سەرەکی » وتار » نه‌وزادى موهه‌ندیس‌ » چۆنێتی بەستنی كۆنگرە لە پەیڕەوی ناوخۆدا

بەرەو بەستنی كۆنگرەی گشتی چوارهەمی یەكێتیی نیشتمانیی كوردستان

چۆنێتی بەستنی كۆنگرە لە پەیڕەوی ناوخۆدا

9
ئەوەی لە ئێستادا تێبینی دەكرێت لەناو خۆی یەكێتی نیشتیمانی كوردستاندا،ئەوەیە كە زۆرێك لە هەڤاڵان باس لە چۆنێتی بەستنی كۆنگرە دەكەن كە بە چ شێواز و میكانیزمێك سازبدرێت و هەریەكە تێڕوانین و بیرۆكە و پێشنیازی جیاواز پێشكەش دەكەن،وەكو ئەوەی كە یەكەم جار بێت لەناو یەكێتیدا كۆنگرە ببەسرێت هەرچەندە یەكێتی لەبەستنی كۆنگرە گشتیەكانیدا كەمتەرخەم و كەمترین كۆنگرەی سازداوە، لەكاتێكدا لە پەیڕەوی ناوخۆی كۆنگرەی سێهەمیدا زۆر بە ڕوونی میكانیزمی بەستنی كۆنگرەو ڕێژە و ژمارەی ئەندامانی كۆنگرە و پڕۆسەی دیاریكردنی هەڤاڵان و ئەو كەس و لایانەنەی كە دەبنە ئەندامی كۆنگرە دیاریكردوە، ئیدی چ پێویست دەكات كە شێوازی نوێ‌ كە تاقینەكەراوەتەوە بێنینە گۆڕێ‌ و لەسەر خۆمان تاقیبكەینەوە، لەكاتێكدا كە ئەم قۆتاغەی یەكێتی و هەڤاڵانی پیادا گوزەر دەكات قۆناغێكی زۆر هەستیار و پڕ لە كێشە و ناكۆكی و ململانێی توندە كە هەندێك جار چۆتە چوارچێوەی ناڕەوایەتیشەوە،بۆیە هەر میكانیزمێك كە ببێتە هۆكاری ئەوەی كە ڕای جیاوازی تر دروست بكات ،باشتر وایە كە تاقینەكرێتەوە، خۆ ئەگەر ئەزمونێكی سانا و ساكاری حیزبە سیاسیەكانی تری هاوشێوەی یەكێتی هەیە لە ئەوروپادا وەك سوسیال دیموكراتەكان و بگونجێت لەگەڵ ئاستی تێگەیشتن و تیڕوانینی ئێمەی یەكێتیەكاندا و ببێتە هۆكاری چارەسەركردنی جیاوازیەكان بەهەرحاڵ دەكرێت پیادە بكرێت.

نزیكەی 16 ساڵی خایاندوە
ئاشكرایە كە یەكێتی نیشتیمانی كوردستان ئەزمونێكی هەیە چ لە شاخ و چ لە شار لە گرتن و سازدانی كۆنفرانسەكانی ((كۆمەڵە و شۆڕشگێڕان )) لەشاخ و كۆنگرە و پلینۆمەكانی شاریشدا.بەداخەوە یەكێتی نیشتیمانی كوردستان لەماوەی ئەم 42 ساڵەی خەباتیدا تەنها 3 كۆنگرەی گشتی بەستوە كە دەبوایە گەر هەر 3 ساڵ جارێك كۆنگرەی ببەستایە ئێستا دەبوو لانی كەم 14 كۆنگرەی گشتی ئاسایی سازبدایە ،بەڵام بەداخەوە لەسەردەمی شاخدا كە ماوەی نزیكەی 16 ساڵی خایاندوە یەك كۆنگرەشی نەبەستوەو تەنها لەدوای ڕاپەڕینی بەهاری ساڵی 1991وە یەكەم كۆنگرەی گشتی لە 27/1 تا 14/2 / 1992 لە(( سلێمانی هۆڵی ڕۆشنبیری و هەولێر لە هۆڵی میدیا))گرێداوە و كۆنگرەی دووەهەمیش لە 31/1 تا 3/2/2001 لە سلێمانی(( هۆڵی كارگەی جلوبەرگ)) گرێداوە و كۆنگرەی سێهەمیش لە 1/6 تا 12/6/2010 لە ((سلێمانی تەلاری هونەر)) گرێداوە.

