سەرەکی » وتار » ته‌ها سلێمان‌ » گه‌ڕانه‌وه‌ بۆ ئاوایی

له‌ نێوان ئێره‌ و ئه‌وێ دا

گه‌ڕانه‌وه‌ بۆ ئاوایی

40
كاره‌با هاتووه‌و گه‌یشتووه‌ به‌ عه‌زیزقادر، ده‌نگ وباس بڵاوبیه‌تۆ ئێژن ئه‌مری قه‌ڵاچه‌رمه‌ڵه‌و پیره‌مه‌ونی و قه‌واڵیش هه‌یه‌، به‌س واسیته‌یه‌كی قه‌وی گه‌ره‌كه‌. چه‌ندجارێك هیدایه‌تی كوێخا برایم و باوكم چوینه‌ كه‌لارو محاوله‌یان كرد، به‌ڵام نه‌یانتوانی قه‌ناعه‌ت وه‌ كار وه‌ده‌ستان و حكومه‌تی میری بكه‌ن كاره‌باكه‌ ڕاكێشن بۆ ئه‌ی سێ ئاواییه‌، خه‌وه‌ریش بڵاو بیۆ كه‌ واسیته‌ی بنه‌كه‌ی خه‌په‌كوێر قه‌وی تره‌و كاره‌باكه‌ بۆ ئه‌وان ئه‌چێ. ئێ وایش بیوو، دوای كاره‌با له‌عه‌زیز قادرۆ بریا بۆ بنه‌كه‌و دوای ماوه‌یه‌ك ئێمه‌ وه‌شه‌وان ئه‌چویمانه‌ بان ته‌په‌ی ئاوایی بۆ ئه‌وه‌ی شه‌وقی گڵۆپه‌كانی بنه‌كه‌ بیوینین و بزان شه‌وقی كاره‌با چوێنه‌.
ئێخۆ ناهه‌قمان نه‌وی وابكه‌ین له‌به‌ر ئه‌وه‌ی له‌گشت ئاوایی كۆمه‌ڵێك چرای نه‌فتی و له‌بڕێك ماڵیش له‌مپه‌و له‌یه‌ك دووماڵیش لۆكس بیوو، كه‌ ئه‌گه‌ر میوان نه‌هاتایه‌ زه‌حمه‌ت بیوو لۆكس دابگیرسێنن. زۆرجاریش بلوری چراكان ئه‌وه‌نه‌ ڕه‌شایی ئه‌گرت وه‌حاڵ و نه‌حاڵ ده‌وروبه‌ری خۆتت ئه‌وینی و باسی له‌مپه‌ش هه‌رمه‌كه‌، قووتوویه‌ك و پڕیان ئه‌كرد له‌نه‌فت و پلیته‌یه‌كیان له‌كوونی بان قه‌باغه‌كه‌یه‌وه‌ تێ ئه‌خست و ئاگریان پێوه‌ ئه‌نیا. له‌هه‌ر ژوویرێكا شه‌وێك له‌مپه‌ ئیشی بكردایه‌ بۆ به‌یانیه‌كه‌ی گشت ئه‌وانه‌ی له‌و ژویره‌دا بیووین، پڕ كونای لویتیان دویكه‌ڵ و ڕه‌شایی بیوو.
ئێ وه‌لحاسڵ كاره‌با نه‌هاته‌ ئاوایی ئێمه‌و پیره‌مه‌وه‌نی و قه‌واڵی و ئه‌میش فره‌ناخۆش بیوو، به‌ڵام ئه‌وێ هه‌ندێ باس و به‌سه‌رهاته‌كانی كاره‌بایشمان بیرنه‌چێ كه‌فره‌خۆشن.
