سەرەکی » وتار » بارزان شێخ عوسمان‌ » برایم ئەحمەد، ئەو رابەرەی كە هەمیشە…

برایم ئەحمەد، ئەو رابەرەی كە هەمیشە…

برایم ئەحمەد، ئەو رابەرەی كە هەمیشە رێبازەكەی ئاوەدان و فراوانتر دەبێت

هەر لەگەڵ ناوی مامۆستای نەمر برایم ئەحمەد دێتە گوێم یان نووسینێكی ئەو زاتە گەورەیە دەخوێنمەوە، دەستبەجێ رستە بەناوبانگەكەی ناو وتارە بە پێزەكەی كاك نەوشیروانی سەركردەم بیردەكەوێتەوە كە لەرۆژی مەراسیمی شادكردنی جەستەی مامۆستا برایم ئەحمەد بە خاكی دایك لە گردی سەلیم بەگ پێشكەشی كرد و تیایدا ئاماژەی كرد بەوەی كە نابێت بە هۆی ململانێ سیاسییەكانەوە رۆڵی ئەم رۆڵە هەڵكەوتووەی گەلەكەمان فەرامۆش بكرێت، لەوتارەكەیدا كاك نەوشیروان ئەو شەڕە قورسەی بەبیرهێنایەوە كە مامۆستا برایم ئەحمەد بە تەنیا لە رۆژنامەی زمانحاڵی پ د ك دا لە بەرامبەر بەعسییە قەومچییەكان كردی بۆ داكۆكی و سەلماندنی رەوایی مافەكانی كورد لە دەستووری عیراقدا .
بەڵێ مامۆستای نەمر وەك چۆن لە سەرەتا و تافی لاوییەوە خۆی تەرخانكردبو بۆ خزمەتكردنی گەلەكەی لەسەر بنەمایەكی زانستیی و پێشكەوتنخوازیی، كە چووە ناو ژیانی سیاسیشەوە ئیتر هەموو بوارەكانی بیركردنەوەو رووانینەكانی خۆی خستە خزمەتی كوردایەتییەوە كە قوربانیدان بە پلە وەزیفییە قانونییەكانی خۆی كردە قوربانی بەردەوامبونی گۆڤاری گەلاوێژ تا درێژە بەژیانی ئەو گۆڤارە بدات لە پێناوی ئەو ئامانجە پیرۆزو رەوایەی كە بەرنامەی بۆ داڕشتبوو خزمەتی گەلەكەی پێ بكات و بە رزگاریی و سەربەخۆیی شاد بكات .
مامۆستای نەمر لە میانەی تێكۆشانیدا لە نێو هەموو پارتە سیاسییەكانی پێش(پارتی) دا، مەدرەسە و رێبازێكی هاوچەرخی دامەزراندبوو كە دەیان رۆڵەی تیادا پەروەردە ببوو، بۆیە لەگەڵ دامەزراندنی پارتیدا ریزەكانی ئەو حزبە بووە مەیدان و چەقی خەباتی بەشی هەرە زۆری ئەو رۆڵە بە ئەمەكانەی كە بە رێباز و فیكری برایم ئەحمەد گۆش كرابون .
راستگۆیی ئەم كەسایەتییە رووناكبیر و بلیمەتەی گەلی كوردستان لەگەڵ بیروباوەڕو رێبازە سیاسیی و ئینسانییەكەیدا لە بوارەكانی پارێزەریی، ئەدەبیی، رۆژنامەگەریی و سیاسییدا رەنگی دابوەوە كە مۆركێكی پێشكەوتنخوازیی، دیموكراسیی، مرۆڤدۆستیی، دادپەروەریی، یەكسانی، چینایەتیی و هاوچەرخیی لەخۆگرتبوو.رێبازە پیرۆزەكەی مامۆستای نەمر بریتیبوو لە سەلماندنی مافەكانی گەلی كوردستان بەو جۆرەی كە خۆی بڕیاری لەسەر دەدات لە سایەی سیستمێكی دیموكراسییدا كە هەموو چەوساندنەوە نەتەوەیی و چینایەتییەكانی تێدا بنبڕ بكرێت، شان بەشانی گەلان و میللەتانی هاوسێی. رێبازو مەدرەسە ئینسانییە پێشكەوتنخوازەكەی مامۆستا برایمی نەمر لەسەر بنەمای یەك پارچەیی كورد و خاكەكەی بنیات نراوە كە كورد خاوەنی یەك مەسەلەیە بە رەچاوكردنی هەلومەرج و بارودۆخ لەهەر پارچەیەكیدا، ئەویش رزگاریی و ئازادیی و شادبوونە بە مافی چارەنووس.
لەبارەی نەهێشتنی ستەمی رەگەزیی سەر ژنانیش مامۆستای نەمر بایەخێكی تایبەتی بەم لایەنە داوە كە هانی رۆڵەكانی گەل دەدات پێگەی ژنان بە هەند وەربگرن ، ژنانیش خۆیان تەرخان بكەن بۆ چڕكردنەوەی خەباتیان لەپێناوی یەكسانیی و بەشدارییكردنیان لە كایەكانی ژیانی سیاسیی و فەرهەنگیی و كۆمەڵایەتیی و ئابورییدا.
ئەو خاڵە گەشانەی كە دڵۆپێكن لە دەریای رێباز و فیكری مامۆستای نەمر ئاماژەن كە رێبازەكەی برایم ئەحمەد راستوڕەوایە و دەریچەی رزگاریی ئازادییە، مەدرەسەیەكی گشتگیری سەرتاسەرییە بۆ گەلی كوردستان و تەواوی دیموكراتخوازو پێشكەوتنخوازەكانی گەلانی دراوسێ و هاوبەشمان، هەموو پێشبینیی و نەخشەی رێگاكانیش بۆ بەدیهێنانی خواستە رەواكانی گەل كە دەیان ساڵ لەمەوبەر مامۆستای نەمر لە پەیامەكانیدا ئاماژەی بۆ كردوون تائێستاش هەر بەگەشاوەیی ماوە، بۆیە رێبازە پیرۆزەكەی رۆژبەڕۆژ ئاوەدانترو فراوانتر دەبێت .
هەزاران درود بۆ گیانی مامۆستا برایم ئەحمەدی رابەرو رووناكبیر و پارێزەر و رۆژنامەنووس و ئەدیبی گەورەی گەلەكەمان.
هەر رۆشن بێت مەدرەسە و رێبازە ئینسانیی و كوردایەتییە هاوچەرخە پێشكەوتنخوازەكەی.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

بۆ كۆنگره‌، پێویستمان به‌ حه‌كیمێکه‌

به‌ستنی چواره‌مین كۆنگره‌ی گشتیی ی.ن.ك بووه‌ته‌ دیفاكتۆ (ئه‌مری واقیع)، تازه‌ ...