سەرەکی » راپۆرت » ماوەی هەفتەیەکە چەندین گەڕەكی هەولێر روبەڕوی گرفتی كەم ئاوی بوونەتەوەپەڕە 2

ماوەی هەفتەیەکە چەندین گەڕەكی هەولێر روبەڕوی گرفتی كەم ئاوی بوونەتەوە

هەولێر، تەها عەبدوڵڵا

ماوەی چەند رۆژێكە لەگەڵ هاتنی شەپۆلێكی گەرما بەشێك لە گەڕەكەكانی هەولێر روبەڕوی گرفتی كەم ئاوی بوونەتەوە، بەتایبەتی ئەو گەڕەكانەی پشت بە بیرەكان دەبەستن، بەوهۆیەوە بە ناچاری پەنا بۆ كڕینی ئاو بەتانكەر دەبەن، بەرپرسانی بەڕێوەبەرایەتیی ئاویش رایدەگەیەنن: هۆكارەكەی كەمی كارەبای نیشتمانییە.

هاووڵاتیان: ماوەی هەفتەیەكە كێشەکە دروستبووە

ئیسماعیل خدر دانیشتووی گەڕەكی رۆشنبیری شاری هەولێر باسی لە گرفتەكانی كەم ئاوی چەند رۆژی رابردوو دەكات و بە كوردستانی نوێ-ی راگەیاند: ماوەی نزیكەی هەفتەیەكە گرفتی کەم ئاوی دروستبووە، بەتایبەتی بۆ ئەم وەرزە كە پلەكانی گەرما لەبەرزبونەوەیە.

وتیشی: بەهۆی نەبوونی ئاو بەناچاری بە تانكەر ئاو دەكڕین ئەمەش بارگرانییەكی ترە لەگەڵ نەبوونی مووچە و كارو كاسبی، چونكە یەك بەرمیل ئاو بە دە هەزار دینارە .

هەروەها محەمەد عەبدوڵڵا لە گەڕەكی ژیان وتی: ماوەی هەفتەیەكە گەڕەكەکەمان تووشی گرفتی كەم ئاوی بۆتەوە.

جگە لەوانە ژمارەیەك گەڕەکی دیکە بەتایبەت گەڕەكەکانی دەرەوەی سەنتەری شار بەهەمانشێوە روبەڕوی گرفتی كەم ئاوی بوونەتەوە، بۆیە داوا لەلایەنی پەیوەندیدار دەكەن ئەو كێشەیەیان بۆ چارەسەر بكات.

هۆکارەکەی نەبوونی کارەبای نیشتمانییە

مەسعود كارەش بەڕێوەبەری گشتیی ئاوی هەرێم بە كوردستانی نوێ-ی راگەیاند: راستە لە هەندێك گەڕەكی هەولێر هاووڵاتیان تووشی كەمی ئاو بوونەتەوە، بەتایبەتی ئەو گەڕەكانەی سەرچاوەی ئاوەكەیان بیرە، چونكە ئەوانە لەگەڵ كارەبای نیشتمانی كاردەكەن، هەركاتێك كارەبا نەبێت، بیرەكانیش كارناكەن، وتیشی: هەوڵەكانمان دەستیپێكردووە بۆ ئەوەی چارەسەری بكەین، ئەویش بەدانانی هەندێك مۆلیدە و سوود وەرگرتن لە مۆلیدە ئەهلییەكان، هەروەها زیادكردنی بڕی كارەبای نیشتمانی بۆ ئەو بیرانە بۆ ئەوەی تاڕادەیەك گرفتەكە كەمبكەینەوە. لە ھەوڵەکانیشمان بەردەوام دەبین بۆ چارەسەرکردنی کێشەکە بەتەواوەتی.

print

 235 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*