ڕۆژێك سه‌یاره‌ له‌كفرییه‌وه‌ تێتۆ بۆ ئاوایی، كابرایه‌كی خه‌ڵكی ئاوایی عه‌زیز قادر دوومامری مه‌سڵه‌حه‌ ئه‌سێنێ و تاوسان ئه‌وێ و تا ئه‌گه‌نه‌ ئاوایی مامره‌كان له‌گه‌رما وه‌هیلاكه‌ت ئه‌چن و ده‌ست ئه‌كه‌ن وه‌ده‌مه‌داچه‌قێ، ئیتر بیستیوشیانه‌ كه‌ مامری مه‌سڵه‌حه‌ حه‌ز له‌فێنكی ئه‌كا یه‌كێكیان ئێژێ ئا بیوه‌ن بیخه‌نه‌ ناو ته‌لاجه‌كه‌ با فێنكیان بێتۆ، ژنی خاوه‌ن ماڵه‌كه‌ش كه‌تازه‌ كاره‌بایان بۆ هاتیوو ته‌لاجه‌یان سه‌نووی ئه‌یانواو ئه‌یانخاته‌ ناو فرێزه‌ری ته‌لاجه‌كه‌و پاش یه‌ك دووسه‌عات ئێژن كوا مامره‌كان؟ ئێژێ له‌ناو سه‌لاجه‌كه‌ دامناوه‌و وتم با فێنكیان بێتۆ، كاتێ ئه‌چن ده‌ریان بكه‌ن، هه‌ردوو مامره‌كه‌ ڕه‌ق بوینه‌تۆ، پیاوه‌كه‌ش ئێژێ ئه‌مه‌ بۆ وایان لێهاتووه‌؟ ژنه‌كه‌یش ئه‌ی مه‌گه‌ر نه‌تانووت بیانخه‌ ناو ته‌لاجه‌كه‌ با فێنكیان بێتۆ، منیش وامكردو ئاوایان لێهات. ئیتر حیكایه‌تی دوو مامره‌ مه‌سڵه‌حه‌كه‌و مردار بوینه‌وه‌یان له‌ناو فرێزه‌ری ته‌لاجه‌كه‌ ده‌ماوده‌م گه‌یه‌ گشت ئاواییه‌كانی ده‌ورو به‌رو جارجار قه‌ومانی عه‌زیز قادریشی تویڕه‌ ئه‌كرد.
جا كورده‌واری ئێژێ قسه‌ قسه‌تێرێ، خه‌ڵكی ئاواییه‌كانی تر به‌خیلیشیان وه‌ خه‌ڵك سه‌ی جه‌ژنی و فه‌تاح ئۆمه‌رو ئۆمه‌ربل و به‌له‌گه‌و چوارشاخ و به‌كره‌شه‌ل و سێخڕان و كانی ماران و عه‌زیزقادرو بنه‌ی خه‌په‌كوێرو ئه‌و ئاوایانه‌ی تر ئه‌ورد، كه‌كاره‌بایان هه‌یه‌و گڵۆپ و ته‌لاجه‌یان هه‌یه‌و له‌تاوسانا به‌فرو ئاوی ساردیان هه‌یه‌. من بیرمه‌ جارێك كه‌ مانگی ڕه‌مه‌زان كه‌فتیوه‌ ناو چله‌ی تاوسانۆ، باوكم ئێواران ئه‌می نارد بۆ عه‌زیز قادر بۆ ئه‌وه‌ی به‌فر بێرم و ڕۆژوو وه‌ ئاو سارد بشكێنێ، كه‌رێكمان بیوو ته‌په‌دویرێكی له‌شار سه‌نوی، لێی فه‌رحانا سوار كه‌ره‌كه‌ ئه‌ویمان و ئه‌چوویمان بۆ عه‌زیز قادر، له‌م سێ ماڵه‌ به‌فرمان ئه‌هاورد، (ماڵ ئه‌حه‌ غه‌ده‌، ماڵ حوسێن عه‌له‌ی كوێخا، ماڵ خووله‌ سوویر). كاتێ ئه‌گه‌یمانه‌ ئاوایی عه‌زیز قادر، بیرمه‌ ئه‌حمه‌و كه‌سێ برابووین (ئه‌حمه‌د، مه‌حموود، عه‌زیز) وه‌ناو دایكیانۆ بانگ ئه‌كریان بۆ نموونه‌ ئه‌یانووت (خووله‌ غه‌ده‌، ئه‌حه‌ غه‌ده‌، عه‌زه‌ غه‌ده‌). ئه‌حمه‌و برا گه‌وره‌یان بیوو باوكمی زۆر خۆشه‌ویست و گشت كه‌ڕه‌تێ لێل دایكیا ئه‌ویه‌ شه‌ڕیان و ئه‌یووت: به‌فر بۆ خاڵۆ سڵێمان وه‌جیا هه‌ڵبگره‌ غه‌ده‌، له‌ماڵ حوسێن عه‌له‌ی كوێخاوو خووله‌ سویریش به‌شمانیان دائه‌نیاوو كه‌ ئه‌هاتینۆ باوكمیش به‌شی مامه‌م مه‌لایاسین و ماڵ جه‌بارو ماڵ حاجی عه‌لی و دادا گورجی و میم نه‌جه‌ی ئه‌دا.
