سەرەکی » دۆسێ » عیراق، كۆرۆنا ژیانی گشتی تێكدەدات

شوێنە گشتییەكان دادەخرێن

عیراق، كۆرۆنا ژیانی گشتی تێكدەدات

لەگەڵ بڵاوبوونەوەی ڤایرۆسی كۆرۆنا لە بەغدا و هەندێك لە پارێزگەكانی تری عیراق، ژیانی گشتی لەنێو كۆمەڵگەی عیراقیدا شڵەژان و تێكچوون بەخۆوەدەبینێت، ئەمەش لەكاتێكدایە كە هێشتا بڵاوبوونەوەی ئەو نەخۆشییە لە چوارچێوەی ئەو كەسانەدا قەتیسبووە كە لە وڵاتی ئێران گەڕاونەتەوە.
دامەزراوە پەیوەندیدارەكان لە عیراق، بۆ بەرگرتن بە بڵاوبوونەوەی ڤایرۆسی كۆرۆنا، چەند رێوشوێنێكی توندییان گرتۆتەبەر و ئەو رێوشوێنانەش لە هەندێك كاتدا كاریگەرییان لەسەر رەوشی ژیانی ئاسایی هاووڵاتیان دروستكردووە و هەندێك لە ئازادییە تایبەتییەكانیان كۆتوپێوەند كردووە، وێڕای لەگەڕخستنی گردبوونەوە ئاینی و كۆمەڵایەتی و بازرگانییەكان.

بڕیار لەبارەی نوێژی هەینییەوە دەدرێت
لەگەڵ بەرزبوونەوەی ڕێژەی ئەو كەسانەی تووشی ڤایرۆسی كۆرۆنا بوون لە عیراق، لیژنەی فەتوای عیراق بڕیاریدا نوێژی هەینی ئەنجام نەدرێت.
لیژنەی فەتوای عیراق لە بەیاننامەیەكیدا لە 28ی شوباتی 2020 رایگەیاندبوو، ئەمڕۆ موسڵمانان دەتوانن لە ماڵەكانی خۆیان نوێژی هەینی بكەن و نەچنە مزگەوت، بەتایبەت بە ساڵاچوان و منداڵان و ئەوانەی بەرگری لەشیان بێهێزە و ئەگەری تووشبوونیان بە ڤایرۆسی كۆرۆنا زیاترە».
هەر لە بەیاننامەكەدا هاتبوو» نابێت خاوەن دەرمانخانەكان و كۆگا و خاوەن مۆڵ و بازار و دوكاندارەكان بارودۆخەكە بقۆزنەوە نرخی كەلوپەل و شتومەكەكانیان بەرز بكەنەوە، هاوكاریكردن لەسەر خێر و چاكە لە ڕووی شەرعەوە ئەركە لەسەر موسڵمانان.
«ئەو كەسانەی هەڵگری ڤایرۆسەكەن یان گومانیان لەسەرە، ڕێگەپێدراو نییە و حەرامە تێكەڵی خەڵك و شوێنە گشتییەكان ببن و پێویستە سەردانی مزگەوت نەكەن و لە شوێنی تایبەتی نوێژ بكەن تاكو چاك دەبنەوە»، ئەمەش لە بەیاننامەكەی لیژنەی فەتوادا هاتووە.
هەروەها لیژنەی فەتوا ئاماژە بە پەكخستنی قوتابخانە و ناوەندەكانی خوێندن دەكات و دەڵێت ئەو كارە لە ڕووی شەرعەوە ڕێگەپێدرا و دروستە، ئەمەش بە ئامانجی ڕێگریكردن لە ڤایرۆسی كۆرۆنا.
پێشتر كۆمەڵی فقهی عیراقی سەر بە گەورە زانایانی بانگخواز و فەتوا، فەتوایەك لەبارەی ڕێوڕەسمەكانی نوێژی جەماعەت دەردەكات كە هاوكاتە لەگەڵ بڵاوبوونەوەی ڤایرۆسی كۆرۆنا.
كۆمەڵی فقهی عیراقی سەر بە گەورە زانایانی بانگخواز و فەتوا، لە فەتوایەكیدا ڕایگەیاندبوو”زانایان لەسەر ئەوە كۆكن كە عوزر هەیە بۆ ئامادەنەبوون لەنوێژی هەینی و ئامادەبوون لە نوێژی جەماعەت بۆ ئەو كەسەی نەخۆشی ڕێگریی لێدەكات بۆ ئامادەبوون لە مزگەوت، یان بڵاوبوونەوەی نەخۆشی یان ترسان لە بڵاوبوونەوەی هیتد.. پێویستی ئەنجامدانی نوێژی هەینی نامێنێت لەگەڵ پێداگری لەسەر پێشكەشكردنی وتارەكانی”.
هەر لە فەتواكەدا هاتووە”مۆڵەت دەدرێتە ئەوانەی بەساڵاچوون یان منداڵن یان بەرگری لەشیان لاوازە، تا ئامادەی نوێژی جەماعەت نەبن لە مزگەوت”.
هەروەها كۆمەڵی فقهی عیراقی سەر بە گەورە زانایانی بانگخواز و فەتوا، دەڵێت”ئەو كەسەی نوێژی لەسەرە و عوزری هەیە، دەتوانێت نوێژی هەینی وەك نوێژی نیوەڕۆ لە ماڵەوە بەجێبگەیەنێت”.

