سەرەکی » ساڵۆنی کوردستانی نوێ » عومه‌ر سۆفی، ده‌نگێكی ره‌سه‌ن و شاعیرێكی هه‌ست ناسك

ساڵۆنی كوردستانی نوێ‌، به‌ جۆش و خرۆشی مه‌قامی كوردییه‌وه‌

عومه‌ر سۆفی، ده‌نگێكی ره‌سه‌ن و شاعیرێكی هه‌ست ناسك

له‌چوارچێوه‌ی كۆڕه‌كانی ساڵۆنی كوردستانی نوێ‌، رۆژی 16/12/2018، كۆڕی دابه‌شكردن و ناساندنی هه‌ردوو دیوانی (ئه‌وین و ئازار) و (رۆژگاری خه‌ماوی)ی عومه‌ر سۆفی به‌ڕێوه‌چوو، كه‌ هاوكاتی دابه‌شكردنی ئه‌م دوو كتێبه‌، چه‌ند مه‌قامێك به‌ده‌نگی خۆی پێشكه‌ش به‌ئاماده‌بووان كرد قسه‌ی له‌سه‌ر كرد.
سه‌ره‌تای كۆڕه‌كه‌، مه‌ریوان مه‌سعود ئه‌ندامی ده‌سته‌ی نووسه‌رانی كوردستانی نوێ، وه‌كو به‌ڕێوه‌به‌ری كۆڕه‌كه‌، قسه‌ی كردو وتی:

میوانه‌ به‌ڕێزه‌كان زۆر به‌خێربێن بۆ ساڵۆنی كوردستانی نوێ بۆ ناساندن‌و دابه‌شكرنی هه‌ردوو دیوانی (ئه‌وین و ئازار – ڕۆژگاری خه‌ماوی) له‌لایه‌ن كاك عومه‌ر سۆفی دابه‌ش ده‌كرێت‌و به‌خۆشحاڵییه‌وه‌ جگه‌ له‌ دوو كتێبه‌كه‌ی قسه‌مان بۆ ده‌كات له‌باره‌ی مه‌قامه‌وه‌و وه‌چه‌ند مه‌قامێكیشمان پێشكه‌ش ده‌كات.
به‌ڕێزان پێش ئه‌وه‌ی كاك عومه‌ر قسه‌مان بۆ بكات بۆ ناساندنی به‌ڕێزیان كورته‌یه‌ك له‌ ژیانی‌و به‌رهه‌مه‌كانی پێشكه‌ش به‌ ئێوه‌ بكه‌م.
ناوی ته‌واوی (عومه‌ر محه‌مه‌د براخاس) ه‌ ناسراو به‌ (عومه‌ر سۆفی) ، له‌ساڵی 1968 له‌ناوچه‌ی بنكوره‌ له‌بنه‌ماڵه‌یه‌كی هه‌ژار له‌دایكبووه‌ له‌گوندی حاجی خه‌لیل له‌ساڵی 1975 له‌زێدی خۆیان ئاواره‌كراون بۆ شاری جه‌له‌ولا تا ساڵی 1982 له‌وێ ماونه‌ته‌وه‌ و به‌ژیانی كرێكاری ژیاوه‌ له‌به‌ر سته‌م و زوڵم زۆری به‌عسی شۆڤێنی خوێندنی ته‌واو نه‌كردووه‌ به‌ڵام به‌خوێندنی قوتابخانه‌ی ئێواران توانیویه‌تی هه‌رچۆنێك بێت ته‌واوی بكات، دواتر كۆچیان كرد بۆ شاری كه‌لاری خۆشه‌ویست له‌ ساڵی1987 ژیانی هاوسه‌ری پێكه‌وه‌ ناوه‌و ئێستا خاوه‌نی سێ منداڵه‌ به‌ناوی (تاڤگه‌ وهه‌ڤاڵ و زریان) و به‌ده‌م كرێكارییه‌وه‌ ناو به‌ناو له‌ ئاهه‌نگ و فێستیڤاڵه‌كان و كۆڕی شیعری به‌شداری كردووه‌ جگه‌ له‌ شیعر خولیای هونه‌ری گۆرانی ڕه‌سه‌ن و مه‌قاماتی كوردییه‌ به‌تایبه‌ت مه‌قامه‌كانی ناوچه‌ی گه‌رمیان و له‌و بواره‌دا شاره‌زایی هه‌یه‌ ، تا ئێستاش به‌رده‌وامه‌ له‌ كار و چالاكی هونه‌ری و ئه‌ده‌بیدا.
