سەرەکی » وتار » ئاوات كۆكه‌یی » لە یادی چوارساڵەی كۆچی دوایی وەسفیە..

لە یادی چوارساڵەی كۆچی دوایی وەسفیە..

لە یادی چوارساڵەی كۆچی دوایی وەسفیە بەنی وەیس دا

فلمێكی دیكۆمێنتاری بۆ دایكی شەهیدان

ئەمڕۆ چوارساڵی تەواو بەسەر كۆچی دوایی دایكی شەهیدان، سەركردە و خەباتگێڕ و ژنە تەوارێكی چاپووك، مامۆستا وەسفیە بەنی وەیسدا تێدەپەڕێت.

مامۆستای نەمر جگە لە دیوە سیاسی و خەباتگێڕییەكەی جا چ خەباتی سیاسی یان خەباتی ژنان و بوارەكانی دیكەی مەدەنی، هەر خۆی بەسروشت كەسایەتییەكی جوان و میهرەبان بوو، خاوەن سەلیقەی كێشكردنی خەڵك بوو بەلای خۆیدا، لە راسیتدا ئەو دایك بوو بۆ هەمووان و سۆزی ئەو دایكایەتییەشی بە یەكسانی دەبەخشییە هەمووان.

هێندە زوو دەچووە دڵ و دەروونی بەرامبەرەكەیەوە لە یەكەمجاری دیداریدا وا هەستدەكرا لەمێژە دۆست و ئاشنایە.

خاڵێكی دیكەی گەشی ژیانی ئەو سەركردەیە ئەوەبوو زۆرترین تێكەڵاوی و هاتوچۆی لەگەڵ ئەندامانی خوارەوەی حزبەكەی و لەگەڵ خەڵكی هەژار و بەتایبەتیش كەسوكاری شەهیداندا بوو، لەسەر ماف و داخوازییەكانیان زۆرترین بەدەنگەوە هاتنی هەبوو، راستگۆیانە و بەمەبەستی جێبەجێكردنیان تێدەكۆشا، هەندێكجار روویداوە كاروباری كەسێكی هەژار كە لە سنووری ئەركی ئەویشدا نەبووە، ئەو مشوری خواردووەو بەپێی توانای خۆی بۆی جێبەجێ كردووە تا ئەو رادەیەی كە ماندووبوونێكی زۆری بەبێ كۆڵدان بە ئاكام گەیاندووە، ئەمانە و زۆر كارو خەسڵەتی دیكەی ئەو سەركردە ژنە كە لە ژمارە نایەن.

هەربۆیە دایكی شەهیدان و دایكی هەمووان و مەرگیشی بووە پرسەی هەموومان.

فلمێك بۆ ژیانی وەسفیە
هەر بەبۆنەی چوارەمین ساڵیادی كۆچی دوایی خاتوو وەسفیە بەنی وەیس دایكی شەهیدانەوە، سەعات 9ی شەوی هەینیی رابردوو لە كەناڵی كوردسات فیلمێكی دیكۆمێنتاری تایبەت لە بارەی خەبات و تێكۆشان و وێستگە گرنگەكانی ژیانی ئەو ژنە سەركردە و خەباتگێڕەی گەلەكەمان و یەكێتیی نیشتمانیی كوردستان نمایشكرا و تا رادەیەك فیلمەكە توانیی ببێتە ئاوێنەی بەشێكی خەبات و خەسڵەتە جوانەكانی مامۆستا وەسفیە.

شایەنی باسە فیلمەكە بەرهەمی دەزگای میدیایی كوردسات-ەو كارێكی شایستەشە بە ژیان و خەباتی دایكی شەهیدان خاتوو وەسفییە بەنی وەیس.