پێویست وابوو كە لەقۆناغی شاردا
بەم شێوەیە یەكێتی لەدوای ڕاپەڕینی ساڵی 1991وە لەلایەك گەشەكردن و گەورەبوونێكی نائاسایی بەخۆوە بینی لە ئەنجامی سەركەوتنی ڕاپەڕین و گرتنە دەستی دەسەڵات لە هەرێمی كوردستاندا و دواتریش گرتنە دەستی دەسەڵات و بەشداریكردنی لە دەوڵەتی عێراقی فیدڕاڵیشدا لەدوای ساڵی 2003ولەلایەكی تریشەوە فراوانبوونی سنوری جوگرافیای كار وژمارەی ئەندام و لایەنگر و ئۆرگانەكانیەوە،توشی جۆرێك لە شڵەژان و تێكچوون لەكار و ڕێكخستن لە نێوماڵەكەیدا ڕوویدا بەتایبەتیش دوای سەرقاڵ بوونی ڕەوانشاد هەڤاڵ مام جەلال بەهۆی چوونی بۆ بەغداد و وەرگرتنی پۆستی سەرۆك كۆماری، كەهەموو ئەمانە بونە هۆی كەڵەكەبونی سەرجەم كێشە و گرفت و جیاوازیەكان، هەربۆیە پێویست وابوو كە لەقۆناغی شاردا لانی كەم یەكێتی چەندین كۆنگرەی ئاسایی گشتی ببەستایە،چونكە كۆنگرە تاڕادەیەكی باش دەبوە هۆی گۆڕانكاری و كەمبونەوەی گرفتەكان و بەرتەسككردنەوەی جیازایەكانیش.

دیاریكردنی ژمارەی ئەندامانی كۆنگرە
بۆیە لە ئێستادا بەڕای بەندە،گەر هەمووان ڕێكبكەون لەسەر ئەو میكانیزمەی كە لە پەیڕەوی ناوخۆی كۆنگرەی سێهەمدا هاتوە لە بەشی سێهەم(( كۆنگرە)) و لەمادەكانی(( 14 و15و16 و 17 و18 و 19و 20 ))كە تایبەتن بە دیاریكردنی ژمارەی ئەندامانی كۆنگرە كە نابێت لە ((1000))هەڤاڵ زیاتر بێت و میكانیزمی بەشداربوانی كۆنگرەشی لەڕێگەی هەڵبژاردنەوە دیاریكردوە بۆ سەرهەم ئەندامانی كۆنگرە لەڕێگەی لیژنەی باڵای ئامادەكاری كۆنگرە و دەزگای هەڵبژاردنی یەكێتیەوە و هەروەهاش دیاریكردنی ئەرك و دەسەڵاتەكانی كۆنگرەشی بە ڕوونی دیاریكردوە، بەڕای بەندە چیدی پێویست ناكات كە میكانیزمی نوێ‌ دابهێنین بۆ بەستنی كۆنگرە.و كاتی پێوە بكوژین،چونكە لەدەستدان و بەفیڕۆدانی كات لە زیانی یەكێتیە،چونكە كەمترین ماوەمان لەبەردەمدایە بۆ هەڵبژاردنەكانی عێراق و كوردستانیش.كەهەموان لەسەر ئەو خاڵە كۆكن كە دەبێت كۆنگرەی چوارەهەم لە پێش ئەو هەڵبژاردنانەوە سازبكرێت.

ئەم دەستورە گرنگە بەهەند وەرناگرن
ئەوەی كە دەمێنێتەوە و بەلای هەموانەوە زۆر گرنگ و هەستیارە بەداخەوە تەنها هەڵبژاردنی ئەنجومەنی سەركردایەتی و سكرتێری گشتیە و ئیدی هەڤاڵان بیر لە دانانی بەرنامە و پڕۆگرام و پەیڕەوێكی واقعی و زانستیانە و ڕوون و ئاسان ناكەنەوە كە زۆر لە پڕۆسەی هەڵبژاردنەكە گرنگترە، چونكە تەنها پرۆگرام و پەیڕەوی ناوخۆ ژیانی حیزبایەتی ڕێك دەخات و سكرتێری گشتی و مەكتەبی سیاسی و ئەنجومەنی سەركردایەتی و تەواوی ئۆرگانەكان هەموان پێویستە پابەندی ئەو پرۆگرام و پەیڕەوە بن و كار بۆ سەرخستن و جێبەجێكردنیشیان بكەن، بەڵام هەموان ئەم دەستورە گرنگە بەهەند وەرناگرن و تەنها فۆكس و ڕووناكی و بیر و پلانیان چڕدەكەنەوە لەسەر هەڵبژاردنی ئەنجومەنی سەركردایەتی، ڕاستە هەڵبژاردنی سەركردایەتیەكی نوێ‌ كە نوێنەرایەتی هەموان بكات لە ناوچە و پارێزگاكان و توانا و نەوەی دێرین و نوێش جێگای ببێتەوە و خاوەن ئەزمون و بڕوانامەكانیش جێگەی شیاویان پێببڕێت وخاوەن توانا و لێهاتوویی و هوشیاری سیاسیش بتوانن بگەنە سەركردایەتی،لەگەڵ بەشداریكردنی ڕێژەیەك كە كەمتر نەبێت لە 20% بۆ ژنانی بەتوانا و خاوەن ئەزمون و لێهاتوویی.گرنگە لانی كەم بۆ ڕابەرایەتی كردنی یەكێتی بۆماوەی 3 ساڵی ئایندە.

