سەرەکی » وتار » نه‌وزادى موهه‌ندیس‌ » حكومەتی هەرێم لە دووڕییانێكی چارەنووسسازدا

حكومەتی هەرێم لە دووڕییانێكی چارەنووسسازدا

حكومەتی هەرێمی كوردستان و بەتایبەتیش ئەم كابینەیەی ئێستا لە دۆخێكی سیاسی و ئابووریی و تەندروستی و پەروەردەیی و …هتد نەخوازراودایە و لە ئەنجامی كەڵەكەبوونی كێشە و گرفتەكانی 17 ساڵی رابردووی لەگەڵ عیراق و لەلایەكی تریشەوە بەهۆی ململانێ سیاسی و حزبییە تەسك و بێزراوەكانی ناو هەرێمی كوردستان و بەتایبەتیش لە نێوان هەرسێ‌ لایەنی پێكهێنەری ئەم كابینەیەدا ((پارتی و یەكێتی و گۆڕان)). بۆیە ئەم هۆكارانە كاریگەرییەكی توند و خرپیان كردۆتە سەر ئەداو كارنامە و ئیشوكارەكانی حكومەت و هێندەی تر لاوازو بێزراویشی كردوە لەبەردەم حكومەتی بەغدا و شەقامی كوردیشدا كە چارەنووسەكەی وەك دەڵێن كەوتۆتە سەر دەستی عفریت و هەندێک پێشبینی ئەوە دەكەن كە ئەگەری هەیە نەتوانێت تەمەنی ئاسایی خۆی تەواو بکات بەهۆی:

*نەبوونی متمانەی تەواو لە نێوان هەرسێ‌ لایەنەكەدا بەیەكتریی.

*جێبەجێنەكردنی رێكەوتنە سیاسییەكانی نێوانیان وەكو خۆی.

*جیاوازیی لە بیروبۆچوون و بەرنامەیاندا بۆ ئیدارەدانی حكومەت و چۆنێتی حوكمڕانی و چارەسەری قەیرانەكان.

*هەستكردن بۆ خۆسەپاندنی بڕیار و هەژموونی لایەنێكی سەرەكی حكومەت بەسەر رێڕەو و سیاسەتی گشتیی حكومەتدا.

بۆیە ئێستا حكومەتی هەرێم كەوتۆتە سەر دووڕیانێكی چارەنوسساز، بەوەی یان دەبێت دەست بكات بە پڕۆسەیەكی چاكسازیی بێ كەموكوڕی و چاوپۆشی نەكات لە هیچ كەسو لایەنێكی گەندەڵكار و بكەوێتە خۆ بۆ كۆكردنەوەی تەواوی داهاتەكانی لە گەنجینەی حكومەت و بە شەفافانە مامەڵەی لەگەڵدا بكات و خەرجییەكانیش روون و ئاشكرا بێت و هەرچی كردووە سەرچاوەی داهاتەكانی حكومەت كە بریتین لە نەوت و گومرگ و باج و رسوماتە ناوخۆییەكان، كۆنتڕۆڵی تەواویان بكات و چاكسازیش لە ئۆرگانەكانیدا بكات، بۆئەوەی بتوانێت مانگانە مووچەی فەرمانبەران بدات و پڕۆژە خزمەتگوزارییەكان ببوژێنێتەوە و وەک پێویست پێشكەش بە هاووڵاتیانی بكات و وڵاتیش ئاوەدان بكاتەوە و بازاڕ و ئابووریش ببوژێنێتەوە.

یان دەبێت حكومەتی هەرێم نەتوانین و بێتوانایی خۆی رابگەیەنێت لە چارەسەری قەیرانەكان و خۆی هەڵبوەشێنێتەوە و كاربكرێت بۆ هەڵبژاردنێکی پێشوەختە.

دیارە هەردوو بژاردەكە ئاسان نین و سەختن، بەڵام دەكرێت هەنگاویان بۆ بنرێت، بەتایبەتی لە بواری چاكسازیی و شەفافییەتی داهات و خەرجییەكان و رێكخستنەوەی مووچە و بودجەی ساڵانە، ئەویش بە رێكەوتن دەبێت لەگەڵ بەغدا دوور لە موزایەدەی سیاسی بەسەر یەكتریدا و فرۆشتنەوەی كوردایەتیش بە یەكتری، چونكە تا ئەوكاتەی هەرێم بەشێك بێت لە دەوڵەتی عیراقی فیدراڵ، هەم ئەركی لە ئەستۆدایە و هەم مافیشی هەیە، بۆیە دەبێت لەلایەك ئەركە یاسایی و دەستوورییەكانی جێبەجێ بكات و لەولاشەوە مكوڕبێت لەسەر داواكاریی و ماف و شایستە دارایی و سیاسی و ئەمنی و زەمینییەکانی لە بەرامبەر دەوڵەتی عیراقدا، چونكە هەر بەغدا قووڵایی پەیوەندیی و رێكەوتنەكانی هەرێمە نەك ئەنقەرە و تاران و دیمەشق و پایتەختەكانی دیکە، بۆیە واپێویست دەکات حكومەتی هەرێم بۆ بەردەوامبوونی تەمەن و مانەوەی ئەم قەوارە سیاسییە دەستوورییەی هەرێم کە هەیە، هەرچی دەكرێت و دەتوانرێت بەدەستبهێنرێت هەنگاوی جدیی بۆ بنێت و خەمسارد و بێ‌ خەم نەبێت، چونكە شەقامی كوردی ئێستا زۆر تووڕە و زویر و ناڕازیی و بێئومێدە لەم کابینەیە، بەتایبەتیش كاتێك هەنگاوەكانی مستەفا كازمی دەبینێت لە عیراقدا بە ئاڕاستەی خزمەتكردنی هاووڵاتیان و نەهێشتنی گەندەڵی و بچووكردنەوەی رۆڵی سەركردە و حزب و میلیشیا چەكدارەكان و قۆرخكاریی و ..هتد.

بۆیە حكومەتی هەرێمی كوردستان و ئەم كابینەیە تەنها و تەنها بە گرتنەبەری سیاسەتی شەفافییەت لە هەموو كەرت و بوارەكاندا و بە رۆنانەوە و بووژاندنەوەی متمانەی جەماوەر بەكار و كردەوەكانی دەتوانێت خۆی دەرباز بكات لە تووڕەیی شەقام و هاووڵاتیان، جا ئەو وتە عەرەبییەی كە دەڵێت (( اذا صلح القائد، فلن یجرا احد علی الفساد)) زۆر پڕ مانایە بۆ ئەم دۆخ و ساتە هەستیار و مەترسیدارەی حكومەتی هەرێمی كوردستان.

 485 جار بینراوە