سەرەکی » راپۆرت » رێوشوێنه‌كانی‌ خۆپاراستن له‌ گه‌نده‌ڵی‌

رێوشوێنه‌كانی‌ خۆپاراستن له‌ گه‌نده‌ڵی‌

دادوه‌ر كازم عه‌بد جاسم ئه‌لزه‌یدی‌

و: كورده‌وان محه‌مه‌د سه‌عید

دیارده‌ی‌ گه‌نده‌ڵی‌ بۆته‌ دیارده‌یه‌كی‌ جیهانی‌‌و سنووری‌ وڵاتانی‌ تێپه‌ڕاندووه‌، به‌ راده‌یه‌كیش ئاڵۆزه‌ كه‌ ناسینه‌وه‌ی‌ قورسه‌، سه‌رجه‌م كۆمه‌ڵگه‌كان له‌ هه‌موو سه‌رده‌مه‌كاندا ئه‌م دیارده‌یه‌یان به‌خۆوه‌ بینیوه‌، هه‌ندێك له‌ حكومه‌ته‌كان هه‌وڵیان داوه‌ ته‌نیا له‌ رێگه‌ی‌ ده‌قه‌ یاساییه‌ توندوتۆڵه‌كانه‌وه‌ به‌ره‌نگاری‌ دیارده‌كه‌ ببنه‌وه‌، به‌ڵام بۆیان سه‌ر نه‌چووه‌‌و سه‌ركه‌وتنیان له‌ نێوچاوان نه‌نووسراوه‌، له‌به‌ر ئه‌وه‌ی‌ یاسا به‌ ته‌نیا له‌ توانایدا نییه‌ گه‌نده‌ڵی‌ كۆنترۆڵ بكات، گه‌نده‌ڵی‌ به‌و هه‌موو لق‌و پۆپه‌یه‌وه‌‌و به‌ كۆڵێك هۆكاری‌ جیاجیاوه‌، هه‌روه‌ها له‌به‌ر ئه‌وه‌ی‌ ئه‌وانه‌ی‌ له‌ بواری‌ كارگێڕی‌‌و داراییدا گه‌نده‌ڵی‌ ده‌كه‌ن، له‌ ناو تۆڕێكدا كار ده‌كه‌ن، زۆر به‌ وردی‌ چنراوه‌، تۆڕێكی‌ ئاڵۆز‌و به‌یه‌كداچووی‌ ده‌ستڕۆیشتوو. گه‌نده‌ڵییه‌ گه‌وره‌كان به‌ ته‌نیا یه‌ك كه‌س ناكرێت، به‌ڵكو كۆمه‌ڵه‌ كه‌سانێك ئه‌و كاره‌ ده‌كه‌ن كه‌ پۆستی‌ جیاجیایان هه‌یه‌‌و له‌ شوێنی‌ جیاجیای‌ ده‌وڵه‌تدا كارمه‌ندن‌و كاری‌ سیاسی‌‌و كۆمه‌ڵایه‌تی‌ ده‌كه‌ن، ئه‌م كۆمه‌ڵه‌ كه‌سه‌ جیاوازه‌، له‌ به‌رژه‌وه‌ندی‌‌و حه‌ز‌و خولیادا یه‌ك ده‌رگرنه‌وه‌، به‌ هه‌موو تواناشیانه‌وه‌‌و به‌ رێگه‌ی‌ نایاسایی به‌رگری‌ له‌ به‌رژه‌وه‌ندییه‌كانیان ده‌كه‌ن، له‌به‌ر ئه‌وه‌ ته‌نیا ده‌ق‌و یاساكان ئه‌م دیارده‌یه‌ چاره‌سه‌ر ناكه‌ن، به‌ڵكو ده‌بێ ئه‌و ده‌قه‌ یاساییانه‌ له‌گه‌ڵ ئامرازی‌ تردا كامڵ بكرێن‌و ئاماده‌‌و كۆك‌و ته‌یار بكرێن بۆ رووبه‌ڕووبوونه‌وه‌ی‌ دیارده‌كه‌، زۆر وڵات‌و حكومه‌ت هه‌بوون خۆیان سه‌غڵه‌ت كرد‌و زیاده‌ڕۆییان كرد له‌ پێكهێنانی‌ ده‌سته‌‌و لایه‌نی‌ جیاجیا‌و له‌ ژێر ناوی‌ جیاجیادا. بۆ به‌ره‌نگاربوونه‌وه‌ی‌ گه‌نده‌ڵی‌، به‌ڵام بێئاكام بوون.