سێ دیوانی شیعری هه‌یه‌ به‌ناوه‌كانی ( چه‌پكێك له‌گوڵزاری بنكوره‌ – ئه‌وین و ئازار – ڕۆژگاری خه‌ماوی) دیوانی چه‌پكێك له‌ گوڵزاری بنكوره‌ له‌ ساڵی 2013 چاپكراوه‌ له‌ چاپخانه‌ی چوارچرا.
ئه‌و كۆڕه‌ شیعرییانه‌ی كه‌ به‌شداری تیا كردون … له‌كه‌لار زیاتر له‌ چه‌ند جارێك ، هه‌روه‌ها له‌ سلێمانی و خانه‌قین و هه‌ڵه‌بجه‌ وده‌ربه‌ندیخان و پێنجوێن و شه‌مێران.
به‌شداری كردووه‌ . له‌ ڤستیڤاڵه‌كانی، 13 وه‌ده‌ری خانه‌قین، فێستیڤاڵی هه‌ورامان، فێستیڤاڵی باجه‌لان، فێستیڤاڵی گه‌رمه‌سێر له‌سلێمانی، فێستیڤاڵی گه‌رمیان و كوێستان له‌ سلێمانی كۆمه‌ڵه‌ی هونه‌ری ملی كورد، فێستیڤاڵی كلتوری وڵاتان له‌ گه‌رمیان، له‌ سلێمانی له‌ یادی ده‌ساڵه‌ی دامه‌زراندنی كۆمه‌ڵه‌ی كه‌له‌پوری كورد
گۆرانی هه‌یه‌ به‌ڵام به‌ شێوه‌ی كلیپ نا. بۆیه‌ پێمان خۆشه‌ كاك عومه‌ر خۆی له‌باره‌ی دوو كتێبه‌كه‌ی‌و مه‌قاماته‌وه‌ چه‌ند قسه‌یه‌كمان بۆ بكات.
پاشان، رووناكبیرو مه‌قامبێژ عومه‌ر سۆفی ده‌ستی به‌ كۆڕه‌كه‌ی كردو وتی:
سه‌ره‌تا به‌خێرهاتنی هه‌موو لایه‌كتان ده‌كه‌م‌و خۆم به‌ خۆشحاڵ ده‌زانم له‌ حزوری ئه‌م میوانه‌ به‌ڕێزو نوسه‌رانه‌دا دانیشتوم‌و ئه‌وه‌ فه‌خرو شانازییه‌ بۆ من، زۆر سوپاسی كاك ستران عه‌بدوڵڵاش ده‌كه‌م كه‌ ئه‌م كۆڕه‌ی بۆمان ڕێكخست‌و سوپاسی مامۆستای به‌ڕێزو خۆشه‌ویست مامۆستا ئه‌نوه‌ر قه‌ره‌داغی ده‌كه‌م كه‌ جه‌نابیان بانگهێشتیان كردم بۆ ئێره‌ زۆر سوپاسیان ده‌كه‌م.


