردستان لە رێگەی ڤیدیۆکۆنفرانسەوە بەشداریی کۆنفرانسی مەکتەبی پەیوەندییەکانی یەکێتیی نیشتمانیی کوردستانی کرد و لەگەڵ نوێنەرانی یەکێتی لە وڵاتانی دەرەوە کۆبووەوە.
لەو ڤیدیۆکۆنفرانسەکەدا کە هەریەک لە دکتۆر سۆران جەمال تاهیر لێپرسراوی مەکتەبی پەیوەندییەکان و سەرکەوت محەمەد غەفور لێپرسراوی بۆردی پەیوەندییەکانی دەرەوە و فریاڵ عەبدوڵڵا لێپرسراوی بۆردی پەیوەندییە هەرێمایەتییەکان و نوێنەرانی یەکێتی لە وڵاتانی دەرەوە ئامادەیبوون، گفتوگۆ کرا دەربارەی دواین گۆڕانکاری و پێشهاتەکانی هەرێمی کوردستان و عیراق و ناوچەکە و رۆڵی یەکێتیی نیشتمانیی کوردستان لە هاوکێشە سیاسییەکاندا.
لە سەرەتای ڤیدیۆکۆنفرانسەکەدا لاهور شێخ جەنگی وتەیەکی پێشکەش کرد و تیایدا بەرچاوڕوونی دا بە هەڤاڵانی نوێنەرایەتییەکانی دەرەوە لە بارەی شێوازی کاری حزبی لە دوای کۆنگرەی چوارەم و رۆڵ و پێگەی یەکێتی بۆ چارەسەرکردنی کێشەکان و خزمەتکردنی کۆمەڵانی خەڵکی کوردستان.
لاهور شێخ جەنگی ئاماژەی بۆ دۆخی کۆرۆنا کرد و رایگەیاند لە دوای کۆنگرە کۆرۆنا رێگر بووە لە کار و چالاکییە حزببیەکان، بەڵام یەکێتی لەو دۆخەشدا دەستەوەستان نەبووە و لە سۆنگەی پەرۆشیمان بۆ میللەتەکەمان و لە کاتی کەرەنتینەدا دەستمانکرد بە هاوکاریکردنی نەخۆشخانەکان و پێشکەشکردنی دەرمان و کۆمەکی پزیشکی و دروستکردنی نەخۆشخانە لە چەند شار و شارۆچکەیەکی هەرێمی کوردستان.
لاهور شێخ جەنگی باسی لە هەوڵەکانی یەکێتی کرد بۆ چارەسەرکردنی کێشەکان لە سەر ئاستی هەرێم و عیراق و پێداگریی یەکێتی دوپاتکردەوە لەسەر گرنگی جێبەجێکردنی سیستمی لامەرکەزیی بۆ پێشکەشکردنی خزمەتگوزارییەکان بە هاووڵاتییان و رایگەیاند لە چوارچێوەی ڕێکەوتنی نێوانمان لەگەڵ پارتی دیموکراتی کوردستان چاوەڕوانی حکومەتی هەرێمی کوردستانین بۆ جێبەجێکردنی لامەرکەزیی دارایی و کارگێڕیی لە هەموو پارێزگاکانی هەرێم.
ئاماژەشیکرد بە سەردانەکانی بۆ بەغدا و دیدار و کۆبوونەوەکانی وەفدی یەکێتی لەگەڵ لایەنە سیاسییەکانی عیراق لە پێناوی چارەسەرکردنی کێشەکان و بەدەستهێنانی رەزامەندیی لایەنەکان و حکومەتی فیدراڵی بۆ دابینکردنی شایستە داراییەکانی هەرێم و تێپەڕاندنی پشکی هەرێم لە پڕۆژەیاسای بودجەی گشتیی عیراق بۆ ساڵی ٢٠٢١.
لە تەوەرێکی تری وتەکانیدا لاهور شێخ جەنگی پلان و بەرنامەی داهاتووی یەکێتی بۆ هەڤاڵان لە نوێنەرایەتییەکانی دەرەوە روونکردەوە، هاوکات سوپاسیکردن کە دڵسۆزانە ئەرکەکانیان جێبەجێکردوە و داواشی لێکردن کە خۆیان ساز و ئامادە بکەن بۆ داهاتوو بە گیانێکی یەکێتیانە کار بکەن بۆ خزمەتکردنی رەوەندی کوردی لە دەرەوە.
لە کۆتاییدا نوێنەرانی یەکێتی لە وڵاتانی دەرەوە باسیان لە کار و چالاکییەکانیان کرد و سەرنج و تێبنییەکانی خۆیان خستە روو، سوپاسی لاهور شێخ جەنگییان کرد کە راشکاوانە بابەتەکانی بۆ روونکردنەوە. هاوکات پرسیار و داواکارییەکانیان ئاراستە کرد و بە گرنگییەوە لە لایەن هاوسەرۆکەوە وەڵام درانەوە.

 

 1,038 جار بینراوە