سەرەکی » ئاراستە » قەندیل و ماینەسپییەكە

بیرەوەریی پێشمەرگە

قەندیل و ماینەسپییەكە

سەباح شوكر

لە سەرەتای مانگی نیسان و سەرهەڵدانی بەهار، خەڵكی ناوچە شاخاوییەكانی قەندیل و لادێكانی ئەو سنوورە روودەكەنە كوێستان، هاووڵاتیانی هەردوو گوندی (چۆمە و زەنگەڵین)یش بەهەمان شێوە رودەكەنە بناری قەندیل.

ساڵی 1988 ئێمە كە مەفرەزەیەكی تیپی ئێمە مەفرەزەیەكی تیپی78ی كاروخ بوین بۆ هاوكاری پێشمەرگەی ناوچەكانی تر، لەو سنوورە بووین، بەتایبەت لە چۆمە و زەنگەڵین، ئەو شوێنەش سنووری تیپی74ی باڵەك بوو.

ناوچەكە بەگشتی بنكەو بارەگای هێزەكانی رژێمی لێبوو، رێگەی پەڕینەوەی پێشمەرگەیان گربوو، ئەو پێشمەرگانەی لە سنوورەكانی ترەوە دەهاتن و لەوێوە دەپەڕینەوە بۆ بناری گەندیل و سەر سنوور، هەندێكجار لەو پەڕینەوەیەدا پێشمەرگەی ناشارەزای ناوچە جیاجیان دەكەوتنە بۆسەی رژێمەوە و ئەنفال دەكران.

لە بەر ئەوە ئەو مەفەرەزەیەی ئێمە لەوێ دانراین تا لەكاتی پەڕینەوەدا هاوكارییان بكەین.

ئێوارەیەك، ئەسعەدی برام كە پێشمەرگەی رێكخراوی و دووی كۆمەڵە بوو، بە ماینێكەوە هاتەلامان، دوای تەواوبوونی دیدەنییەكە، ماینەكەی بە جێهێشت و گەڕایەوە لای مەفرەزەكەی خۆیان.

بۆ بەیانییەكەی سەیرم كرد ماینەكە زۆر ماندوو و پۆخڵ و قوڕاوی بوو، شەوی رابردوو پێشمەرگە لە وەرتێ باریان پێ گواستبۆوە، دیارە ماینیش، وەك ئەسپ و هێستر بەهێز نییە، بۆیە بۆیە هەندێك لە وانەی كە رایاندەگرن گرنگی زۆریان پێنادەن، هاوسەرەكەم وتی: (با خاوێنی بكەینەوە ئەم ماینە سودی بۆ مان دەبێت).

ئەوەبوو خاوێنمانكردەوە، ماین گوڕێكی هاتەوە بە بەرداو رۆژ بە رۆژ جوان و چوستوچالاك دەبوو، لەو سەوزاییە باشتر دەلەوەڕا و لە كەشی خۆیدا بوو.

رۆژانەش (سوڵتان دێهاتی) لە رێگەی جیهازەكەی تیپی 74ی باڵەكەوە هەواڵی شەڕ و هێرشی جەیشی عیراقی لە گەرمیان و شوێنەكانی تر بۆ وەردەگرتین.

ئەو كاتە ئەو ماینە ببوە تەتەرو بارهەڵگری پێشمەرگە، بەتایبەت بۆ گواستنەوەی تەقەمەنی و ئازوقە بۆ سەر شاخ.

ئێوارەیەك گەڕامەوە ماڵەوە، هاوسەرەكەم وتی: ماینەكە نەخۆشەو لای پشتەوەی برینداربووە، هەر بمبینێ داوای چارەسەرم لێدەكات، منیش بە پێكەنینەوە وتم: دیارە قسەت لەگەڵ كردووە، وتی: نا، بەس لە منداڵییەوە لەگەڵ ئاژەڵ ژیاوم هەست بە ئازاریان دەكەم. كاتێك چومە سەیری و ماینەكەم بەو وەزعەوە دی، دیاربوو لای رانی پشتەوەی بریندار بوو مێش و مێشوولە دەوریاندابوو، كرمێ ببوو، داوام لە سوڵتان دێهاتی كرد چارەیەكی بكا، ئەو پێی باش بوو لەو وەزعە ناخۆشە ماینەكە لە كوێستانەكانی قەندیل بەڕەڵابكەم، بەڵام هاوسەرەكەم دژی بەرەڵاكردنی بوو.

ئیتر رۆژ بە رۆژ برینەكەی خراپتر دەبوو، ویژدانمان ئاسودە نەبوو، بڕیارمدا بە ماینەوە روو لە رەوەندەكانی كوێستانی(بنبەرسۆرن) بكەین بەڵكو چارەیەكی بكەین، خۆشبەخاتە یەكێك لە رەوەندەكان بەناوی (مام خدر) دەرمانێكی گیراوەی دامێ و وتی: رۆژی سێجار برینەكەی پێ خاوێنبكەوە چاك دەبێتەوە.

منیش رێنماییەكانی مام خدرم جێبەجێدەكرد، هەستم دەكرد رۆژ بە رۆژ برینەكەی ساڕێژتر دەبێت، زۆرمان بەلاوە خۆشبوو، ماوەیەك كارمان پێنەكرد تا هاتەوە باردۆخی پێش نەخۆشكەوتنی، جا ئیتر كە پێشمەرگە داوای دەكرد بۆ ئیش، خۆم لەگەڵیان دەچوم بۆ ئەوەی زۆر ماندوو نەبێت.

رۆژێك ئەسعەدی برام هاتەوە و داوای ماینەكەی كرد بیباتەوە دۆڵی ئاڵانە بۆ سنووری تیپی 19ی كۆڕەك، لەگەڵ هاوسەرەكەم زۆمان پێناخۆشبوو دەستبەرداری ماینەكە ببین، هۆگری یەكتری ببوین، پشوویەكی باشی دابوو لای ئێمە، بەڵام چارنەبوو، ئەسعەد بردییەوەو ئیتر جارێكی دی ماینەبۆرم نەبینییەوە، ئەو ماینەی كە هاوڕێیەتی مرۆڤەكانی زۆر پێخۆشبوو، هاوكارێكی باش و پێویستی پێشمەرگە بوو، ماوەیەكی زۆر ببووینە ئاشنای یەكتری، ئیتر بردیان و بۆ دواجار ماڵئاواییمان لێی كرد.

 377 جار بینراوە