سەرەکی » چاوپێکه‌وتن »  تا ئێستا لە سلێمانی 51 تووشبووی ڤایرۆسی كۆرۆنا پاش وەرگرتنی چارەسەر، چاكبوونەتەوە و گەڕێنراونەتەوە ماڵەوە

دكتۆر یاد نەقشبەندی وتەبێژی تەندروستیی سلێمانی بۆ کوردستانی نوێ:

 تا ئێستا لە سلێمانی 51 تووشبووی ڤایرۆسی كۆرۆنا پاش وەرگرتنی چارەسەر، چاكبوونەتەوە و گەڕێنراونەتەوە ماڵەوە

تیمی تەندروستیی چین بە گرنگییەوە باس لە تەندروستیی سلێمانی دەكات

دیداری: گۆران قەرەداغی

دكتۆر یاد نەقشبەندی وتەبێژی تەندروستیی سلێمانی، لە دیدارێكی تەلەفۆنیدا لەگەڵ كوردستانی نوێ، قۆناغەكانی روبەڕوبونەوەی ڤایرۆسی كۆرۆنای خستەڕوو، سوپاسگوزاری هەمووانیش بوو كە پابەندی رێنماییە تەندروستییەكان بوون و وتی: ئەگەر پابەندیی هاووڵاتیان نەبووایە بە جێبەجێكردنی رێنماییە تەندروستییەكان‌و مانەوەیان لەماڵەوە، ئەوا بەرگرتن لە بڵاوبوونەوەی ڤایرۆسی كۆرۆنا زۆر قورس دەبوو.

قۆناغ و ئامادەكارییەكانی تەندروستیی سلێمانی

لەسەرەتای قسەكانیدا، وتەبێژی تەندروستیی سلێمانی، ئاماژەی بەقۆناغەكانی ئامادەكاری‌و روبەڕبونەوەی ڤایرۆسی كۆرۆنا كردو رایگەیاند: لەگەڵ دەركەوتنی ڤایرۆسی كۆرۆنا لە شاری ووهانی وڵاتی چین، وەك تەندروستیی سلێمانی، ئامادەكارییمان دەستپێكرد لە خۆپارێزی، دوای بڵاوبوونەوەی ڤایرۆسەكەش لەچەند وڵاتێكی ناوچەكە بەتایبەت لە ئێران، ئامادەكارییەكانمان چووە قۆناغێكی باشترەوەو ئەوەی پێویست بوو بۆ بەرگرتن لەبڵاوبوونەوەی ڤایرۆسەكە، كاری لەسەر كراو پێویستییەكان ئامادەكران‌و قۆناغی چارەسەری دەستپێكرا.

لەبارەی ئامادەكارییەكانی قۆناغەكانی چارەسەرییش، وتی: چەند بنكەو نەخۆشخانەیەكمان تایبەت كرد بە تووشبووانی كۆرۆنا وەك نەخۆشخانەكانی دكتۆر شەهید ئاسۆی چاوو سەرچنار و بنكەی تەندروستیی عەلی ناجی، كە زیاتر لە 100 قەرەوێڵە ئامادەكرا لەگەڵ پێویستییەكانیدا لەسەرەكیترینیان ئامێری هەناسەدان (ڤێنتیلەیتەر)، هەروەها سەنتەری فریاكەوتنی خێرای تەندروستی (122) خرایە حاڵەتی ئامادەباشییەوە، وتیشی: لە هەڵمەتی بەرەنگاربوونەوەی كۆرۆنادا ژمارەیەكی زۆر لە دكتۆر و كارمەندی تەندروستی و یەكە ئیداری و كارگێڕی و خزمەتگوزارییەكان و كرێكارانی پاككەرەوە لە ناوەندە تەندروستییەكاندا، پێشمەرگە ئاسا، خۆیان تەرخانكرد و تا رادەیەكی زۆر توانراوە بەر بە بڵاوبوونەوەی ڤایرۆسەكە بگیرێت، ئامارەكانیش ئەو راستییە دووپاتدەكەنەوە، هەروەك پێویستیشە ئاماژە بە هەوڵ و خەمخۆریی چەند بەڕێوەبەرێتی ‌و سەنتەر و ناوەندو رێكخراوێك لە سلێمانی بدرێت كە هاوكاربوون لە دابینكردنی پێویستییەكان لە قۆناغەكانی خۆپارێزی ‌و چارەسەری، بەسوپاسیشەوە زانكۆی سلێمانی بەهاوكاریی دەزگای مرۆیی مام ، سامپڵی ماددەی (ڤی تی ئێم) بۆ پشكنینی تاقیگەیی توشبووانی كۆرۆنایان دابینكرد.

