سەرەکی » کەلتوور » ژن لە دراماكانی كوردساتدا

ژن لە دراماكانی كوردساتدا

لەنجە شێخ عوسمان

وەك دەبینرێت لەماوەی ئەم چەند ساڵەی دواییدا درامای دۆبلاژكراو بەشێوەیەكی بەرچاو هێنراوەتە نێو كەناڵەكانی راگەیاندن و بەهەر هۆكارێك بێت جێی درامای بەرهەمهێنراوی ناوخۆیی گرتووەتەوە. هەندێك لەو كەناڵانەش زۆر نابەرپرسانە كەوتونەتە پەخشی كۆمەڵێك درامای بێ ئامانجی بەلارێدابەری گەنجان و نەوەی تازە پێگەیشتوو، كە فاكتەرێكی بەهێزی پچڕانی شیرازەی كۆمەڵایەتی و سڕینەوەی بەها نەتەوەیی و كلتورییەكانی ئەم كۆمەڵگایەن‌ و بچوككردنەوەی‌ رۆڵی ژنە تەنها لە خۆشەویستی و بەكاڵاكردن و سەرقاڵكردنی بە بیرۆكەی خۆبەكەمزانی و بێ متمانەیی بەرامبەر رەگەزی نێر‌، بێ ئاگا لەوەی كە ژن، دایكە، خوشكە، مامۆستایە، پزیشك و ئەندازیارە، زۆرێك ئەركی گرنگی لە كۆمەڵگەدا دەستخستووە، ناكرێت ئەوەندە لاواز بخرێتە بەر چاو.
بەداخەوە زۆرن ئەوانەی لە بێئاگایی بێت یان بۆ پڕكردنەوەی كاتەكان، پەنا بۆ سەیركردنی ئەم جۆرە درامایانە ئەبەن، لەو نێوەندەشدا رەگەزی مێ زۆرینەی ئەو تەماشاكەرانەن.

لەنێو دیمەنەكانی ئەو درامایانەدا بەئاشكرا دەبینرێت ژن چەندە دەستەوسانەو چۆن بووەتە دیلی حەزە خۆرسكەكانی و هەندێك جار دایكایەتی و گەورەیی خۆی پێ لەناو دەبات، لە دەیان دیمەندا ژن خراوەتە پێگەیەكەوە كە ئەپارێتەوە بۆئەوەی بەبەزەییەوە مامەڵەی لەگەڵدا بكرێت، ژن تەنها وەكو ئامراز پیشان دەدرێت. ئایا هیچ لەم درامایانە سەوز ئەكرێت جگە لە دەرهێنانی دانەبەدانەی بەردی بناغەی ئاكار و نەریتی كۆمەڵایەتی؟. بۆیە هێشتا درەنگ نییە بۆ بەگژداچونەوەی ئەو نابەرپرسیارێتییە و ئەو ژەهرەی بەناوی هونەرەوە دەرخواردی ئەم میللەتە دەدرێت، ناكرێت وەزارەتی رۆشنبیری و لایەنی پەیوەندیدار ئەوەندە بێ خەم و بێ ئاگا بێت. دڵنیام هونەرمەند و بەرهەمهێنی زۆر بەتوانامان هەیە و دەتوانن جێگەی ئەو درامایانە بە درامای ئامانجدار پڕبكەنەوە، ئەگەر بێت و خواستەكە هەبێت و هاوكاری بكرێن.

هەرچەندە زۆرینەی ئەو دراما دۆبلاژكراوانە لە ئامانجی درێژخایەن و دورمەودای نەرێنی زیاتر هیچ نابەخشنە كۆمەڵگا بەتایبەت ژن، بەڵام شایەنی دەستخۆشییە كەناڵی (كوردسات) لەو درامایانەی پێشكەشی كردووە لە هەوڵی پاراستنی بەها مرۆیی و كلتورییەكاندا كەمتەرخەمی نەنواندووە، كۆمەڵە درامایەكی پیشانداوە كە رەنگە هەندێكیان لەرووی چیرۆك و سیناریۆ و دەرهێنانەوە زۆر سەرنجراكێش نەبن، بەڵام كەمترین دەرهاویشتەی خراپی بۆ كۆمەڵگە و خێزانەكان هەبووە و بەشێوەیەكی بەرچاو رۆڵی ژن تێیاندا بەرز راگیراوە، تەنانەت لە زۆربەیاندا ژن كارەكتەری سەرەكییە، بەجۆرێك لەپاڵ ئەركە سروشتییەكەی خۆیدا هێزە شاراوەكەی ناخی بڵێسە دراوە و ئاسمانی دراماكەیان رۆشنكردووەتەوە، بە ئەندازەیەك ئامادەیە گیان و هەموو جوانییەكانی خۆی بكاتە قوربانیی بۆ خێزان و گەل و نیشتیمانەكەی و بەهیچ جۆرێك خۆی پێ كەمتر نەبێت لە باوك و براو هاوسەرەكەی، بەڵكو تا رادەی گیانفیداكردن ئامادەیە بەرگرییان لێ بكات و مامەڵەی ژیرانەو سۆزی زۆری خۆی بۆیان بەهێز و متمانەبونێكی گەورە پیشان بدات. ئەم جۆرە درامایانە هانی كچان و ژنان دەدەن چیتر خۆیان پێ كاڵا نەبێت و بكەونە كێبڕكێی ئەرێنییانە بۆ وەرگرتنی هەموو ئەرك و بەرپرسیارێتییەك و ئازادكردنی فكری خودی ژنە لە بیرۆكەی خۆپێ كەمبوون. ژن داینەمۆی بەردەوامی ژیانی كۆمەڵایەتییە، بۆیە پێویستە هەوڵی زیاتر بدات بۆ گۆڕینی هەر كلتور و دیاردەیەكی نەرێنی لە كۆمەڵگەكەیدا، بەدڵنیاییەوە ئەگەر بیەوێت سەركەوتوو دەبێت.

 

 652 جار بینراوە