راگرتنی مامەڵەكانی پاسپۆرت و كارتی نیشتمانی
بەڕێوەبەرایەتی گشتی ڕەگەزنامە و باری شارستانی و پاسپۆرت و مانەوەی حكومەتی فیدراڵی بڕیاریدا بە ڕاگرتنی پێدانی سەرجەم بەڵگەنامەكان بە هاووڵاتیان بۆ ماوەی یەك هەفتە.
لیوای مافناس، نەشئەت ئیبراهیم خەفاجی، بەڕێوەبەری گشتی ڕەگەزنامە و باری شارستانی و پاسپۆرت و مانەوەی حكومەتی فیدڕاڵی لە 28ی شوباتی 2020 لە بەیاننامەیەكدا رایگەیاندبوو، بڕیاریان داوە بە ڕاگرتنی كاری پێدانی بەڵگەنامە فەرمییەكان لەسەرجەم فەرمانگەكان (ڕەگەزنامە، پێناسی باری شارستانی، كارتی نیشتمانی، كارتی زانیاری، پاسپۆرت، مانەوە) لە سەرجەم فەرمانگەكان لە بەغدا و پارێزگاكانی دیكەی وڵات.
بە وتەی خەفاجی» بڕیارەكە لە ڕۆژی 1ی ئاداری 2020 دەستپێدەكات و بۆ ماوەی 7 ڕۆژ بەردەوام دەبێت».
هەروەها دەڵێت» بڕیاری ڕاگەیاندنی پشووە بۆ پاراستنی هاووڵاتیان و كارمەندانە لە بڵاوبوونەوەی ڤایرۆسی كۆرۆنا بەهۆی قەرەباڵغ بوونی فەرمانگەكان، بەڵام بڕیارەكە حاڵەتە زۆر پێویستەكان و نەخۆشی ناگرێتەوە».

داخستنی شوێنە گشتییەكان
هەر لە چوارچێوەی هەوڵەكانی بەرگرتن لە بڵاوبوونەوەی ڤایرۆسی كۆرۆنا، وەزارەتی تەندروستیی عیراق چەند ڕێوشوێنیكی بۆ خۆپاراستن لە ڤایرۆسی كۆرۆنا گرتەبەر لەو بارەیەوە رایگەیاندبوو كەلە 27ی شوباتەوە تا 7ی ئاداری 2020، شوێنە گشتییەكان، هۆڵەكانی سینەما، قاوەخانە و یانە كۆمەڵایەتییەكان دادەخرێن.
وەزارەتی تەندروستیی عیراق لەبارەی پشوو لە ناوەندەكانی خوێندن رایگەیاندبوو، بە هەمان شێوە لە 27ی شوباتەوە تا 7ی ئاداری 2020 لە ناوەندەكانی خوێندن پشوو دەبێت.
هەروەها قەدەغەی گەشتكردنیشی بۆ هەریەك لە وڵاتانی (چین، ئێران، ژاپۆن، كۆریای باشوور، تایلەند، سەنگاپورە، ئیتاڵیا، كوەیت و بەحرەین) ڕاگەیاندبووە، هاتنی هاووڵاتییانیشی لەو وڵاتانەوە بۆ عیراق قەدەغەكردبوو، جگە لە نێردە دیپلۆماتییەكان.
جگە لەو ڕێوشوێنانەش وەزارەتی تەندروستی عیراق ڕایگەیاندبوو كە پشكنینی تەندروستیی بۆ هەموو گەشتیارێك دەكرێت كە ڕوو لە عیراق دەكات و گردبوونەوەكانی خەڵكیش قەدەغە دەكات.

print

 47 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*