ژیاننامەكەی
سەركردەی نەمر وەسفیە بەنی وەیس عەلی ناسراو بە مامۆستا وەسفیە یان (دایكی شەهیدان)، ساڵی 1951 لە خێزانێكی نیشتمانپەروەر و زەحمەتكێشی پاڵێوگەی نەوتی ئەڵوەن لە گوندی ( بانمیل)ی شاری خانەقین لەدایكبووە، ساڵی 1959 ماڵیان بۆ شاری خانەقین گواسترایەوە، هەر ئەوساڵە چۆتە خوێندنگە و قۆناغی سەرەتایی لە قوتابخانەی (خەدیجە كوبرا)ی تێكەڵاو دەستپێكرد، خوێندنی ناوەندی و دواناوەندیشی لە ئامادەیی خانەقینی كچان تەواوكردووە.

ساڵی 1971 لەبەشی زمانی ئینگلیزیی زانكۆی بەغدا وەرگیرا، بەڵام بەهۆی جیاكاریی نەتەوەیی و مەزهەبییەوە لەلایەن رژێمی ئەوسای عیراقەوە، گواسترایەوە بۆ زانكۆی سلێمانی- كۆلێژی ئاداب بەشی زمانی كوردی، ساڵی 1975 ئەو بەشەی زانكۆی سلێمانی تەواوكرد، هەر لەو قۆناغەی خوێندندا پەیوەندیی بە كۆمەڵەی ماركسی لینینی كوردستانەوە كرد كە دواتر بووە كۆمەڵەی رەنجدەرانی كوردستان.

ساڵی 1974 دوای ئەوەی كە دوو برای پەیوەندییان بە شۆڕشەوە كرد، دەزگا ئەمنییەكان لە خانەقین هەڵیان كوتایە سەر ماڵیان، دایك و باوكیان بەدیلكراوی دوور دەخەنەوە بۆ گوندی ( هۆرێن و شێخان)ی بناری بەمۆ و دەستیان بەسەر خانووەكەیاندا گرت و هەموو كەلوپەلەكانیان هەڕاج كرد.

ساڵی 1976 بە لەكەلار بە مامۆستا دامەزرا، بەڵام لەسەر بڕیاری رێكخستن خۆی‌ بۆ (تاسڵوجە)ی سلێمانی گواستەوە كە رژێمی عیراق ئۆردوگای بۆ كوردە دوورخراوەكانی باشوور و ناوەڕاستی عیراق لێ دروست كردبوو، ئەوانە رێیان پێدرابوو بگەڕێنەوە بۆ كوردستان، بەڵام ئۆردوگای‌ تاسڵوجەیان وەك شوێنی‌ نیشتەجێبوون بۆ دیاری‌ كردبوون، بەمجۆرە جگە لە ئەركی وەك مامۆستا، ئەركی رێكخستنیشی لە تاسڵوجە بەڕێوە دەبرد.

ساڵی 1977 پاش دامەزراندنی رێكخراوی لەیلا قاسم بۆ رێكخستنی ژنان، لێپرسراوێتی و سەرپەرشتیكردنی یەكێك لە دوو بەشەكەی ئەم رێكخراوەی پێ سپێردرا.
هەر ئەو ساڵە چالاكییەكانی خۆی بۆ بەغدا گواستەوە و پەیوەندیی بە ملازم (جوامێر سایەمیر)ەوە كرد.

لە سەروبەندی پێكهێنانی رێكخراوی (هەڵۆی سوور)دا كە ئەركەكەی گواستنەوەی شەڕ بوو بۆ ناو ماڵی دوژمن لەبەغدا، رۆڵێكی دیاری لە جێبەجێكردنی ئەركە لۆجستیكییەكانی وەك گواستنەوەی چەك و نامە لە سلێمانییەوە بۆ بەغدا پێ سپێردرا.

نموونەیەك لە چالاكییەكانی: یەكەم چالاكی رێكخراوی هەڵۆی سوور كە بۆ سزادانی تاوانبار (ع.ف) بوو، مامۆستا وەسفیە دەمانچەیەك و دوو نارنجۆك و چەند پاكەتە فیشەكێكی لە سلێمانییەوە گەیاندۆتە دەستی شەهید ملازم جوامێر لە بەغدا.