ئه‌زانن خۆشترین چشت بۆ من و فه‌رحان چی بیوو له‌ڕۆین بۆ عه‌زیزقادر؟ ئه‌وه‌ بیوو باوكم په‌نجا فلسی ئه‌داپێمان و ئێمه‌ش له‌وره‌ له‌ماڵ خووله‌ سوویر ئه‌ماندا به‌كرێمستی، كرێمستی له‌ناو نایلۆنی بیچك بیچك وه‌ شه‌كرو ڕه‌نگی زه‌ردو سویرو سه‌وزو پرتقالی ئه‌یانكردو وامان ئه‌زانی له‌م شته‌ خۆشتر هه‌ر نیه‌و نه‌كریاوه‌، چوینكه‌ هه‌م ساردو هه‌م شرین و هه‌میش له‌ناو ته‌لاجه‌ ئه‌ویه‌ به‌فرو له‌ژێر دگانمانا خرمه‌ی ئه‌هات كه‌ئه‌مان خوارد. ئه‌و مانگه‌ی ڕه‌مه‌زان وه‌ من و فه‌رحان بیویایه‌، بویایه‌ته‌ دوانزه‌ مانگ و هه‌ر نه‌وڕیایه‌تۆ..
ئیتر كاره‌با هه‌ر نه‌هات بۆ ئاوایی ئێمه‌و گشت خه‌ڵكه‌كه‌ وه‌ عه‌زره‌ت كاره‌باۆ دوای ساڵێك ئه‌نفال كریان و تێر ئاوی ساردیان نه‌خواردۆ، له‌م ساڵانه‌ی دویایی كاتێك كاره‌ گه‌یه‌ ئاوایی، قه‌ره‌چۆڵی تیا نه‌ماوی….

41
من ده‌مای ده‌م ژنه‌فتوومه‌، ئێژن كاتێك كاكه‌ ئه‌وڵای حاجی ئه‌حمه‌دی ئامۆزای باوكم كه‌ گه‌نج بوویه‌، داوای ژنی له‌ باوكی كردووه‌و باوكیشی پێی ئێژێ جارێ وه‌ختی ماوه‌؟ ئه‌ویش وه‌ك ناڕه‌زایه‌تیه‌ك چویه‌ بۆ نزیك شاخی زه‌نگڵه‌ بنجگ و له‌ كلكی شاخه‌وه‌ نه‌ك لای به‌رزاییه‌كه‌ی خۆی فڕه‌ داوه‌ته‌ خواره‌وه‌و به‌ ئه‌نقه‌ستیش خۆی بێهۆش كردووه‌، ئه‌مه‌ی بۆ ئه‌وه‌ كردووه‌ باوكی مل كه‌چ بكات ژنی بۆ بێرێ؟ ئیتر حاجیش بڕیار ده‌دا ژنی بۆ بێرێ و له‌گه‌ڵ ماڵی غێدان له‌ ئاوایی به‌له‌گه‌ رێك ئه‌كه‌ون، ئه‌وان فه‌ریده‌ ده‌ده‌نه‌ كاكه‌ ئه‌وڵاو ئه‌مانیش خه‌دیجه‌ ئه‌ده‌نه‌ حه‌مید غێدان و له‌م رێگایه‌شه‌وه‌ خزمایه‌تی دروست ده‌كه‌ن و هه‌تا ئێستاش ئه‌و خزمایه‌تیه‌ به‌رده‌وامی هه‌یه‌.