له‌ ساڵی 1975 به‌عسی فاشی كاتێك له‌ گونده‌كانه‌وه‌ گواستینیانه‌وه‌ بۆ شاره‌كان ئه‌و كاته‌ من له‌ ته‌مه‌نێكی منداڵیدا بووم كه‌ چوینه‌ جه‌له‌ولا له‌به‌ر نه‌بوونی كرێكاریم ده‌كرد سه‌رباری ئیهانه‌كردنمان كه‌ وه‌ك پێشمه‌رگه‌ مامه‌ڵه‌یان له‌گه‌ڵ ده‌كردین، من هه‌ر له‌ منداڵییه‌وه‌ زۆر حه‌زم له‌ گۆرانی‌و مه‌قام هه‌بوو جێگایه‌كیش نه‌بوو بۆی بچم‌و په‌ره‌ به‌و حه‌زوو به‌هره‌یه‌ بده‌م كه‌ هه‌مه‌ له‌ عه‌شقم بۆ كتێب‌و نیشتمانه‌كه‌م ده‌چوم كتێبی خورشیدو خاوه‌رم ده‌كڕی‌و ده‌م خوێنده‌وه‌ پاشانیش چومه‌ ڕێكخستنه‌كانی كۆمه‌ڵه‌ی ره‌نجده‌ران‌و سه‌رپه‌رشتی كاری شه‌ش شانه‌م ده‌كرد له‌و ته‌مه‌نه‌ منداڵیه‌دا، زۆر خولیای شیعرنوسینم هه‌بوو ئه‌وه‌بوو ده‌شتم پێكردو له‌ په‌نای خواوه‌ سێ كتێبم چاپكردووه‌ كتێبێكی تریش له‌سه‌ر مێژووی مه‌قامات‌و ناوچه‌كانه‌وه‌‌و ناوه‌كانیان له‌ چییه‌وه‌ هاتووه‌ ئه‌وه‌ش له‌به‌ر ده‌ستمایه‌‌و ساڵی داهاتوو ئاماده‌ی ده‌كه‌م، شیعر په‌نگ خواردنه‌وه‌ی هه‌ستی ئینسانه‌ كه‌ ده‌سه‌ڵاتی كارێك بكات وه‌ك منداڵێك چۆن ده‌گری شیعر‌و مه‌قامیش ناخی ئینسانه‌ بۆیه‌ له‌لای من مه‌قام وتن شیعرنوسین هه‌لقوڵاوی ناخمه‌و وه‌ك گریان وایه‌ به‌لامه‌وه‌، تا ئه‌و رۆژه‌ی ده‌مرم خزمه‌تكاری میلله‌تكه‌م ده‌كه‌م به‌چه‌ك‌و به‌قه‌ڵه‌م، هه‌ر كارێكیش دژی میلله‌ته‌كه‌م بێت من به‌ قه‌ڵه‌م‌و به‌چه‌ك وه‌ڵامی ئه‌ده‌مه‌وه‌، شیعره‌كانیش بریتییه‌ له‌ شیعری خۆشه‌ویستی‌و نیشتمانی‌و كۆمه‌ڵایه‌تی له‌ هه‌ر ڕوویه‌كه‌وه‌ شاعیر وه‌ك ئاوێنه‌وایه‌‌و هه‌رچی به‌ڕوویدا بڕوات ده‌ریه‌بڕێت، مرۆڤ نییه‌ كه‌ هاته‌ دویناوه‌ ناخۆشی‌و خۆشی نه‌بینێ من له‌و نه‌هامه‌تی‌و ناڕه‌حه‌تییه‌‌و له‌كاتی كاركردندا گۆرانیم وتووه‌‌و شیعریشم نوسیووه‌ ئێمه‌ ده‌بێت تا مردن ڕێز له‌ هونه‌رمه‌ندانی رابردوو بگرین ئه‌وانه‌ی به‌تایبه‌ت مه‌قام بێژه‌كان.
