سەرەکی » راپۆرت » ئامادەکردنی:بورهان ئەمین » تەقینەوەکەی بەیروت لە میدیای ئەڵمانیادا

تەقینەوەکەی بەیروت لە میدیای ئەڵمانیادا

تەقینەوەکەی لوبنان دەنگی دایەوە و بووە رووداوێکی تراژیدی سەردەمی کۆرۆنا و وێرانی و بانگهێشتی هاوکاریی مرۆیی و دەستی یارمەتی بۆ ئەم وڵاتە، هەمان کات زۆرێک لە میدیا و چاودێرانی سیاسی و شارەزایان لۆمەی سیاسەتمەدار و دەسەڵاتداران دەکەن، لە گوێنەدان بە مەترسییەکانی سەر ژیان و چارەنووسی کۆمەڵگە و هاووڵاتیانیان.

لای خۆیەوە، میدیای ئەڵمانیا بە بایەخەوە باسی ئەو رووداوە دڵتەزینە دەکا و حکومەتیش بڕیاریداوە خێرا دەستی یارمەتی بۆ ئەو وڵاتە و لێقەوماوانی درێژ بکات، لەگەڵ ئەوەشدا لە پەنای هەواڵ و راپۆرتە رۆژنامەوانییەکاندا، پلار دەگرنە دەسەڵاتدارانی لوبنان، کە بێخەمبوون لە ژیان و سەلامەتیی هاووڵاتیانیان.

حکومەت کەمتەرخەمە
رۆژنامەی تاگس شپیگل لەو بارەیەوە نووسیویەتی: ئەو رووداوە نە هەڕەمەکی و نەسروشتیشە، بەڵکو لە ئەنجامی نەبوونی حکومەت روویداوە. رۆژنامەکە دەپرسێت، چۆن دەبێت هەزاران تۆن لەو مادە کیمیاییە مەترسیدارە بۆ ئەو ماوە دوور و درێژە لە ناو جەرگەی شاردا عەمبار بکرێ؟ دەشڵێت: ئەگەر کەمتەرخەمەکان سزانەدرێن، ئەوا رووداوی لەوە گەورەتریش روودەدا و هەزاران کەس تیایدا دەبنە قوربانیی بێخەمی دەسەڵاتداران و دونیای دەرەوە ناتوانێت سزای دەسەڵاتی سیاسی و حکومی لوبنان بدات، بەڵکو خەڵکەکە خۆیان دەبێت مشووری خۆیان بخۆن.

فرانکفۆرتە ئەلگێماینە زایتۆنگ بە هەمان شێوە دەڵیت: سەرکردایەتیی سیاسی لوبنان باش دەزانێت کە ئەو هەموو تۆنە لە نیتراتی ئەمۆنیۆم چەند مەترسیدارە و رەوا نییە ئەو هەموو ساڵە لە بەندەری بەیروت هەڵبگیرێت، ئەو کارەساتە مرۆییەی روویدا، تاوانەکەی لە ئەستۆی چینی دەسەڵاتدارە، کە ژیانی کۆمەڵگەی لوبنانیان خستۆتە مەترسییەوە.

لوبنان بۆنی شەڕی ناوخۆی لێدێت
رۆژنامەی بادیشە زایتۆنگ لە پەرەگرافی راپۆرتێکیدا نووسیویەتی: ئەوەی ئێستا لە لوبنان دەگوزەرێت، بە راستی کارەساتە، سەرەڕای هەژاری و کەمدەرامەتیی خەڵک و بوونی ژمارەیەکی زۆری توشبووانی کۆرۆنا، لە کەمتەرخەمیی دەسەڵاتدا ئەو کارەساتەیان بەسەرداهات.

ئەم رووداوە تێپەڕ نابێت
کۆڵنەر شتادئەنزایگە نووسیویەتی: ناوچەی رۆژهەڵاتی ناوەڕاست پارچەیەکە لە ئاگر، شەڕی سوریا و یەمەن و لیبیا و ململانێی نێوان ئێران و سعودیە و ئیسرائیل و میسر و تورکیا لە ناو خاکی وڵاتاندا، بوونەتە سیمای شەڕ و شۆڕ و کارەساتی بەردەوام و لە ناو لوبنانیشدا ململانێی ئیسرائیل دەکرێت، کە بۆتە نەهامەتی بۆ خەڵکەکەی و ڤایرۆسی کۆرۆنا و روودانی ئەو تەقینەوەیەش هێندەی تر باری ژیان و گوزەرانی لوبنانییەکانی سەخت کردووە.

رۆژنامەکە پێیوایە، کە ئەو رووداوە وا بە سانایی تێپەڕ نابێت و خۆپیشاندان و ناڕەزایەتی لێدەکەوێتەوە، خەم و پەژارەی خەڵکی لوبنان دەبێتە توڕەیی و بە رووی دەسەڵاتدا دەتەقێتەوە.

ئەو رۆژنامەیە لە پەرەگرافێکی تردا باسی لەرە کردووە، کە لوبنان پێویستی بە ئارامی هەمیشەیی هەیە و خەڵکەکەی ماندووی دەستی سیاسییەکانن.

تۆڵە لە دەسەڵات دەکەنەوە
گۆڤاری فۆکۆس لە راپۆرتێکیدا دیداری لەگەڵ نۆبەرت گێبێکن پسپۆڕی مادە کیمیاییەکان لە بنکەی توێژینەوەی RISK لە شاری میونشن کردووە و ئەو شارەزایە دەڵێت: کارەساتی تەقینەوە بە نیتراتی ئەمۆنیۆم زۆر لە مێژە رووینەداوە، ساڵی 1921 لە ئەڵمانیا تەقینەوەیەک لە کۆگایەکی کۆمپانیای BASF روویدا و 561 کەس بەهۆیەوە گیانیان لەدەستدا، لە دوای ئەمەوە، ئەوە یەکەمجارە لە بەیروت روویداوە، چونکە لەوساوە جیهان دەزانێت ئەو مادەیە چەند کاریگەر و مەترسیدارە و هەڵگرتنی پێویستیی بە شوێنێکی گونجاو و دوور لە دانیشتووان هەیە.

هەر لە راپۆرتەکەدا، چاودێرێکی سیاسی وایدەبینێت کە سیاسییەکانی لوبنان بێئاگا نین و باش دەزانن کە ئەو عەمبارکردنە هەڵەیەکی کوشندەیە لەم شوێنەدا، بەڵام کەمتەرخەمی و گوێنەدانیان بە ژیانی خەڵک، وایکرد ئەم کارەساتە مرۆییەی لێبکەوێتەوە.

کەناڵی تەلەفزیۆنی NTV لە ریپۆرتاژێکیدا لەگەڵ چەند چاودێرێکی سیاسی، بە گشتی پێیان وابوو کە کێشەی ئەو وڵاتە و سەرهەڵدانی قەیران و ئاڵۆزی و پشێوی و کارەساتەکان لە ئەستۆی پارتە سیاسییەکاندایە، بە تایبەتیش ئەوانەی دەسەڵات، چونکە مەسەلەی کۆگاکردن و شاردنەوەی ئەو جۆرە مادە کیمیاییانە کاری هاووڵاتیان نییە، بەڵکو ئەوە حکومەتە کە سەرپەرشتیکار و بڕیاردەری ئەم کاروبارانەیە.

سەرچاوە : کەناڵەکانی میدیای ئەڵمانیا

print

 213 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*