سەرەکی » وتار » ستران عه‌بدوڵڵا » بە هەموو جۆرەكانی یەكێتیبوونپەڕە 2

بە هەموو جۆرەكانی یەكێتیبوون

بە تیلەی چاوی رابردووی سەروەری، بە چاوی تیژی داهاتووی چارەنووس، بە برژانگی پارێزگاری لەم باسكە بەهێزەی كوردایەتی نوێباو لە سەدەی بیستویەكدا.

1-
یەكێتی… هەموو هەقیانە شانازی بەم تۆمارە مێژووییەوە بكەن، بەم روباری خوێنەی دیجلە و فوراتی كوردەواری و كوردایەتییەوە بنازن. لەم تابلۆ گەورەی خەبات و تێكۆشانی 46 ساڵەدا خوێنی شەهید ئەستێرەی سوور، ئاڵایە، گۆچانەكەی مام دارعەسای دەست و پەنای حەسانەوەیە، كلێتەی سەری پێشمەرگەكانی كۆمەڵە و جامانەی سەری تێكۆشەرانی دێرین، میدالی سەرسینگی دامەزرێنەران و كاسكێتی سەری سەركردەكانی ناوەوەی وڵات و تەگبیری مەفرەزە سەرەتاییەكانی بادینان و شارەزوور و قوربانی فەیلییەكان و پارتیزانەكانی دوای ئەنفال و كیمیاباران، ئەمانە هەمووی دیمەنی شۆڕشی نوێن. لەم ئەلبومەدا كادرە بزۆز و بژوێنەكانی چەپ و كادرە سەرڕاستەكانی كوردایەتیش هەن، نامیلكەی ناو كەشكۆڵی پێشمەرگە و شارلستۆن لەپێی رێكخستنەكان و كچانی رووسوری نامەی چوكلێتی و نووسینی سەر دیواری زیندانەكان و دیواری لاكۆڵانەكانیش هەن: كەم ژیان و كەڵ ژیان و كرێكارێكی هەژاری كوردم و هیچ پەشیمان نیم لەوەی كە كردم و یا كوردستان یان نەمان و یا كەركوك و خانەقین یان تاماوین دەجەنگینیش هەیە، لەم تابلۆیەدا توڵەیتڵە هەیە، كانی موراد و زەڵێ و دەباشان، خانووە قوڕەكان و سەنگەری ئاوەدان و گوندی خاپوور كراوی پورە مەنیج و پلكە بەسێ و میمكە غەزێم و یا عایشێ و داك میرخاس هەیە.

2-
لەم دیمەنە چڕوپڕەدا ئێزگەكە و دیبلۆماسی و مفاوەزاتە حەیاتەكە و ئاسوودە بن و نەبەردی و نەبەزین و نەوەستان هەیە. ئەنجومەنی گوند و ئەنجومەنی نیشتمانی و نوێنەران و باڵەخانەی حكومەتاتی و گردبوونەوە و مانگرتن و «لێرە ناڕۆم هەیە»

3-
لەم دیمەنەدا دەخیلەی رەنجی رۆژهەڵات، باكوور و رۆژئاڤا هەیە، كە میوانی باشوور نین و خاوەن ماڵن، رەوتی دیموكراتی و نیشتمانیی عیراق هەیە كە نابێ لێڵی شۆڤێنیزم و تایفەگەری عیراقی قەت بەرچاومان لێڵ بكات، ئەزموونی شۆڕشگێڕی جەنگی گەلی جیهانی و جەنگەڵەكانی رۆژهەڵاتی ناوەڕاست هەیە لە خەباتیان بۆ داد و یەكسانی و ئازادی، بەڵام یەكێتی لە بنچینە و لە كۆتایشدا هەر یەكێتییەكی خۆمانییە، كە كوردستانییان لە جوتیار و كرێكار و ئەفەندی و كچان و كوڕانی نەوە دوای نەوە پێكیانهێناوە، یەكێتی بەری رەنجی هەموو ئەمانەیە، ژانێكی مێژوویی نەتەوەی كوردە، كۆكتێلی گوشراوی رێكخستنی مۆدێرنی كوردەواری و دامەزراوەیی كوردایەتییە دوای دەیان ئەزموونی ناكام.

4-
وەكو مامۆستا گۆرانی شاعیر دەڵێ:
ئەمانە هەمووی جوانن شیرینن
رۆشنكەرەوەی شەقامی ژینن
بەڵام تەبیعەت هەرگیزاو هەرگیز
بێ رووناكییە بێ بزەی ئازیز
كە ئازیزی هەموومان لەم حوزەیرانە دوور و درێژەی تێكۆشاندا ئایندە و نوێبوونەوەی یەكێتییە و گرەوی گەورەش هەر ئەمەیە یاران.

5-
لەم تابلۆیەدا ئێوە و ئێمە و ئەوانیش هەیە.

شتێك منیش هەم، كە منیش پەسەنێكی ناخۆشە، لە سوچێك دەركەوتووم، رۆژێك عەینەك لە چاوێكی باریكەڵەی دەربازبوو لە چنگی تەعریب، رۆژێك قەڵەوێكی پانوپۆڕی بێ ئەخبار و رۆژێكی تریش كە ئێستایەتی، بەلەنگازی پاشماوەی جەنگی نەخۆشی و ناخۆشی، كە ئەدگارەكانی سەرەتای پیری سەرەتاتكێیەتی. كەمێكی زۆر كەمێكی ئەو سەروەرییەم بەردەكەوێ و تەمای تا سەری خزمەتم گەرەكە.

شەڕم لەسەر رابردووەكەی نییە و شەڕ بۆ داهاتووەكەی دەكەم و زۆری مێژوو رۆیشتووە و زۆرتری داهاتووی كاروانەكەمان ماوە.

وەزیفە و جەدوای مانەوەمان ئایندەكەیە، بۆیە پێشمەرگەی ئەو داهاتووەم.

 306 جار بینراوە