مه‌قامه‌كان ئه‌وانه‌ی كه‌ هه‌ن من گوێم له‌ زۆربه‌ی هونه‌رمه‌نده‌ عه‌ره‌بییه‌كان گرتووه‌، چه‌ندین جۆر مه‌قاممان هه‌یه‌ وه‌ك به‌یات،حیجاز، هه‌مایۆن،سه‌با، ئۆرفه‌‌و چه‌ندین مه‌قامی تر ئه‌م مه‌قامانه‌ش چه‌ند جۆرێكیان هه‌یه‌ كه‌ من به‌دواداچونم بۆ كردووه‌ نزیكه‌ی په‌نجا جۆرن ئه‌م جۆرانه‌ش چۆن دروست بوون، هه‌ر هونه‌رمه‌ندێك به‌ شیوازی خۆی وتویه‌تی بۆ نمونه‌ ئه‌ڵاوه‌یسیمان سێ ته‌به‌قه‌یه‌ یه‌كه‌م حه‌جه‌م نه‌هاوه‌ند راست ئه‌و سێ مه‌قامه‌ پێكه‌وه‌ ده‌وترێت‌و په‌یوه‌ندی به‌ عه‌ره‌به‌وه‌ نییه‌، ده‌ڵێن مه‌قامی نه‌هاوه‌ند له‌ شاری نه‌هاوه‌نده‌وه‌ هاتوو مه‌قامی ئۆرفه‌ له‌ شاری ئۆرفه‌وه‌ هاتووه‌ مه‌قامی قه‌تار‌و خاو كه‌رمان هه‌یه‌، قه‌تار له‌ بنچینه‌دا گاتار بووه‌ سه‌یربكه‌ چه‌ندین ئامێری مۆسیقیمان هه‌یه‌ ئه‌و ناوه‌یان پێوه‌یه‌ وه‌ك گیتار‌و چه‌ندین نمونه‌ی تر، چه‌ندین مه‌قامی كوردی هه‌یه‌ ته‌عریب كراوه‌‌و به‌ فارس‌و عه‌ره‌ب كراوه‌ چه‌ندین به‌ڵگه‌ش هه‌یه‌ كه‌ مۆسیقا‌و مه‌قامات له‌م كوردستانه‌ی خۆمانه‌وه‌ گه‌شه‌ی كردووه‌‌و وڵاتانی ده‌ووروبه‌ر سودیان لێبنیووه‌، مه‌قامی خاوكه‌رمان هه‌یه‌ كه‌ زیاتر بۆ لای لایه‌ وتراوه‌ حه‌یرانمان هه‌یه‌ له‌سه‌ر مه‌قامی به‌یات ده‌وترێت ده‌بێت زیاتر له‌ ده‌شتا بووترێت حه‌یرانی مه‌جلیسیمان هه‌یه‌ ئای ئایمان هه‌یه‌ زیاتر ده‌ڵێن له‌ هۆزی باجه‌لان ده‌رچووه‌، خورشیدیمان هه‌یه‌ یه‌ك ته‌به‌قه‌مان هه‌یه‌ من وای بۆ ده‌چم هی زه‌مانی ئاوراكانه‌، هۆره‌شمان هه‌یه‌ كه‌ ده‌ دوانزه‌ جۆره‌،مه‌قامات زۆره‌ باسی بكه‌ین به‌ چه‌ندین كۆڕو سیمینار ته‌واو نابێت هیوادارم ئه‌م جۆره‌ كۆڕانه‌ به‌رده‌وام بێت دووباره‌ زۆر سوپاس‌و هیوای سه‌ركه‌وتنتان بۆ ده‌خوازم.
پاشان، میوانه‌كان، چه‌ند سه‌رنج و تێبینیه‌كیان خسته‌ڕوو:
مامۆستا ئه‌نوه‌ر قه‌ره‌داغی:
ئه‌م جۆره‌ هونه‌رمه‌ندانه‌ی وه‌ك كاك عومه‌ر سۆفی به‌داخه‌وه‌ له‌به‌رچاونین‌و ئه‌گه‌ر ده‌ربكه‌ون‌و بهێنرێن كاری جوانیان بۆ بكرێت، دڵنیام له‌و قه‌یرانه‌ نه‌جاتمان ده‌بێت كه‌ قه‌یرانی مۆسیقای كوردییه‌، ئه‌وه‌تا ده‌نگێكی جوان كه‌ هه‌موو ئاماده‌بووان پێی دڵ خۆشن‌و هه‌واسێكی خۆشیان هه‌یه‌ ئه‌مه‌ گۆرانییه‌كی ساندویجی نییه‌ له‌و كاته‌ گوێ بگریت‌و بچیته‌ ده‌ره‌وه‌ هه‌ر یه‌ك له‌ ئێمه‌ به‌ یاده‌وه‌رییه‌كی جوانه‌وه‌ ده‌ڕۆینه‌ ده‌ره‌وه‌ بۆ ئه‌و ده‌نگه‌ جوانه‌، ده‌یان ده‌نگی جوان هه‌یه‌ له‌ به‌ر چاو نین‌و هیوادارین له‌ ڕێگه‌ی ئه‌م ساڵۆنه‌ جوانه‌وه‌ بتوانین بیاناسێنین‌و میدیاكان‌و هونه‌رمه‌ندان بیان بینن‌و كاریان بۆ بكه‌ن، من ئێستا به‌ڵێنم داوه‌ چه‌ند كارێكی جوان ئه‌م جۆره‌ مه‌قامانه‌ بكه‌م كه‌ كاك عومه‌ر وتی‌و باسی كرد‌و ئه‌وه‌ش ده‌گه‌ڕێته‌وه‌ بۆ كه‌ناڵه‌كانی راگه‌یاندن چۆن بڵاوی بكه‌نه‌وه‌.
