سەرەکی » راپۆرت » هاوپەیمانیی كوردستان 40 كاندیدی لە 27 بازنەی هەڵبژاردندا دەبێت

هاوپەیمانیی كوردستان 40 كاندیدی لە 27 بازنەی هەڵبژاردندا دەبێت

راپۆرتی: جێگر خدر

(هاوپەیمانیی كوردستان) بۆ هەڵبژاردنی داهاتووی ئەنجومەنی نوێنەرانی عیراق، بە هەنگاوێكی گرنگ و پڕبایەخ سەیردەكرێت بۆ یەكڕیزیی گەلی كورد و بەدەستهێنانی زۆرترین كورسی بەتایبەتی لە ناوچە دابڕێنراوەكاندا.

(هاوپەیمانیی كوردستان) بەسەرۆكایەتیی لاهور شێخ جەنگی هاوسەرۆكی یەكێتی، لەنێوان یەكێتیی نیشتمانیی كوردستان و بزوتنەوەی گۆڕان بۆ بەشداری لە هەڵبژاردنەكانی ئەنجومەنی نوێنەرانی عیراق، تۆماركراوە.

كوتلەیەكی سیاسیی بەهێز
لەبارەی هاوپەیمانییەكەوە و گرنگیی بۆ هەرێمی كوردستان و دۆزی رەوای میللەتەكەمان لە داهاتووی عیراقدا، ستران عەبدوڵڵا ئەندامی ئەنجومەنی سەركردایەتیی یەكێتی، بە كوردستانی نوێ-ی راگەیاند: رێكەوتنی یەكێتیی نیشتمانیی كوردستان و بزوتنەوەی گۆڕان، لەگەڵ ئەوەی ئارامیی هەڵبژاردن بەدیدەهێنێت و كەشوهەوایەكی لەبار دەڕەخسێنێت، لەوەش زیاتر ئامانجی گەورەتر دەپێكێت، بەتایبەت لە پەیوەندییەكانی هەردوو هێزدا و پوختكردنەوەی هێزە سیاسییەكان بەشێوەیەكی گشتی. جەختیشیكردەوە كە رێكەوتنی یەكێتی و گۆڕان دەبێتەهۆی دروستبوونی كوتلەیەكی سیاسیی بەهێز لە عیراقدا، كە لە ئایندەدا رۆڵێكی گرنگ دەبینێت لە راستكردنەوەی رێڕەوی سیاسی لە كوردستان و عیراقدا.

بەپێی داتاكانی كۆمیسۆن «39 هاوپەیمانی لەنێوان لایەنەكاندا پێكهاتووە، 265 حزبی سیاسیش خۆیان تۆماركردووە، 3523 كاندید هەن، كە 1002 كاندیدیان لەناو هاوپەیمانێتییەكاندان و حزبەكانیش 1634 كاندیدیان هەیە، 887 كاندیدیش سەربەخۆن». تاكە هاوپەیمانیی بەهێز لە كوردستاندا هاوپەیمانیی كوردستانە لەنێوان یەكێتیی نیشتمانیی كوردستان و بزوتنەوەی گۆڕان-دا.

هاوپەیمانیی كوردستان لە 27 بازنەی هەڵبژاردندا كاندیدی هەیە
لای خۆیشییەوە، یاسین حەمەعەلی سەرپەرشتیاری ژووری هەڵبژاردنی بزوتنەوەی گۆڕان، بەكوردستانی نوێ-ی راگەیاند: هاوپەیمانیی كوردستان نزیكەی 40 كاندیدی هاوبەشی لە 27 بازنەی هەڵبژاردندا هەیە و كارە هونەرییەكانمان كۆتایی پێهێناوە و كاندیدەكانمان پێشكەشی كۆمسیۆن كردووە و هیچ كاندیدێكی سەربەخۆمان لە دەرەوەی هاوپەیمانیی كوردستانیشدا نییە. وتیشی: هەردوو لایەن لیژنەیەكی هەماهەنگی پێكدەهێنین، بڕیاریشە لە نزیكترین ماوەدا دانیشتن بكەین و لیژنەكە دەستبەكاربێت.