ئەرك و قۆناغە سەركەوتووەكانی روبەڕوبونەوە

لەدرێژەی قسەكانیدا، وتەبێژی تەندروستیی سلێمانی، دڵنیایی دا لەسەر ئەوەی كە ئامادەكاریی پێویست كراوە بۆ رێگرتن لە بڵاوبوونەوەی ڤایرۆسەكە و باسی لەوە كرد ئێستا كە لە قۆناغی روبەڕوبونەوەی ڤایرۆسەكەداین، سلێمانی‌و هەڵەبجەو ئیدارەكانی گەرمیان و راپەڕین‌و قەزا و ناحیەكان، كراون بە چەند زۆنێكەوەو لەهەر زۆنێكیشدا ژمارەیەكی زۆر تیم لەلایەنە پەیوەندیدارەكان بەشدارن، ئەوەش بەو ئامانجەی هەر كەسێك كە هەڵگری ڤایرۆسەكە بێت یان ئەو كەسانەی بەركەوتەیان لەگەڵیدا هەبووبێت، لە كۆمەڵگە جیابكرێنەوەو كەرەنتین بكرێن، یان ئەو كەسانەی لە دەرەوەی هەرێم دەگەڕێنەوە، توانراوە زۆربەی زۆریان كەرەنتین بكرێن و پشكنینیان بۆ كراوە، دەشتوانم بڵێم ئەوە یەكێك بووە لە رێگە زۆر سەركەوتووەكان و توانراوە كۆنتڕۆڵی تەشەنەسەندن و بڵاوبوونەوەی ڤایرۆسەكە بكرێت، لەو چوارچێوەیەشدا وەفدی تەندروستیی وڵاتی چین لە سەردانیاندا بۆ سلێمانی، سەرسامیی خۆیان بە سەركەوتوویی‌و توانایی پزیشكیی و تەندروستیی سلێمانی و چۆنێتی رێگریی‌و روبەڕوبونەوەی ڤایرۆسی كۆرۆنا، دەربڕی و تەئكیدیان كردەوە كە”رێكارەكانی روبەڕبونەوەو خۆپارێزیی لەسلێمانی زۆر سەركەوتوو بووە”.

51 تووشبوو لە سلێمانی چاكبوونەتەوە

سەبارەت بە بارودۆخی تەندروستیی تووشبووان و ژمارەی چاكبووەكان، د.یاد، وتی: تا رۆژی 1/4 لە سلێمانی 51 تووشبوو بە ڤایرۆسی كۆرۆنا، پاش وەرگرتنی چارەسەر، چاكبوونەتەوەو گەڕێنراونەتەوە ماڵەوە، كە ئەوەش بەڵگەیە بۆ سەركەوتنی تەندروستیی سلێمانی و هەروەها ئەو كەسانەشی كە هەڵگری ڤایرۆسەكەن لەباری چارەسەریدان‌و بارودۆخی تەندروستییان جێگیرەو مەترسییان لەسەر نەماوە، بەخۆشحاڵییشەوە تووشبووانی كۆرۆنا لە سلێمانی، بەهۆی ئەوەی توانراوە زوو پشكنینیان بۆ بكرێت و دەستنیشان بكرێن، هیچ یەكێكیان پێویستی بە ئامێری هەناسەدانی دەستكرد (ڤێنتیلەیتەر) نییە، ئەوانیش دوای دڵنیابوون لە وەرگرتنی چارەسەری تەواوەتی‌و چاكبوونەوەیان، رەوانەی ماڵەوە دەكرێنەوە.

هەوڵە سەركەوتووەكانی لیژنەی باڵای ئۆپەراسیۆنەكانی سلێمانی

لەكۆتایی قسەكانیشیدا، وتەبێژی تەندروستیی سلێمانی، ئاماژەی بە هەماهەنگییەكان و هەوڵە سەركەوتووەكانی پارێزگاو قائیمقامیەتی سلێمانی و هێزەكانی ئاسایش و ناوخۆ و تیمەكانی تەندروستی و خۆپارێزی‌و تەواوی فەرمانگەكانی پەیوەست بەم بارودۆخە كرد، كە لەچوارچێوەی لیژنەی باڵای ئۆپەراسیۆنەكانی پارێزگای سلێمانی بۆ روبەڕوبونەوەی كۆرۆنا لەئەركدا بوون، هەروەها داوای لەهاووڵاتیان كرد وەك چۆن لەسەرەتاوە لەماڵەكانیان مانەوەو رێكارەكانی خۆپارێزییان جێبەجێكرد، بەهەمان شێوە لەم قۆناغەداو تا ئەوكاتەی مەترسیی ڤایرۆسی كۆرۆنا نامێنێت، پابەندی رێنماییەكان بن.

print

 263 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*