سه‌باره‌ت به‌ مه‌قامه‌كانیش كاك عومه‌ر سۆفی چه‌ندین زانیاری جوانی وت له‌سه‌ر مه‌قامات بۆچونه‌كان جوان بوون ئه‌و خوێندكارانه‌ی كه‌ ده‌رئه‌چن به‌دواداچون بكه‌ن كاك عومه‌ر به‌و توانا سنورداره‌ی خۆی ئه‌و هه‌موو زانیارییه‌ی كۆكردۆته‌وه‌ ئێمه‌ بۆ سوود له‌و تواناییه‌ی وه‌رنگرین، من شتێكم بیركه‌وته‌وه‌ ساڵی 1985 له‌ توركیا ئه‌و مامۆستایانه‌ی وانه‌یان به‌ ئامێری شه‌عبی ئه‌وته‌وه‌ هه‌مووی مامۆستای ده‌ره‌وه‌ بوون كه‌ له‌ شای‌و بۆنه‌كان باڵابان‌و سازیان لێ ده‌دا ئه‌یان هێنان زانیاریان لێ وه‌رده‌گرن. ئه‌م توانا ده‌نگه‌ش ده‌كرێت سودی لێ ببینرێت‌و ده‌ستخۆشی لێ بكرێت هه‌قی خۆی نه‌دراوه‌تێ له‌ جێگایه‌كی وه‌ك كه‌لار كاره‌كانی سنوردارن‌و هیوادارین له‌مه‌ودوا كاری بۆ بكرێت‌و ده‌ستخۆشی لێ ده‌كه‌م.
مامۆستا ئه‌یوب رۆسته‌م:
ده‌ست‌و ده‌مت خۆشبێت كاك عومه‌ر، ئێوه‌ش ئه‌م كاته‌تان باش له‌ راستیا مامۆستا ئه‌نوه‌ر شتی جوانی باسكرد له‌م كوردستانه‌ی ئێمه‌ چه‌ندین ده‌نگی جوانی وه‌ك كاك عومه‌ر هه‌ن‌و په‌رده‌پۆش كراون ئاوڕیان لێنه‌دراوه‌ته‌وه‌ ئه‌مه‌ له‌ رووی كه‌سیه‌وه‌، بۆ ئاوازو مه‌قامه‌كانیش من شتێك ده‌ڵێم یاره‌سانه‌كان 72 مه‌قامیان هه‌یه‌ هه‌مویان شیعری تایبه‌ت به‌ خۆیان هه‌یه‌ تا ئێستا رۆژێك له‌ رۆژان یه‌ك مه‌قام له‌و مه‌قامانه‌یان له‌ هیچ كه‌ناڵێك راگه‌یاندنه‌وه‌ گوێمان لێی نه‌بووه‌ ئومێد ده‌كه‌م ئه‌وانه‌ی له‌ هونه‌ردا شاره‌زان ئاوڕێك له‌ هونه‌ر یاره‌سان بده‌نه‌وه‌، سه‌رده‌مانێك یاره‌سانه‌كان شتی خۆیان باس نه‌كردووه‌ به‌ڵام ئێستا باسی ده‌كه‌ن‌و هه‌قه‌ ئاوڕێكیان لێ بده‌نه‌وه‌ زۆر سوپاستان ده‌كه‌م.