ئه‌ركی‌ به‌ره‌نگاربوونه‌وه‌ی‌ دیارده‌ی‌ گه‌نده‌ڵی‌ به‌ ته‌نیا له‌ ئه‌ستۆی‌ لایه‌نه‌ حكومی‌‌و ره‌سمییه‌كان نییه‌، به‌ڵكو ده‌بێ هاووڵاتیان‌و رێكخراوه‌كانی‌ كۆمه‌ڵگه‌ی‌ مه‌ده‌نی‌‌و كه‌رتی‌ تایبه‌ت‌و رێكخراوه‌ نێوده‌وڵه‌تییه‌كان‌و رێكه‌وتنه‌ ئیقلیمییه‌كانیش به‌شداری‌ له‌و رووبه‌ڕووبوونه‌وه‌یه‌دا بكه‌ن، ده‌بێ هه‌موو لایه‌نه‌كانی‌ ئه‌م دیارده‌ مه‌ترسیداره‌ به‌ وردی‌ ده‌ستنیشان بكرێت، له‌گه‌ڵ ده‌ستنیشان كردنی‌ هۆكاره‌ سه‌ره‌كییه‌كانی‌ دروستبوون‌و سه‌رهه‌ڵدانی‌‌و پاشان چاودێری‌ كردنی‌ ورد‌و ده‌ستنیشان كردنی‌ كاریگه‌ریییه‌كانی‌ له‌سه‌ر هه‌موو بواره‌كانی‌ ژیان. ده‌بێ میكانیزم‌و رێوشوێنی‌ پێویست بگیرێته‌به‌ر به‌ جۆرێك ئه‌وه‌ی‌ ده‌قی‌ نووسراوه‌ بۆ به‌ره‌نگاربوونه‌وه‌ی‌ دیارده‌كه‌ بكه‌وێته‌ بواری‌ جێبه‌جێ كردنه‌وه‌، تا لایه‌نه‌ په‌یوه‌ندیداره‌كان توانای‌ رووبه‌ڕووبوونه‌وه‌ی‌ دیارده‌كه‌‌و چاره‌سه‌ر كردنی‌ ریشه‌ییان هه‌بێت بۆی‌‌و هه‌ر له‌ سه‌رچاوه‌وه‌ كه‌ هۆكاره‌كانه‌ رێگه‌ی‌ لێ بگرن نه‌هێڵن بڵاو بێته‌وه‌.
رێكه‌وتنه‌ نێوده‌وڵه‌تییه‌كان كۆمه‌ڵێك رێوشوێنیان ده‌ستنیشان كردووه‌ وه‌ك هه‌نگاوی‌ خۆپاراستن‌و له‌ پێناو رووبه‌ڕووبوونه‌وه‌ی‌ گه‌نده‌ڵی‌، یه‌ك له‌وانه‌ش دانانی‌ ستراتیژێكه‌ له‌ شێوه‌ی‌ نه‌خشه‌ڕێگادا بۆ به‌ره‌نگاربوونه‌وه‌ی‌ گه‌نده‌ڵی‌، ئه‌ویش له‌ رێگه‌ی‌ ده‌ستنیشان كردنی‌ دیارده‌ خراپه‌كان‌و په‌نجه‌ خستنه‌ سه‌ر هۆكاره‌كانی‌ روودانی‌ دیارده‌ی‌ له‌و جۆره‌‌و پاشان هه‌نگاونانی‌ پێویست بۆ خۆپاراستن‌و چاره‌سه‌ری‌ دیارده‌كه‌، هه‌روه‌ها ده‌ستنیشان كردنی‌ ئه‌ركی‌ ده‌زگا په‌یوه‌ندیداره‌كانی‌ تایبه‌ت به‌ به‌گژداچوونه‌وه‌ی‌ گه‌نده‌ڵی‌‌و به‌شداری‌ پێكردنی‌ هه‌رسێ ده‌سه‌ڵاته‌كه‌ی‌ ده‌وڵه‌ت‌و له‌گه‌ڵ ئه‌وانیشدا به‌شداری‌ پێكردنی‌ رێكخراوه‌كانی‌ كۆمه‌ڵگه‌ی‌ مه‌ده‌نی‌‌و ئامرازه‌كانی‌ راگه‌یاندن‌و پسپۆڕان‌و شاره‌زایان.
