سەرەکی » وەرزش » یه‌كێتییه‌ وه‌رزشییه‌كه‌ی ئێمه‌ (F.U.S.)

یه‌كێتییه‌ وه‌رزشییه‌كه‌ی ئێمه‌ (F.U.S.)

هه‌وراز كاوه‌

به‌شی سێیەم

تۆپ و كتێب له‌ ماڵی ئێمه‌
وه‌ستا كاوه‌ی باوكم به‌رگریكارێكی توندوتیژ و پیاوێكی توڕه‌بوو، محمد كوردۆی مامم هێمن و له‌سه‌رخۆ و خاوه‌نی كتێبخانه‌یه‌كی باشبوو، ئه‌م دوو لایه‌نه‌ زیاتر گه‌شه‌ی به‌ بیر و پێشكه‌وتنی ژیانی من دا له‌ جیهانی نوسین و بابه‌ته‌ وه‌رزشییه‌كان، ئه‌وكاته‌ی تیپه‌كه‌ی باوكم(ئاشتی) م بینی منیش حه‌زم ده‌كرد به‌دوای تۆپدا ڕابكه‌م، به‌و هیوایه‌ی ئه‌و ڕاكردنه‌ بمبات بۆ زۆر شوێنی ئه‌م جیهانه. ئاشتی ڕاسته‌ تیپێكی میللی بچووكی شاری چه‌چمه‌ماڵ بوو، به‌ڵام ده‌روازه‌یه‌كی ناوازه‌بوو تا ئێمه‌ بتوانین له‌وێوه‌ فێری ئه‌وه‌بین كه‌ی و چۆن تۆپ هاتۆته‌ شاره‌كه‌وه‌، یان كێ‌ یه‌كه‌م كه‌س بووه‌ كامێرای هێناوه‌ته‌ یاریگاكان؟ بۆیه‌ به‌ به‌رده‌وامی باوكم باسی گرنگی وێنه‌ و گێڕانه‌وه‌ی چیرۆكی یارییه‌كانی بۆ ده‌كردم، له‌سه‌ر ئه‌و چركانه‌ی له‌ كاغه‌زێكدا بووبووه‌ مێژوو، یان هه‌ندێكجار بیری له‌وه‌ ده‌كرده‌وه‌ زۆر یاریی گرنگ به‌ تایبه‌تی گه‌شتی شاری (به‌سره‌) و ئه‌وانی دیكه‌ وێنه‌یان نه‌گرتووه‌، یاخود هه‌ندێكی به‌هۆی هاوڕێ‌ و گرفته‌كانی ژیان له‌ پاراستن قوتاریان نه‌بووه‌.
هه‌موو ئه‌مانه‌ وای له‌ من كرد ئه‌وه‌ی له‌ پێشوودا له‌ ده‌ستچووه‌ به‌زوویی قه‌ره‌بوویان بكه‌مه‌وه‌، ‌دوای ساڵی (1999) به‌ هه‌رحاڵێك بێت كامێرایه‌كی(36) فلمیم په‌یدا كرد، تا له‌و سۆنگه‌یه‌وه‌ وێنه‌ و یادگارییه‌ وه‌رزشییه‌كانی شاره‌كه‌ تۆمار بكه‌م، یان لانی كه‌م نه‌ هێڵم باوكم به‌و حه‌سه‌ره‌ته‌وه‌ چی دیكه‌ له‌ بیری نه‌بوونی وێنه‌ و بابه‌تی نوێی وه‌رزشی چه‌مچه‌ماڵدا بێت، پاشان له‌ وێنه‌ زۆره‌كانی ئه‌وه‌وه‌ ده‌ستمكرد به‌ ئه‌رشیفكردن و هه‌ڵگرتنیان.
سه‌ره‌تا ده‌چووم ماڵ به‌ماڵی ئه‌وانه‌ی له‌ كۆتایی شه‌سته‌كان یاریی تۆپی پێیان له‌ چه‌مچه‌ماڵ كردووه‌، وێنه‌كانم ده‌هێنا و هه‌ندێكجار به‌هۆی كه‌می ته‌مه‌نم وێنه‌كانیان پێنه‌ده‌دام، به‌ڵام له‌گه‌ڵ ناوهێنانی وه‌ستا كاوه‌ی باوكم ده‌گیشتمه‌ ئه‌و وێنانه‌ی بۆی چووبووم، دواتر شه‌وێكی دره‌نگ ده‌هاتمه‌وه‌ به‌ شێوه‌یه‌كی هونه‌ری به‌رز (سكان)و ئه‌رشیفی بابه‌ت و وێنه‌كانم ده‌كرد، له‌وكاته‌دا توانیم وێنه‌ی یه‌كه‌م یاریی ره‌سمی تیپی ڕاستی چه‌مچه‌ماڵ و تیپه‌ میوانه‌كه‌ی شاری كه‌ركوكم ده‌ستبكه‌وێت، له‌گه‌ڵ ڕۆیشتنی ڕۆژگار و هاتووچۆی من بۆلای پیره‌ وه‌رزشكارانی شاره‌كه‌، وای لێهات بتوانم به‌ سه‌دان وێنه‌ی باش و نه‌بینراوی سه‌ره‌تای یاریی تۆپی پێی چه‌مچه‌ماڵ كۆبكه‌مه‌وه‌ كه‌ دواتر له‌گه‌ڵ چاوپێكه‌وتنی باوكم به‌ وێنه‌كان به‌ گیانێگی پڕ له‌ بیركردنه‌وه‌ بۆ ڕۆژانی ته‌مه‌نی لاوی و دووری هه‌ندێك هاوڕێ‌ و ڕۆژه‌ سه‌خته‌كانی ژیان، به‌ هه‌ناسه‌یه‌كی سارد و هێمن، وه‌كو مه‌لێك له‌م چڵ بۆ ئه‌و چڵ ده‌چووه‌ سه‌ر باسی گێڕانه‌وه‌ی چیرۆكی وێنه‌كان، دواتر وای لێهات بیر له‌وه‌ بكه‌مه‌وه‌ ئه‌و حیكایه‌ت و چیرۆكانه‌ له‌ فه‌وتان ڕزگار بكه‌م، پاشان بۆم ده‌ركه‌وت باوكم ته‌نیا به‌رگریكارێكی تووند نه‌بووه‌ له‌ یاریگادا، به‌ڵكو گه‌یشتمه‌ ئه‌و بڕوایه‌ی له‌ ڕێگای تیپه‌كه‌یه‌وه‌ زنجیره‌یه‌كی ڕۆشنبیری گه‌وره‌ی دروستكردووه‌، تا بتوانێت به‌ هاوكاری هه‌موو لایه‌ك مێژووی تۆپی پێی شارێك، وه‌كو به‌رگریكار بپارێزێت.

print

 77 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*