ئێستا با له‌وه‌ بگه‌ڕێین، بزانین به‌سه‌ر هاته‌كه‌ چیه‌؟ فه‌ریده‌ی خێزانی كاكه‌ ئه‌وڵا ژتێكی ره‌قه‌ڵه‌، هاروهاج، یادی به‌خێر كه‌مێك فره‌وێژیش بوو، كاتێك فه‌ریده‌ بڕۆییایه‌ بۆ چه‌م بیره‌كان بۆ ئاو هاوردن به‌ مویشه‌ماو به‌سه‌ر پشتی كه‌رۆ، ئه‌ویایه‌ وه‌به‌رده‌م ماڵی مه‌حمودی شویبرایی و ماڵی ئێمه‌دا بڕۆییایه‌. رۆژێكیان فه‌ریده‌ خۆی ئاماده‌ ده‌كات بۆ ئاو هاوردن، توومه‌ز كه‌ره‌ بۆزه‌كه‌یان زۆر عه‌زییه‌تی ده‌دا، به‌ڵام هه‌رچۆنێك بێت ده‌كه‌وێته‌ ڕێ و كه‌ ده‌گاته‌ به‌رده‌م ماڵی مه‌حمودی شویبرای كه‌ره‌كه‌ی ده‌سه‌ڕێنێ؟ سالاری كوڕی مه‌حمویش ئێژێ: مه‌سه‌ڕێنه‌ مه‌سه‌ڕه‌ڕێنه‌ له‌به‌رده‌متایه‌؟ دوو سێ هه‌نگاو خوارتر گه‌شته‌ لای ماڵی ئێمه‌و ئێمه‌ش وتمان: (سه‌ڕڕڕڕو چه‌ند جارێك دووباره‌مان كرده‌وه‌). وه‌ڵا كاكه‌ كه‌ره‌بۆزه‌ سینی گرت و ده‌ستی كرد به‌سه‌ڕین.
ئۆووف خوایه‌ فه‌ریده‌ ده‌ستی كرد به‌ جماندان، به‌ڵام چۆن جمانێك؟ هه‌زار وه‌ عانه‌یه‌ك و ئیتر مه‌پرسه‌.. دایكم له‌م كاته‌ هاته‌ ده‌رگه‌ی حه‌وشه‌و وتی:
-ئه‌وه‌ چیه‌ شێته‌ ئه‌وه‌ چیه‌؟
-چوزانم ئێوه‌ ئه‌زانن؟
-وه‌ناو خوا هیچ نازانم چی بویه‌؟
فه‌ریده‌ هه‌ڵشاخا به‌رووی دایكماو وتی: نازانم وه‌ناو خوا نازانم؟ ئازان خۆت و غه‌زێم هه‌ر ڕۆژه‌ی سه‌گێك بێنن، به‌ڵام ئازا نیتان گوێیان رابكێشن؟
-كوره‌ ئاگات له‌ده‌مت وێ هه‌ی بێنامووس تۆ ئه‌زانی چی ئێژی..
-ئه‌ی بۆ نازانم ئه‌رێوه‌ڵا ئه‌زانم بێژه‌ سه‌گانت بزان چییان كردوه‌..