رێكه‌وتنی‌ نه‌ته‌وه‌ یه‌كگرتووه‌كانی‌ ساڵی‌ 2003ی‌ تایبه‌ت به‌ به‌گژداچوونه‌وه‌ی‌ گه‌نده‌ڵی‌ ده‌ڵێ: پێویسته‌ وڵاتانی‌ به‌شدار له‌م رێكه‌وتنه‌دا ستراتیژێكی‌ گشتگیر دابڕێژن بۆ رووبه‌ڕووبوونه‌وه‌ی‌ تاوانه‌كانی‌ گه‌نده‌ڵی‌، ئه‌ویش به‌ پێی‌ بنه‌ما سه‌ره‌كییه‌كانی‌ یاساكانی‌ خۆی‌‌و به‌هێز كردن‌و هاندانی‌ ئاستی‌ به‌شداری‌ كردنی‌ رێكخراوه‌كانی‌ كۆمه‌ڵگه‌ی‌ مه‌ده‌نی‌‌و كه‌رتی‌ تایبه‌ت‌و به‌رجه‌سته‌ كردنی‌ بنه‌مای‌ سه‌روه‌ری‌ یاسا‌و حوكمڕانی‌ دادپه‌روه‌رانه‌ له‌ رێگه‌ی‌ ده‌ستپاكی‌‌و شه‌فافه‌یه‌ت‌و لێپرسینه‌وه‌وه‌، پرۆسه‌ی‌ خۆپاراستن له‌ گه‌نده‌ڵی‌ ته‌نیا په‌یوه‌ست نییه‌ به‌ دامه‌زراوه‌كانی‌ ده‌وڵه‌ت یان كه‌رتی‌ گشتییه‌وه‌، چونك گه‌نده‌ڵی‌ دیارده‌یه‌ك نییه‌ به‌ ته‌نیا له‌ ده‌زگاكانی‌ حكومه‌تدا هه‌بێت‌و ده‌ربكه‌وێت، به‌ڵكو دیارده‌یه‌كی‌ گشتییه‌‌و له‌ سه‌رجه‌م كه‌رته‌كانی‌ ده‌وڵه‌تدا بڵاو ده‌بێته‌وه‌، به‌ تایبه‌تیش دوای‌ بڵاوبوونه‌وه‌ی‌ تاوانه‌ نێوده‌وڵه‌تییه‌كانی‌ وه‌ك سپی‌ كردنه‌وه‌ی‌ پاره‌‌و بازرگانی‌ مادده‌ هۆشبه‌ره‌كان‌و بازرگانی‌ به‌ چه‌كه‌وه‌.
مه‌ترسی‌ دیارده‌ی‌ گه‌نده‌ڵی‌ گه‌یشتۆته‌ ئاستێك كه‌ له‌سه‌ر ئاستی‌ نێوده‌وڵه‌تی‌ هاوكاری‌‌و چوارچێوه‌ی‌ یاسایی هه‌بێت بۆ به‌ره‌نگاربوونه‌وه‌ی‌ دیارده‌كه‌، رێكه‌وتنی‌ نێوده‌وڵه‌تی‌ تایبه‌ت به‌ به‌ره‌نگاربوونه‌وه‌ی‌ گه‌نده‌ڵی‌ باس له‌وه‌ ده‌كات كه‌ ده‌بێ رێوشوێنی‌ پێویست دژی‌ گه‌نده‌ڵی‌ له‌ ناو كه‌رتی‌ تایبه‌تیشدا بگیرێته‌به‌ر، پێویسته‌ پێوه‌ری‌ تایبه‌ت به‌ ده‌ستپاكی‌ دابنرێت له‌ ناو كه‌رتی‌ تایبه‌تدا‌و هه‌موو پێداچوونه‌وه‌‌و وردبینییه‌كی‌ تایبه‌ت به‌ ژمێریای‌ كۆنترۆڵ بكرێت، تۆماره‌كان به‌ وردی‌ چاودێری‌ بكرێن، بۆ ئه‌وه‌ی‌ خه‌رجی‌ وه‌همی‌ تێدا تۆمار نه‌كرێت. هه‌روه‌ها رێكخراوه‌كانی‌ كۆمه‌ڵگه‌ی‌ مه‌ده‌نی‌ ده‌توانن رۆڵی‌ گرنگیان هه‌بێت له‌ به‌گژداچوونه‌وه‌ی‌ گه‌نده‌ڵیدا، چۆنكه‌ ده‌كرێ توانای‌ ئه‌و رێكخراوانه‌ به‌هێز بكرێت تا بگه‌نه‌ ئه‌و ئاسته‌ی‌ له‌ توانایاندا هه‌بێت بچنه‌ ریزی‌ ئه‌و لایه‌نانه‌وه‌ كه‌ به‌شدارن له‌ به‌ره‌نگاربوونه‌وه‌ی‌ گه‌نده‌ڵیدا، ئه‌وه‌ش له‌ رێگه‌ی‌ ره‌خساندن‌و خوڵقاندنی‌ ژینگه‌یه‌كی‌ ئه‌وتۆ كه‌ هانده‌ر بێت بۆ خه‌ڵك تا به‌شداری‌ چالاكانه‌ بكه‌ن له‌ هه‌موو چالاكییه‌كان‌و به‌ هه‌موو ئامرازێك.
رێكه‌وتنه‌كه‌ی‌ نه‌ته‌وه‌ یه‌كگرتووه‌كان به‌ ده‌ق باس له‌وه‌ ده‌كات كه‌ پێویسته‌ كۆمه‌ڵگه‌ به‌شداری‌ له‌ به‌ره‌نگاربوونه‌وه‌ی‌ گه‌نده‌ڵیدا بكات، هه‌ڵبه‌ت به‌ رێگه‌ی‌ هاندانی‌ تاك‌و گروپه‌كانی‌ ناو كۆمه‌ڵگه‌ی‌ مه‌ده‌نی‌‌و رێكخراوه‌ ناحكومییه‌كان بۆ به‌شداری‌ كردن له‌ رێگرتن له‌ هه‌ر جۆرێكی‌ گه‌نده‌ڵی‌، هه‌روه‌ها له‌ رێگه‌ی‌ هۆشیار كردنه‌وه‌‌و رۆشنبیر كردنی‌ خه‌ڵك سه‌باره‌ت به‌ دیارده‌ی‌ گه‌نده‌ڵی‌‌و هۆكار‌و مه‌ترسییه‌كانی‌. ئه‌وه‌ش ته‌نیا له‌ رێگه‌ی‌ به‌هێز كردنی‌ شه‌فافیه‌ت دێت له‌ بڕیاره‌كانی‌ حكومه‌تدا‌و به‌شداری‌ كردنی‌ خه‌ڵكی‌ تیایاندا له‌گه‌ڵ مسۆگه‌ر كردنی‌ پێدانی‌ زانیاری‌ راست‌و دروست به‌ خه‌ڵك‌و به‌شداری‌ پێكردنیان له‌و چالاكییه‌ رۆژنامه‌وانیانه‌ی‌ جه‌خت له‌وه‌ ده‌كه‌نه‌وه‌ كه‌ نابێ چاوپۆشی‌ له‌ گه‌نده‌ڵی‌ بكرێت.
ئازادی‌ به‌ده‌ست هێنانی‌ زانیاری‌ ده‌بێ به‌هێز بكرێت، به‌ تایبه‌تیش ئه‌و زانیاریانه‌ی‌ په‌یوه‌ستن به‌ گه‌نده‌ڵییه‌وه‌، له‌گه‌ڵ ئه‌وه‌شدا ده‌بێ خه‌ڵكی‌ ئه‌و ده‌زگا‌و لایه‌نانه‌ بناسن كه‌ تایبه‌ت به‌ به‌ره‌نگاربوونه‌وه‌ی‌ گه‌نده‌ڵی‌‌و ئاسانكاریشیان بۆ بكرێت بۆ په‌یوه‌ندی‌ كردن به‌و ده‌زگایانه‌وه‌‌و راگه‌یاندنی‌ هه‌ر جۆره‌ گه‌نده‌ڵییه‌ك كه‌ به‌رچاویان ده‌كه‌وێت، بێئه‌وه‌ی‌ ناسنامه‌ی‌ خۆیان ئاشكرا بكه‌ن، سه‌رباری‌ ئه‌وه‌ش ده‌بێ رێكخراوه‌كانی‌ كۆمه‌ڵگه‌ی‌ مه‌ده‌نی‌ فشار بخه‌نه‌ سه‌ر لایه‌نه‌ ره‌سمییه‌كان بۆ ئه‌وه‌ی‌ پابه‌ند بن به‌ بنه‌ما‌و پێوه‌ره‌كانی‌ شه‌فافیه‌ت‌و ده‌ستپاكییه‌وه‌‌و به‌رده‌وامیش هه‌ڵمه‌تی‌ هۆشیار كردنه‌وه‌ی‌ هاووڵاتیان ئه‌نجام بده‌ن سه‌باره‌ت به‌ به‌ره‌نگاربوونه‌وه‌ی‌ گه‌نده‌ڵی‌.
