سەرەکی » وتار » جەمال ئارێز » سەلمێنەری كوردستانیبوون ‌و نیشتمانیبوون و دیموكراسیخوازیی یەكێتیین

سەلمێنەری كوردستانیبوون ‌و نیشتمانیبوون و دیموكراسیخوازیی یەكێتیین

جەمال ئارێز

ماغوت بۆخۆی و بۆ وڵاتی خۆی وت، من و سەدان هەزاری وەك من ئەوەی بەم نیشتمانەمانەوە دەبەستێتەوە، خوێنی گەشی شەهیدەكانێتی، كە سەدان بەرپرسی گەندەڵ ‌و نانیشتمانی ئەو راستییەمان پێ ناگۆڕدرێت.
كاروانەكەی یەكێتی بایی هێندە قوربانیی و شەهیدی بۆ نیشتمان داوە كە گڵكۆی قوربانییەكان ‌و سەنگی كەسوكارە سەربەرزەكەیان هەمیشە وامان لێبكات كە بە رێزەوە سەر بۆ خۆڵی سەر گڵكۆكەیان ‌و جەرگی سوتاوی باوك ‌و دایكیان ‌و پشتشكانی خوشک و براكانیان ‌و بێناز بوونی رۆڵەكانیان دابنەوێنین ‌و هەرگیز ئاڵاكەیان نەنەوێنین.
ئەگەر لای ئەوانەی هیچ قوربانییەكیان بۆ نیشتمان نەداوە محەمەد ماغوت ئاسا تەنها پێڵاوەكانیان بە نیشتمانەوە بیانبەستێتەوە، ئەوا بۆ ئەوانەی خەباتیان بۆ كردووە و قوربانیان بە خوێن بۆ داوە، نیشتمان پێناسەیەكی دیكەی هەیە و قوتابییەكانی ماغوت لێی تێناگەن، چونكە هەر بۆخۆی ئەوەی ئەوان بە ئازادانە قسەكەی ماغوت دەجوونەوە، بەری ئەو قوربانییە كە هەزاران خێزان و بنەماڵەی ئەم وڵاتە بە خوێن بەدییان هێناوە.
یەكێتی بۆچی ناوی یەكێتیی نیشتمانیی كوردستانە؟ بۆچی هەر لە سەرەتای دامەزراندنییەوە دروشمی ئازادیی ‌و دیموكراسیی و پێكەوەژیانی كردۆتە دروشمی خۆی، كە ئەوانە هەر دروشم نەبوون، بەڵكو شێلگیرانەش كاری بۆ كردووە و بەرگریی لێ كردووە و خوێنی بۆ داوە و چەندین خەڵكی غەیرە كورد لە پێناوی ئەو بڕوا پتەوەدا خوێنی خۆیان بەخشیووە.
شەهیدەكانی یەكێتی ‌و شەهیدە زیندووەكانیشی كە ئێستا لە كەمئەندامانی سەنگەر ‌و پێشمەرگە دێرین ‌و زیندانییە سیاسییەكاندا بەرجەستە بوون، نە تەنها پێشمەرگە و خۆبەخش و قارەمانی سەنگەری ناوچەگەریی بوون ‌و نە چاویان لەوە بووە كە خەڵكی فڵانە شار ‌و سەربە فیسار عەشیرەتن، كەوابێت ئەوانە هەموویان كوردستانی بوون ‌و لە هەركوێ نیشتمان ئازار بە جەستەی گەیشتبێت، ئەوان خوێنی خۆیان كردۆتە هەتوانی سەر زامەكانی نیشتمان، زۆر پێشمەرگەی یەكێتی خەڵكی كەركوكی قودسی كوردستان بوون ‌و لە بادینانی دەلال یان لە هەولێری قەڵاو منارە، یان لە سلێمانی هەڵمەت ‌و قوربانی شەهید بوون، بەپێچەوانەشەوە زۆر قارەمان ‌و مێرخاسی بادینانی دەلال لە سۆران ‌و شەقڵاوە و گەرمیان ‌و سورقاوشان ‌و دەشتی شوان ‌و دەشتی هەولێرێ شەهید بوون، بۆیە یەكێتی بە خوێن سەلماندوێتی كە كوردستانی ‌و نیشتمانییە.
ئەوە جگە لەوەی لەهەر پارچەیەكی نیشتمانی گەورەی داگیر و دابەشكراو، شۆڕش ‌و بزاوتی نەتەوەیی لە مەترسیدا بووبێت، خوێنی پێشمەرگەكانی یەكێتی لە سەنگەری بەرگریی نەتەوەییدا رژاوە.
یەكێتی ئەگەرچی یەكێتیی خەباتگێڕانی خاك ‌و خەڵكی كوردستان بووە. كوردستانیی بووە بەو پێوەرەی لە ریزەكانیدا سەدان پێشمەرگەی رۆژهەڵات ‌و رۆژئاوای كوردستان و باكووری كوردستان لە كاروانەكەیدا بەشداربوون ‌و هەندێكیشیان شەهید بوون وەك شەهید نەجۆ-ی باكووری كوردستان ‌و د. جەعفەری شەفیعی رۆژهەڵاتی كوردستان، ئەوە جگە لەوەی كوردستانیانی ئێزدی ‌و شەبەك ‌و كاكەیی ‌و فەیلی ‌و…هتد لە ریزەكانیدا چ لە سەنگەرەكانی خەباتی پێشمەرگەیی یان لە زیندانەكاندا گیانی خۆیان بۆ نیشتمان و گەل ‌و نەتەوەكەیان كردۆتە قوربانی.
سەرەڕای ئەو رەهەندە كوردستانییەشی هێزێكی ئازادیخواز و دیموكراتخواز بووە، ئەوەش هەر بە دروشمبازیی ‌و موزایەدەی سیاسی نەبووە، بەڵكو لە هەموو دانوستاندنێكیدا لەگەڵ رژێمی پێشوودا و لەوپەڕی تەنگەتاوی ‌و پێویستیی شۆڕشەكە بە پشوو و ئاگربەستێك، بەڵام هەرگیز لە دروشمی دیموكراسی بۆ عیراق و مافی چارەی خۆنووسین بۆ خەڵكی كوردستان پاشەكشەی نەكردووە، لەسەروو ئەوەشەوە ئەو راستییەی بە خەباتی پێشمەرگەكانی ‌و خوێنی گەشی شەهیدە نەمرەكانی بەرجەستە كردووە، كە تەنها سێ نموونە بەسن بۆ ئەوەی نەوەیەك كە بێئاگان لە خەباتی پێشمەرگە و شەهیدەكانی یەكێتی بچن دەفتەری سەروەریی شەهیدانی غەیرە كوردی وەك شەهیدان موسەننا غەریب (ئازاد عەرەب) و (دكتۆر ئاتێللا)ی پێشمەرگە و شەهیدی توركمان ‌و شەهید سۆرانی مەسیحی هەولێر و قوربانیی بنەماڵەكانیان هەڵبدەنەوە، چونكە ئەوان لەوە تێگەیشتبوون كە یەكێتی ‌و ناوچە ئازادكراوەكانی رۆژگاری خەباتی سەختی شاخ، تەنها ناوچەی ئارام نەبوون بۆ ئەو كوردانەی كە لە دەستی رژێمی رەگەزپەرستی بەعس پەنایان بۆ ئەو ناوچانە دەبرد، بەڵكو نوایەكی ئارام بوو بۆ هەموو عیراقییەكی ئازادیخواز بە كورد ‌و عەرەب ‌و توركمان ‌و كلدانیی و ئاشوورییەوە.

 194 جار بینراوە