ئامانجی هەموان هەستانەوە و نوێبونەوەی یەكێتی بێت
بۆیە دەبێت ئەم كۆنگرەی گشتی چوارهەمە كە لەكات و ساتێكی زۆر هەستیار و چارەنووسازدا هەوڵی سازكردنی دەدرێت،لەهەموو ڕووەكانەوە بەرنامەیەكی تۆكمە و سازانێكی ڕاستەقینە و ڕاستگۆیانەو هەڤاڵانەی لەسەر بكرێت كە تەنها ئامانجی هەموان هەستانەوە و نوێبونەوەی یەكێتی بێت دوور لە بەرژەوەندیە كەسی و تایبەتی دەستە و گروپ و ناوچەگەرێتی ناڕەوا، با هەموان بەتواناترین و بە ئەزمونترین و دڵسۆزترین كادرەكان ببەینە ناو كۆنگرە و لەناویشیاندا شیاوترینیان هەڵبژێرین بۆ سەركردایەتی، باهەموان ئەم هەڵبژاندنانە بكەینە نمونەیەكی جوانی دیموكراسی ناوخۆیی لەناو یەكێتیدا و دواتریش پەخشی بكەینەوە بۆ ناو ژیانی سیاسی و ناو كۆمەڵگای كوردەواریش،با هەموان بە شۆڕشگێڕانی ماندووی دوێنێ‌ و خەباتكارانی نەوەی نوێی ئەمڕۆشەوە هەموان پێكەوە درێژە بەكار و خەباتی یەكێتی بدەین و بتوانین یەكێتی بە پتەوی و بەهێزی و لەدەسەڵاتدا بیهێڵینەوە،ئەوەش تەنها بەگەڕانەوە دەبێت بۆ ناو جەماوەر و خزمەتكردنیان و گوێگرتن لەداواكاری و پێشنیازەكانیان و گرنگی دان بەبێ‌ جیاوازی بەهەموو ناوچەكان بەتایبەتیش گوند و ناوچە دوورە دەست و هەژارەكان ،گرنگیدان دەبێت بە هەڤاڵانی بیر و بازوو،بە جۆشدانەوەی سەرەتاكانی شۆڕش و یەكێتیمان دەبێت،بەوەلاوەنانی ناكۆكی و ململانێ‌ ناڕەواكان دەبێت،بە بەرز ڕاگرتنی تەنها بەرژەوەندی یەكێتی دەبێت لەسەروو بەرژەوەندیە تایبەتەكانەوە،بەدووركەوتنەوە دەبێت لە خۆخۆری و ناتەبایی نێوان ڕیزەكان و دووركەوتنەوە لەگەندەڵی و ناعەدالەتی دەبێت،بۆئەوەی هەموان پێكەوە ڕیزكان و نێوماڵی یەكێتی توند و پتەو و بەهێز و یەكگرتوو بكەینەوە،چونكە بەبێ‌ یەكێتیەكی بەهێز هەموو كوردایەتی لاواز و بچوك دەبێتەوە،بۆیە پێویستە هەمیشە ئامژژگاریە بەنرخەكە ڕەوان شاد هەڤاڵ مام جەلال لەبیر نەكەین كە دەیگوت((سێ‌ یەكێتیەكە بپارێزین،یەكێتی ناو یەكێتی و یەكێتی نێوان پارتە سیاسیەكانی كوردستان و یەكێتی ڕیزەكانی گەلەكەمان،كە بەردی بناغەی هەموو سەركەوتن و برایەتیەكن))، بۆیە لەم كۆنگرەیەدا جگە لە پاراستنی ڕیزەكان و نێوماڵی یەكێتی هیچ ڕێگە چارەیەكی ترمان لەبەردەمدا نیە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*