تێكشكاندنی‌ كه‌لتووری‌ گه‌نده‌ڵی‌ له‌وێوه‌ ده‌ست پێ ده‌كات، كه‌ متمانه‌ له‌ نێوان ئه‌و كه‌سانه‌دا نه‌مێنێت كه‌ پێكه‌وه‌ گه‌نده‌ڵی‌ ده‌كه‌ن، هه‌ر كاتێك ئه‌وه‌ كرا، به‌گژداچوونه‌وه‌ی‌ گه‌نده‌ڵی‌ له‌ قسه‌وه‌ ده‌گۆڕێت بۆ پراكتیك‌و ده‌سته‌‌و ده‌زگاكانی‌ تایبه‌ت به‌ به‌ره‌نگاربوونه‌وه‌ی‌ گه‌نده‌ڵی‌ وه‌ك رێكه‌وتنه‌ نێوده‌وڵه‌تییه‌كان جه‌ختی‌ له‌سه‌ر ده‌كه‌نه‌وه‌، ده‌بێ كارا بن‌و رووبه‌ڕووی‌ گه‌نده‌ڵی‌ ببنه‌وه‌، ئه‌م ده‌سته‌‌و ده‌زگایانه‌ ده‌بێ سه‌ربه‌خۆ بن‌و پێداویستییه‌ دارایی‌و ته‌كنیكی‌ تیابه‌ت به‌و كاره‌شیان له‌به‌ر ده‌ستدا بێت.
دادگا رۆڵی‌ گرنگی‌ هه‌یه‌ له‌ رێگرتن له‌ گه‌نده‌ڵیدا، چونكه‌ حوكمی‌ كۆتایی لای‌ ئه‌وه‌، دادگای‌ عیراقیش كاری‌ كردووه‌ بۆ رووبه‌ڕووبوونه‌وه‌ی‌ گه‌نده‌ڵی‌، ئه‌ویش له‌ رێگه‌ی‌ دامه‌زراندنی‌ دادگایه‌كی‌ تایبه‌ت به‌و بابه‌ته‌‌و پسپۆڕه‌ له‌ بواری‌ لێكۆڵینه‌وه‌ له‌ تاوانه‌كانی‌ گه‌نده‌ڵی‌ كارگێڕی‌‌و دارایی.
دیارده‌ی‌ گه‌نده‌ڵی‌ سیستمێكی‌ كامڵ‌و پێكه‌وه‌ به‌ستراوه‌، ره‌گ‌و ریشه‌‌و هۆكاری‌ خۆی‌ هه‌یه‌، به‌شه‌كان‌و پێكهاته‌كانی‌ ئه‌م دیارده‌یه‌ پێكه‌وه‌ كار ده‌كه‌ن‌و كارلێكیان هه‌یه‌، ناكرێ به‌ ته‌نیا به‌شێكیان بگرین‌و كاری‌ له‌سه‌ر بكه‌ین، چاره‌سه‌ری‌ یاسایی له‌ عیراق بۆ دیارده‌كه‌ ته‌نیا لایه‌نێكی‌ گرتووه‌، ئه‌ویش لایه‌نی‌ سزادانی‌ دیارده‌كه‌یه‌، واته‌ ته‌نیا ده‌ستنیشان كردنی‌ گه‌نده‌ڵییه‌كه‌‌و سزادانیه‌تی‌، ئیتر باسی‌ چۆنێتی‌ خۆپاراستنی‌ نه‌كردووه‌ وه‌ك ئه‌وه‌ی‌ له‌ رێكه‌وتنه‌ نێوده‌وڵه‌تییه‌كاندا هاتووه‌، چاره‌سه‌ری‌ كاریگه‌رییه‌كای‌ تاوانی‌ گه‌نده‌ڵیش هه‌ر له‌ پاره‌ ماشینه‌وه‌‌و به‌رتیل‌و به‌كارهێنانی‌ ده‌سه‌ڵات بۆ به‌رژه‌وه‌ندی‌ تایبه‌ت‌و زۆری‌ تریش له‌ گه‌نده‌ڵییه‌كانی‌ كارگێڕی‌و دارایی، بێ گوێدانه‌ هۆكاره‌كانی‌ پشت ئه‌و دیارده‌یه‌ سوودێكی‌ نابێت‌و ئامانجی‌ به‌ره‌نگاربوونه‌وه‌ی‌ گه‌نده‌ڵی‌ ناپێكێت.
