سەرەکی » هەواڵ » پیرۆزبایی گەلاوێژخان بۆ هاوسەرۆكانی یەكێتی

پیرۆزبایی گەلاوێژخان بۆ هاوسەرۆكانی یەكێتی

پیرۆزبایی بۆ هەردوو جگەرگۆشەكانم بافڵ و لاهور

كاكە بافڵ گیان
زۆر بە گەرمی و لە ناخی دڵمەوە پیرۆزبایتان لێدەكەم بەبۆنەی ئەو متمانە زۆرەی كە لەناو خەباتگێڕانی یەكێتی نیشتمانی كوردستاندا بەدەستان هێناو بوونە هاوسەرۆكی ئەو حزبەی كە بۆ 44 ساڵ دەچێت لە پێناو بەدەستهێنانی مافی ڕەوای گەلی كوردستاندا تێدەكۆشێت.
ئەم متمانەیە هەر سەرۆكایەتی حزبێكی تێكۆشەرو خەباتگێڕ نییە، بەڵكو شەرەف و بەرپرسیارێتییەكی یەكجار گەورەیەو ئیدی نەك هەر یەكێتیەكان، بەڵكو هەموو گەلی كوردستان چاوی ئومێدی لەسەرتانەو دەبێت ئێوەش لەئاستی ئەو متمانەو شەرەف و بەرپرسیاریەتییەدا بن. ئەوەشتان لە بیر نەچێت كە ئێوە چوونەتە جێگەی مام جەلال، ئەو مام جەلال-ەی كە یەكێكە لەكەڵەپیاوەكانی مێژووی كوردو كودستان و جیهان و دەبێت مامیش شانازیتان پێوەبكات و دڵنیابن سەركەوتنی ئێوە ڕۆحی پاك و بەرزی ئەویش ئاسودە دەكات.
كوڕە شیرینەكانم كاكە بافڵ و كاكە لاهور، كە هیچ جیاوازییەك بۆ من نییە و هەردووكتان وەك كوڕی خۆم و بەیەك چاو سەیرتان دەكەم:
مێژووی پڕ لەسەروەریی كوردو پاشان یەكێتی نیشتمانی كوردستان و ئینجا بنەماڵەكەی خۆتان بكەن بەسەرچاوەی راپەڕاندنی ئەركە قورسەكەی سەرشانتان و دەست لەناودەست لەگەڵ تێكۆشەرەكانی تری یەكێتی و ئازادیخوازان و دیموكراتخوازانی ڕێگەی خەباتی نەتەوایەتی و پشت ئەستور بەكۆمەڵانی خەڵكی كوردستان، درێژە بەخەباتی نەپساوەو بەڕێبازەكەی مام بدەن.
ئێمە لەتوانا و لێهاتوویی ئێوەی هەڵكەوتوو دڵنیاین و وەك هەمیشە سەرمان بەرزو بڵندە.
ئێوەش سەربەرزو سەربڵند بن.

گەلاوێژ

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*