ئیتر دای تلیشكان و رۆیی و دایكمیش تێگه‌یی و به‌ به‌رانكێشی ناو كوانوه‌كه‌ كه‌وته‌ دوای ئێمه‌، زانی و تیگه‌یشت ئێمه‌ فه‌ریده‌مان تویڕه‌ كردووه‌. له‌كاتی گه‌ڕانه‌وه‌شیا فه‌ریده‌ هه‌رجمانی ئه‌دا ئه‌یوت: خوله‌ ملپان، سلێمانه‌ ورگن، پڕ ئه‌م ناوه‌یان كردووه‌ له‌ مناڵ بۆ ئه‌وه‌ی وه‌ك سه‌گ به‌ خه‌ڵك بوه‌ڕن؟ باشه‌ ئیتر سه‌گتان بۆ چیه‌ مادام ئه‌مانه‌تان هه‌یه‌؟
ئیتر ئه‌وه‌ وابوو، بۆ به‌یانیه‌كه‌ی كه‌ ئه‌تیبینی بتوتایه‌ فه‌ریده‌ جمانت داوه‌، ئه‌یووت من؟ وه‌ناو خوا من جمان ناده‌م و وه‌ی باوانم كه‌یه‌ شێوێ جا جمان بۆ بده‌م؟ ئه‌نجا له‌هه‌مووی خۆشتر قاقا پێده‌كه‌نی و ئه‌تووت ئه‌وه‌ی دوێكه‌ روویداوه‌ ئه‌م هه‌ر له‌وره‌ نه‌وییه‌..

42
مامه‌م سه‌عید تا حه‌زبكه‌ی پیاوێكی فه‌قیرو گرانیش بویی و كه‌م قسه‌ی ئه‌كردو زۆر گوێی ئه‌گرت، بۆ ژیان و گوزه‌ران، هێنده‌ی وه‌بیرم كه‌فێتۆ ئه‌و هه‌ر خه‌ریكی كرێكاری و هویرده‌ ئیش و كه‌سابه‌تی فره‌ نه‌وع ئه‌ویی.بۆنموینه‌؟ئه‌چوی بۆ به‌غا بۆ كه‌ركویك بۆ خورماتیوو بۆ كفری بۆ كه‌لار بۆ كرێكاری كردن و فه‌تره‌یه‌كیش خووی دابویه‌ ویرده‌واڵه‌و كویتاڵ فرۆشتن، وه‌ تایبه‌ت قووماشی كراس و كه‌واوو شتی ژنانه‌. جا مامه‌م سه‌عید قسه‌یه‌كی باوی بیوو، كه‌باسی چشتێكی بكردایه‌ ئه‌یووت: (بیلامه‌عنا). بۆ كویتاڵ فرۆشییه‌كه‌ی، بیرمه‌ دوو مه‌تری بوی، یه‌كێكیان دارو ئه‌وه‌كه‌ی تر ئاسن. كاتێك ئه‌چویه‌ هه‌ر ئاواییه‌ك و ژن و كچ و پیاوه‌كان له‌ده‌وری كۆ ئه‌وینۆ، ئه‌یووت: هینه‌كه‌ی من مشتێك درێژتره‌. ژن و كچه‌كانیش ئه‌یانووت وه‌ی كۆست نه‌كه‌وێ و باوانت نه‌ڕمێ، ئه‌یه‌ سه‌عید خه‌لیفه‌ عیسا چی ئێژێ و پیاوه‌كانیش ئه‌یانووت: كا سه‌عید چی توو مشتێ درێژتره‌؟ ئه‌ویش ئه‌یوت: به‌خوا برا ئێوه‌ قسه‌ی خراو وه‌ده‌م پیاۆ هه‌ڵه‌واسن، باوكم بیلامه‌عنا مه‌تری قووماشه‌كان ئێژم، بۆ ئه‌یوه‌ن بۆ لای شتی خراو؟