موعته‌سه‌م نه‌جمه‌دین:
ده‌ست خۆش به‌ڕاستی ئه‌م به‌یانیه‌ جۆش‌و خرۆشێكی جوانت پێداین من بۆ خۆم موعجیبی مه‌قاماتم له‌به‌ر ئه‌وه‌ی خه‌ڵكی لای كه‌ركوكین، من شتێكم له‌ یاده‌ مامۆستا ئه‌نوه‌ر له‌ به‌غدا ساڵی 1989 له‌ مونته‌دا شه‌باب بوو كۆڕێكی كرد له‌سه‌ر گۆرانی كوردی ته‌فسیرێكی جوانی كرد وتی گۆرانیه‌كان تا به‌ره‌و خواره‌وه‌ گه‌رم ده‌ڕۆیته‌وه‌ خاو ده‌بێته‌وه‌ باسی له‌ مه‌قامی گه‌رمیان كرد تا گه‌یاندیه‌ بادینا‌و هه‌ورامان ئێمه‌ كه‌لتورێكی گه‌وره‌مان هه‌یه‌ له‌ نیوان سیاچه‌مان‌و مه‌قاماتی گه‌رمیان‌و كه‌ركوك‌و قسه‌كه‌ له‌سه‌ر ئه‌وه‌یه‌ قوتابخانه‌ی گۆرانیه‌كان جیاوازن ئێمه‌ له‌ناو ئه‌م قوتابخانه‌ی عێراقییه‌ تواوینه‌ته‌وه‌ ون بووین له‌وانه‌یه‌ ئه‌م به‌شێك بێت له‌سیاسه‌ت بۆیه‌ ده‌بێت كاریان بۆ بكه‌ین چۆن جارێكی تر ئه‌و مه‌قامه‌ كوردیانه‌ زیندو بكه‌ینه‌وه‌ ده‌ستت خۆشبێت.
نه‌جم باجه‌لان:
من ده‌ستخۆشی له‌ كاك عومه‌ر ده‌كه‌م كوڕێكی گه‌رمیانی نه‌خوێنده‌وار به‌ڵام به‌رچاو روون‌و رۆشن‌و شاره‌زا كاك عومه‌ر زۆر گه‌وره‌یه‌ له‌ رووی هونه‌ر‌و شیعره‌كانیشه‌وه‌، له‌سه‌ر مه‌قامه‌كان به‌تایبه‌ت خورشیدی كه‌ به‌ فارسی یه‌عنی تیشكی خۆر كه‌ په‌یوه‌ندی به‌ ئاینی میهره‌وه‌ هه‌یه‌ مامۆستا ئه‌یوب شاره‌زایی له‌ ئاینه‌كاندا هه‌یه‌، له‌كاتی تیشكی خۆردا له‌ زستاندا مه‌قامی خورشیدیان وتووه‌، باسی مه‌قامی باجه‌لانت كرد ره‌حمه‌توڵڵای شورتاغ مامۆستای محه‌مه‌د گومباتی نه‌بووه‌، چونكه‌ ره‌حمه‌توڵڵا ساڵی 1873 له‌ كفری له‌دایك بووه‌ چووه‌ بۆ به‌غدا مه‌قامی باجه‌لانی له‌ به‌غدا له‌ گازینۆكان وتووه‌ ره‌شید قۆنده‌رچیش مه‌قامی باجه‌لانی تۆمار كردووه‌ ئه‌وانیش زۆرجیاوازیان هه‌یه‌ له‌م مه‌قامانه‌ی كه‌ ئێستا ئه‌وترێت به‌تایبه‌ت ئای ئای زۆر سوپاستان ده‌كه‌م.