ده‌ستنیشان كردنی‌ هۆكار‌و سه‌رچاوه‌كانی‌ تاوانی‌ گه‌نده‌ڵی‌ له‌ راستیدا هه‌نگاوی‌ یه‌كه‌مه‌ به‌ره‌و چاره‌سه‌ر كردنی‌، هه‌ندێك هۆكاریش هه‌ن كاریگه‌رییان له‌ ته‌شه‌نه‌ كردنی‌ دیارده‌كه‌دا هه‌یه‌، وه‌ك ئاستی‌ رووناكبیری‌ كۆمه‌ڵگه‌‌و ویستی‌ سیاسی‌ بۆ چاكسازی‌‌و هانده‌ری‌ ئایینی‌، هه‌ر كاتێكیش ئه‌م كاركردانه‌ چالاك‌و جێگیر بن پرۆسه‌ی‌ به‌ره‌نگاربوونه‌وه‌ی‌ گه‌نده‌ڵی‌ ئاسانتر ده‌بێت. هه‌روه‌ها رووبه‌ڕووبوونه‌وه‌ی‌ دیارده‌ی‌ گه‌نده‌ڵی‌ ده‌بێ گشتگیرانه‌ بێت‌و هه‌موو لایه‌نه‌كان بگرێته‌وه‌، له‌سه‌ر هه‌موو ئاسته‌كانیش كاری‌ بۆ بكرێت، ده‌بێ ستراتیژێكی‌ درێژمه‌ودای‌ بۆ بگیرێته‌به‌ر، به‌ر هه‌موو شتێكیش ده‌بێ بیر له‌ چاره‌سه‌ری‌ هۆكاره‌كانی‌ گه‌نده‌ڵی‌ بكرێته‌وه‌، له‌ هه‌مووشی‌ گرنگتر ئه‌وه‌یه‌ ده‌بێ به‌ره‌نگاربوونه‌وه‌ی‌ گه‌نده‌ڵی‌ مۆركێكی‌ نیشتمانی‌ هه‌بێت‌و به‌ پێی‌ سروشتی‌ كۆمه‌ڵگه‌‌و جوگرافیای‌ ئه‌و ده‌وڵه‌ته‌ ستراتیژی‌ بۆ دابڕێژرێت، له‌به‌ر ئه‌وه‌ی‌ هه‌ر وڵاته‌و تایبه‌تمه‌ندی‌ خۆی‌ هه‌یه‌، هه‌ر له‌به‌ر ئه‌وه‌شه‌ كه‌ پلان‌و ستراتیژی‌ وڵاتێك بۆ وڵاتێكی‌ تر نابێت، چونكه‌ ژینگه‌ی‌ سه‌رهه‌ڵدانی‌ گه‌نده‌ڵییه‌كه‌‌و هۆكاره‌كانی‌ ته‌شه‌نه‌ كردنی‌ جیاوازن.

سایتی‌ ئه‌نجومه‌نی‌ دادوه‌ریی

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

قه‌یرانی‌ دارایی روو له‌ عیراق ده‌كات

اندبیندنت و: کوردستانی نوێ-ی هەفتانە له‌ راپۆرتی‌ كۆمپانیا زه‌به‌لاحه‌كان‌و راوێژكار‌و ...