سەرەکی » وتار » چەند سەرنجێک لەسەر بیرەوەرییەکانی دکتۆر فایەق گوڵپی

چەند سەرنجێک لەسەر بیرەوەرییەکانی دکتۆر فایەق گوڵپی

ئەکبەر یەناخی

بۆ برای بەڕێزمان کاک دکتۆر فایەق محەمەد گوڵپی، برای بەڕێز کە کتێبی بیرەوەریەکانتم دەستکەوت، خوێندمەوە. دەستخۆشیت لێدەکەم، خۆت لەناو رووداوەکاندا پەروەردە بوویت.
١- وەک دکتۆرێکی شارەزا و ئازا و دڵسۆز و مەیدانی ناو هێزی پێشمەرگەی کوردستان لە سنووری سەرکردایەتیی یەکێتیی نیشتمانیی کوردستان و مەڵبەندەکانی (یەک- دوو-سێ) لە ناوچە رزگارکراوەکان کە ئەو سنوورانە زۆربەی باشووری کوردستان دەگرتەوە.
٢- وەک کادرێکی سیاسی و رۆشنبیری پێشمەرگە.
٣- وەک بنەماڵەیەکی شەهیدپەروەرو خاوەن فیداکاریی ئاماژەت بە هەموو ناخۆشی و هەڵەکانی شوڕشی کوردستان داوە لە ساڵی ١٩٦١ ەوە تا ساڵی ١٩٨٩.
بەڵام بە پێویستمزانی لەسەر کارەساتی کیمیابارانی هەڵەبجە لە چەند خاڵێکدا روونکردنەوە بدەم کە لە لاپەڕەکانی (٤٣٣) (٤٣٤)ی کتێبەکەتدا ئاماژەت پێکردووە.
یەکەم: لە خاڵی یەکەمدا نووسیوتە «پێش ئازادکردنی هەڵەبجە، پێشمەرگە و بەرپرسی هەموو حزبەکان هەواڵیان بۆ خزم و بنەماڵەکانیان ناردبوو، هەڵەبجە چۆڵ بکەن و بچن بۆ سلێمانی یان بچن بۆ ئێران تا سەرو ماڵیان لە کاریگەریی شەڕێکی وا بپارێزن».
دەمەوێت لێرەدا روونکردنەوە لەسەر ئەو پەرەگرافەی نووسینەکەتان بدەم:
من ئەوکاتە فەرماندەی کەرتی یەکی تیپی ١١ی هەورامان بووم، لە هەموو جووڵەکانی پێشمەرگە لەو شەڕەدا بەشداربووم، زۆربەی کەسوکارو خوشک و براکانم لە هەڵەبجەدا بوون تا کۆنتڕۆڵکردنی شاری هەڵەبجە، هەواڵم بۆ کەسیان نەناردووەو ئاگاداریش نیم هیچ پێشمەرگەیەک هەواڵی بۆ خزمەکانی ناردبێت، ئەگەروا بوایە چالاکییەکە لەلایەن رژێمی بەعسەوە ئاشکرا دەبوو و ئەوە بە خیانەت دەژمێردرێت».
٢- لە خاڵی دووەمدا نووسیوتە نە هێزەکانی ئێران و نە پێشمەرگە چەکی دژە فڕۆکەیان لە دەوروبەری هەڵەبجە دانەمەزراندبوو بۆ پاراستنی خەڵکی هەڵەبجە، ئەمەیان زۆر ڕست و دروستە.
لەخاڵی سێیەمدا نووسیووتە هێزی پێشمەرگە و سوپای پاسداران جلوبەرگی کیمیایییان لەگەڵ خۆیان هەڵگرتبوو و لەکاتی کیمیابارانەکە لەبەریانکردووە، خۆیان پاراستووە، بۆیە یەک کەس نە پێشمەرگە و نە پاسدار لە هەڵەبجەدا بە چەکی کیمیایی نە کوژراون.
دەمەوێت لێرەدا ئەو هەڵ مێژووییەتان بۆ راست بکەمەوە کە لە هەڵەبجەدا ئەم پێشمەرگانەی یەکێتیی نیشتمانیی کوردستان شەهید بوون بە چەکی کیمیایی ئەوەی من بیانناسم و ئاگاداربم ئەم شەهیدانە بوون:
١- شەهید عەلی حەمە ئەمین حامید/ ناسراو بە حاجی عەلی، خەڵکی ناحیەی سیروانە بنەماڵەیەکی دیارن لێپرسراوی ناوچەی شوڕشگێڕان بوو لە سنوری تیپی ی١١ هەورامان کە هەڵەبجە و هەورامان و شارەزوور دەگرێتەوە.