خالید باجه‌لان:
من رۆژنامه‌نوس‌و فیلمسازم له‌ ساڵی 2000 تا 2009 له‌ جه‌زیره‌ عه‌ره‌بی كارمكردووه‌ من خۆشحاڵم كه‌ كاك عومه‌ر به‌شدار بوو له‌ فلێمێكم له‌سه‌ر مه‌قامات ده‌وری ئه‌ساسی هه‌بوو مامۆستا ئه‌نوه‌ریش وه‌ك شاره‌زایه‌ك له‌ بواری مه‌قام به‌شدار بوو، من خاوه‌نی 12 كورته‌ فیلمم له‌سه‌ر باڵابان‌و مه‌قامیشی تیایه‌ له‌ ڤیستیڤاڵێكدا له‌ میصر كه‌ زۆربه‌ی هونه‌رمه‌نده‌كان دانیشتبوون كه‌سێك هات بۆ لامان وتی ئێوه‌ له‌ كوێوه‌ هاتون وتم كوردین وتی من ئاوازدانه‌رم ئێمه‌ ده‌زانین مه‌قامات‌و گۆرانی كه‌ لای ئێوه‌ هاتووه‌ سودمان لێ بینی سه‌باره‌ت به‌ مه‌قامی باجه‌لان له‌ كوێوه‌ هاتووه‌ كێ یه‌كه‌م وتویه‌تی؟ سوپاستان ده‌كه‌م.
عومه‌ر سۆفی:
مه‌قامی باجه‌لان خۆی به‌شێكه‌ له‌ به‌یات به‌ڵام ئه‌و كه‌سه‌ی وتویه‌تی نازانم بلێم كێیه‌ ئه‌و شیعره‌ش كه‌ به‌و مه‌قامه‌ وتراوه‌ به‌سه‌ر هات بووه‌‌و روویداوه‌ به‌ڵام دیار نییه‌ كێ وتویه‌تی. ئه‌وه‌ مامۆستاش لیره‌یه‌ زیاتر ده‌زانی.

مامۆستا ئه‌نوه‌ر قه‌ره‌داغی:
سه‌باره‌ت به‌وناوه‌ له‌ چییه‌وه‌ هاتووه‌، هه‌مومان ناوی ساندویچمان بیستووه‌، كه‌ناوی ئینسانێك بووه‌ وه‌ختی خۆی ئه‌و كه‌سه‌ له‌سه‌ر مێزی قومار بووه‌ داوای خواردنێكی كردووه‌ وتویه‌تی بۆم بخه‌ پارچه‌ سه‌مونێكه‌وه‌ بیخۆم تا چه‌ند رۆژێك به‌و شێوه‌یه‌ داوای خواردنی كردووه‌، هاوڕێكانیش وتویانه‌ له‌ خواردنه‌كه‌ی ساندویچمان بۆ بێنه‌ ورده‌ ورده‌ وتویانه‌ سانده‌ویچمان بۆ بێنه‌ ئیتر ناوه‌كه‌ ئاوهای به‌سه‌ر هاتووه‌ مه‌قامه‌كانیش به‌و شێوه‌یه‌ بووه‌ له‌ناوی شیعره‌وه‌ یان جێگه‌وه‌ ناوه‌كانی وه‌رگرتووه‌ ئێستا بۆ نمونه‌ مه‌قامی نیوه‌شه‌و دیاره‌ حیجازه‌ زۆرێك له‌ مه‌قامه‌كان به‌و شێوه‌یه‌ ناویان وه‌رگرتووه‌.
هه‌ڵۆ حه‌سه‌ن:
من به‌و پێیه‌ی خه‌ڵكی هه‌ولێرم زیاتر حه‌زم له‌ حه‌یرانه‌، ده‌نگی مامۆستا زۆر نایابه‌ باسكرا كه‌ مامۆستا عومه‌ر نه‌خوێنده‌واره‌، به‌ڵام من ده‌ڵێم خوێنده‌واره‌‌و مامۆستاشه‌ ره‌نگه‌ شه‌هاده‌ی به‌رزی نه‌بێت به‌ڵام زۆر خوێنده‌واره‌‌و من به‌ مامۆستای ده‌زانم.
دواتریش‌و له‌ كۆتایی ساڵۆنه‌كه‌ كاك عومه‌ر سۆفی به‌ چه‌ندین مه‌قام كۆڕه‌كه‌ی رازانده‌وه‌‌و دڵی گوێگرانیشی خۆشكرد‌و جۆش‌و خرۆشی دابه‌ ئاماده‌بووان.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

وەكو دیاریی كوردستانی نوێ‌، كۆڕێك لە ئێران و تۆرانەوە، لە خانەقینەوە تا لاچین

لەم دووتوێیەدا رۆژی 18/8/2019، كۆری ناساندن و واژۆكردنی كتێبی (یارو ...