سەبارەت بە ئامانجی پێكهێنانی هاوپەیمانیی كوردستان-یش، بابەكر دڕەیی هەڵسوڕاوی بزوتنەوەی گۆڕان لە لێدوانێكدا بۆ كوردستانی نوێ، ئاماژەی بەوە كرد كە هاوپەیمانیی كوردستان هەنگاوێكی گرنگ و پێویستی یەكێتی و گۆڕان-ە لەپێناوی لێكنزیكبوونەوەی زیاتر، بەتایبەتی كە ئێستا لە هەموو ئاستەكاندا هەردوو هێز زۆر لێكەوە نزیكن. وتیشی: كاری هاوبەش لەنێوان یەكێتی و گۆڕاندا شتێكی نامۆ نییە، ئەگەرچی جیاوازی فكرییش هەبێت، بەڵام ئێستا كاتی پێكەوەییە بەتایبەت بۆ بەغدا زۆر گرنگە هیچ جیاوازییەك نەبێت، بەوپێیەی بەغدا شوێنێكە هێز و لایەن و خەڵكی جۆراوجۆری تێدایە، كە جیاوازن لە بیركردنەوەدا لەڕووی سیاسی و مەزهەبی و ئایینی و لە چەند ساڵی رابردووشدا چەندین هەڵوێستی دژ بە كوردمان بینیوە، بۆیە ئەم پێكەوەییە و هاوپەیمانی لەنێوان هێزەكاندا زۆر پێویستە و هاوپەیمانیی كوردستانیش لەسەر ئەو بنەمایە پێكهێنراوە.
ئەوەشی خستەڕوو كە سەركردایەتیی یەكێتی و گۆڕان، پلان و بەرنامەی چاكسازییان هەیە، بۆیە ئێستا دەكرێت ئەو نزیكییە بكرێتە دەستپێك بۆ كاری هاوبەشی هەردوو هێز و هەوڵبدرێت فراكسیۆنەكان لە هەموو ئاستەكاندا یەكبخرێن.

״هاوپەیمانیی كوردستان، بڕیارێكی بەرپرسانە بوو״
هەر تایبەت بە گرنگیی هاوپەیمانیی كوردستان، عەدالەت عەبدوڵڵا شرۆڤەكاری سیاسی بۆ كوردستانی نوێ، ئەوەی خستەڕوو كە لەڕووی ستراتیژی و نیشتمانییەوە، هاوپەیمانیی كوردستان، بڕیارێكی سیاسیی بوێرانە و بەرپرسانەیە، لەبەر ئەو هۆكارەی كە ئێستا هەلومەرجێكی دیكە بۆ هەردوولا لەئارادایە، سەرزەمینی سیاسیی هاوپەیمانێتییەكەش كە دەكەوێتە بەغدا بنەمایەكی بابەتی هەیە، بۆیە پێویستە هەموو هێزە كوردستانییەكان لە عیراقدا هاوپەیمان بن. ئەوەشی وت: ئەم هاوپەیمانێتییە، زیانی بۆ هیچ لایەك نییە و هیوادارین دوای هەڵبژاردنیش فراوانتر بكرێت و دەكرێت هاوپەیمانێتییەكە دەرگا بكاتەوە بۆ هاوپەیمانێتیی فراوانتر لە هەڵبژاردنەكانی كوردستانیشدا.

باسی لەوەشكرد كە یەكێتی و گۆڕان، ئەمە یەكەمجار نییە لێكتێگەیشتن و رێكەوتن بكەن، پێشتر رێكەوتننامەی دەباشان كرا، بۆ ئەم هەڵبژاردنەش هاوپەیمانێتییەكەیان بە سەرۆكایەتیی لاهور شێخ جەنگی هاوسەرۆكی یەكێتی، دەچنە نێو پرۆسەی هەڵبژاردنی پێشوەختەی عیراقەوە، كە بۆتە ئومێدێكی گەورە بۆ خەڵكی كوردستان و ناوچە دابڕێنراوەكان.

 479 جار بینراوە