جا شتێكی خۆشتری مامه‌م سه‌عیدتان بۆ باس بكه‌م، عاده‌تێكی بیوو قه‌ت نیه‌تی دڵی خۆی و ڕێگای چوین و هاتنی وه‌كه‌س نه‌ئه‌وت و بچویایه‌ به‌ره‌و باكووری ئاوایی، ئه‌یوت ئه‌چم به‌ره‌و خۆرئاوا، بچویایه‌ بۆ خۆرئاوای ئاوایی ئه‌یووت ئه‌چم بۆ خۆركه‌فتن. بچویایه‌ بۆ به‌غا ئه‌یووت ئه‌چم تاسه‌رقه‌ڵا. ئیتر ته‌بیعه‌تی وابیوو، حه‌زی نه‌ئه‌كرد كه‌س وه‌ سڕو كاره‌كانی بزانێ و باوه‌ڕیش ناكه‌م، گشت چشتێكی وه‌ ئامۆژنه‌ گوڵستانم وتیوێ؟
میمكم نه‌شمیل جارێك باسی كردو وتی: سه‌عید هات بۆماڵمان و داوای قوڵنگه‌ی كردو منیش پێم ووت بۆچیته‌ سه‌عید برازام؟ جوابی دامۆو ووتی: وه‌ڵا میمی چاڵیۆنك ژێر كوڵه‌نانه‌كه‌ هین ئه‌و سنان كوشتووه‌، سه‌گه‌كه‌ ئێژم تێكچوویوه‌و چاكی ئه‌كه‌مۆ. ئینجا میمكم ئه‌یوت: حایر مابیوم، ئه‌مزانی سوعالی تری لێبكه‌، ئه‌وه‌نه‌ دوویرم ئه‌خاتۆ مه‌پرسه‌، ناچار قوڵنكه‌م داپێی و ڕۆیی. دوو ڕۆژی پێچیوو، سه‌عید قوڵنگه‌كه‌و پڕ جامێ ته‌ڕه‌ دۆینه‌ی هاورد، سووعالم كردو ووتم سه‌عید برا ئه‌م ته‌ڕه‌ دوێنه‌ چیه‌؟ ووتی: وه‌ڵا میمی كه‌ قوڵنكه‌م برد بۆ چاككردنی چاڵیۆنكه‌كه‌، بیرم كردۆ چاڵێك بۆ دۆینه‌ش بكه‌م و ئێ تۆراغیش حازریوو دۆینه‌كه‌مانیش كردو ووتم حه‌زت لێیه‌تی بابه‌شت بێرم.
جا كێشه‌ی من و فه‌رحان له‌ختووخۆڕا یاخه‌ی مامه‌م سه‌عید ئه‌گرێ و زۆرو زه‌وه‌نه‌، به‌ڵام گشتیشیان بۆ باسكردن ناشێن. باباسی ئه‌مه‌تان بۆبكه‌م ئێواره‌یه‌و من له‌چه‌م بیره‌كان كۆلی بیره‌ حه‌وزه‌كه‌م پڕكردووه‌ له‌ئاو بۆ په‌زه‌كانی ماڵی بابام و خۆمان. عاده‌تیش وابیوو، گایه‌ل به‌له‌ ڕان و په‌ز ئه‌هاتنۆ، مامه‌م سه‌عید یه‌ك مانگایه‌كی بیوو، هاوردی ئاویبداو من گه‌ره‌كمه‌ نه‌یه‌ڵم مانگاكه‌ی ئاوبخواوو ئه‌ویش ووتی:
-مه‌كه‌ ڕۆڵه‌ بامانگاكه‌ ئاوبخوا..
-نایه‌ڵم كۆل و ئاوه‌كه‌ پیس ئه‌كا..
-ئێژم مه‌كه‌ كوڕم با ئاو بخوا..
-نایه‌ڵم وه‌حه‌ نایه‌ڵم وه‌حه‌..
