سەرەکی » وتار » پاداشتێ كوردا پشتی ژناڤبرنا داعشێ

پاداشتێ كوردا پشتی ژناڤبرنا داعشێ

عەدنان محەمەدتاهیر زێباری- ئاكرێ

داعش دەست پێكا هێرشێن خوە دا وەكی ئاگری مەزن بوو، چ هێزەكێ نەشیا خوە بەر ڤێ ئاگری بگریت، ژ دەمەكێ كورتدا شیا «دەوڵەت»ەكا مەزن دامەزرێنن سەر ئەردێ سوریا و عیراق، لەشكرێن ڤان وەڵاتان نەشیان خوە بەر هێزا داعش راگرن، سەرەڕاێی هەبونا چەكێ مەزن و پێشكەفتی دەستێ ڤی لەشكرێ دا.
ب تنێ هێزێن كوردستانی شەرڤان ل روژئاڤا و پێشمەرگە ل باشور شیا خوە راگرن و سەنگەر ب ساناهی چول نەكرن، لێ ژ بەر نەبوونا چەكێ پێتڤی دەستی دا، مەترسی دروست بوو، پشتی وەڵاتێن جیهانێ بڕیاردای بەشەك ژ هاریكاریێن لەشكری بنێرن بۆ هێزێن كوردیی، ئیدی داعش ژ دەوڵەتێ بەرەڤ نەمانێ چوو، هنارتنا ڤی چەكی دەمەكێ دا بو كو هێزا داعشێ گەهشتبووە وی ئاستی كە رێكخراوا دڕندە گەف ل زوور وەڵاتان دكر، وەلاتێن جیهانێ ئەڤ هێزە ب مەترسی بوو سەر خوە ناساند.
هێزێن كوردی ل سەر ئەردێ ب نوێنەراتیا جیهان شەڕ دكر، ل ڤان شەڕاندا زیانێن مەزنێن مرۆیی و مادی هەبوون، ب سەدان كەس ل پێشمەرگە و شەڕڤان ‌و سڤیلێن كوردستانی بوینە قوربانی، ژێرخانا ئابووریی وێران بوو، جورەكێ باژێرەكێ وەكی كوبانێ بتەمامی هەرفت، وەڵاتێن هەڤپەیمان لەشكرێ وان ب تنێ جهێن بڕیارێ بوون و كێمترین زیان گەهایێ، ل راستیدا مفایێ وەڵاتێن بیانی شەڕێ داعش گەلەك زێدەتر بوو ژ زیانێن گەهایێ، ب تایبەت مفایێن ئابووریی و سیاسی .
ناڤبرنا دەوڵەتا داعش و رووخاندنا پایتەخێ وان ل سەر دەستێ هێزێن كوردستانی، كارەكێ مەزن بوو ل مێژووێ دا هاتە تۆماركرن، ئەو مەترسی راكر سەر خەڵكێ وان وەڵاتان كە تەنانەت ژ دیتنا ڤیدیۆیێن ڤی شەڕیدا خەو ل چاڤا نەدەكەت.
پشتی ڤێ خەباتا زۆر، وەسا هزر دهاتە كرن كە ژ بەر ڤێ قوربانیا كو كوردان دایی، ئیدی دێ جیهان رێز ڤێ قوربانیێ گریتن، ئەگەر هەر چ نەبیت چ ئاستەنگیا دروست ناكەن كە كورد وان دەڤەرێن خوە رێڤەبەن، ئەوێن كو ب خوێن رزگاركری.
لێ مخابن زوور پێ نەچوو دەمێ ریفراندوما هەرێما كوردستان ریێ راستەقینە زوور وەڵاتان دەركەفت، بەشەك ژ وان وەڵاتان گلوپێ كەسك هەڵكر كە لەشكرێ عیراق ڤان هەمی دەڤەرێن رزگاركری كۆنترۆل بكەن، جارەكا دی پێشمەرگە زڤری خالا دەستپێكی، دەمەكێ دا هزاران پێشمەرگە بینە قوربانی ل ڤان دەڤەرا.
ئەڤرو رۆژئاڤایێ كوردستان ب هەمان دەرد و سیناریۆیا باشورێ كوردستان و خراپتر دەرباز دبیت، پشتی هەلكرنا گلوپی كەسك ژ لایێ هەڤپەیمانان بو توركیا، عەفرین هات داگیركرن، ئەڤرو هێرشەكا دی یا هەمان رەنگ هەیە بو داگیركرنا دەڤەرێن دی یێن كوردستانی.
هەڤپەیمانێن كوردان بتایبەت ئەمریكا بەردەوام كورد ب دۆست و هەڤپەیمان ددان ناسین، دەمێ گەرمە گەرما شەڕێ داعش دا، لێ ئەڤرۆ بێ هەڵویستە، دوستەكێ خراب و بێ وەفا و بەرژوەندیخاز دەرچوو .
ئەنجامێن دیماهیكێ شەڕێ داعش هێدی هێدی دەردكەڤیت كە ژ بلی هندێ كورد ب پاڵەوان و شەڕكەرێن زیرەك دهێنە ناسین چ تشتەكێ دی زێدە نەبوو، زیانێن مەزنێن مرۆیی و مادیی بو كوردان و بەرهەمیش بۆ وان ئەوێن مالێن خوە رینشتی.
یا جهێ ئەسەف و بەحسكرنە زوور خالێن خراب ناڤا دەسەڵاتدارێن كوردی هەیە، تایبەت ناڤ مالا كوردیی كە تەژی ناكۆكیە، هەر ڤێ وەكریە پشتی وان سەركەفتنێن لەشكری دگەل تیرۆر، دەست هاتی رێكێن سیاسی نەشێین دروست سەرەدەری بكەین و بپارێزین، خوە ئەگەر هەلبژارتنا كێمترین زیان با، هەر ڤێ وەكریە نیڤەیا ئەردێ باشوور و نوكەش ئەردێ روژئاڤا دەست بدەین، ڤیابا دەمێ بووری رێككەفتن و براینیەكا مكوم ناڤبەرا حكومەتا هەرێم و رێڤەبەریا روژئاڤا پەیدا ببا كە هەردوو پێتڤی هەڤدو بین، لێ مخابن ئەڤی دەمێ نازك، ئەڤە نەهات دیتن. عینادییا كوردا ل سیاسەتێ دا دگەل هەڤدو، خوەش باوەڕیا كوردان، دووڕووییا هەڤپەیمانان، ئەڤە هەمی كێشەكا مەزنن كو ئەڤرو گەهشتینە ڤی حالی، دەستێ ڤاڵا و تژی خوێن دەركەفتین.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*