٢- شەهید محەمەد حەمە ئەمین حامید/ پێشمەرگەی ناوچە و برای شەهید حاجی عەلی بوو.
٣- شەهید حەمەجان محەمەد ئەمین محەمەد/ خەڵکی گوندی دەلێن و پێشمەرگەی ناوچە بوو.
٤- شەهید مەحمود محەمەد ئەمین محەمەد/ پێشمەرگەی ناوچە گوندی دەلێن.
٥- شەهید محەمەد کەریم محەمەد/ پێشمەرگە لە کەرتی دووی تیپی ١١ی هەورامان خەڵکی گوندی جەلیلە بووە.
٦- شەهید ئەحمەد رەشید عەبدولڕەحیم ناسراو بە دکتۆر ئەحمەد/ دکتۆری تیپی ١١ی هەورامان بوو.
٧- شەهید ئەحمەد فەتاح عبدول محەمەد ناسراو بە ئاوات/ فەرماندەی کەرتی تیپی ١٧ی زمناکۆ خەڵکی گوندی تریفە بوو.
٨- شەهید عومەر محەمەد عەلی/ پێشمەرگە لە تیپی ١٧ی زمناکۆ، خەڵکی گوندی بەڵخەی قەرەداغ بوو.
٩- شەهید حەبیب لەتیف ئەحمەد/ پێشمەرگە لە تیپی ١٧ی زمناکۆ، خەڵی گوندی بەڵخەی قەرەداغ بوو.
١٠- شەهید عومەر محەمەد سالح کەریم/ کوڕی حەمە شارەزووری خەڵکی سەید صادق، پێشمەرگەی تیپی ١٥ی شارەزوور بوو .
هەروەها چەندین پێشمەرگە بە چەکی کیمیایی برینداربوون دوای چارەسەرکردن و چاکبوونەوە، هێزی ناوچەکانی تری یەکێتی لەم شەڕەدا بەشداربوون ئەگەر شەهیدیان دابێت من ئاگادار نیم، هێزی لایەنەکانی تری بەرەی کوردستانیش لە ئازادکردنی هەڵەبجە و هەورامان و شارەزوور بەشداربوون نازانم چەند شەهید و برینداریان داوە.
٤- لە خاڵی بەشێکی تردا نووسیوتانە دوای ئەوەی کە هەڵەبجە کەوتبووە دەست هێزە کوردییەکان و سوپای پاسدارانی ئێران، خەڵکی هەڵەبجە هەوڵیان دابوو شارەکە چۆڵبکەن، بەرپرسەکانی پێشمەرگە رێگرییان لە خەڵکی مەدەنی کردبوو لەشار بچنە دەرەوە. لێرەشدا دەمەوێت ئەوە روون بکەمەوە کە هەڵەبجە کۆنتڕۆڵکرا، من لەگەڵ شەهیدی سەرکردە کاک شەوکەتی حاجی موشیر کە بەرپرسی هێزەکانی یەکێتیی نیشتمانیی کوردستان بوو پێکەوە چووین بۆ ماڵی حاجی رەشید عەزیز، لەو کاتەدا بەرپرسی هێزەکانی سوپای پاسداران و لەشکری ٩ ی بەدر بە جیهاز پەیوەندییان بە کاک شەوکەتەوە کرد، هاتن بۆلای کاک شەوکەت گلەیی لێ کردن و پێی راگەیاندن کە بڕیاربووە پاسدار نەیەتە ناو هەڵەبجەوە، بەڵام هێزێکی زۆرتان هێناوەتە ناو شارو تاڵانی دەکەن و هەروەها لە هەمان ماڵ برادەرانی حزبی دیموکراتی کوردستانی ئێران هاتن بۆلای کاک شەوکەت لە ژوورێکی تر داماننان کە ئەم بەڕێزانەبوون:
١-(کاک محەمەد وڵەدبەگی بوو) ئێستا لە دەرەوەی وڵاتە.
٢-( دکتۆر مستەفا بوو) ئێستا لە ژیاندا نەماوە.