ساڵی 1978 لەكاتێكدا ئیمام خومەینی لە نەجەفەوە دەستی بە جموجوڵ لەدژی رژێمی شای ئێران كردبوو، دوو نامەی رەوانشاد سەرۆك مام جەلال-ی سكرتێری گشتیی‌ یەكێتیی نیشتمانیی كوردستانی‌ گەیاندۆتە دەست ئایەتوڵڵا خوئیی مەرجەعی شیعە لە كەربەلا و ئیمام خومەینی لە نەجەف.

ساڵی 1982 یەكەم ژن بوو لە رێكخستنی شارەكانەوە بەشداری لەیەكەمین كۆنفرانسی یەكێتیی مامۆستایانی كوردستان لەگوندی بالیسان بكا.

ساڵی 1986 لەلایەن دەزگا ئەمنییەكانەوە فەرمانی گرتنی بۆ دەرچوو، بۆیە رووی كردە شاخ و هاوشانی هاوسەرەكەی، عەلی شامار، ژیانی پێشمەرگایەتیی دەستپێكرد.

لەكاتی دەستپێكردنی شاڵاوی ئەنفالەكان بۆ سەر دۆڵی جافەتی و ناوچەی مەرگە، ماوەیەك لەناو شاری سلێمانی خۆی حەشارداو دواتر پەیوەندیی بە هاوسەرەكەیەوە كرد‌ و لەگوندی (كانی دینار) گیرسایەوە.
دوای دامەزراندنی یەكێتیی ژنانی كوردستان لە سەقز لە ساڵی 1989، لەو رێكخراوەدا كاری كردو لە یەكەم ژمارەی گۆڤاری (تەوار)ی ئۆرگانی رێكخراوەكەدا بەناوی خوازراو بابەتی بڵاوكردەوە.

لەكاتی كۆڕەوی ساڵی 1991، رۆڵی دیاری هەبوو لە كۆكردنەوەی كۆمەك بۆ ئاوارەكانی سەرسنوور و ناو ئێران، هەر ئەو ساڵەش گەڕایەوە بۆ گەرمیان و بووە ئەندام لە مەڵبەندی دووی كەركوك.

لەماوەی نێوان ساڵانی 1993- 2003دا بەرپرسیارێتی لقی كەركوكی یەكێتیی ژنانی كوردستانی گرتە ئەستۆ و ماوەیەكیش كارگێڕی مەڵبەندی گەرمیان بوو.

ساڵی 2003 بە جێگری لێپرسراوی مەڵبەندی خانەقین هەڵبژێردرا.

ساڵی 2006 لە هەڵبژاردنی مەڵبەندەكانی ی.ن.ك-دا لەئاستی مەڵبەندی خانەقیندا (بەزۆرینەی دەنگ) دەنگی یەكەمی بەدەستهێنا و بە جێگری یەكەمی لێپرسراوی ئەو مەڵبەندە دەستنیشانكرا.

ساڵی 2010 لە سێیەمین كۆنگرەی یەكێتیی نیشتمانیی كوردستان لە سلێمانی، بە ئەندامی سەركردایەتیی هەڵبژێردرا و هەر ئەو ساڵە، دوای پێكهێنانەوەی مەكتەبەكان، بە لێپرسراوی مەكتەبی شەهیدان دیاریكرا.

بەداخەوە، دوای كاروانێكی زۆر لە خەبات و تێكۆشان و ماندووبوون لەپێناوی گەل و خاكەكەیدا، شەوی 25\26/4/2016 دا لەسەر رێگای سلێمانی – دەربەندیخان لە نزیك ناحیەی (وارماوا)ی سەربە قەزای شارەزوور، بەهۆی رووداوی هاتوچۆوە گیانی لەدەستداو چووە ریزی هاوڕێ شەهیدەكانییەوە، رۆژی دواتر لە رێوڕەسمێكی شایستەدا لە خانەقین بە خاك سپێردرا.

print

 145 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*