زۆری ووت و پاڕایه‌وه‌و من نه‌مژنه‌فت، ئه‌ویش هه‌تا خوا تاقه‌تیدا بدا، یه‌ك شه‌پازله‌ی سراوانه‌ بناگوێم و مانگاكه‌یشی ئاوداو ڕۆیی. باوه‌ڕتان بێ ئیسایش زرینگه‌و ده‌نگی شه‌پازله‌كه‌ی له‌بن گوێچكه‌مایه‌و كه‌بیری لێده‌كه‌مه‌وه‌ مووسته‌حه‌قی دووسێ زله‌ی تریش بیووم و به‌س ها سه‌رم كاس بیوو وه‌و شه‌پازله‌یه‌. ئاخر باشه‌ بۆچی ڕێگه‌م نه‌ئه‌دا، كه‌له‌داره‌ی دنیا ته‌نیا مانگایه‌كی بیوو، له‌كۆل و بیره‌كه‌ ئاوی بدا؟
بۆ عه‌قڵ و بیركردنه‌وه‌ی ئه‌و ده‌مه‌ی مناڵی، كه‌ مامه‌م سه‌عید زله‌یه‌كی لێمداوه‌و كه‌سیش نیه‌ باوك نه‌مامه‌كانی ترم و نه‌ش دایك پشتگیری من بكات و هه‌قیان ئه‌دایه‌ ئه‌و. بیرم كردۆ چۆن تۆڵه‌ی ئه‌م زله‌یه‌ بكه‌مۆ؟
له‌ئاواییشا عاده‌ت وابیوو ئه‌وانه‌ی ژن وه‌ ژنیان ئه‌كرد، كاتێ كچی ماڵه‌كه‌ ئه‌هاتۆ، بووكی ماڵیش ئه‌ڕۆیه‌وه‌ بۆ سه‌ردانی ماڵی باوكی. مامه‌م سه‌عیدیش لێل سه‌ی قاسم میم ئینجی ژن وه‌ژنیان كردیوو. قاسم گوڵستانی خوارزای دابووه‌ مامه‌م سه‌عیدو مامه‌م سه‌عیدیش میمكم ئه‌سمه‌ری داویه‌ ئه‌و. میمكم ئه‌سمه‌ر له‌كه‌لارۆ هاتیۆ بۆ ئاوایی و مامه‌م سه‌عیدیش ئامۆژنم گوڵستانی بردیوۆ بۆ كه‌لار. منیش ئه‌مه‌م وه‌هه‌ل زانی و نیوه‌ڕۆیه‌كیان زۆر گه‌رم بیوو، فه‌رحان برام و سیروان و په‌یمان میمكم ئه‌سمه‌رم له‌ته‌ك خۆما بردو له‌قاپیه‌كه‌ی ناو حه‌وش ماڵ بابامۆ، چویمانه‌ ماڵ مامه‌م سه‌عیدۆ. ئۆۆفف چیمان كرد، باوه‌ڕبكه‌ن، هه‌ردوو مه‌تری كووتاڵ فرۆشییه‌كه‌یمان شكان، یه‌ك دنیا چكلێت و لووقممان دزی و خواردمان، ده‌فته‌رێكی بیوو نازانم هین قه‌رزیوو هین حساباتیوو دڕیمان و به‌وه‌شه‌وه‌ نه‌وێسیاین، عه‌له‌شیشێكی كڕیان له‌ماڵا بیوو، نازانم بیست بۆ بیس وئه‌وه‌نده‌ خای له‌ژێرا بیوو، گشتی نزیك هه‌ڵهاوردنیان بیوو، یه‌ك یه‌ك ئه‌ماندایه‌ دایه‌ قه‌و دیواره‌كه‌یاو ئه‌مانشكان. كارێكمان كرد دووژمنیش وه‌ ماڵ دووژمنه‌كه‌ی نه‌كا؟
ئیسایش نازانم چوێن ئاشكرا نه‌ویمان و له‌سه‌ر ئه‌م ئه‌فعاله‌ نه‌مانیان كوشت؟

print

 33 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*