داوایانکرد هێزەکەی حزبی دیموکرات چۆن دەرباز بکەین؟ دوای هەندێک مشتومڕ کاک شەوکەت پێی راگەیاندن هێزەکەتان ببەن بۆ سەرکەن کە دەکەوێتە نێوان گوندی عەنەب و گوندی دەرەشیش و گوندی تاوێرە و پێی وتن ئەو شوێنە بێ شکە، بەڵام نابێت خۆتان دەربخەن، خۆمان خواردنتان بۆ دابین دەکەین تا هەوڵ دەدەین دەربازتان بکەین هەر لەهەمان ماڵ واتە ماڵی حاجی رەشید عزیز مام وریا براخاس هاواری ئامادە بوو کە کادری کۆمەڵایەتی یەکێتی بوو، کاک شەوکەت پێی وت: مام وریا بچۆ بۆ بەردەم بانکەکە دەڵێن خەڵکی زۆر کۆبووەتەوە، پێیان بڵێ دەبێت شاری هەڵەبجە چۆڵ بکەن لەبەرئەوە حکومەتی بەعس کیمیابارانی هەڵەبجە دەکات، پاشان بە منیشی وت: تۆش بچۆ لەگەڵی کە چووینە بەردەم بانکەکە، هەندێک خەڵکی لێبوو وەستابوون (٣٠-٤٠) کەسێک دەبوون، مام وریا قسەی بۆکردن و پێی وتن: بەڕێزان باپێتان بڵێین، دەبێت شاری هەڵەبجە چۆڵ بکەن لەبەرئەوەی ڕژێمی بەعس هەڵەبجە کیمیاباران دەکات، بچن بۆ لادێکان، دوای قسەکانی مام وریا، چەند کەسێک قسەیان کرد، وتیان رژێمی بەعس هەموو لادێکانی وێرانکردووە هیچ شوێنێک نییە تیایدا بژین، بەم باران و تەڕییە بۆ کوێ بچین؟ یەکێک لەو پیاوانە ناوی (حاجی سەعید بوو دوکانی سەعاتی هەبوو) ئێستا لە ژیاندا نەماوە، لەوەڵامدا مام وریا وتی: گوندەکانی دەوروبەری هەڵەبجە ماون، دەبێت شار چۆڵ بکەن، لەدوای ئەوە من گەڕامەوە بۆ گەڕەکی سەرا و کانی شێخ، زۆربەی خزم و ناسراوەکانمان لەو گەڕەکانەبوون، بەردەوام بە خەڵکمان دەوت شار چۆڵبکەن، بەڵام دەبوایە لە مکەبەرەی مزگەوتەکانەوە بانگەوازمان بکردایە کە شار چۆڵ بکەن، زۆر خەڵکم بینی بەرەو سنووری سازان دەڕۆیشتن، کە شەو داهات (کاک خوڵاوەیس کۆکۆی) ئێستا لە ژیاندا نەماوە منی دۆزییەوەو وتی لەسەر ملەی سازان رێگەمان پێنادەن دەربچین، منیش لەگەڵ کاک خوڵاوەیس بە ئۆتۆمبێلی ئەو چووین کاک شەوکەت و کاک قادر کۆکۆیمان دۆزییەوە لەماڵی خزمێکی کاک قادر نانیان دەخوارد، پێمان وتن لەسەر ملەی سازان رێگریی لە خەڵک دەکەن دەربچێت، لەشکری ٩ی بەدری لێبوو. لەو کاتەدا کاک شەوکەت و کاک قادر و من و کاک خوڵاوەیس چووین بۆسەر ملەی سازان، لەوێدا بازگەیەکیان دانابوو نەیان دەهێشت کەس دەربچێت، کاک شەوکەت سەرکەوت بۆ ناو رەبییەکە، ئەو عەرەبی دەزانی بۆئەوەی تێیان بگەیەنێت کە هەڵەبجە کیمیاباران دەکرێت، من و کاک قادر لەناو خەڵکەکە ماینەوە، پاشان رێگەکەیان کردەوەو خەڵکەکە بەرەو سازان رۆیشتن، زۆربەی ئەو خەڵکە لەوێ بوون، خزم و ناسراوبوون، بەڵام زۆربەیان لە ژیاندا نەماون، تەنها ئەم بەڕێزانە لە ژیاندا ماون:
١- ئەحمەد مستەفا مەحمود پیرە/ حاجی ئەحمدی کۆساوا
٢- محەمەد حسێن مەحمود پیرە/ کۆساوا
٣- مەجرون ئەحمەد فەتاح/ سازان
٤- سەعدون ئەحمەد فەتاح/ سازان
٥- محەمەد فەتاح ساڵح/ سازان
هیوادارم روونکردنەوەکان سوودێک بە کتێبەکەی بە ڕێزتان بگەیەنێت.

 568 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*